meiling bb的个人专页

魚事者Fisholic，一聽店名就知道呢間係專用魚肉做料理，一直想試吓。今日放工經過就買咗個外賣魚麵撈返去食。可以用手機掃描QR code落單，外賣自取可享有八折。個外賣盒仔細細，設計隱約有陣文青嘅味道。泰式-蝦頭油炸蝦球魚麵撈($56)原價$70，八折後$56就買到。魚麵鋪上櫻花蝦，再增添香氣。唔知係咪因為外賣既關係，炸蝦球唔係平時日本炸物咁香脆，但勝在夠彈牙！但主角一定係魚麵，因為食落爽彈，唔會覺得腥，我相信唔鍾意食魚既人都會鍾意食。整個份量偏少，係女仔食嘅份量，下次要加配小食先得！…查看更多

好耐冇去茶樓食腸粉，經過見到就想試下。間鋪冇堂食位，只係提供外賣。因為想過下口癮，所以冇加$14轉套餐（再加6粒燒賣同埋一支飲品）。點咗個必試嘅無骨手撕雞腸粉（$33）店面話因為即叫即整，要等耐少少。可能當日唔多人，我只係等5分鐘到就有。無骨手撕雞腸粉($33)整盒份量唔多，主角石磨腸粉真係好滑溜，再配上無骨手撕雞醬汁，十分惹味。而無骨手撕雞份量同樣比較少，不過食落夠嫩唔鞋，好快就食哂成盒。呢間下次可以再食！…查看更多

今日放假約咗朋友去中環食lunch，朋友建議去La Vache!鋸扒。之前試過夜晚黎食，未試過lunch，一於就過黎試下！原本先上餐包，可惜食完先醒起唔記得咗影相。而每個餐都配有沙律。沙律菜夠新鮮，我鍾意份沙律入面有walnut，為沙律增添堅果香味。餐廳入面其實都冇得你揀，只係得牛扒餐，你要揀既只係要幾熟。牛扒上枱既時候，餐廳會用小蠟燭繼續溫熱碟牛扒。所以平時食開medium既我叫咗medium rare，俾D空間件牛扒食食下變medium。Ribeye表面煎香，內裏肉質夠鮮嫩，呈粉紅色，充滿肉汁。店員會不時問你需唔需要refill跟餐薯條，我幾鍾意咁樣安排，因為refill既薯條係熱既，食落去感受到啱啱炸好既香脆，咁既薯條先係最正！Lunch同Dinner既分別係Lunch係包埋甜品，Dinner係要加錢先有甜品。呢個跟餐甜品係法式杏仁金磚蛋糕，好似係家喻戶曉既法式甜品，我唔太清楚，只係知食落唔太甜，都幾好！如果唔特別叫野飲，每人都只係$338一個餐，加埋一就$371.8，算係幾平！而餐廳環境其實都幾嘈，音樂聲幾大，一大班人黎聚餐係唔錯，但如果你係想約另一半黎個浪漫約會，呢到就唔建議啦！…查看更多

話咁快就已經開咗學半個月啦！趁功課、測驗既壓力未黎既時候，約咗朋友食個遲來既開SEM飯。今次約咗係始創中心一樓既夏麵館，粉藍色既外面望落增添唔少青春既感覺。入座之後，望見裏面既裝潢都係粉藍色，而且好多人已經開餐啦！我地都唔執輸，點菜開餐啦！上海醬鴨︰涼菜方面，我地叫咗碟上海醬鴨。從色澤方面，顏色頗深，每一件鴨肉都被醃得剛剛好，保存著肉汁，唔會鞋。雖然望落顏色頗深，但味道唔會太咸太濃。味道唔錯，果然係店內推介！鮮肉小籠包︰食上海野又點少得小籠包。雖然有其他口味既小籠包，但係最簡單、最基本既原味，就已經好好味，而且先最食得出廚師既真功夫。點一點醋，放入口一咬開，D肉汁立即溢出，皮薄餡靚！排骨擔擔麵︰食咗涼菜同埋點心之後，就叫咗個通常係上海菜館都有既擔擔麵。撈勻後夾起，每條麵條都沾上豬肉碎同埋醬汁。上海口味唔同四川口味，食落唔辣，滿有花生香味。配料揀咗排骨，酥炸過後仍然保存住肉汁，唔會好乾，外層更添香脆。XO醬炒年糕︰上海年糕好出名，鍾意食年糕既我都必點年糕，今次就點咗XO醬炒年糕。上海年糕炒完之後仍然好煙韌，唔會變得好硬。用XO醬炒完之後，更香口惹味，連配菜都變得好好味！高力豆沙︰食完主菜之後就要留肚食甜品 。高力豆沙就係打起蛋白同埋麵粉，入面加入豆沙餡，再落油中炸起。材料十分簡單，製作過程卻唔容易。食落好似軟綿綿既綿花糖咁，入面既豆沙餡甜甜地，係我其中一樣食完會想再食既甜品之一。豆沙鍋餅︰除咗高力豆沙之外，豆沙鍋餅都係出名既上海甜品之一。外表炸得香脆，色澤金黃，內裏係軟綿既豆沙餡，味道甜而不膩。茶芥每位$4，價錢唔係好貴，食物既份量都唔少，呢一餐真係食得好滿足！MENU︰…查看更多

離開咗大半年去咗讀書，返黎放暑假既日子緊係要約埋好友一齊聚下啦！今次就約咗係之前放學後經常約去行街既銅鑼灣。HeSheEat係銅鑼灣地帶2樓，位置方便。晚飯時間，客人都幾多。入座之後，我地都盡快點餐。炸珍寶蟹棒&芝士年糕配日式蛋黃醬︰小食方面叫咗碟炸物，剛炸起要小心燙口，食落十分香口。炸珍寶蟹棒︰炸皮唔會太厚，入面既蟹棒好珍寶，咬落啖啖肉，好正！芝士年糕︰年糕入口軟糯，同入面D芝士好夾，唔會好漏。單骨水牛城雞翼︰因為抵抗唔到雞翼既誘惑，所以叫咗個水牛城雞翼黎食。單骨雞翼食落非常方便，啱哂女士想食雞翼食得有儀態少少。單骨雞翼先炸好，再淋上醬汁。雞翼唔會炸到好乾，醬汁有少少辣，對於嗜辣既人黎講，可能就有D唔夠喉。卡邦尼芝士汁意大利鮮蛋麵︰主菜就點咗呢份卡邦尼芝士汁意大利鮮蛋麵，份量唔多，大概係女士既食量。麵方面係用咗意大利闊條麵Fettuccine，上面灑上芝士碎，配以煙肉同埋蘑菇。卡邦尼芝士汁好足，將鋪在面頭既鮮蛋篤破拌勻，夾起麵條，可以見到每條麵條都好creamy，食落好滿足。朱古力咖啡沙冰︰飲品方面，喜愛飲mocha既朋友就叫咗杯朱古力咖啡沙冰。係炎炎夏日飲沙冰確係涼爽，而且沙冰未拌勻，呈現三色，再on top加上忌廉，外表好靚！柚子沙冰配抹茶雪糕︰開頭係MENU見到呢杯野飲既時候，心入面不禁疑惑︰柚子沙冰同埋抹茶雪糕真係夾咩？飲落就知兩者真係冇違和感。柚子沙冰就好似沙冰版既柚子蜜咁，不過唔會太甜，飲落清清地。而抹茶雪糕放入口即溶，抹茶味幾濃，唔錯！朱古力三重奏︰到咗食甜品既時候，甜品要預二十分鐘，所以食到咁上下，大家就好叫定職員預備啦！呢個朱古力三重奏係包括朱古力慕絲雪糕、朱古力心太軟同埋凍朱古力特飲呢三樣野。朱古力慕絲雪糕︰呢個唔係普通既朱古力雪糕咁簡單，而係伴以mousse，令整個口感更綿滑。朱古力心太軟︰心太軟焗熱後，飄散出勁濃既朱古力香味，讓人不禁靠前聞多幾下。切開後，內裏既朱古力就好似熔岩咁流出黎，呢個就係心太軟既精髓！又香又濃既朱古力味直接衝擊味蕾，唔係死甜，真係好正！凍朱古力特飲︰呢一小杯朱古力凍飲，面頭有OREO碎，飲落又香又滑。宇治金時心太軟配豆腐雪糕︰除咗朱古力之外，我地仲叫咗另一款味道既心太軟，就係宇治金時啦！宇治金時，即係抹茶紅豆，兩者味道配合極佳。伴以白玉、綠茶蕨餅，滿有日式甜品風味！而豆腐雪糕味道相對比較清淡，同心太軟一齊食就會一冷一熱，冰火交融。最享受既一刻就係切開佢，等入面既抹茶漿流出黎，呢個心太軟絕對合格！食飽埋單，真係好滿足！MENU︰…查看更多

去到朋友屋企傾完project之後，順便食埋個晚飯先走。朋友帶我去附近既喜點.鮮鍋粥底火鍋點心專門店食海鮮粥底火鍋。入到鋪頭入面發現都幾多人食，睇黎都應該幾唔錯喎。有A餐B餐揀，我地食貴少少，揀龍蝦餐。有時唔係太清楚D野食要淥幾耐，不過唔駛驚，呢到教埋你正確食法～除咗教你點食之外，仲話埋俾你知粥底火鍋既由來。先黎一鍋粥水俾你打邊爐。粟米、芋頭同埋南瓜都係等淥好海鮮之後放落去為精華海鮮粥作預備。我地先放粟米去鍋入面滾先。醬料盤俾你隨意配搭醬料。等粥水滾起之後，就夾起美國極上牛小排放落鍋入面，淥一淥，好快就熟，趁冇咁熱既時候立即放入口食，非常夠牛味。最吸引係海鮮拼盤，有一隻龍蝦分開兩半，兩個人分啱啱好！仲有海蝦、貴妃蚌、黃金蜆、帶子、鮑魚，面對住咁多咁正既海鮮，有時真係唔知揀落咩好。除此之外，仲有多寶魚，淥完之後，魚肉變得嫩滑鮮甜，不過就要小心D魚骨。夾起仲係綠色既生龍蝦放入個鍋入面。另一面睇，隻龍蝦都算多肉。淥完之後，龍蝦就變咗橙紅色啦！龍蝦肉彈牙鮮甜，仲有少量膏，半隻實在唔夠喉啊！同樣由綠變紅既海蝦食得出係新鮮既，蝦肉唔會好霉。飲品可以去飲品櫃拎，有竹蔗芧根同埋豆漿，可以一支支咁拎。我地拎咗支竹蔗芧根倒係杯入面飲，味道天然，唔會死甜！除咗海鮮盤同埋牛之外，仲可以揀多八款配料。我地見有咁多肉，點都要揀返D菜既！所以我地就揀咗唐生菜，淥完之後，吸咗湯底精華，仍然十分爽脆。順德釀冬菇呢D咁有家鄉特色既配料其實係將鯪魚釀係冬菇到，淥熟之後，食落就知道冬菇同埋鯪魚既味道好夾！平時打邊爐十分喜愛食墨魚滑，呢到更特別既係加有蟹肉，令味道更鮮甜。蟹籽蝦滑係另一至愛，蝦肉打至充滿膠質，而且仲有原隻蝦身，再加入蟹籽，除咗味道一流之外，質感上面都豐富咗，係推介之選！喜歡點竹笙既原因係因為佢可以吸收湯底既精華，好正！見有西洋菜餃呢款比較特別既配料，就點黎試下，淥熟之後，發現餃子裏面既西洋菜十分清甜，相當唔錯。魚皮餃同埋台灣黑椒腸係朋友至愛，當然要點黎淥下啦！淥哂所有配料之後，就可以放埋南瓜粒同埋芋頭粒落去，再叫店員加入粥膽去煮，攪拌幾下，煮滾之後就可以熄火，如果唔係會好易燶。店員放了一小碟粥既配料係枱，但溫馨提醒我地唔好放太多，怕味道太重。我選擇咩都唔放，就咁食呢碗精華海鮮粥。食第一啖就已經食到濃濃海鮮既鮮味，而且仲散發淡淡芋頭既香味！雖然好飽，但係我仍然可以食兩碗。我明白點解咁多人黎呢到食粥底海鮮火鍋啦！等我下次帶埋鍾意食海鮮既爹地媽咪黎食先！…查看更多

今日有個八哥迷朋友帶我去位於尖沙咀既八哥主題餐廳食晚飯。係尖沙咀站B1出口行幾分鐘就到，地下有指示要行樓梯上二樓就到間餐廳~沿途都有好得意既八哥圖案，好似指示你點去咁。一到達間餐廳，就會見到入面有幅好靚既粉彩畫，係隻八哥扮起聖誕老人祝大家MERRY CHRISTMAS同埋HAPPY NEW YEAR！餐廳既另一邊就係八哥著得好潮咁準備食大餐既壁畫，座位上面仲有兩隻八哥公仔回望過黎~望入去會見到入面店員忙碌咁預備食物。呢到既碗碟、紙巾都印有八哥既圖案。周圍都係八哥，連擺放牙籤、砂糖既杯都有八哥！因應聖誕節同埋新年，餐廳仲推出咗個聖誕新年套餐，供應時段由12月21日至1月1日。不過我地今日散叫，冇叫到呢個套餐。卡邦尼意粉配溫泉蛋︰就咁望個外表就已經好吸引，溫泉蛋係意粉中間，食之前撈勻佢，令到每條意粉都有蛋黃同埋芝士既香味，配料有蘑菇同埋煙肉，整體好creamy。香煎韓式一口和牛粒配自家制泡菜︰食完碟意粉之後，好想叫小食，所以就叫咗呢碟小食。和牛粒size啱啱好一口一件，香煎後肉汁被鎖係入面，所以食落好juicy，再配上韓式醬汁，加添咗一份甜味。每一口都會配埋自家制既泡菜，令剛才提到既甜味再帶來少許既辣，整個味道既層次更顯豐富~八哥朱古力慕絲配美國芝士蛋糕︰食過小食後，就到咗食甜品既時候啦！朋友勁力推介要點呢款，原因係因為佢既造型實在太可愛啦！美國芝士蛋糕側邊有隻八哥訓咗係到，見到直呼可愛！美國芝士蛋糕唔算好濃味，只係散發淡淡既芝士香味，感覺唔會好heavy，食完唔會有罪疚感，仲可以伴著水果、忌廉一齊食。相反，係造型咁可愛既八哥身上，遲遲未肯開始食，因為感覺好似好殘忍咁。八哥像真度非常高，但係其實只係八哥造型既朱古力慕絲，用黎影相打卡一流！望見唔同既角落、周圍既佈置、擺設，甚至係食物都充滿住八哥，又見到身為八哥迷既朋友面上既滿足笑容，我真心推介俾每一位喜歡八哥既朋友仔黎呢到食飯、聚會、影相、打卡。MENU︰…查看更多

一直以為素食唔係冇味，就係整色整水扮肉，但係今日朋友帶我黎銅鑼灣悠蔬食，就令我完全改觀。店內用上藍色作主調，讓人感覺十分舒服。一坐低，店員就立即黎斟暖水，仲好細心咁提我地小心熱，D水係檸檬水黎，有清香既檸檬味。我地每人叫咗一set，首先會上三款前菜。日式藜麥野菜松子薯球外表精緻，好似日式飯糰咁成球狀，有D紫菜係面，薯蓉混入營養價值高既藜麥同埋松子，十分健康。第二款前菜係草莓鮮果香芋沙律伴杏仁脆片，好少見呢個配搭既沙律，酸酸甜甜咁又好開胃喎。第三款前菜係滷水花菇毛豆百頁豆腐伴琥珀合桃，花菇同埋百頁豆腐充滿滷水汁既味道，毛豆添上點點清新，再配上香脆既琥珀合桃，味道唔錯。手卷方面，我揀咗香芒牛油果苜蓿芽手卷。手卷唔係用紫菜包住普通飯粒，而係包住苜蓿芽、芒果同埋牛油果，味道清新好味。朋友揀咗蘆筍素香鬆苜蓿芽手卷，同樣讚不絕口。另外值得一提既係，店員上手卷既時候，會細心咁建議先享用手卷，避免紫菜淋咗，影響香脆既口感。牛肝菌桃膠忌廉濃湯：有別於平時係餐廳飲到既忌廉湯，每一啖都有好香既牛肝菌味，仲有具美顏功效既桃膠，真係體會到係用心預備既。蟲草花椰子黃耳竹笙燉湯︰呢個中式燉湯用料十足，十分滋補，飲落成個人暖哂。溫馨提醒：睇熱，小心淥親個嘴仔啊～牛油果鮮豆包芋頭栗子藜麥焗千層闊麵︰呢個千層闊麵既配料非常豐富，面頭鋪有幾片牛油果，內裏有芋頭、栗子、鮮豆包、藜麥等，每一啖都有唔同既口感，而蕃茄醬同埋芝士就為咗清淡既素菜配上香濃既味道，整體配搭唔錯！菠菜栗子野菌忌廉燴意大利飯配韓式炸物︰整個外觀看來像韓式炸雞放係一堆綠色既飯上面咁，食落就知殊不簡單。呢到係食素，當然唔會有炸雞啦～韓式炸物係仿效炸雞樣式既炸物，而同樣係用咗韓式既醬汁，味道酸酸甜甜咁。燴意大利飯呈青綠色係因為有菠菜汁，入面有栗子同埋菇類作配料，味道十分出色，朋友對此讚不絕口。椰香紫薯千層班戟︰加咗$25要咗呢個甜品，淺紫色既外表望落已經十分迷人。班戟真係做到薄薄既多層，淡淡紫薯味散發著椰香，一啖又一啖，好快就食哂。蝶戀花百爵紅茶布丁燒︰呢個係銅鑼灣店限定，要加$25。外表好少女，有隻藍色紙蝴蝶停係士多啤梨上面，而布丁燒上面有片朱古力焦糖脆片。布丁燒有淡淡既百爵紅茶味，而且仲有軟綿既芝士蛋糕口感，同朱古力焦糖脆片一齊食，十分相襯。呢個甜品吸睛之餘，仲好好味，十分推介！香脆五穀杏仁牛乳(熱)︰加咗$15點咗呢個飲品，杏仁奶既味道好出，而且散發淡淡既穀物味，好香。熱飲令人感覺暖暖的。熱檸檬紅茶︰朋友加$10點咗杯熱檸茶，側邊有粒糖原來係俾你放入去杯熱茶入面溶，好特別。對於少食素食既我黎講，呢餐由前菜、小食、餐湯、主菜、飲品到甜品都令我感到意外，原來素食都可以咁出色好味，而且甜品令我好回味。一定會再黎！MENU:…查看更多

係佐敦地鐵站A出口行幾分鐘，抬頭一望就見到倫哥火鍋既招牌，今日既目的地就係黎佐敦分店呢到啦！  上到去二樓就見到倫哥私房菜既靚靚招牌，如果拎走條紅色帶就更好！ 店員俾咗個枱號我地，唔知點搵。原來抬頭一望，就會見到枱號！店內既裝潢都幾別緻。D碗筷好盞鬼！張紙會教你點整個雞煲~前菜有麻辣豆角同埋木耳，木耳用醋醃過，又用咗蒜蓉調味，香得黎，酸酸地，豆角麻辣得好過癮，兩樣都好好味。第一次黎食倫哥真係好有驚喜，係食雞煲前會有中湯飲，而且唔係普通中湯，而係燉湯，今晚係蟲草花燉雞湯，十分滋補。飲完湯之後，另一驚喜就會出場，係鮑魚花膠啊！花膠含豐富骨膠原，啱哂女士食。鮑魚細細隻十分彈牙，配埋D汁味道剛剛好。當你以為開始食雞煲既時候，店員又拎咗一盤刺身拼盤黎。有三文魚、牡丹蝦、帶子、八爪魚同埋北寄貝，每一樣都新鮮肥美，唔錯喎！食咗咁多正野，主角雞煲終於出場啦！本來諗住跟住張紙既指示去整，但係呢到D店員好好咁黎幫手攪。攪咗四次之後，個雞煲就可以食啦！我地怕辣，所以叫咗BB辣。一打開煲蓋，就立即香氣撲鼻，夾起一舊食，雞肉十分嫩滑，醬汁都十分惹味，最正係可以任食。食到一半，就可以放埋牛柏葉、豬皮同埋魷魚落去個煲入面撈，索哂D濃香惹味醬汁，非常美味！食完雞煲就可以轉打邊爐，等緊既時候，店員就拎咗串燒蝦同埋我一開始店員俾我抽籤抽中既串燒羊肉出黎。串燒蝦有椒鹽調味，而羊肉串燒一D都唔騷，兩樣都唔錯！湯底我地就揀咗牛乳湯，顏色呈奶白色，飲落清清地。等D湯滾起之後，我地就落野食啦！D蠔望落去大大粒，驚放入去淥會縮水，點知淥完之後都仲係飽滿多汁。海鮮拼盤︰又一驚喜之作！拼盤有海蝦、蟹、蚌、鑽石蜆、刀貝蜆、白鱔、龍躉、魷魚、鯇魚，十分豐富，絕對啱哂熱愛海鮮既我！打邊爐冇牛總係好似爭D野咁。呢盤牛頸脊擺盤好靚，夾起一片淥好之後品嚐，就會食到濃郁既牛味，而且有少許厚度，偏向有嚼勁。一片又一片，好快就清哂。墨魚滑同埋蝦滑係我認為無論幾飽都一定要食，因為真係好彈牙，而且仲有墨魚粒同埋蝦肉係入面，真材實料，味道鮮甜。打邊爐有雲吞水餃係基本！呢到既餡料都幾有水準，d皮唔會好重醶水味。食咗咁多肉，一定要食下菜balance下。仲有打邊爐常見既響鈴！如果想飲野，可以問店員拎一樽涼茶，又或者去飲品櫃拎汽水。食完咁多野，最後就係甜品！甜品係黑糖冰涼粉，有別於平時食既黑色涼粉，呢個係透明，而黑糖為這晶瑩剔透既涼粉帶來一絲絲既甜。食完好飽，要捧住個肚去埋單。之後見到呢幅圖，真係非常認同！「同志們，這家雞煲火鍋要常來！」…查看更多

朋友終於完成咗佢既大project，梗係要約出黎賀一賀佢啦～係銅鑼灣地鐵站C出口行幾分鐘就到Ember。門面望落去已經見到ember閃亮既標誌，當中既b就用咗音樂符號代替，好特別。入到去見到燈光都係比較暗，份外突顯餐廳型格既裝潢。每枱都會有一小盞燈，讓你感到特別有情調。現場更有live show，讓人享用晚餐時，可以同時享受音樂。牛肉墨西哥烤餅配酸忌廉，牛油梨醬及蕃茄莎莎：墨西哥烤餅可以選擇雞肉或者牛肉，我地揀咗牛肉。牛肉經調味後，伴有洋蔥、蕃茄、 蘑菇、芝士，再用烤好既餅皮包好。牛肉好juicy，洋蔥唔會好辣，再加上蕃茄、蘑菇同埋芝士既配搭好夾。餅皮因為唔會過薄，烤過後只帶有少許香脆，包起所有餡料放入口就剛好！雖然就咁食都已經好夠味，但係我建議可以點酸忌廉，牛油梨醬同埋蕃茄莎莎呢三種醬汁，為味道添上清新既感覺。烤西班牙黑毛豬扒伴荷蘭豆燒手指薯配燒汁：點呢道菜既時候，店員會問要幾成熟。我地聽從店員既建議點咗七成熟。可能因為七成熟既關係，整塊黑毛豬扒都係比較容易切開，但又唔會見到血淋淋未熟既肉，見到既係令人垂涎欲滴、剛烤好既西班牙黑毛豬扒。放入口咀嚼，肉質鮮嫩而且充滿肉香，唔會食到有筋好韌好難咬。伴菜荷蘭豆、蕃茄同埋手指薯都烤得剛好，完完全全被我清碟。魷魚燒南瓜法邊豆粟米黄金意大利飯伴香煎北海道帶子：呢碟risotto賣相黃黃綠綠咁，有d似小朋友平時食既粟米青豆飯。食落就知道遠比小朋友食既飯好味！粒粒飯粒都染上金黃色係因為有南瓜既緣故。柔軟濕潤既意大利飯帶有南瓜既香甜，配上粒粒香甜黃金粟米，最驚喜係加入咸蛋，增添了少許咸味，令味道更豐富。伴係飯粒中間既青綠色唔係青豆，而係爽脆清甜既法邊豆，絕對係加分既地方。碟risotto精華既地方當然唔少得北海道帶子，面頭鋪咗三隻size都唔細既北海道帶子，肉質肥美，表面煎香，內裏味道鮮甜。Hotel California：我地見呢到有signature cocktail，所以就各自點咗杯。呢杯Hotel California飲落去立即飲到係whisky既味道，溝咗梳打水變得冇咁嗆，再加咗蜜糖同埋菠蘿之後，變得甜甜地，仲有薄荷既清新，唔錯。Tap Sonic：呢杯就完全激起少女心！Gin味道唔嗆，配合茉莉花和接骨木花，味道甜甜地幾夾。飲品入面既花花冰粒，頗為吸睛，啱哂少女。呢到既氣氛十分有情調，而且又可以享受音樂同埋美酒佳餚，係放工過黎輕鬆既好地方。MENU:…查看更多

今日黎到尖沙咀同前輩一齊上堂，落堂之後就一齊黎諾士佛臺既圓山台灣料理食晚飯。上咗一層樓梯之後見到間鋪都幾大下，仲有好多白領放咗工過黎食飯tim~人數多既話可以坐圓枱，大家可以一路食一路傾計。一坐低，店員好快就會黎問飲咩茶，同埋放低一小碟蒜蓉青瓜，味道清清地。因為想食比較有台式味道既小食，所以台式雙拼揀咗彰化鹽水鴨同埋台式鴨舌。彰化鹽水鴨好入味，咸咸地而且肉質嫩滑，唔駛點側邊既白醋都夠好味。台式鴨舌就辣辣地好過癮，少少既肉配搭住少少既軟骨，十分有嚼口。蚵仔煎一上枱就圓圓一餅，可以跟據自己既喜好用刀切開，要幾大切幾大。蛋煎得香之餘，蚵仔飽滿，食落有D似啫喱既口感，幾得意，加咗韭菜之後變得更香。三杯雞係台灣地道既家常菜，每次一上枱，就可以令你垂涎欲滴。三杯係指醬油、麻油同埋米酒。當店員放小砂鍋上枱時，仍然吱吱作響，熱力令到香味更撲鼻。雞件被均勻地染至上色，顯得出每件雞件都十分入味，而且唔會鞋口，十分嫩滑惹味。見有咁多美味既小菜，所以叫咗碗台式滷肉飯。飯上面有兩塊滷肉，肥美既豬肉透著油光，加上香濃既醬汁。雖然感覺好肥，但係你會忍唔住放入口。食完之後，你會嫌兩塊實在太少。流沙包係我每次去飲茶都一定會叫既點心，見呢到有，即刻叫咗一籠。可以叫店員後上，留待飯後享用。一籠有三個流沙包，用手分開，立即見到入面既餡想流出黎。流沙包能夠做到真正既流沙，絕對唔係間間餐廳都做到，呢到就絕對合格啦！趁熱食，軟熟既包入面有充滿蛋黃香味既流沙餡，值得推介！呢到茶錢每位$16，另有加一服務費，今餐埋單total $508。今晚能夠同前輩食飯，聽住前輩既分享教導，又食到一餐咁美味既晚飯，真係好有得著，好滿足！MENU︰…查看更多

今日同朋友仔去新蒲崗為咗份功課做資料搜集，到咗夜晚就順便食埋飯先返屋企。見天氣涼涼地，經過又見到燒皇燒烤雞煲專門店，就諗起好耐冇食雞煲，所以就入去食。入到店鋪入面，見地方唔大，但係D客就絡繹不絕。我同朋友仔都喜愛食辣，所以點咗麻辣雞煲，為咗可以留肚食多d野，叫咗半份雞。呢到有得揀要幾麻、要幾辣、需唔需要走芫荽、洋蔥等。我地驚太辣太麻，但又唔想BB麻BB辣，所以我地揀咗小辣，朋友仔唔食芫荽同埋洋蔥，所以揀埋走芫荽走洋蔥。師傅炒好個雞煲之後先上枱，令到個雞煲更香。上枱之後，店員仲會開爐幫手撈一撈，再焗一焗，務求令個雞煲完全熟透，但又唔會過熟影響肉質。所以焗完一開蓋，麻辣雞煲既香味立即撲鼻，香、麻、辣俱全，肉質嫩滑，令人冇辦法停手，食完再食。不過我地都認為我地揀得太保守，下次可以揀中辣，過一過癮。食完雞煲之後，店員就加湯預備打邊爐。配料雙拼($34)揀咗魚皮餃同埋芝心丸，都係我打邊爐常食既配料。手打墨魚滑可以隨自己喜好分大細size，淥好後食落口感彈牙，墨魚味香。自家水餃餡料有木耳絲、豬肉碎、椰菜絲，十分清甜，但略嫌水餃皮鹼水味較濃。呢到除咗雞煲之外，串燒都係非常出名，所以我地就叫咗一D串燒黎試下。首先黎到既有燒牛舌同埋燒牛柳粒。燒牛舌肉質有咬口、帶韌勁。燒牛柳粒外表金黃香脆，內裏顏色仍帶粉紅，燒得啱啱好，唔會過熟，所以咬落去充滿肉汁，唔會過韌。燒牛舌同埋燒牛柳粒兩者雖然口感不同，但都可以食得出串燒透過燒烤後，表面的醃料散發出閃閃油光，變得十分惹味！平時好鍾意食金菇肥牛卷，所以點咗串燒金菇牛肉卷。味道甜甜地，仲多咗燒烤而有既惹味。BBQ最鍾意燒茄子，呢到有川燒特大茄子，立即點客黎食。川燒可以揀辣度，如果冇特別要求，可以揀小辣。上枱個刻就見到茄子既size好大條，兩個人share食就唔驚唔夠食啦！茄子面頭鋪滿蒜粒，再撒上少許蔥花，茄子肉燒得好淋，醃料調味得剛好，食到我地舐舐脷！食咗咁多肉，點咗個燒金菠蘿黎清一清個口腔。金菠蘿燒完之後，依然多汁，清甜唔酸。店員推介呢到既燒海鮮唔錯，我地都叫咗D黎試下。燒蟶子皇$100有三隻，見價錢幾抵就叫咗三隻。店員講到明燒海鮮要等一段時間，因為海鮮要清洗要一D時間。話明係蟶子皇，貨真價實，size真係好大，肉質飽滿而且爽口彈牙有嚼勁。店鋪用咗蒜粒、辣椒粒同埋蔥花作調味，但海鮮獨有既鮮甜係遮蓋唔到！ 另外，我地又叫咗燒大扇貝，都係$100三隻。燒大扇貝都係用蒜粒、辣椒粒同埋蔥花作調味。大大粒既扇貝燒得剛剛好，唔會好韌，鮮甜惹味到我覺得爭緊D粉絲或者白飯！海鮮大多都係時價，所以可以留意下店內張貼或者問下店員價錢。除咗美味雞煲之外，串燒、燒海鮮都好高質。店員仲推介我地下次黎，可以試下椰子雞煲，因為夠滋潤，啱哂宜家乾燥既天氣。雖然呢間店舖細小，但係卻見到都幾多人黎食，高峰時期仲會有幾枱人係門外等位tim，我諗除咗因為D食物好味之外，仲因為店員友善殷勤既服務態度，唔係一般連鎖店可以感受到既感覺！MENU:…查看更多

黎到九龍灣陪朋友報完補習之後，就係呢到附近搵食。係得寶商場入面見到間好日式既門口，我地就決定今晚係大漁屋台享用我地既晚餐啦！坐底見到師傅忙碌咁預備食物，感覺同置身係日本小店一樣。啱啱開門做晚市，我地一坐低就即刻點野食。先黎一個刺身季節沙律，除咗有新鮮爽脆既沙律菜同埋車厘茄之外，仲有新鮮刺身如甜蝦、三文魚、八爪魚、三文魚籽同埋蟹籽，配起柚子醋混和後，整碟沙律都變得份外鮮味，作為前菜認真唔錯！食過沙律中的刺身，都感覺呢到提供既食材都十分新鮮，所以我地就叫咗少許刺身，有真鯛、赤身、三文魚。真鯛如白色外表一樣，味道比較清淡但口感鮮甜。赤身則脂肪較少，肉質結實有嚼口。三文魚同赤身一樣厚切，紋理呈現出脂肪分佈得好靚，放入口裏面，感覺份外肥美。見關東煮價錢唔貴，所以就叫咗蟹餅、板魚旦、鵪春蛋同埋大根，每樣都係$10串，好抵！大根即係白蘿蔔，十分厚切，盡吸湯汁既味道。蟹餅同埋板魚旦都口感彈牙，十分入味。鵪春蛋外表細細粒卻不失蛋香，十分過癮！鍾情軟殼蟹既朋友仔叫咗碟軟殼蟹水菜卷。軟殼蟹炸得十分酥香，與清新爽脆既水菜配搭得剛好，再用被蟹籽鋪滿既飯和紫菜卷起，賣相與味道都十分不錯～我地仲叫咗幾串串燒黎食下。鯖魚串燒燒得剛好，皮脆肉嫩。一口蕃薯可以一啖一粒，食落甜甜地但唔怕太濟。冬菇燒完唔會亁，好多汁，表面更有木魚絲tim～最後就叫咗個主食：什錦天婦羅手打烏冬。什錦天婦羅有蝦、茄子、南瓜、冬菇等，而手打烏冬口感彈牙，湯汁味濃，配上紫菜、板魚旦、紅蘿蔔、蔥花，十分驚喜。係一個小小的商場入面既一間小鋪享用到一頓美味既日式晚飯，真係十分意想不到！MENU︰…查看更多

就黎跟學校去交流團，所以約埋同學仔一齊黎尖沙咀找換店兌定D外幣，順個便就係附近搵埋食。今次揀咗係嵐橋食日式丼飯。從門外睇呢間鋪，已經見到充滿日式味道既門口。六點黎到啱啱開門做晚市，所以係門口等咗一陣等店員收拾好先入去。店內既裝飾都好有日本既風味，令人感覺置身係日本既小店進餐中。一坐低，店員就端來每人一杯茶，溫熱既日本茶入口甘香，先暖一暖身。再來一碗麵豉湯，本來我個人幾抗拒麵豉湯，因為試過係其他餐廳飲過超咸既麵豉湯，今次一飲，發覺原來麵豉湯唔一定係超咸！內有豆腐粒、油豆腐絲、海帶，都幾足料，幾好飲！雖然係呢到，主角係丼飯，但係喺呢個咁有日式風味既餐廳入面，都叫咗D關東煮黎食。關東煮既炸魚餅同埋油揚味道清淡，所以旁邊有一小碟裝有芥末醬，點咗之後，味道又真係變得唔錯喎！除咗關東煮，我地仲叫咗大阪關西流行既小食︰串揚！我地叫咗半熟玉子同埋豆腐，串揚就係類似天婦羅但係就好似串燒咁用竹籤串起。不過，半熟玉子放在匙羹上應該比起用竹籤串起好，因為若然用竹籤串起，裏面既蛋汁應該會漏哂出黎、冇哂！豆腐本身十分嫩滑，係表面沾上炸漿炸起，又薄又脆既外表，與嫩滑既內裏，相映成趣。味道有點淡，點起側邊既醬汁黎食，味道剛好。半熟玉子同樣地外表披住一層薄薄既香脆炸皮，但內裏保持住半熟既狀態。火候真係控制得好好，蛋白剛熟呈滑彈既狀態，中心既蛋黃卻蠢蠢欲動想漏出來，所以一定要盡快將半熟玉子放入口裏面品嚐！主角終於出場啦！一見到有蟹食，就急不及待點咗個北海蟹丼。d料多到遮哂d飯，而且真係見到蟹蓋同埋蟹鉗㗎！蔥花吞拿魚蓉口感好細膩，咀嚼下滲出淡淡蔥花既香味，而三文魚紋理分明，脂肪與肉既比例剛好，與三文魚籽同樣十分新鮮。海膽鮮甜，若然份量再多d就更好！話明係北海蟹丼，就一定唔少得蟹啦！一隻甲羅燒裏面裝有香濃味美既蟹膏，撈埋蟹籽一齊食，特別滋味。而松葉蟹肉已拆好，可以放係口入面品嚐到啖啖蟹肉既鮮甜，令人心情尤其興奮～視覺上仲可以見到師傅擺放得好有心機既四隻松葉蟹鉗，拎起仍然見到一大塊蟹鉗肉，忍唔住要大咬一口。丼飯飯底可以揀赤醋壽司飯、冬菇赤醋壽司飯同埋麻油白飯，我揀咗赤醋壽司飯，食得出係選用咗日本米，粒粒飽滿，香口開胃。整體而言，整碗北海道蟹丼都好值得再encore！同學仔點了黑松露帆立貝鵝肝丼。就咁聽個名︰黑松露、帆立貝、鵝肝，通通都好啱我胃口。呢個飯丼同樣有蔥花吞拿魚蓉同埋三文魚籽，主角當然係帆立貝同埋鵝肝啦！因為帆立貝同埋鵝肝各有四塊，所以我忍唔住夾咗黎試下。一試之下，就覺得同學仔叫呢個飯丼真係冇叫錯！帆立貝先微微炭燒了表面，再係上面配有少許黑松露，保存到彈牙既口感之餘，新鮮既味道再加上因炭燒而有既香味，再配有畫龍點睛之效既黑松露，感覺係人間美味！而鵝肝同樣因煎過而變得更香，放入口中咀嚼，香氣立即充滿咗整個口腔！下次再黎可以試下叫呢個~走既時候，天已經黑啦~雖然聽日又係一個忙碌既一日，但係能夠食到美食，感覺就好似為自己叉咗電咁，充滿力量！嵐橋丼飯專門店，絕對值得encore！MENU:…查看更多

同朋友黎到銅鑼灣想食韓國野，但唔想過去尖沙咀，所以就搵下銅鑼灣有咩韓國餐廳。係銅鑼灣C出口一出就見到對面係駱克駅，二樓有一間叫Bingo&Cook，正正就係韓國餐廳，啱哂我地！入面地方寬敞，坐低係座位既時候，可以見到開放式廚房入面既廚師係到烹調緊食物。店入面既佈置都充滿童真～除咗有公仔擺設之外，仲有色彩繽紛既壁畫，望落令人感到好舒服。肚仔餓既我地好彩唔駛等好耐就已經有得開餐啦！朋友話叫個『彈彈麵』，我開頭聽錯咗係『擔擔麵』，心諗：『黎韓國餐廳食咩四川野？』原來係我諗錯咗！係韓式既『彈彈麵』~原隻炸魷魚彈彈麵真係有原隻炸魷魚係面，上咗枱之後，店員先會用剪刀剪開隻魷魚。等店員剪開之後，我地就開動啦！魷魚炸完之後，唔會有好厚既炸粉係面，食落去除咗彈牙有嚼勁之外，仲食到魷魚獨特既香味，好香口。而『彈彈麵』麵條既質感十分彈牙，名副其實，絕不欺場。夾起每啖都掛有湯汁，微辣，十分過癮！我非常鍾意食韓式煎餅，呢到既煎餅選擇有幾款，我地就揀咗烤牛肉韭菜餅，一上枱就見到塊煎餅都幾大塊，份量唔少，仲有一小碟醬汁去點。就咁望，見到韭菜份量都幾多下。夾起一塊黎試，韭菜味又唔算突出喎。大概係因為烤牛肉既香味非常出眾，蓋過了韭菜既味道。烤牛肉充滿肉汁，十分juicy，味道剛好，我覺得唔駛點醬汁已經非常夠味。煎餅唔會用過多粉漿，煎得好香，點下D醬汁，就好似食到韓燒既感覺，好好味！韓式既無骨烤雞出名好食，我地見呢到有，就梗係點咗一份黎食啦！呢到有得揀原味、甜辣醬、醬油，我地揀咗甜辣醬。上咗枱之後，我地見到仲有四隻小碟裝住D醬汁可以隨個人喜好去點。有烤肉醬汁、芥末醬、沙律醬同埋韓式辣醬，仲有一小碟裝住用紅菜頭汁醃製過既蘿蔔，食落酸酸甜甜，非常開胃。無骨烤雞食落唔駛吐骨，非常方便，而且只係烤焗，冇被炸過，冇炸雞咁熱氣。雞塊面頭塗上甜辣醬，被烤至金黃色，有少許花生碎粒鋪面，甜辣醬味道剛好，唔駛點其他醬汁，就咁食就已經非常滋味，而且烤雞十分嫩滑，一D都唔老，唔駛怕食到D好鞋既肉。除咗烤雞，估唔到D配料都好有驚喜！像雞蛋般大既小薯仔被烤過之後，馬鈴薯既香味被帶出，口感綿密柔和，鬆軟美味。烤粟米雖然烤過後唔會似就咁水煮咁多汁，但係呢到烤得剛好，唔會乾爭爭，而且粟米被烤過之後，顯得分外香甜。我個人十分推介呢碟韓式既無骨烤雞！平時食開韓式炒粉絲，見到MENU有芝士炒粉絲咁得意，所以特登叫黎試下。上到枱之後，見到碟炒粉絲面頭就已經有芝士絲，攪勻之後夾起會有拉絲既效果。我個人都頗喜愛食韓式炒粉絲，估唔到芝士炒粉絲卻意外地好味，味道一D都冇違和感，而且除咗平時常見既香菇絲之外，仲加入海鮮配料，有蠔、蜆、魷魚等，份量唔少，令到整個炒粉絲除咗多咗芝士既香味之外，仲有海鮮既鮮甜，令到口感彈牙既韓式粉絲味道更豐富。食完呢餐之後，我知道除咗尖沙咀之外，銅鑼灣都可以食到美味既韓國菜！下次一定要再黎~MENU︰…查看更多