charlotte lauuu的个人专页

成日行經呢間野都無入過去，今日咁岩要去pop corn就一於試試佢！將軍澳台式餐廳唔多，呢間算係中上既質素。我點左原汁牛肉麵，揀左幼麵。呢間有個特別之處係成碗麵你都可以自選，例如揀麵底，我揀左幼麵，至於配料既多少都隨你選擇，幾貼心。平時只係日本拉麵鋪見過呢種自選服務。個麵啲牛肉係牛腩咁既樣，咬落幾腍。啲牛係痴埋小小筋，有筋既部分好爽口。但有一兩舊有啲「孩」同痴牙，但整體唔錯。至於個麵不過不失，佢一開始有得揀腍度我揀左正常，出黎既效果真係好正常既一個麵。成個麵最正係個湯底，好清甜，又有啲牛味，下次會想試埋個白湯。順帶一提，佢啲酸菜原來係辣既，但都幾好食，唔會太酸，但唔食得辣既朋友要注意⚠️…查看更多

黎到呢度到就知一定要叫黑椒薯仔牛仔粒。薯仔有層蜜糖係面，甜得黎舊薯仔又炸過，好香脆，外脆內軟，牛柳粒相比之下就失色左，雖然都煮得幾腍又入哂黑椒味。呢碟野絕對唔係浪得虛名 隻雞唔係肥仔，唔會好肥好溜。雞皮薄得黎又炸到脆脆地，咬落啲雞汁咇哂出黎，高質。 因為之前已經食過薯仔，所以唔會覺得好特別，當然係好好食喇。但令我驚喜既反而係碟通菜，無諗過佢咁爽口，我係咁夾呢碟菜，仲要勁大碟大驚喜！ 作為鮮魷愛好者，呢個鮮魷係尊貴級既level。鮮魷夠新鮮，爽口彈牙，又唔會炸過頭，炸到岩岩好，勁香口，又係會係咁食既一碟餸。 相較之下碟拼盤就有啲失色，但水準仍比一般好，亮點係啲腎，超！級！爽！口！ 真心覺得比起肥姐啲腎仲爽。 一個字，鮮。 一望都知呢個係炸得好勁，好食但太熱氣，第二日喉嚨痛。粒粒蠔都有返咁上下大，又夠鮮，但下次會轉試桶蠔。 講明先，呢間絕對唔係食環境/服務，好岩一班佬黎邊食邊飲啤酒🍻但食物的話，可以話整體都好高水準，絕對值得食…查看更多

經常都係附近買早餐，食過營樂既晏就，好鐘意佢既咖哩，唔係好辣但超香濃，所以決定試下佢既早餐。佢既早餐選擇都幾多，比較特別既係台灣特色早餐，就係我今次揀既早餐。首先講講呢個奄列，實係太油，頂唔順要浸下湯洗洗啲油，我唔鐘意油腍腍既野，扣分。但點解我會俾四星？個兩條香腸大加分。咪望佢平平無奇，條腸肉味香濃，多肉汁，外皮脆，我超鐘意。 米粉超彈牙，唔知係咪台灣米粉既特色？仲要我遲左小小拎，都索左唔小湯，但個米粉仍然咁彈牙，加分。但最既係啲肉燥，好鐘意佢個肉燥味，香濃。 但杯咖啡就麻麻地，加加減減之後，我係會為左個米粉再食呢間。…查看更多

觀塘係我經常搵食既地方，今次一大班朋友去，諗住揀間環境舒適既地方坐下食下野。 可能因為我地太大班人又有啲嘈，女侍應一開始就對我地黑面，態度都幾差，不過我不嬲對服務無太大要求，最緊要食物。 由於本人係魷魚愛好者，基本上總知係魷魚我都會覺得好食。呢個都炸得幾好，係份量細啲。 呢個芝士年糕既size 超級的骰，目測直徑得4，5cm，似糯米滋既大細。憑良心講佢係好食，皮夠脆同入面腍腍地，但性價比太低，成$24一粒，絕對唔值。 我既評價係... 要食牛肉鍋不如去食吉野家，一樣size，吉野家仲要有烏冬，呢度只可以加飯（$15）。啲肉就比較「鞋」，粉絲彈牙，唔錯。但整體唔係幾抵食。 舊鰻魚煮到好腍，外皮微微燒到香脆，好食。但個飯黎到係凍既，我個人期望每碟食物上枱都係熱既，至少唔好係凍。呢度扣左唔小分。 呢個飯就熱返啲喇，個飯都幾乾身，但唔會話好好食。 呢個應該係全晚最好食既一碟，汁濃肉香，舊肉煮到好腍但又唔靭，好食但得勁小，十幾舊一口肉收成百蚊。 總括黎講，大食既朋友要諗清楚，叫一樣野就一定唔夠食。但公平小小講，佢係有二人餐提供，每人二百蚊度，但我地太多人無叫，可能二人餐會抵食啲喇。呢間坐低傾下計既話係唔錯既選擇，但我唔會因為食物推薦呢間。…查看更多

成日聽人講觀塘多好野食，但之前都中過唔小伏（不過個陣未開始寫食評），今次又膽粗粗試下新野，揀左呢個有好多讚既哈豆試下。 呢個就係好多人推薦既牛肉麵，果然啲牛肉夠哂腍又入味，個湯係飲得，夠哂香濃，令我有驚喜既係粒貢丸爽口彈牙仲有豬既香味，認真唔錯。唯一扣分位係蘿蔔唔甜仲要苦苦地，即使煮到入哂味都無補於是。但整體係一個好高分既麵。 作為一個撈麵我就覺得個麵腍左小小，但配麻醬就無得輸。鹹酥雞就好一般，唔會話好好食。 呢個香腸係今日VIP，岩岩炸起，個皮勁脆，入面啲肉汁好多，好香。我超鐘意呢個。 除左推薦香腸，其實杯哈豆鮮果茶好香果味，又唔會死甜，可惜無影到相。整體間餐廳我會俾幾高分，會再黎試下其他款。…查看更多

屋企人好鐘意食翠華，但次次都係食晚餐，因為最抵食，大概八十蚊有湯有野飲，雖然比起一般茶記呢個價係貴，但個紅湯好味，豬仔包又香脆，算係咁喇。但食到悶悶地，今次一於叫其他野試下！馬拉炒米 公正啲講，啲蝦就真係唔得架喇，不過六十幾蚊又點會俾新鮮蝦我，唔係梅到難食我都接受架喇。但個米炒得好好，夠乾身，料又多，辣辣地幾過癮。我唔知佢地叫咩名，但我個人就鐘意右邊個芥末醬多啲，唔係話好攻鼻個種，但幾香芥辣味，配個炒米食都幾夾。但我自己就鐘意唔沾醬，但沾醬都幾有特式，唔錯。胡椒豬手 胡椒味幾香，豬手爽口，似胡椒豬肚湯個隻味，中上既品質。黎得翠華食既都知呢個係貴價茶記，除左小量既餐，好多都係散叫品包野食，但炒野係值得推薦，至於值唔值就見人見志…查看更多

同朋友聚會，由於要就其中既朋友返工地點，又有人想食牛扒，一位識食之人就揀左呢個。睇睇介紹先知原來係天后個間既分店！之前都食過天后個間，高質，一於GOGOGO!天后個間係地鋪細好多，呢間係大廈上層，環境寬敞舒適仲有個幾靚既吧枱，可惜佢地無酒牌。餐湯又估唔到幾好飲，好濃茄味，啲菜又入哂味。我本身唔好沙律，但呢個我入到口，朋友鐘意食沙律，佢話啲菜好食。炸魚薯條，炸魚炸得岩岩好，唔油膩。雖然我好小食炸魚，但呢個我幾鐘意。佢啲魚好林，食到外脆內軟，加埋佢舊多汁既檸檬，整體配合得幾好。薯條就不嬲都好食，最勁既係佢就算凍左都仲好脆，無得輸。德州燒烤牛肉漢堡黎到食漢堡既地方一定叫漢堡，果然無令我失望。中間舊肉（唔好意思影唔到）多肉汁，好香牛味，麵包皮用特別處理過，外皮好香脆，但個包又好鬆軟，洋蔥圈又炸到岩岩好，大讚。西冷牛扒呢個扒勁，勁在個樣明明好好食，又好似煮到岩岩好咁（我地叫五成），但竟然係靭架！應該係舊肉唔靚，食漢堡既地方真係唔應該叫其他野食。豬鞍黎講，比一般差，唔夠嫩，比牛扒好食既，但我唔會推薦。都係個句，乖乖地叫返漢堡喇。*加分位雖然當日好多甜品都賣哂，我地book枱個陣又無講定想寫字，但侍應可以提供寫字服務，好貼心。啲套餐around 一百蚊包湯/沙律同野飲，比起天后個間抵食。另外漢堡同薯條係最好食，炸魚都唔差，其他唔好諗（由其扒類），乖乖地食漢堡！Ps 雖然餐廳唔多人，但係度訂枱有八折，抵。…查看更多

係OpenRice 見到咁多人like，自己都幾鐘意食台式野，有小小期望，就叫左朋友陪我試下。晚上七點鐘左右都不算太多人，一去到就有位。睇一睇menu，啲餸都偏貴，七八十蚊。但香港地，咩都貴架喇，都算可以接受。但啲餸黎到之後我就覺得好唔值，味道唔好，又細碟，唔明白點解咁多正評？呢個海鮮粉絲煲，首先得一隻男性手掌咁大既煲，份量好小，繼而得兩隻蝦同兩粒魷魚，啲粉絲唔彈牙，完全係失敗之作。無諗過呢個菜竟然係最好食，但係都係無蒜香味，又炒得唔夠林，佢好味只係因為菜本身夠好食，並唔係煮得好食。花雕雞都可算係經典，完全無花雕味。雞有十令舊，但好細舊，又係勁細碟，最神奇既地方係啲雞完全無味架！明明啲汁咁濃，但啲雞一啲都唔入味，雞又無雞味，大為失望。呢個仲得一驚，副圖同碟野完全唔同樣既？我真心以為黎錯，突登問多次侍應呢碟咩黎？又係得兩粒細魷魚同兩隻蝦，啲蝦仲要係苺架！救命，呢一碟真係好驚嚇最後我懷疑我地唔識叫，人地都係叫麵食多，都有人叫餸既，但都係叫鹽酥個啲。唯有怨自己無做足功課。…查看更多

我之前食過另一間，外脆內軟，但我唔會講邊間，廢事賣廣告。呢間既雞蛋仔我唔會話唔好食，但無傳聞中講到咁好食。首先佢個皮係脆既，但入面唔夠軟，做唔到外脆內軟既口感。會變左好似食緊餅乾。我個人偏好外脆內軟，可能口味唔太一樣。不過呢個鋪好犀利，雖然係一條小窄巷度開鋪，連行都唔夠位既時候都仲有唔小人排隊，名氣就真係十足十，就算未聽過佢個名都會俾條隊吸引到。另外佢呢排隔離開左間飲品鋪，唔知佢地係合作定根本同一個老闆喇，佢地就出左個優惠可以平買野飲，我買左杯蜜桃烏龍茶，都唔錯既，唔洗淨食雞蛋仔咁乾。但我應該唔會再食多次呢間了。…查看更多

最近係公司附近開左間龍門冰室，好耐之前去過觀塘個間龍門冰室，食過晚餐，都唔差，但早餐就未食過，今日一於試試佢。睇睇張餐牌先選擇都算幾多，都係正路野，比較特別既係有菇菌湯米線，好似唔差，但我今次就簡左鮮茄濃湯通粉配煎蛋加鮮牛肉。茄湯而已都幾夠茄味，個人黎講幾鐘意佢啲茄蓉。隻煎蛋唔似其他餐廳咁水，半蛋漿半凝結，我自己就幾鐘意。鮮牛肉無咩雪味，但牛味就無乜，不過不失。其實炮台山早餐黎講有好多選擇，如果唔夠特色/好食/平就好難立足，呢間都算一般中上…查看更多

無意中搵到呢間餐廳，一早同朋友訂左枱。太子有兩間分店，大家如果訂左枱就要小心唔好去錯。呢間係二樓，地方都算大，燈光比較暗，幾好情調。我地叫左牛扒，豬仔脾同兩杯cocktails。其實野飲就真係麻麻。但勝在平，好似68蚊。但野食真係無得輸。呢個扒先百幾二百蚊，但煮得一啲都唔馬夫！肉質好林，好香牛味，真係物超所值。呢個豬仔脾好有驚喜，本身對豬扒豬鞍類既興趣好一般，通常都「孩」，但呢個係鮮嫩彈牙個介末醬先係重點，個醬好好味。如果想去既朋友我建議訂枱穩陣，因為都幾多人。…查看更多

Lunchtime 時間，我同啲同事最鐘意係附近搵啲隱世美食，算係比自己一個喘息既時間。一直都想試下呢間九份飽，但次次見到排長龍就無試到。有一日落雨，小好多人排就一於試試佢。去到排隊，大概十五分鐘就入得，係門口落定單先入。鋪頭好細，位唔多，坐得迫，好明顯呢間唔係食環境，而係食物。呢個牛肉夠哂林，米粉爽口，但份量小，大食既會唔夠飽，叫麵會飽啲。呢個香酥排骨好好食，皮脆但肉嫩又有肉汁，無炸過龍，岩岩好。呢個比起個排骨就變得有啲失色，當然都係炸得好但雞肉有啲「孩」，小失望。…查看更多

係附近做完運動就周圍搵下野食，見到the wave 樓下d poster，因為朋友想飲啤酒，就揀左呢間XD 一上到去侍應問我地有無訂位，個陣已經9點幾，估唔到咁夜仲要訂位。呢個時間間鋪都仲幾多人下，幾犀利。不過我地都唔洗等就有位。因為唔係好餓，我地淨係飲野同叫左個pizza食。朋友叫左杯黑啤，佢話好抵，但我唔記得左幾錢。 我叫左杯Margarita。我之前無飲過，個味都ok既。98蚊，價錢合理。呢個pizza真係俾到驚喜我，個皮好脆，啲芝士可以拉絲但又唔「溜」。唯一失色係蝦比較細同無咩蝦味。但整體好好，係一個好食既pizza 。當日見到人食豬鞍，一條勁大。另外環境舒適又大，隔離枱慶祝生日，餐廳仲會幫佢地擺盤同用朱古力寫字，整體氣氛好好，會再食過。…查看更多

同朋友係the wave附近做完運動就係the wave 搵野食，見到呢間泰妹就決定入去試下。環境不大，餐廳分左兩邊，我地坐左係細啲個邊，環境不過不失。我地叫左一份二人餐再加海南雞飯。海南雞一般，算合水準，但個泰式酸辣醬唔係我預期咁，比較稀同唔夠酸辣。另外個油飯一啲都唔熱。 我地另外都叫左個肉鬆飯，無影到相，飯比較濕，肉鬆好食，但個飯都係唔熱既。我地已經好早去，啲飯都係唔熱，有啲失望。小食拼盤唔錯，第一個汁好辣，但幾香。仲有酸辣汁同吵嗲汁都唔錯。飛天通菜係我最鐘意，首先佢係熱辣辣既，另外我本身都鐘意食通菜，通菜好爽口，個醬汁好味，推薦。椰子雞湯啲雞「孩」，個湯無椰香仲偏酸，似冬陰公湯味，如果當一個唔辣既冬陰公湯黎飲係幾好味既。另外有個題外話，佢俾個隻匙「更」都唔fit呢個煲😂 「不」唔到底既料，另一枱都遇到同一問題，有啲搞笑。最後個雪糕真係好一般，唔好期望太多。…查看更多

本來打算去食拉麵，途經見到呢間野就入左去食。門面唔算吸引，但見到餐牌已經有小驚喜，平均一個餐只係七、八十幾蚊，跟湯、飲品同包，係尖沙咀有呢個價錢實在係驚喜價！湯同飲品仲要係任飲！自助湯有誠意既中湯，足料，有濃濃既香味（我估係章魚）。一間西餐廳有咁既質素真係估唔到。自助飲品帶子波菜麵（唔太記得） 唔太膩，帶子爽口，唔錯。茄汁海鮮意粉，我個人好鐘意食！意粉同醬汁應該有一齊煮過，而唔係就咁撈埋。意粉好入味，唔會太酸。海鮮好足料，有成四隻青口，三、四隻蝦，蝦同魷魚都好彈牙，青口香，大愛！唯獨個魚柳無咩味，但整體我好鐘意。…查看更多