foodiecaca's Profile

我應承過屋企人每個月食一次火鍋，今個月我做到啦！終於我們一行４人嚟到一鍋豐；座落旺角創興廣場，位於18樓，餐廳面積非常大，座位非常寬闊，比起其他火鍋店更加乾淨。我地㨂咗個鮑魚海鮮套餐，一黎包海鮮拼盤，二黎任簡食物選擇多！海鮮拼盤好大份，有鮑魚丶大扇貝丶帶子丶生蠔同東風螺，賣相吸引，味道鮮美，重點係好新鮮冇沙，爽口，東風螺都好大隻，大扇貝係最我鍾意嘅海鮮，好鮮甜，而且大大隻。每人$218竟然有咁豐富嘅海鮮食，絕對抵讚。我地就揀左鮮茄蜆湯，湯底都好多材料，蜆同蕃茄都足料，好鮮甜！除咗本身包既鮑魚海鮮之外，仲可以自己選擇好多材料，肉類方面，叫咗美國牛肩肉眼、美國三角肥牛、鮮滑牛肉、黑豚肉片、雞翼和豬頸肉，Ｄ肥牛牛味濃，油脂分布均勻；黑豚肉唔肥和滑牛肉非常嫩滑爽口；豬大腸完全唔肥和豬粉腸冇苦味，仲有order唔同丸類，自己就好鍾意墨魚滑、手打墨魚丸同蝦丸都不錯，因為我去好多火鍋店都冇手打丸類，值得一讚。雲吞是眾多餃中最好味，大大隻蝦肉，食了好幾隻，芝士豆腐很特別和重口味，還有脆口炸魚皮和魚皮餃也是我的最愛，仲有菜，響鈴，出前一丁都有得叫，仲要有好多甜品，可以喺雪糕櫃任選，我最喜歡紅豆雪糕，出面都未必食到。整體黎講，餐廳環境舒適，食物質素良好，簡直物超所值。…Read More

​今天是星期天，四位雀友打完麻雀後，有人提議去食火鍋，有位老友住係太子附近，知道太子地鐵站附近有間叫”火薈中日火鍋“打邊爐唔錯，聽老友講，呢一間鋪頭，食物質素好新鮮；我地大約六點半便到達這間鋪頭，時間尚早，人唔太多，店內環境都幾寬敞舒適，坐位間隔空間感都足夠，坐低後，店員就俾左盒調味配料我地自行混醬。​老友就指吓個套餐俾我睇，鮑魚龍蝦餐$298一位，個餐包括有龍蝦、鮑魚、元貝、、三寶丸、鱔片、廣島蠔、雜菜籃、稻庭烏冬同埋安格斯牛，仲送湯底和一罐可樂，價錢十分超值，但要記得鮑魚龍蝦餐逢星期五、六暫停供應。最後我們order了兩個鮑魚龍蝦餐及雙拼餃、脆皮芝士腸、即炸響鈴、馬鈴薯及辛辣麵等。​今次我就嗌左鮮茄薯仔湯底（鮑魚龍蝦餐送既），Ｄ湯底送到黎係超濃，好香、好正！先試安格斯牛，超好味喎，有牛味又唔韌；波士頓龍蝦超大隻，非常新鮮，淥幾分鐘龍蝦身就食得，但隻龍蝦鉗就要淥耐Ｄ，因Size都好大，龍蝦非常鮮甜又多肉，正呀！鮑魚及元貝都很大隻及新鮮，Ｄ肉唔韌、爽口及好鮮甜；三寶丸和雙拼餃都好正，粒粒都好大粒，當中我最鍾意墨魚丸，足料新鮮彈牙，係街市買唔到的，真係諗起都想再去食；鱔片肥美，淥熟了非常爽口，正！廣島蠔又係好大隻，食落口一d鯹味都冇。​呢度食物花款好多，總之樣樣都好好食。…Read More

五姨媽同表姐提早喺今晚同媽咪慶祝生日！我們揀咗去旺角瓊華中心嘅至尊滿屋到食晚市放題🤤一開始我們就當然叫咗個雜錦刺身拼盤嚟食先啦，一上碟嗰陣我們都嘩咗出嚟，因除咗刺身嘅款式多之外，樣樣嘢都非常新鮮呀！刺身有我最中意食既甜蝦同三文魚，甜蝦幾生鮮同埋幾大隻，而三文魚系厚切既，而且凍冰冰好正，而三文魚既質素，encore好味過第一次落單，因為第二次既三文魚較為肥美，肥既比例多少少，反而有返啲口感。北寄貝嘅味道除咗有北寄貝本身嘅鮮味之外，仲有微微嘅甜味！饅魚嘅味道都幾鮮甜同香口，唔會有腥同泥嘅味道！我地仲叫左啲炸物, 一黎到睇落好細件，原來係因爲佢既炸粉少，而且外表都幾白淨，證明佢啲油都幾乾淨呀！仲有叫咗芝麻雞翼，烤羊架同燒五花腩，外脆內軟，而且熱辣辣，即叫即做, 正呀！仲有牛舌、芝士焗壕同炸鮮魷等等，都非常好食！ 至於甜品方面除咗有基本每人一杯哈根達斯雪糕之外，仲有芝士蛋糕、泡芙、奶凍等等，啱晒最鍾意食甜品嘅我地！…Read More

十月中一位老友喺賭波嗰度贏咗錢，我地就決定揀食日本嘢去害一害(賀一賀)佢haha，今次我地總共有四個人，懷住興奮愉悅嘅心情，去咗觀塘極尚大瀛喜食夜晚時段嘅放題，揀呢間係因為佢都有一個瀛字呀，夠哂應景！星期六晩都係每人$210加一，呢個價錢簡直冇得輸呀！我地一坐底就走咗去設有自助形式嘅地方拎嘢食，當中有好多美味嘅甜品同凍食，嗰啲前菜嘅八爪魚非常爽口，有一款白色嘅奶凍口感非常嫩滑，值得一提嘅係嗰度竟然有雀巢嘅脆皮雪條，當晚我食咗兩枝呢！跟住我地叫咗一個刺身拼盤，當中有三文魚、象拨蚌、帶子、鮑片等等，每一種刺身都非常新鮮甜美，特別係北寄貝，真係非常彈牙爽口，看地仲encore咗兩次添！嗰度啲蟹粥都非常鮮甜，再加埋粟米粒，簡直天衣無縫，我地每人都食咗一大碗呢！除此之外，仲有芝麻雞翼、烤羊架、炒豬頸肉同牛肉粒，都非常好食，當中嘅東風螺我地仲encore咗幾次，肉質鮮甜爽口一啲沙都冇，值得推介呀！…Read More

九月開學啦，mentor話要請我地食飯，派過3爆4利是俾我地，有啲咁好意頭嘅嘢收，就梗係即刻拿拿臨揾吓有啲咩好嘢食啦！因為mentor平日要返工，就只好揀假期食，上openrice search吓，就俾我地見到呢間嘅放題評價唔錯，一於就打電話book位！大家記得假日嚟食嗰陣一定要book位，因為個場都幾爆吓㗎！一嚟到，就安排咗我地坐窗口位，景色開揚，胃口都好啲啦！放題嘅重頭戲就當然係刺身啦！我地差唔多叫哂所有刺身嚟個大包圍，啲刺身鮮甜，冇雪味，睇得出啲刺身唔會話擺咗好耐，好新鮮有誠意！之後我地又叫咗啲熱食，我地最鐘意嘅係羊架同燒骨！肉質juicy唔乾，啲汁俾得好闊綽，非常惹味呀，我地都encore咗幾次！放題結尾就梗係唔少得甜品啦，甜品選擇非常多，除咗可以自己出去攞唔同牌子嘅雪條，仲可剔紙仔叫甜品！今次食得好滿足，mentor都話正！…Read More

呢間餐廳唔貴又好食，已經成為咗我同屋企人嘅飯堂啦，平時決定唔到食咩或者屋企冇煮飯嘅話都會嚟呢度食飯haha我地最常叫嘅就係焗豬扒飯，我地一致認為呢度嘅焗豬扒飯好食過其他嘅連鎖大集團，咩大家樂、大快活嗰啲。啲豬扒夠腍唔乾，同埋啲飯好多汁夠送飯，仲有芝士喺面，夠惹味，好食…Read More

其實好少去元朗㗎，不過媽咪心血來潮想去行街，就陪佢去元朗啦呢間餐廳係朋友介紹嘅，佢話唔算貴，又好食，地方闊落又舒服，咁帶同媽咪一齊嚟咗呢間餐廳食晏我地叫咗個炒河同豬頸肉飯，等咗冇幾耐就有得食，好快手吓首先講吓個炒河先，好夠鑊氣同惹味，好好食 啲河粉唔會太油同埋炒得好，冇一pat pat咁，正不過裏面啲一齊炒嘅肉就麻麻地，冇咩味:(至於個豬頸肉飯，不過不失嘅，不過啲豬頸肉嘅味都係差少少，唔知係咪餣唔切啲肉呢不過，呢間餐廳食物嘅份量算多，我同媽咪食飽都有剩，就打包拎返屋企…Read More

今日無端端夜晚要上堂，仲要上到九點半喎，咁就揾吓學校附近有啲咩食啦。search一search，就見到好多傳媒介紹呢間新開幕嘅煎餅舖，睇啲相個樣都唔錯，又近近地，就決定食呢間當晩餐啦去到大概六點鐘到，嘩，超多人排緊隊俾錢同等拎嘢食，嗱嗱臨決定好食咩就快快手俾錢先。咁就叫咗個孜然羊肉煎餅，35蚊，淨係俾錢都等咗10分鐘，俾錢嗰陣問要等幾耐，佢話要等20分鐘結果，等咗半個鐘!講噃個餅先，孜然味幾香，羊肉唔太so，即叫即整熱辣辣幾好食不過裏面有超多香莞茜，唔食得嘅話就叫第二啲款啦。仲有，其實一個餅唔太飽，女仔還好，男仔一定唔夠食啦…Read More

記得第一年入poly讀書，就要喺被人稱為孤島嘅z core讀書，嗰陣啲師兄師姐已經同我地講z can好難食，選擇少、啲嘢食凍嘅真係寧願行多幾步路出去食都唔想喺z can食不過！隔咗幾年之後，舊z can已經執咗啦！變咗一間全新嘅z can，好過以前嗰間好多添！雖然佢嘅價錢對比起新舊can係貴啲，不過勝在款式新穎，日日不同，唔似得新舊can日日都係嗰啲款今日叫咗個單餸飯，28蚊連熱飲，有五至六個款可以揀，我就要咗川椒雞球，辣辣地嘅惹味，不過唔知點解要加油炸鬼落去，可能早餐賣唔哂？總括嚟講，喺z core上堂嘅同學仔有多個選擇！…Read More

今日放學，同學仔話好想食米線，經過呢間川粵米線，見到夜晚嘅價錢同同區比較真係好經濟，都係三十幾至四十幾蚊包嘢飲，啲相又影到幾吸引，就決定喺呢間度買外賣返學校食啦。我就叫咗二餸麵，33蚊外賣加1蚊，揀咗貢丸同川粵炸醬，麻辣微辣，同米線。其實餸都有差唔多二十款可以揀，湯有得揀麻辣或者酸辣，麵就有得揀米線或者紅薯粉。因為叫外賣嘅關系，湯同麵係分開上嘅，都好貼心吓，唔使驚啲麵浸淋哂。貢丸唔係啲麵粉丸，有冬菇粒彈牙幾好食，炸醬有啲辣同埋我覺得少咗啲，米線就正常唔淋ok嘅…Read More