LemonLemonGirl的个人专页

呢間拉麵店喺尖沙咀K11 Musea開嗰陣已經想試，而家沙田都有分店，喺正我樓下仲使諗嘅。聽聞日本店係米芝蓮餐廳，咁第一次就試吓佢嘅招牌「多賀野醬油拉麵」啦。食拉麵之前飲啖湯先，係走清淡路線嘅味道，有淡淡鰹魚香，又有雞湯微鹹，加埋醬油味，層次豐富但又唔會好重口味。同平時食開濃郁嘅豬骨湯拉麵有另一番風味，鍾意清淡口味拉麵嘅朋友仔會鍾意。之後試個麵，呢度餐牌冇得揀軟硬度，但我覺得個硬度係適中嘅。麵身偏幼，口感都煙韌，仲有少少麥香味，幾好。拉麵仲有兩塊大叉燒係最驚喜，真係超大塊，肥瘦適中，咬落好鬆化，唔係好柴或者成口油，女仔都啱食。仲點咗個蝦小食，份量以小食嚟講都ok，啲蝦唔會炸得太乾太油，脆卜卜咁送酒一流。呢餐都幾好食，不負米芝蓮餐廳之名，下次會再嚟試佢哋嘅沾麵。…查看更多

早幾日同班朋友一齊放假，行K11 Musea發現開咗間新餐廳，見佢裝修幾特別就入咗去試。成間舖頭設計到好似洞穴咁，有少少波希米亞feel，打卡一流，放社交平台未必知係一間餐廳添。下午茶時間見唔係幾肚餓，每人點咗杯嘢飲同甜品就算。呢度除咗有酒精飲品外，估唔到仲有mockail，啱晒中午唔想飲酒嘅我。杯嘢飲都幾fresh，唔會太甜。仲有一個烏龍茶味panna cotta，估唔到又會咁夾，烏龍茶味好出，唔算太甜。間餐廳啲位幾闊，幾個女仔坐得好舒服。好似仲有兩個類似VIP房，如果多人嚟就更加有私隱。我哋幾個人飲吓嘢，食吓甜品咁就過咗一個下午，想消磨時間或者打卡都好合適。…查看更多