s_lala的个人专页

喺餐廳食早餐，飲熱奶茶，飲到最後先發現杯底有張白糖包裝紙，即係上一手嘅，餐廳冇洗乾淨隻杯之餘，沖奶茶嗰個亦睇唔到或睇到都唔理。即刻同咗侍應講，侍應話沖過杯畀我，但我已經食飽，冇要到，同埋都已經飲咗了。希望集團負責人、餐廳店長睇到，注意一下衞生。…查看更多

呢間舖頭由細食到大，就算大個咗喺九龍住，時不時都會過嚟幫襯。一半係食味道，一半係食回憶。今朝過開嚟筲箕灣，就嚟呢度買個牛筋腩米外賣，分湯，諗住返屋企下晝叮返嚟食。點知返到屋企先發現得清湯、齋米，一嚿筋腩都冇，又冇腩汁，又冇理由過返港島換，變咗食齋米。😔不過佢個牛筋腩同炸醬真係出色，可能係兒時回憶啦，所以我都係會繼續幫襯。希望老闆睇到，下次pack外賣就注意一下啦！…查看更多

本身諗住食food court隔離的鮨點，但午市好多人，等唔到位，唯有近近地轉食food court。睇中food court入面呢間越南嘢，望落賣相唔錯，所以叫咗個皇牌3+2撈檬粉。重點係：未食已經見到條好好好長嘅頭髮，即刻唔多開胃！🤢奈何午市太多人，本身等出餐已經等咗好耐，再拎返去換就趕唔切返公司，唯有避咗嗰part唔食啦。結果，豬頸肉絲、腍豬肉、烤牛肉都過乾同過鹹，送嘅飲品又只得檸茶、檸水揀，其他要加錢，整體嚟講CP值好低！…查看更多

向來都冇點寫食評，但呢間餐廳名不符實，感覺被揾笨，令我寫第一次（件事有啲長）。話說早排行開北角匯，見到Giovanni Pina進駐，Afternoon Tea只係$398兩位，已經諗住同男朋友嚟試。後來見到網上介紹，好多Afternoon Tea用KKDay買都有優惠，Giovanni Pina都有$330兩位嘅優惠，評價都唔錯，就決定經KKDay買。我哋跟足指示，先喺KKDay畀錢，再預早一日打去餐廳留位。點知，呢個係失望嘅開始。我哋等咗一陣，餐廳安排我哋入座。我哋示意個職員過嚟落單，本身佢態度都OK，但一聽到我哋係KKDay訂位，就面色一沉。噉我哋照落單啦，餐牌明明係寫「經典米蘭咖啡或任選茶」，我上OpenRice同KKDay睇過食評，「任選茶」係包括English Breakfast Tea嘅，但呢位職員就話只包檸茶，English Breakfast Tea就要加$20。男朋友想要凍咖啡，職員就話要加$10，我哋就要咗熱咖啡。奇怪嘅事就出現了，我哋聽到另一位職員同隔離枱介紹緊呢個Afternoon Tea，呢位職員就話有幾款茶可以揀，凍飲亦唔使加錢。噉我哋即刻問呢位職員，到底Afternoon Tea係包邊幾款茶，佢就話係包English Breakfast Tea，唔使加錢，我哋就叫佢幫我哋換返。我見到OpenRice有人介紹用Storellet入會，可以有多6件迷你撻做迎新優惠。我又問呢位職員用KKDay訂枱有冇呢個優惠，佢態度本身都OK，點知佢一聽到KKDay，又面色一沉噉話冇，令我都開始懷疑杯English Breakfast Tea都係正價先包，用KKDay就唔包。其實「一分錢，一分貨。」正價包某啲飲品，用咗KKDay優惠就要加錢都係合理。問題係現場餐牌同KKDay都係寫「任選茶」，冇寫用KKDay就要額外加$20，食評都見可以揀English Breakfast Tea，去到先話要加錢，有啲感覺被呃！而且，用咗KKDay嘅特價優惠，就冇Storellet嘅迎新優惠，我覺得都好合理，但點解一聽到係KKDay訂枱，就即刻唔想招呼噉呢？其實貴公司如果淨係想招呼正價幫襯嘅客人，大可以獨善其身，唔同其他平台合作，無謂搞到職員同食客都唔開心！再講，畀到個好嘅體驗食客，食客自然會再幫襯，或推薦畀親朋戚友，而家噉樣似趕客多啲！再講食物質素，鹹點唔錯，但甜點就遜色，迷你撻嘅撻皮過乾，質素普通，名不符實。而且，雖然話係Tea，但平時食其他餐廳嘅Afternoon Tea都好飽，可以當Lunch咁滯，呢個就真係完全唔飽。總括嚟講，如果大家想去試嘅話，可能用返正價$398幫襯會開心啲嘅，但食物質素、份量就見仁見智喇！不過經過今日，我就唔會推薦親友嚟lu！…查看更多