忠忠直直的个人专页

見這餐廳有咁多笑臉，慕名去試下啦。位置偏僻，在舊區工廠大廈內，都不算容易找到，交通十分不方便。上到去只佔工廈一層內的一個小單位，比一般茶記還小，座位距還算寬敞，但冷氣唔夠，有啲悶焗。看餐牌價錢不算便宜，淨意粉不連套餐都要百多元，改套餐要加多75元（68元加10%），這個升級價錢似乎高了一點。未試過這店的食物，都係唔好博住。先叫了一個墨汁帶子risotto和軟殼蟹安格斯漢堡，一食失望。墨汁risotto好細碟，男人食一碟一定會餓住咁走（除非叫多個餐）。墨汁risotto完全沒有墨汁那種獨特香味，最起碼連一點牛油味也沒有，米太熟根本不似risotto。漢堡包一看比正常size細了一個圈，有點小家感覺。漢堡的軟殼蟹不脆，漢堡牛扒沒兩面煎香，牛肉卻乾似柴皮，連麥記的安格斯漢堡都高佢幾班。本來都想叫甜品，不過應該唔使試啦。兩樣嘢埋單314，好唔抵。呢個價錢在市區地舖或大商場的餐廳一定可以食得更好，坐得更舒服，做乜要山卡啦走去舊工廠區食啲咁嘢？…查看更多

開咗一段日子，終於去試吓。分兩層以木結構為主，裝修格調很好，坐得也舒服。服務很好，侍應的反應很快也有禮。食物水準就較一般。主菜改餐（多了沙律、湯、啡茶）要加38元，我們改黑松露湯要再加20元。凱撒沙律都係一般，幾條菜葉加少少醬咁，普普通通。湯有黑松露香味，口感也不錯，可讚。叫了蜆肉意大利飯，蜆肉有少許海腥味（不是難吃那種），我鐘意。不過啲飯太過淋，透晒心，唔似意大利飯，可能就香港人口味。黑毛豬扒，肉質好淋，幾乎冇牙都食到。肉不乾有汁，質感不錯，不過冇味，不但豬扒冇肉味，連醬都乜味，就只係鹹鹹地。豬扒似是燒的，但沒有一點焦香味，燒得好的肉扒應該表面有微焦，內有肉汁。咖啡水準也不行，只是不難飲的水平，有點失望。這餐廳價錢在荃灣區中不算低檔，環境和服務也不錯，只是食物質素有待改善。…查看更多

行過聞說新開個多星期，即本試試。冇乜人，可能時間尚早，而且太新冇人識。樓底好高，坐落也舒服。叫了個二人餐，先嚟個南瓜忌廉湯，夠滑又有奶香味，相當不俗，對之後的食物自然有些期望。再來凱撤沙律，菜一般，但煙三文魚和煙肉粒好正，沙律醬的味道也很好，一讚！冬蔭功大蝦海鮮墨汁意粉，意粉不太淋又不太硬，剛剛好。蝦肉煎過，有一點焦香味，其他海鮮也有水準。起初覺得冬蔭功配意粉有些新奇，但食落確實不錯，有創意。黑豬扒煎得剛好，配搭的蘋果醬不太甜、很清新；配另一個蘑菇醬好有蘑菇香味，俾我食晒。檸檬茶有淡淡茶味，也是剛剛好。整体而言，個廚好得，食物比我預期中好，完全對得起他的價錢。這餐廳選擇不少，大眾化五六十元的晚餐也有，豐儉由人。荃灣區食物有水準的西餐廳不多（之前執了一間好好味但食唔飽的法國小廚），希望這間能有好發展。…查看更多

朋友食過話唔錯去試試，中午食餐最旺時間，只得幾枱人，奇怪！叫了個牛扒餐和龍脷柳餐，侍應似乎好生手，落單後再回頭問牛扒要幾成熟。先來餐湯，一個紅一個白，兩個都幾好，白湯夠奶香味，紅湯剛好不太甜。印象加分，對之後的食物有期望。先來牛扒，原來系鐵板餐，原本order五成熟其實冇意思，鐵板上幾乎九成熟。牛扒全是牛筋，朋友好似食香口膠，全部嚼完吐翻出嚟。再來龍脷柳，眉頭一皺，又系貓食都唔飽嗰隻。一個細碗仔飯左右，男人食一定唔飽，最怕這種餐廳，食完仲要餓住走。魚柳都係鐵板上，煎得幾好，外層微燶裏面軟滑，不過好鹹。套餐不包飲品，啡茶要加錢（好似五六蚊），即本試試呢度的咖啡（於我是決定會否再來的指標之一），好唔得！荃灣區的餐廳咖啡我差不多都試過，大部分系唔好飲但可接受，只有幾間真系難飲至極難飲。這裏的咖啡是近乎難飲的一種，勉強飲完。埋單168，明白點解得幾枱客。中午套餐不包餐茶是很罕有的（確實都見過），感覺好小家，印象差。價錢不算下價，但食物質素唔得，同去大X樂差不多，是旦去間餐廳都差不多。食唔飽和咖啡難飲系致命傷，幾乎可以肯定不會再來。以佢既客量估計，應該都.........。…查看更多

質素唔算好突出，但一分錢一分貨，這料理的質素對得起他的價錢有餘。石頭鍋鰻魚飯，普普通通，沒深刻印象。天婦羅炸漿好厚，不過我鍾意，夠脆。雜錦烏冬：叉燒好肥好油膩，烏冬麵有少許怪味，又唔似係變壞，唔知點形容。環境可以一讚，夠濶落又唔太嘈，坐得幾舒服。服務一般的好，侍應都算幾醒目反應快。仲有一樣可以加分，就係無用即棄筷子，衛生又環保。可以再去。…查看更多

每次行過都一大班人在門口等，未有機會入過去，今日看過其他食評的起心肝去試吓。但水準好一般，有些失望。叫了個咖喱炒大蜆，大蜆好像是花甲，完全無鮮味，好似冷藏咗好耐，咖喱味不夠香亦不夠辛，愛吃重香料味的人一定覺得唔過癮。蒜蓉包還算脆，但不香。油夠多，但不知是什麼油，如果是牛油一定香得很，蒜蓉味也不明顯。串燒牛肉可以讚一吓，肉嫩剛剛好，有少許炭火味，滿意。甜品椰汁西米膏，椰汁味不夠香濃，似椰漿被溝淡咗。環境好唔得，濟迫都無所謂，但一坐低就要打烏蠅仔，一路食一路趕，要同烏蠅爭食。最後我方勝，打死了兩隻，旁邊食客亦打死了一隻。招呼都OK，客人多，待應個個都開了turbo，但急而不燥，算幾好啦。整体食物水準好一般，各種食物（包括冬蔭功）都好像缺乏了一種東南亞菜的重要材料：椰子。以致香不夠香，甘不夠甘。…查看更多

經過好多次，今日終於有機會入去食吓嘢，喜出望外。環境好清靜，我們三個人幾乎係包場，咁少人有些疑慮莫非質素很.....叫了兩個焗海鮮飯晚餐和煎龍脷柳晚餐，有頭盆蝦沙律，蝦有蝦味菜新鮮，開始有驚喜。繼續.....湯夠creamy、麵包夠香脆，水準之作。而且分量很足，湯的分量在一些高檔西餐廳算是兩人分量，食量細的人要預一下。來到主菜，龍脷柳煎得好靚，應說是我咁大個仔見過煎得最靚的一次，兩面金黃微微燶，魚肉不乾剛剛好。可惜焗海鮮飯芝士味不夠濃，但有四隻中蝦、帶子、青口....，好好味又唔講得，但都算有海鮮味。甜品、咖啡質素比較一般。大佬，98蚊個餐食六樣嘢仲想點呀？簡直係超值。上星期去過煤X廳餐，近四百蚊個人落樓論質素都唔及這裏。只係可能因為太少人，待應亦少，經常都唔見人。想要胡椒粉等好耐都見唔到一個人，要自己走出去搵人。但服務態度仍算幾好，有幾會定會再去。…查看更多

父親節四圍都人多，這間大把位，可能因為多數人都不會揀這類餐廳做節。入去叫了個128二人餐，好多嘢食，兩個人食飽無問題，不過質素就欠奉。凱撒沙律菜是生食的，但上枱時候生菜是暖的，即是沒有冷藏或放了久。而且不是西生菜，是唐生菜，中式凱撒沙律！？意大利pizza的靈魂是蕃茄膏和芝士，但來的pizza只有中間位有大約一片份量的芝士，而且沒有茄醬，食落似上海舖的蔥油餅，又中式意大利pizza！？南瓜意粉好重胡椒味，除了顏色似外看不出是南瓜意粉，質素似平價茶餐廳的午餐意粉。感覺這餐廳的食材都是最平最cheap的貨式，當然128兩位絕不算高價，但貨比貨，這價錢去其他餐廳一定可以食得更好。…查看更多

新開張時旺，物質素亦算好，所以常去食午飯。最近一次去好多位、人少，奇怪！這店服務一向人手不夠，上餐慢幾拍。但招手就有人應，仍算可接受。叫了一個洲炒米，少許擔心，因為我鍾意食星洲米、揚洲炒飯、芙蓉蛋等（全部有叉燒的）。但叫這幾樣好多時都是最後一次幫襯那餐廳，因為最少有三分一餐廳都係用火腿完全代替叉燒，我覺得是不能原諒的做法，不會有下次。等一陣星洲米到啦，終於知道點解少咗人。大大碟星洲米，叉燒呢？蝦仁呢？唔係無，真實統計，有幾條牙韱咁粗、吋多長的叉燒絲和一又四分一隻蝦仔，成碟就係咁多。明明係腿蛋炒米，做乜要話係星洲米？好反感。論餐湯，初期碗碗都有渣，好多時有骨有肉。差極都會有嚿紅蘿蔔或有條菜乾，但今次清湯水一碗，確係退步。荃灣又少一間餐廳可選，真可惜。…查看更多

這是荃灣區第二間較高檔的西餐廳，即本去試試。叫做蠔吧，但我唔多中意食生蠔，於是叫了個肉眼扒（8oz），要五成熟，288一份。叫肉眼扒但似西冷，比較薄，唔似有八安士，煎得兩面略脆內裏生，值得讚。牛扒無配汁，只落鹽，算好味。但大廚落鹽好重手，鹽夠多雖較能帶出肉味，但真係幾鹹。除牛扒就只有一嚿薯蓉和一小堆菜，分量似乎太少，大男人食可能唔多夠。這個價錢在outback可以食得豐富好多，而且質素絕不比這裏差。若這個餐配多個湯和一片包，之後多杯飲品，賣貴三幾十蚊（一定夠本）相信都無問題，感覺會好唔同。但成$316（加一後）就食這件扒感覺好唔值，無下次。我老婆叫個特價餐，質素都唔係好得，餐湯係普通茶餐廳的粉漿湯，麵包唔脆（死咗好耐）。海膽意大利麵，麵無味道，海膽煎香味道似煎鯉魚春。整体上食物質素只屬一般水平，但價錢貴，物非所值，試過就算。…查看更多

叫了兩個放題，除了有刺生、壽司等傳統日本食品，也有火鍋。第一次食日本嘢有火鍋，即本試試。火鍋其實和一般中式酒樓食的差不多，沒什麼特別，如果只是想食火鍋，去一般酒樓應該會更便宜更多選擇。火鍋料份量不少，只是叫了一份平價和牛都一大碟，多到有點不合理，仲使食其他嘢？傳統日式食品，三文魚刺生算新鮮，都合格；至於鮮味就不要有太高期望，與其他中下價魚生店賣的都差不多。天婦羅的粉漿太厚，蝦天婦羅好似吉列蝦。但蝦肉好爽，爽到有啲唔自然。服務都算好，久不久有人會嚟添茶，火鍋會添水。最值得讚是地方寬敝，其實他佔了6樓全層，地方夠大，行人通道濶落。枱和枱之間也有足夠空間，坐得舒服。整体以這個價錢來說算合格，沒有驚喜也不會太失望，想食日本嘢去下無妨。…查看更多

行過好多次，每次想入但都無入去，總係覺得沒什麼吸引。但係難得荃灣都有間看似高級的西餐廳，而且平時好少人，估計唔捱得好耐，今晚經過，即本試試。送來餐牌，立即覺得反感，有幾頁較貴價的食品只有英文餐牌，沒有中文。這裏分明是做華人客為主，很討厭一些以華人客為主又不提供中文餐牌的餐廳，又想起那個華人與狗不得內進的牌子。不過另外也有一份中文餐牌，價錢似是比較便宜的。叫了兩個晚餐，一個雞胸一份牛扒，有湯有沙律。先來洋蔥湯，只係鹹鹹地，沒有洋蔥味。跟包的牛油也比較淡，沒牛油香。黑椒吞拿魚沙律，一定要自己加鹽，否則一啲味都無，連黑椒味都無至奇怪。牛扒要五成熟，略為過熟但可接受，質素和Outback差不多，配菜是煮？菇加兩個薯球，味道偏淡。雞胸啲汁都可以，但太少，問侍應可以再添一些，服務算唔錯。奶茶起初有些驚喜，因為看似夠濃。香港人習慣飲濃香紅茶，可惜這裏的沒有茶香，差過大部分茶餐廳。這裏的食物味道偏淡，喜歡食濃味的（如我者）可能不太合口味。服務算是幾好，相對來說客少侍應多，一招手就有人應。而且侍應都好企理及有禮，有高級食府的風範。環境寧靜（可能人少），背境音樂聲量剛剛好，聽得到但又不吵耳。但地方稍嫌擠迫，和那裏的格調有些不相稱。總結來說沒什麼賣點，也沒有什麼令我回味的食物，試過就算啦。…查看更多

去過幾次都幾滿意。食物水平：講真只是一般的好，二三十蚊碗米綫，絕對對得起得價錢，可算是低食。辣味分十級，相信對一般人來說第三級已經夠。辣味不是麻辣那種，沒有香味，只有辣。賣相一般，同你去是旦一間米綫舖食的都差不多。這裏最低讚係啲米綫夠份量。可能我大食，最怕去一啲餸多過麵的舖頭，夾兩箸麵就食完，唔夠炭水化合物。這裏的大大個碗裝到滿，食得痛快過癮，有機會一定再去。環境：地方不算很濶落，但枱比好多舖仔大。一張圓枱五六個人坐食野時都唔使頭碰頭，還算舒服。好多舖頭仔迫到食麵時湯汁可以彈到過格籬碗。服務：一般地好，舉手會有人應你，等一陣就有得食。食米綫仲想要啲乜嘢服務？…查看更多

午餐叫了個雞卷三文魚套餐，$88，先嚟湯，OK，中規中矩。之後主菜就真特別，好大個碟（唔要咁大做乜）有四五件雞卷，正常分量。但主菜跟飯，飯呢？在哪裏？睇真啲，碟上有個雞蛋大小的團狀物，原來係飯團。只係大過雞卷小小，跟餐咁細嚿飯真係第一次見，貓食都唔飽啦，何況一個大男人？ 好惆悵，叫多個餐好還是餓住咁走好呢？叫侍應嚟問問，佢話真係就得這嚿飯，不過之後佢再俾咗一碗白飯我，算係咁啦。其實已經好耐無去百佳，今次主要想試下啲咖啡得唔得，結果仍是失望。咖啡煮到過晒龍，一味得過苦，幾乎有翠華嗰啲咁難飲。近年茶餐廳水吧水準急劇下降，好的水吧傅唔知去晒邊。咖啡大多數煮到得過苦字，只有小數幾間仍能保持合格水準。但百佳以咖啡做招牌，煮到咁樣就真係不能接受。早期佢啲咖啡真係唔錯，但越來越差，所以都好少去。試埋今次，都找不到再去的理由。…查看更多

第一次光顧，原來剛裝修完，裝環氣氛一流，三兩知己朋友晚飯談心很合適，服務也很好，及得上高級餐廳的水平。可惜食物質素大差勁，叫了一個特價套餐，自選四款菜色包括一個主菜。價錢388，也算OK。另加一個主菜羊仔扒(原價245)。點了 鵝肝醬配多士(原價133)；安挌斯牛扒(原價268)；牛尾湯(原價65)；蜆肉汁意粉(原價85)。鵝肝醬全無鵝肝那種甘香味，口感乾身，似食臘味潤腸。不合格！:(安挌斯牛扒只有一件約一百元鈔票大小，7mm厚左右，估計不足4安士，好耐無係扒房食過咁奀的牛扒。我要五成熟的，但過了火，可能牛扒太薄，兩面稍為一煎就已過熟。扒面上放一大件半溶牛油（起初以為係蛋），其實牛扒比少少油略煎就已經好出油，再加大舊牛油在面，古古怪怪。扒中間有筋，唔好食。 伴碟只有一支露筍（破兩邊）和一支三吋長甘筍仔。就係咁多嘢，連薯條都無支，聲稱原價268，真荒膠！意粉太生口感乾硬，無蜆肉鮮味，不合格！意粉煮得好應該係外面軟裏面硬，咬落口感煙韌，略有咬勁。我估煮意粉我可能好過這裏的大廚。:(可以讚的是湯，牛尾湯用cream煮我第一次食，夠creamy，有牛味。算合格。羊仔扒都算ok啦，差不多有翠華的水平。份量有兩大件，比我的牛扒多一倍。因有會員折扣所以埋單只係四百幾兩人，這個價錢我在OutBack可以食得好飽好痛快，而且食物質素好得多。這裏的賣點就只有環境和服務，若想食好嘢唔使嚟，去翠華都一定好過佢，應該都無下次。…查看更多