siuchuentze的个人专页

下午同同事去飲茶，坐低冇耐就話有燒鵝，同佢講等人齊先再决定，咁坐咗一陣，有個阿姐每人放低一張唔知乜劵俾每人，問佢係乜佢話係月餅，我問佢係咪送ga, 佢依依哦哦，咁我朋友問佢咪即係要我哋買佢d月餅卷，佢到嗰時先話係，咁我同佢講，不如我哋飲完茶先啦，但佢仲死，係都要我俾個答案佢，我好斬釘截鐵同佢講唔買，佢先肯行開，坐多十分鐘後，又一個經理行埋嚟又問。唉。。飲餐茶jei, 好似去咗傳銷埸咁。唔洗問呢間酒樓要員工孭quota啦，搞到d員工西口西面，茶客食嘢仲要被人sell嘢，呢個集團d酒樓都係少去為妙。…查看更多

呢間有年幾冇去過, 最唔鐘意食緊中途搬個客走俾位其他客, 食到好似走鬼咁, 新年流流食早餐又冇乜選擇下都要食, 預咗收貴啲, 坐低望住個餐牌套餐冇晒, 祇見雙併麵36蚊, 麵包加1蚊, 廚房嘢一律加10蚊, 最克制都係飲品, 冇加價, 但唔好開心住, 成張單要加10%, 叫咗碗餐牛面, 菠蘿包同一杯奶茶, 食完埋單盛惠69蚊, 平時食呢Ｄ都係大約40蚊, 足足貴咗50%有多, 值唔值得就見仁見智, 但我就覺得唔值同埋生意唔係咁做, 有得選擇的話呢間都唔會再諗…查看更多

好耐冇去, 下午趁冬天唔太熱走上去舊地重遊, 叫咗個牛腩鳳爪麵, 鳳瓜係用古法製造, 相信冇邊間同樣製作, 鳳爪先炸過再用花椒八角等調味, 製成品入口皮肉分離, 正正就係幾十年前酒樓點心嗰種, 同現在食嘅鳳爪有天淵之別, 做法同水準依然幾十年一樣, 好難得, 牛腩就一般, 冇乜大特別, 上海麵個麵質依然煙靭, 唯獨是份量比較細, 食完碗麵要落樓下買多個麵包, 幾十年始終如一, 江記, 請繼續努力為我哋保留兒時回憶.…查看更多

之前食過一次頗有驚喜, 除夕再食, 叫咗個招牌生炒骨, 頗能保持水準, 但今次瘦肉多, 食落比較嚡, 到個豬膶浸苟杞, 豬膶'啤'水啤得太耐, 咬落好似食發泡膠, 即時扣晒分, 琵琶豆腐好食, 水準keep 得住, 仲有半隻鹽焗雞, 淨係皮有鹽香, 雞肉冇味, 同檯朋友都擰晒頭, 聽聞灣仔舖已比中環舖好, 但今次食就比較失望, 同一間舖都咁參差, 遲Ｄ有機會再食多次, 再好似今次咁就可以去少一間.…查看更多

今晚慕名而至, 先點一碟叉燒, 上檯頗有睇頭¸ 頭同尾都還可以, 但食到中間成嚿廋肉, 雖則頗稔, 但祇係一嚿外面燒過有蜜糖味嘅廋肉, 其餘兩個前菜海蜇頭同素鵝偏淡但還可以.叫咗四個熱盤, 先到半隻燒鷄, 上檯祇見到一隻比春鷄大Ｄ, 都算嘞, 食落都ok, 等多半個鐘, 未到嗰三個熱盤依然未到, 催咗三次依然失蹤, 最後唯有埋單, 單到check單, 未到嗰三個有一個take out, 有兩個計埋錢, 真係冇眼睇, 個經理sorry前sorry後但於事無補, 經理解釋今日好多人, 但我眼望都祇係九成檯, 壓力測試完全肥佬.明白開新檔要磨合, 但好明顯樓面同廚房冇溝通, 還好呢餐同Ｄ老死朋友食, 如果同客食真係多謝晒, 都唔敢有下次. 又多一間唔會再去嘅食肆…查看更多