thgtc的個人專頁

禽日禮拜，去咗老尖佐敦行下，到一點幾鐘，想搵嘢吃，周圍都冇位，一路响油麻地方向行，見到呢間嘢，原來係食素嘅，又有位，走咗入去 ...一般食肆格局，兩個人，叫咗三樣嘢 ~馬來金不換炒飯︰冇油淋淋，可能唔係好習慣隻葉嘅味道，但個飯炒得唔錯。 山珍豆腐煲︰煲上，食到尾都仲熱辣辣，豆腐夠滑。 生炒芥茉骨︰呢個幾特別，味道即係啲沙律醬多咗Wasabi味，但唔辣嘅，幾醒神。啲菜夠碟頭，大約60蚊左右，可接受，食物夠熱，但招呼就同屋邨啲餐廳仔咁上下 (咁都仲收加一) ...雖然係素食，但又唔同一般傳統素食，啲菜幾有新意，可以一試﹗…查看更多

朝頭早先飲過茶，夜晚又嚟食飯，真係咁好食﹖ (註︰今朝飲茶應該係「每人48元」) 其實今日上深圳玩，本來Plan咗夜晚嚟呢度食飯嘅，朝早見過完關仲早，咁咪飲埋茶囉﹗ 七點前上到嚟，好彩，唔駛等就有檯，坐低，同今朝一樣，問你開唔開泡茶，照舊開咗壺鐵觀音，不過，啲茶就有味過今朝。 打開Menu，見啲價錢都唔平，是但叫咗幾個經濟啲嘅 ... 上湯浸豆苗︰入味，唔錯。燒乳鴿︰幾香，幾嫰。沙薑豬手︰凍食，好爽口。黑椒四季豆牛肉粒︰惹味，都幾油。客家煎釀豆腐煲︰黃豆湯底幾好味。 夠碟頭，兩個人冇叫飯，都夠飽，有飯後果送，埋單180人仔，唔算貴，但係，啲味精都幾犀利 ... …查看更多

禮拜日得閒，過咗嚟深圳行下，先响褔田搵嘢食，走咗上呢度試下；八點幾鐘，唔係好多人，見啲侍應懶懶閒，仲未入狀態。坐低，冇叫泡茶，求其開咗壺鐵觀音，冇嚟味道(係都要逼人飲泡茶)；跟住劃點心，選擇同香港差不多，叫咗幾樣頂得肚嘅 ...菜乾排骨粥︰幾夠料，味道唔錯。搾菜牛肉腸粉︰普通，唔知點解要落搾菜﹖鳳爪排骨飯︰啲餸OK，飯軟硬適中。煎蘿蔔糕︰睇就幾好，但係好削，煎過應該硬身，不過輕輕力夾都散。叉燒餐包︰呢個好食，熱辣辣，軟腍腍，之後都見好多人叫。炸春卷︰咬落好鬆脆，唔錯。其實，飲茶度度都差唔多，不過呢度地方唔錯，幾舒服，嘢食上得幾快，又夠熱，價錢唔算平，可以接受；最好嘅一樣嘢，就係呢度冇得食煙，呢樣先最正，响大陸食嘢，間間都食煙，坐落周圍都臭崩崩，胃口都冇埋 ...…查看更多

出街食嘢，除咗食物嘅味道之外，仲有食肆嘅環境、服務、衛生，同埋抵唔抵食。假如果間食肆啲嘢好好食，但係就坐得好唔舒服，周圍又污糟邋遢，就算唔駛錢，你都未必會幫襯。上個月尾(31/10)，一行五人，去咗銅鑼灣行下，到咗十二點零，想搵嘢食，可能近午飯時間，好多舖頭開始多人，見呢間仲有位，就走咗入去。用兩張枱拍埋，廢事坐到散開哂，跟住睇下吃乜，見佢餐牌有「特價套餐」，跟一杯嘢飲，每人叫一樣，總共五樣，一齊 Share。落咗單之後，叫人攞五隻碗、兩對公筷、兩隻公羹，佢攞咗嚟；隔咗一陣，想問佢攞幾塊Tissue，點知 ...果位仁兄 (聽講係老闆) 拎住幾張Tissue行埋嚟，跟住就用啲唔鹹唔淡嘅廣東話，好大聲咁對住我哋幾個係咁鬧，因為佢啲話唔係好正，約略聽到佢話我哋「又要呢樣、又要果樣」...跟住就行咗去，佢嘅意思可能係覺得我哋幫襯唔多，但係就要求多多喇﹗我哋五個人，你眼望我眼，完全唔知發生乜嘢事；跟住啲嘢食嚟到，幾個人快快趣，食完埋單走人，因為真係唔想留响度 ...講食物，其實好一般，冇乜特別︰涼瓜斑腩(連白飯)時菜炒雞球(連白飯)印尼炒飯 印尼炒麵印尼炒河好似的斑腩咁，仲乾過啲餅乾，完全冇哂水份，硬到幾乎咬唔到，雞球係隻雞髀斬開幾件，毫無味道；其他嘅炒飯、炒河、炒麵，如果多油係優點，咁就係唯一嘅優點囉﹗其實入得嚟呢啲餐廳，我哋都唔係抱有好高嘅要求，都係諗住填飽個肚就算；但係果位仁兄嘅服務態度，就真係令我哋大開眼界。如果佢認為攞多幾對筷子、幾隻瓷羹，係好辛苦嘅，你可以開聲講咪得囉，唔需要發咁大脾氣架；你有權唔做我生意，我亦有自由唔幫襯你，好公平啫﹗我諗佢梗係响呢間舖頭困埋好耐，唔知出便個環境係點罅；依家啲大集團快餐店嘅服務，好到你唔信，你買咗飛之後，搵好位坐低，服務員就會拎到埋嚟俾你，唔駛你操勞。其實，一間食肆嘅「服務態度」係好重要，因為會影響到客人用餐時候嘅感受；同埋，佢會唔會再嚟幫襯，又或者會唔會介紹俾朋友，都係睇你服務得好唔好。我好肯定，就算佢搵勞斯萊斯嚟接我，食完唔收錢，兼夾有嘢送，我都唔會再嚟，試一次都嫌多﹗…查看更多

想吃海鮮，諗起佢哋。先去三聖街，習慣行埋去關財記，二個人吃，揀咗四樣嘢，一共520蚊。上到去，將海鮮交俾Waiter，開咗位，Waiter問點整，又係例牌食法，有三樣係必吃嘅︰1) 辣酒煮花螺︰用爐滾住，一滾起，啲酒嘅香氣已經撲埋嚟，辣味啱啱好，我唔吃得辣嘅，都唔會食唔到，啲螺係自己揀嘅，梗係新鮮、鮮味喇﹗2) 開邊芝士焗龍蝦︰同濕煮撈伊麵食果種唔同，我反而鍾意呢個食法，芝士鋪响龍蝦上面，焗到香噴噴，兩種味道出奇咁夾，Good﹗3) 砵酒焗桶蠔︰呢個又係經典，次次食都覺得冇得彈，一切開塊錫紙，淨係聞就已經流哂口水，隻蠔肥嘟嘟，外脆內軟，又Juicy，响其他地方吃唔番呢種感覺﹗最後條魚，唔駛問都係清蒸︰條魚叫花英，係魚檔伙記介紹嘅，十零兩重，火路蒸得啱啱好，好滑，冇介紹錯﹗吃飽，有紅荳沙、生果送，找數300蚊，食得開心滿足，覺得合理。(註︰招呼一般，可能唔係常客)…查看更多

早排睇到報紙介紹，咁啱今日行開呢度，順便走嚟試試 ...去到嘅時候大約六點半度，日頭茶餐廳完咗，晚市即將開始。地方唔大，約六七張檯左右，搵咗張細檯坐低。由於得兩個人，唔叫得幾多，嗌咗五樣嘢試下︰1) 生滾膏蟹粥 (88蚊例牌)佢哋嘅主打，砂鍋滾熱辣上，88蚊煲，份量對辦；蟹夠膏、有鮮味，但反而鍋粥嘅味唔夠鮮，唔知係咪煲得未夠時間。2) 鮮蜆肉春卷 (25蚊4條) 呢個係推介，係五樣裏面最OK，夠脆夠味，要趁熱食。3) 炸八爪魚丸 (25蚊6粒)呢個都係推介，不過，冇乜驚喜；粒丸本身都算彈牙，外面夠脆，但係，裏面完全冇味。4) 豉椒排骨炒麵 (30蚊一碟，加一杯凍飲多3蚊)其實，豉油皇炒麵先係推介，不過驚油得滯，所以，轉叫呢個，食落普普通通，不過不失。5) 米通雷沙湯圓 (22蚊4粒) 又係推介，都係一般，而且覺得最唔抵食係佢。總括而言，叫五樣嘢，埋單兩百蚊，唔算貴；地方就簡陋啲，同埋冷氣唔多夠，一食粥你就會好覺。不過，值得一提，就係果位阿姐嘅禮貌好好(佢應該係老闆嚟嘅)，果晚全部檯Full哂，但係，樓面得佢一個，又要入廚房幫手，俾啲客嗌嚟嗌去，完全冇變臉，非常之有耐性去處理， Good﹗…查看更多

禽晚第三次幫襯，今次吃夠一席。個套餐價錢冇變，但係啲菜有啲改動，同埋唔送飲品，炸BB鴿照舊每人送半隻。菜單~芝士焗龍蝦 (足兩斤，送伊麵底)鴻運燒味大拼盤黃金沙律海皇卷翡翠彩鳳花姿紅燒雞絲竹笙翅瑤柱扒雙寶蔬清蒸大海石斑南乳脆皮鮮雞精美甜品生果拼盤不過，今次覺得個份量少咗，十二個人都係僅僅夠，同埋啲味道冇初初咁好。我諗啲負責人要檢討下嘞，再係咁樣，啲客慢慢就會走咗去第二度架罅﹗…查看更多

呢間酒樓開咗冇幾耐，今次已經係第二次幫襯嘞。兩次都係食呢個套餐，呢個係全包宴，每席1,288元，半席648元，免茶芥加一；星期六日及假期就1,488元同748元。飲品一席跟二枝啤酒、六罐汽水，半席跟一枝啤酒、三罐汽水。新張期間，每人送多半隻炸BB鴿；另外，飯後送糖水。我哋六個人，叫咗半席；個餐份量好夠，就算再多一至兩個人都夠食，味道亦算OK。價錢肯定抵啦，一餐飯食咗兩個鐘，每人都係125元，仲想點呀﹗個餐嘅菜式係咁~錦繡大拼盤紅燒竹笙雞絲翅碧綠花枝珊瑚蚌秘制流汁芝心球翡翠玉環瑤柱脯清蒸游水大海斑蠔皇北菰扒玉掌招牌脆皮文昌雞生炒臘味糯米飯生果响呢個社區範圍，有四個私人屋苑~翠林、康德、大興一期、大興二期，但係祇係得一間酒樓，再去最近就要數到卓爾居嘅麗都總廚同埋裕滿人家。之前嘅佳餚廚房都捱咗幾年，但係做得唔係咁好；所以，近期開咗間由集團式經營嘅，希望可以做番好啲，keep到啲客，等呢度嘅街坊唔駛行到咁遠食飯飲茶吖。…查看更多