Sum Sum的个人专页

每隔兩個月就會去一次的餐廳，卻發現越來越不濟，環境服務味道跌watt不在話下，仲呃秤先最激氣。首先，一個月前book定 10 位，睇住佢mark我地資料上去時都未有人book同一日，但嚟到佢只俾出面嘅枱，而唔肯俾間房我地，而間房其實係成晚都冇人㗎喎。坐喺出面環境嘈吵，天花板又滴水。差！再嚟服務，哩間分店不嬲唔係好夠人手，但之前都ok, 今日卻勁想將我地未食完嘅嘢收走，好似豬手凍成碟都只係十零廿粒，但食剩四五粒時佢不停想收，好彩2次都眼明手快阻止到，但搞到我地好狼狽，好似要同佢鬥快，狂塞嘢入口度咁，食得一啲都唔Enjoy! 差！講番食物，一個月前食過鹽焗蟶子，咸香鮮甜，令人回味；今日食的肉質新鮮卻毫無味道。另一邊廂，豆腐煲同百秒黃花魚卻咸到要自己加水。差！輪到價錢，最最激氣。一隻八個人都分唔勻的蟹，蟹蚶剝殼後蟹肉只得一半，事前唔講幾重，埋單先話計33両。你話我地第一次食蟹就話啫，喺哩間餐廳都食過3、4次蟹啦，細蟹4百零蚊，大蟹都不過600蚊，今次俾佢足足收咗800蚊，離晒大譜！差！怒！乜嘢差都可以忍，呃秤就最最難忍。生日流流費事同你嘈，用我地自己對腳去投票，哩間餐廳唔會再嚟！…查看更多

由這間扒房開業至今，每次經過力寶看到它poster上的牛柳，都想衝入去光顧。但聽聞實在太貴，所以直到今晚慶祝4週年紀念日，才第一次幫襯。即日訂的位，閒日關係餐廳唔full, 被安排坐在4人卡座，沿路有侍者殷切地打招呼，配合古典的裝修，暖和的燈光，再加上經過廚房傳來陣陣濃烈的牛油香味，心裡想：即使真的收$1000一位，也絕對超值。打開Menu, 套餐有多款選擇，視乎牛肉部位及選配海鮮與否，價錢$1000-1200左右，包餐酒、湯或沙律，及甜品。以後來上菜時的份量看，一個套餐其實足夠2人分享。好彩我同老公係散叫，不用浪費食物，亦慳不少。先來的是雞尾蝦冷盆，落order時侍應溫馨提示另一BBQ蝦才是他們的招牌出品，但好吃的雞尾蝦普通餐廳實在難找，所以決定一試。結果沒有讓人失望：中指般粗的蝦肉甜而實淨，雞尾汁提神開胃。:)接著是主菜，我們二人挑的是16Oz rib eye，伴芝士焗薯、蘑菇和青露筍。牛扒用超熱碟裝載，碟上一早塗抹牛油，熱力令黃油半帶深啡色，撲鼻的香氣正是剛才從廚房傳出的那股。:)肉眼牛味濃郁，面上灑了香草更豐富了味覺。吃至後期肉質稍實，也許是碟子太熱的緣故，至後期medium rare已變成medium well。伴碟的露筍配荷蘭汁，我嫌筍老，老公卻喜歡那種草青味。蘑菇初入口甜香，越近盤底卻越鹹。薯塊不是法式忌廉的焗法，只純以兩款芝士烘焗，有點膩口。最後因太飽，沒法子享受他們的招牌芝士蛋糕和法式燉蛋，不能算是全滿足。埋單總共才$1170，比想像中便宜，下次一定要再來！！…查看更多

挾著譚校長與李克勤的名字，這間左麟右李剛開幕時人龍不絕。這天下午茶時間路過銅鑼灣，一時心血來潮，放棄幫襯老字號何洪記，也不介意多走幾個街口，專門來信和廣場嚐一嚐新。結果：蘿蔔糕：酸的腐皮卷：勁咸，用茶沖晒啲汁先勉強食到。拉布腸粉：夠滑，合格好彩冇介紹朋友去。$61，當股票輸咗。…查看更多

因為BB唔駛打GOLF，所以可以早啲出發 :)；又因為我係螄蚶怪，所以選擇咗哩間作為到埗後第一間歎既食肆。去到六點鬆啲，尚有一張六人枱靠近門口，唔駛等就有得坐。 :)我同BB當然唔會傻到大熱天時走去嗌個豬骨煲熱鬥熱啦。結果除咗招牌菜螄蚶，我地仲叫咗豉椒丁螺，同埋事頭婆推介的燒乳鴿。螄蚶先嚟，每隻都有一個半五蚊銀咁大，大廚灼至全熟，不似香港的血淋淋；但肉質KEEP住爽口彈牙而且螄蚶味濃，食落去每啖都好似食緊日本壽司店的靚赤貝刺身咁，但佢一碟既價錢等於日本餐廳一隻既價錢，螄蚶愛好者必食！ 伴碟的泰式辣醬太辣，我唔食得辣齋點豉油，下次叫佢俾埋WASABI就仲正～～ 再嚟就係丁螺，豉椒炒，配料足所以好辣，啲螺仔吸晒啲汁結果我哩啲完全唔食辣既人食唔得多，益咗BB～～最後上既係乳鴿，一開四，無椒鹽同喼汁醋伴碟。我本嚟係個鍾意食完一樣餸先食另一樣餸既人，但隻乳鴿一上枱，香到我哩個螄蚶怪忍唔住未食完隻螄蚶就已經用手攞起咗一舊嚟食。一咬落去發覺：錯晒！！ 平時啲乳鴿總要蘸鹽又要蘸喼汁，即使好味如沙田龍華都要點少少果汁醋吊味啦。但點解哩隻鴿可以做到皮脆肉嫩豐滿多汁，夠晒味道之餘仲隱約食到少少喼汁味，真係咩都唔駛蘸，平時食嗰啲仲唔係錯晒？！！ 可惜螄蚶同丁螺都大大碟，兩個人食都要打包，冇得再追加多隻乳鴿，唯有期待下次～～今次正值休魚期，冇瀨尿虾，下次下次！！ 本嚟仲有啲小菜如九肚魚想試，但BB擔心食唔晒，下次下次！！ 依家天口未夠凍，不宜試骨煲住，下次下次！！！ …查看更多

在日本，吃過一間天婦羅專門店130港元的晚市套餐，美味留存十年至今，無一可超越。在香港，於日本餐廳其實不常點天婦羅，一來怕熱氣，二來心知質素普通。今次，在澳門，懷著多多錢都預咗俾既心情，試了這間以天婦羅作號召的餐廳。可惜...裝修是一流的，小橋流水式佈置。日式庭園設計，不華麗但優雅。各人圍繞大廚而坐，親睹他的真功夫，不但滿足了視覺上的好奇；偶爾交談數句，拉近廚師與顧客的距離，是好事。可惜...窗外景緻雖然遠眺對岸MGM，晚上尤其漂亮；但近觀之下，酒店樓下的荒蕪地盤卻躍入眼簾。滿佈銹蝕的雜亂，大煞風景，唯有將專注放回食物上。可惜...我們點的菜包括一客海老海鮮天婦羅set lunch，然後再散叫了松葉蟹腳、帶子、粟米、蕃薯、星鰻天婦羅壽司和一客冷麵。看著師傅不夠十分鐘就將海老、魚和蟹炸起，心情很期待。可惜...炸起的海老和魚，因為是set LUNCH，所以未有即時奉於我們跟前，而要再拿回大廚房等其他食物都準備好後才上桌。前後再經歴了十餘分鐘，如是者，本是熱辣香脆的天婦羅，到我跟前時已冷卻而且“林”晒。 :( 可惜...散叫的炸物因不用再遊花園，吃的時候仍是熱辣的。粟米超好味，蟹腳不過不失。但帶子炸得稍燶，肉質老了；蕃薯因太厚，口感反而不夠香港的普通貨色。 :( 可惜... 星鰻壽司除了星熳，另包有少量刺身，驚喜之餘亦很美味。 水準之作 可惜...為什麼壽司先上這種最基本知識這裡都做不到。當我們滿口油膩時才來生魚片，口感打了折扣。而我們原意冷麵是配散叫的天婦羅一起吃的，但三催四請之下仍未奉桌，結果所有食物都吃完後再等了十數分鐘才來。 一間聲稱自已很高級的日本餐廳，應該如此？？ :(這間餐廳既以天婦羅作招徠，當日亦只招待區區十數枱客人，但仍然要我們吃冷掉的天婦羅，等到頸都長的冷麵，和原本話有後來又話冇晒的芝蔴雪糕。真係連普通日本連鎖式居酒屋都做得好過佢，起碼人地收的錢係值嗰個價。哩間？連鬧都費事。…查看更多

哩間餐廳，真係唔讚唔得… 睇得出哩個老闆好有誠意開餐廳：知道馬鞍山人多食肆少，所以安咗個咁難讀既名，然後再縮喺麻酸樂隔離，費事太出名太多人搵到，結果就係連商場食蕉哥哥都唔知間嘢喺邊。一讚 門口reception夠忠心：為咗老闆多啲生意，五人枱不停叫入，四人枱二人枱半個鐘都唔嗌一張飛；幸好友人醒目，等咗廿分鐘攞多張五人飛，唔駛十分鐘就入得。但入到去發現，張五人枱其實係四人枱加多張椅，仲要加正路中心。咁well use個場，一讚 餐廳十分環保：知道自已啲餐飲馬馬虎虎，索性二人餐menu中印明只有1杯餐茶。當然，如果你問waitress姐姐，佢係會話你知你有2杯餐茶，menu只是印錯... 環保吖嘛，錯咗無謂改啦！ 菜式fusion創意十足：牛角包唔跟餐要8元一個，但就crossover咗傳統牛角包既外形＋普通餐包的味道；而且為你健康著想，全間餐廳不提供牛油... 反正個湯都難飲到只係試一啖就可以叫佢收走，個麵包都預你唔會食啦，冇牛油哩家嘢真係一絕。 waitress姐姐好pro，可以同時應幾枱客都仲記得問你個牛柳要幾成熟，又記得本小姐要求個汁另上。 堅讚！ 可惜煮嗰位唔係好識睇waitress啲字，五成熟變十成，個汁又撈埋落個main course度，結果要勞煩waitress姐姐再搞過... 扣分！ :( 老闆極度重視香港傳統飲食文化，雖然搞既係意大利餐廳，但身在意大利，心在港式大排檔：幾組唔識既人齊齊搭枱，唔夠位就路中心加椅，再唔係索性安排坐喺廚房對出走廊位，餐刀餐叉滿佈油光用兩張紙先抹得甩，收碟用手推車一次過快靚正，執枱更簡單 ﹣將啲垃圾掃落地等落場一次過掃；咁有效率既意大利餐廳，問你見過未！ 作為一間地道的大排檔，我一定俾滿分！！ 但點解... 個牌寫住係意大利餐廳既... …查看更多

這天小寒, 熱鬧如銅鑼灣也蓋不住寒意.. 想吃壽司卻來到了鳥信, 皆因同集團的壽司廣已滿。一坐下, 待應遞上兩條熱毛巾, 暖意由雙手直傳入心, 友人和我都不期意露出滿意笑容。細看餐牌, 除了鳥信的, 還有壽司廣和天扶良的, 於是決定每間的菜式都試一點。前菜前菜是送的, 今天是八爪魚漬物和牛蒡。味道可以, 但與我們點的串燒菜式略有重疊, 餐廳應該提醒。串燒.. 99分！前菜之後是餐廳推薦的八爪魚串燒和我的至愛牛脷串燒。前者異常好味, 八爪魚腳外表微脆, 內裡卻保留Juicy感覺, 是一大驚喜, 下次也一定再點, 但記緊要趁熱吃。 牛脷份量太小, 但外脆內「林」, 一咬下去, 肉汁必晒出嚟, 口感非常正。 兩款串燒味道淡口, 需自己再用桌上的調味料加味。鳥食.. 可以好味啲來到專門吃「鳥」的餐廳, 當然一定要試一試「鳥」的食物。這次我們選擇了柳川鍋的吃法, 即雞肉與蛋和柳川汁同煮。鳥信的柳川鍋其實只有手掌般大小, 上菜時鍋小爐大, 火焰霹靂作聲, 嚇得友人忙叫部長把爐撤去... 原以為以這樣的份量, 一定不夠飽。但原來整個鍋很足料, 每一啖都是雞肉, 雖嫌略咸 :( , 但吃完這個菜已有飽意了。柳川鍋的做法我最喜歡的依然是鰻魚柳川.. 但餐廳硬說不是當造沒有提供; 另一邊廂, 餐牌卻印著是日推介: 鰻魚xxx... 天婦羅.. 普普通通可能在東京已吃過最好味的天婦羅, 所以對這裡不過不失的質素已沒有太大的期望。我們點的是雜菜天婦羅。基本要求如炸漿要夠薄, 食物要有鮮味和Juicy等, 這裡都做得到。但ok好味與真正好味之間, 就是差那麼一點點~壽司.. 鮮甜我和友人都決定以帆立貝壽司來試試這一家的質素。帆立貝肉質偏"林", 但其甜味在口腔內縈繞不散。讚！ :)生果.. 驚喜！埋單時服務生告知有生果送, 還以為是普通士多啤梨蘋果橙, 原來是富有柿+日本士多啤梨, 份量各有半個, 絕不欺場。再讚！ :)服務.. 必需再好啲!!這篇食評的標題叫得做雞蛋裡挑骨頭, 當然除了食物外, 鳥信的確有讓人挑剔的地方。平心而論, 這店的食物質素是可以的, 坐位環境等也屬上佳。但作為一家貴價的日本食店, 服務態度必需要再好啲。這天一心想吃壽司, 但10樓的Sushi Hiro無位, 部長說了一句:「上12樓啦, 12樓有位」.. 沒有稱呼, 沒有說「請」, 沒有「唔該」, 更遑論有人帶位~ 感覺就似去了舊式中式酒樓.. 去到12樓的鳥信, 妹妹仔的笑容ok, 但部長就好cool~順口問了一句係未可以嗌到樓下壽司廣的壽司, 答案是「我地三層樓menu都一樣架喎.. 」, 笑容欠奉之餘, 語調略帶晦氣。奇怪~ 不過, 餐廳在食物方面的誠意, 還是遠較那些熟口熟面連鎖式經營為佳, 所以今次都係決定俾個笑面公仔, 希望多啲人幫襯, 間餐廳唔好執, 咁我下次都可以再去喇~…查看更多

如果只是一兩道菜做得好, 那麼我家的廚房也可以是米芝蓮。東來順, 背得起這個虛名...為了在尖沙咀找一間好吃而不用排隊的中菜館, 一行四人是夜到了帝苑的東來順。但就座後才發覺, H君感冒, T君胃痛, C君皮膚敏感, 需要戒牛羊雞鴨鵝蝦蟹炸物等等等等.... 故網友推介的什麼名菜、得獎菜全部變得可望而不可及, 最後叫了.. 手抓羊肉 口中點的雖然是這手抓羊肉, 但心裡記掛的卻是火辣辣的羊腩煲。所以當侍應把這個前菜般大小的手抓羊肉端過來的時候, 著實有點失望：份量相差太遠了~ :(但仔細近看, 羊肉浸在羊湯內, 湯不似港式羊腩煲的深色, 反呈奶白濃稠, 微香撲鼻, 令人忍不住未試肉先啖湯。湯略鹹, 帶醇厚骨香, 散發細膩的香料味道。 :)再啖羊肉。所謂羊肉, 其實是羊肋位置的肉, 連骨上供手拿著吃而名之, 是傳統的西藏小吃。羊肉與骨相連, 肥膏卻出奇地少, 應是被刻意解薄的緣故。由於有油膏的關係, 羊肉嫩滑鬆化, 但又不會因過多羊脂令人覺得肥膩, 整件羊肉香且微羶。 東來順的手抓羊, 嗜羊者如我會嫌其不夠羶, 但卻勝在吃得舒服。手抓羊作為小吃, 本來就不應過份滯口。若說及格的手抓羊肉必備爽口不膩、不羶不腥、常食不煩三要素, 東來順做到了。菜樹菇炒海蜇 東來順另有一蔥油海蜇頭, 在別的食店試過, 做得好的可以比普通海蜇好吃一百倍。是夜以茶樹菇炒海蜇而代之, 是因為覺得這個季節應該少吃冷盆。而且, 炒海蜇, 可以很考功夫的。茶樹菇帶菌類獨有異味, 除之可提鮮, 省之卻澀口, 功夫一；海蜇易出水收縮, 炒時需與它鬥快, 功夫二；茶樹菇味濃, 海蜇味淡。如何將兩者味道融和為一, 功夫三。上菜了.. 份量仍然是一大敗筆 :(, 但味道卻一致被讚好。海蜇爽脆彈牙 :), 茶樹菇菌腥味全去, 帶甜的醬汁掛滿每一條蜇絲與菌絲 :), 讓各人夾完一箸又一箸。看似一個平凡餸, 卻收百多元, 貴是貴, 但東來順, 起碼沒有省那幾重功夫。吃完份量最多的百頁塌菜 (好味 :)) 和 煙燻雞菜飯 (果然不應該亂叫煙燻菜式 ), 甜品時間...我最喜歡楊枝金露 :) 的足料和驢打滾 的煙韌, 而H則喜歡流沙金球.. 我卻覺得：流沙奶皇, 和中式包是絕配; 而金球, 裡面放的應該是麻蓉餡。埋單超過九百蚊, 好彩信用咭有八五折。每人二百蚊, 雖然未嚐招牌菜式, 但可以舒舒服服吃到如此質素, 還趕得及回家看劉醒攞獎 , 算係咁啦~ …查看更多

分行慶功, 按傳統拉大隊去哩度食。因為壞人負責嗰一仟蚊筆直仲未到手, 我地既策略係嗌套餐慳加一同酒水錢。但咀尖既經理同好鬼識食既C+額外加咗兩個餸, 搞到十五個人都食唔晒枱面啲嘢。事前已經聽聞C+, 經理, 阿莎同嘉鑫對哩間讚不絕口, 所以期望都幾高, 亦好彩冇令我失望, 仲屢屢有意外驚喜。驚喜一：鴛鴦色太爺雞 (另加)一入口, 係喇! 係三十年前阿嫲整既味道呀!! 終於俾我再食返, 感動到我當堂想跪低大嗌HALLELUJAH.. 但成碟雞一半淺鼓油色, 一半較深色。深色嗰半煙薰味則略嫌過火.. 驚喜二：招牌燒鵝皇阿莎兩個月前的推介。但上次同DaDa去食深井出名嗰啲, 都不外如是, 所以今次其實冇乜expectation。但原來..又真係OK好食喎... 經理話今次凍咗少少, 再趁熱少少食仲正.. 好.. 下次再Encore~驚喜三：砵酒焗桶蠔 (另加)自己覺得砵酒桶蠔係一樣好易就校得好味既餸, 所以覺得冇乜位可以再加分。但原來.. 蠔身粉薄, 蠔裙邊炸得脆而不膩的砵酒焗桶蠔係可以 好好味x2 架！ 難怪叫咗三大碟都俾我地刷晒啦~驚喜四：古法麒麟龍躉球喺時代聘x樓嗌過同一個餸, 當時覺得火腿還火腿, 冬菇還冬菇, 魚還魚, 三者味道未能融合, 所以對所謂麒麟蒸一直覺得只係啅頭。但原來..今晚食既麒麟蒸, 火腿冬菇同魚既味道終於融為一體並得出1+1+1>3 , 彼此不會搶彼此的味.. 讚！驚喜五：今晚既套餐還包括：上湯焗波士頓龍蝦烏冬 芹香藕片爆雙脆 (魷魚&珊瑚蚌)脆奶拼鍋貼石斑夾生炆龍躉頭腩竹笙海皇燴生翅北菰螺片扒唐生菜荷香糯米飯杞子桂花糕啤酒汽水蓮蓉壽包 (另送) 焗西米布甸 (另加) 但十五人埋單都只係$2688, 如果唔計加多兩個餸既錢就只不過係$1668, 上次聘x樓嗰碟古法麒麟蒸魚都過仟啦~ 抵! :)不過當然啦, 今餐都有少少瑕疵既, 就係啲甜食：全部甜既食品都只係食到甜味, 但就炸奶冇奶味, 桂花糕冇桂花味, 布甸冇蛋味。 扣分~ :(但瑕不掩瑜, 最多避開唔嗌甜食, 學有賢話齋, 喺哩度食飽去九龍城合成食糖水就perfect啦!! …查看更多

當日現場, 祥記門口排晒隊.. 哩間嘢就只坐得一半枱。估唔到喺Open Rice既食評都爭咁遠, 95篇同4篇既分別!!哩間嘢我食第三次喇..第一次, Mami介紹, 第一次接觸蝦子面.. 比起香港嗰啲梗係大讚啦... 第二次, 唔信邪, 同公仔食完祥記, 先再過嚟食.. 高下立見。:)今次, 病住再食.. 感覺仍然係Very Good：蝦子金黃、香口, 又唔駛排隊, 又平啲, 真係諗唔到咩理由唔食囉！蔡生的廣告效應真係非同凡響, 明明貴啲兼冇咁好食既, 一樣大把人排住隊買。攪到我都以為自己既味覺有問題... 寫哩篇食評只係希望多啲人話我知, 其實.. 我條脷係正常架！ 不過, 可能因為短期內都試過三次, 記憶猶新, 所以覺得佢有時啲蝦子會落多啲, 有時就會少啲啲.. …查看更多

一年內大大話話去咗成六次澳門.. 次次都有去福隆新街, 次次都見哩間嘢排晒長龍, 所以次次都冇幫襯.. 今次見到佢冇人排隊, 於是一行四人諗住試下啦~坐低問老闆唔同價錢有咩分別, 佢話等等... 然後等咗成五分鐘都冇再理我地.. 但佢係冇嘢做緊架喎.. 跟住我個好同事唯有問隔離枱啦.. 隔離枱都係第一次幫襯, 然後試完俾咗個結論我地：嗌個$20得喇...咁我地嘛照落order.. 然後老闆就開始俾面色我地睇喇.. 嘩! :( 澳門都有啲咁既服務態度架咩.. 唔緊要, 我地心情好.. 忍你!!啲翅嚟到, 落咗兩滴麻油撈勻擺落口>> 啲湯底：冇乜特別.. 啲翅： 好「 硬膠」, 好似冇煲過咁.. 啲雞絲： 竟然係硬架.. 我都好想知佢點煲啲肉會咁硬?!?!?!本嚟我不嬲只係寫啲好既餐廳, 差既由得佢.. 但見咁多人嘥咁多時間嚟排隊幫襯, 真係想奉勸一句：澳門大把好嘢食, 西南、四海、長城、海灣、李康記、聯記、牛雜佬等等等等, 有貴有平有正餐有小食, 一日都食唔晒, 無謂嘥時間喺哩度排啦!!…查看更多

唔係第一次幫襯這間與元氣壽司屬同一集團的千両壽司, 前幾次都係坐迴轉枱, 又掛住同朋友傾計, 所以冇乜特別感覺~~今次坐bar枱order位, 雖然位置談不上舒服, 但食物總的來說都不錯。鰻魚仍是暖的。海膽、秋刀魚都唔腥。有啲驚喜~~ 燒厚蛋略嫌過甜, 板x的師傅狀態好的話燒得比哩間好食...雖然唔算係喺香港食過最好食既迴轉壽司, 但有個咁有心既朋友同我預祝生日, 咩都抵番啦~~ :)…查看更多

平時去開新城市, 唔係食HIP SUSHI就係POKKA GRILL, 反而從來冇機會食哩間。講裝修, 外表睇算OK。但坐落覺得張SOFA太矮太軟, 唔飲嘢唔啱食飯囉。再講杯水, 我飲熱水, 都冇乜嘢。但EAMMON就話唔慣杯凍水有怪味.. MAYBE係啲檸檬唔夠新鮮影響咗~講番嘢食, 其實覺得好正。我地兩個人, 嗌咗個羊奶芝士意粉, 同煙三文魚PIZZA, 但食唔晒囉~~第一次食羊奶芝士, 個汁好濃, 略有酒味... 超正！至於個PIZZA, MAYBE我地掛住食個意粉同傾計, 所以食到PIZZA已經覺得有少少凍, 同埋覺得芝士唔夠囉~~ 但個PIZZA底好CRISPY, 齋食都好好味~~ :)返到屋企上嚟OPEN RICE, 先發覺哩間嘢係彈多過讚, 嚇死！但睇真啲食評, 有啲係因為食LUNCH, 有啲係因為嗌咗啲咩扒咩餐咁... 我諗如果嚟哩度叫意粉應該冇走雞.. 至於PIZZA.. 講真, 食慣PIZZA HUT厚批既人, 又真係未必識得欣賞既~~ …查看更多

平常很少機會到屯門吃飯, 今晚為慶祝未來師嫂的牛一, 師兄一早約定我去屯門食「海鮮」... 起初實在想像唔到喺大興邨何來有海鮮檔, 去到見到個門面, 更加估唔到用每人$110既價錢就可以享受到以下咁高水準既美食。1. 黃金焗尤魚八點人都未齊, 所以食住哩碟黃金尤魚頂住肚餓先。一入口就嚐到咸蛋黃的鮮香同幼細質感, 尤魚彈牙, 唔會死咸。唔錯唔錯... 2. 魚露香茅蝦廚師以泰式手法入饌, 新鮮大蝦伴以蒜茸、洋葱、香茅、葱及魚露等, 比起純豉油皇大蝦多咗幾分香茅味, 味道變得較有層次感, 鮮得來不會過咸。但如果香茅味再濃啲會更加好。 3. 手撕雞 (兩隻)蔡師傅話此餸菜之味美, 一隻實在不足以讓所有人都大飽口福, 故連叫兩隻。食落肉質沒有一般店家的"霉", 已有好感。但最精采之處莫過於一起涼拌的青瓜和紅/白蘿蔔絲。原來這裡的酸菜都是自家醃製, 味道清中帶酸酸甜甜, 口感爽脆, 和同屬自家調配的麻醬和雞肉配合得天衣無縫。 3. 細鱗兩食 (炒球 / 蒸頭腩)當晚吃的細鱗重約4斤, 由店家相熟的釣魚翁釣回來, 市面少見。細鱗炒球, 肉質略嫌少許"林", 而且尚有少量骨未起, 稍稍扣分； 但其後的蒸頭腩卻給扳回不少分數。頭腩只用清蒸方式, 令吃慣炸頭腩的我本來有點抗拒。但一上菜, 聞到陣陣豉油香味, 已經按捺不住要多夾兩塊。遺憾的是沒有叫白飯... 4. 牛尾煲 x2 (自攜法式面包, 由店家烘熱成香脆多士)又一味餸係打孖上既, 一試果然非同凡響。蕃茄味香濃而不過酸, 恰到好處。牛尾亦炆得好"林", 一試再試。 5. 蒜茸糯米蟹因不能吃蒜茸, 所以這道菜只能由友人分享。6. 炒蟶子蟶子鮮甜不腥, 肉質結實。但可惜豉汁不夠香不夠辣, 上水榮發茶餐廳的汁要好味得多。 :)7. 甜酸油炸鬼炒雞軟骨這道菜別的地方少見, 小女子第一次吃到, 驚為天人。油炸鬼和雞軟骨都被切成小件, 炸得香香脆脆, 再配以微辣的甜酸汁和青瓜, 解膩之餘又不會太熱氣。自己一個都可以食晒成碟。 8. 藍莓芝士蛋糕由老板娘代購, 外觀精緻, 味道一流。可見老板娘的心思。加分。 埋單竟然每人只需$110, 平到俾完錢都唔信。本想說可以約friend專登過嚟試, 但師兄話今晚食既餸係餐牌上冇既, 咁下次嚟嘛食唔番... …查看更多

喺粉嶺返工返咗兩年都未嚟過哩間嘢, 諗唔到最後一個月留喺聯和墟既日子, 竟然一口氣幫襯咗哩度三次。第一次嚟食係晚飯, 第二次午餐, 都係同大食同事一齊嚟, 所以佢地嫌哩間嘢塞佢地唔飽。今次兩個人撐枱腳, 三個餸都食唔晒。前兩次試過幾味餸都覺得水準好好, 所以對佢個大廚好有信心。今次嚟擺明係玩嘢, 專登嗌啲出面唔常見既餸。1. 金牌咸香鴨外表似普通咸水鴨, 食落除咗鴨腳位有咸香外, 亦都唔覺有咩特別。但原來精粹在個汁, 話甜又唔係甜, 話酸又唔係酸, 好詭異, 但夾埋個鴨食又好好味喎~~~2. 醬油焗鴨下巴咸香鴨味啖, 哩個餸味濃, 所以剛剛好dun番勻, 令同行友人讚不絕口。3. 蒸蜆乾 (原本個餸名係有成八九個字, 我讀完個waitress好似聽唔明, 呆咗三秒先恍然大悟, 然後就話「哦, 蒸蜆乾」*_*)係一個驚喜。哩個應該係一個下酒餸, 或者用嚟送粥食, 所以下次都應該唔會專登再嗌。今次誤打誤撞試到, 覺得雖然蜆仔有啲乾同硬, 但用嚟送飯一流, 令人想食多兩碗。4. 綠豆沙送既。好多渣同埋好沙.. 又唔太甜, 好正。想呃多兩碗。次次嚟到都見到隔嚟枱啲餸好吸引, 睇嚟再嚟多幾次都唔會厭。可惜我留喺聯和墟既日子只係剩番兩日.. 真係太遲先嚟食嘞。…查看更多