MartyChung的个人专页

終於知道點解呢間粥麵店未到十二點已經爆滿，因為真係幾好食。要坐到最入嘅位置，都好嘅，無咁多人環境靜啲。唔晒諗即刻叫咗碗雲吞麵，蝦同肉嘅比例啱啱好，一啖一粒，皮夠薄，唔錯！麵無梘水味，湯用最傳統嘅做法——大地魚湯，好鮮甜。加埋一的話70幾蚊，其實又唔算貴，好食咪得囉，食碗拉麵都唔止呢個價啦。朋友就叫牛肉撈麵，好搞笑，佢話因為貪佢唔熱，天氣熱唔想食湯麵。牛有口感有牛味，我無食到，唔知個湯係咪一樣呢？最後叫多個菜苗餃，一籠四粒，我口細分兩啖食，都足料。最意想不到係杯豆漿，豆味濃一啲都唔甜，睇嚟下次要試埋正斗啲糖水。…查看更多

喺圓方睇完戲時間尚早，趁正斗未有人排隊就入去食個雲吞麵。其實之前喺跑馬地已經食過，覺得唔錯，今日同個friend再食。雲吞麵一如既往好食，估唔到間間分店出品一樣咁有水準。之後再叫咗個南乳豬手撈麵，嘩！啲豬手好好食，炆得淋仲好入味，同埋舊舊都好多肉，肥瘦比例剛剛好，南乳味唔會太濃蓋過豬肉嘅味道，揀撈麵嘅好處就係乾食又得，連湯食又得，得咗！而今次推介係豬膶腸粉！！！！入口勁香，未食過咁好食嘅內臟，而且個皮唔係好厚嗰種，總之就係正啦！…查看更多

落機好肚餓，掛住廣東菜，見到雲吞麵專家何洪記就入去試試。門口侍應好好人，見我哋車住兩個喼，幫我哋安排推去隔離巷仔，咁就唔會阻到人喇。以為喺機場食嘢價錢會好離地，但何洪記又唔算貴喎，幾十蚊碗雲吞麵算係咁。眼見食客普偏都係叫雲吞麵、燒味飯同點心，咁我又叫下囉。雲吞麵味道唔錯，份量都剛剛好，湯味濃、麵彈牙、雲吞鮮，十分高質。燒味飯我揀咗油雞飯，飯無一pat pat，仲要係我最鍾意嘅雞胸肉，好滑好滑，一定好食過太ｘ！最後食咗個燒賣，不過不失啦。見隔離枱兩個人叫咗乾炒牛河、切雞飯、油菜再加碟燒腩仔，兩個人晒唔晒食咁多呀？btw下次試下乾炒牛河，望落都好似唔錯。yummy~…查看更多

去泰國5日，臨走前想食返啲廣東味道，你知啦，去到泰國就餐餐海南雞飯喇。雲吞麵、瑤柱蛋白炒飯、五柳炸雲吞。今次真係咬開一半睇下粒雲吞入面有咩，咪就係有蝦同肉囉~ 哈哈哈。好想知點解啲蝦咁鮮，因為我好鍾意食蝦，蝦蝦蝦。瑤柱蛋白炒飯炒得好好味，啲飯無痴埋一舊舊，菜粒都好均勻，每啖都食到菜粒、瑤柱同蛋白。最後係五柳炸雲吞，即叫即炸，同佢皮唔係春卷皮，唔知道啲雲吞係咪同雲吞麵嗰啲一樣呢？五柳醬偏甜，食落都幾惹味。值得一讚係出餐算快，趕上機都可以快速醫個肚先~…查看更多

喺又一城血拼完，無理由去食food court咁頹，個friend又話鍾意食雲吞麵，於是就去咗正斗，貪佢夠舒服，可以同朋友坐下傾下計。三個女人一個墟，叫咗碗雲吞麵、蛋煎蝦米腸同福州炒飯。開頭諗住嗌多碗粥，但好彩臨崖勒馬，如果唔係就會做大嘥鬼，無諗過啲嘢咁大碟。個friend大讚話正斗碗雲吞麵係佢食過最好食嘅雲吞麵。首先啲雲吞喺麵嘅下面，應該係唔想啲麵浸得太淋，係傳統嘅做法。而細細粒嘅雲吞先係正宗，一啖一粒。佢仲話啲雲吞入面嘅蝦好鮮，食得出有香油味。佢連碗湯都飲埋，我諗真係好好食。。。我就最欣賞個福州炒飯，好足料，最鍾意嗰啲瑤柱絲同冬菇粒，個飯底一啲都唔hea，應該用靚雞蛋去炒，有蛋香味又金黃。百三蚊咁大碟真係抵，酒樓都係咁上下價位但無咁出色～蛋煎蝦米腸喺出面少見，由於佢係圓形，我哋就當佢pizza咁砌，哈哈。都幾特別，無諗過蝦米腸同蛋都夾到。…查看更多

朝早開完會，見有啲時間，嘆個lunch。行到去海濱，見到一間白色貨櫃咁嘅物體，原來係餐廳，見SET LUNCH價錢唔貴就試下。本身諗住坐出面，但要BOOK，咁就坐入面啦。環境都算舒服，叫咗個SET LUNCH，就有啲失望。勁HEA，好似IKEA啲餐咁，見到都唔開胃，個意粉係想點？HEA到咁我不如去食大快活。個魚似翻熱，一啲都唔好食。甜品都無誠意，好明顯係訂返嚟。呢一餐完全浪費咗個景，個VIEW幾靚都無用。…查看更多

自己唔係韓國FANS，但個FRIEND好鍾意韓國嘢，就陪佢食呢間hoo韓國包車。入到去好似去咗展覽咁花多眼亂，每個corner都係影相位，都算特別嘅，唔係嗰啲優雅港女打卡cafe，都有少少韓國feel。兩個人叫咗魚糕串串鍋、炸流心芝士豬扒同薯仔煎餅。魚糕串串鍋一路煲住，食到出汗，但味道唔錯呀，魚糕都幾彈牙。炸流心芝士豬扒外層炸粉唔厚，趁熱食仲有拉絲，充滿罪惡感。而薯仔煎餅我自己幾鍾意食，唔食薯餅又唔似薯條，好似煎蘿蔔糕，不過係薯仔版，仲配上酸酸辣辣嘅醬汁，唔錯唔錯。…查看更多

今日去開跑馬地搵個friend順便食個晏，見到呢間正斗榮獲2023年米芝蓮推介，仲要係連續十五年喎，就試下佢有幾巴閉。兩個人叫咗碗大雲吞麵、乾炒牛河、炸兩同桑寄生蛋茶，好飽好滿足。雲吞麵：雲吞在哪？原來在最底，每粒大小一致，剛好一啖一粒，蝦味極鮮。因為太好味，成粒擺落口，完全無咬開過睇下入面有咩料。而麵質都算彈牙，無鹼水味，實在難得。乾炒牛河：食乾炒牛河最怕佢太油，但正斗呢碟望落少少油，但食落無油膩感。同埋無舊牛肉都好滑有牛味，正~炸兩：喜出望外，可能上星期食過炸兩，有比較有傷害，正斗個炸兩係超級好味！！！個樣似係啱啱炸起，好脆，皮唔厚，個豉油要讚，一倒出嚟已經聞到嗰種鮮味，令到成個炸兩提升咗。桑寄生蛋茶：連款經典糖水唔係度度都有得食，正斗呢碗微甜得嚟又有茶嘅回甘味，水準非常高。總括嚟講，正斗都幾高質呀，成日見啲食評話服務態度差，又唔多覺喎，我話冷氣太凍姐姐都幫我換位，仲唔晒自己酙茶，以食雲吞麵嚟講係一個好好嘅體驗。…查看更多

疫情之前已經食過幾次，環境算係咁啦以呢個價錢，不過飲品無得任飲就唔係咁好。疫情之下夜晚無得堂食唯有叫外賣自取，啲食材好得，好新鮮同洗得好乾淨。200蚊好抵食。不過呢，佢最唔好嘅地方就係拎返屋企嗰下麻煩，就算係男仔拎都覺得辛苦，何況女士呢？所有嘢分咗兩個袋only，可能我十人份量啦，真係太重太重太重。…查看更多