LeslieFung6871的个人专页

入去餐廳見到星期一至四 3-6有個A La Brasa Sandwich 買一送一，當時時間係5:52，咁我就即刻問個店員可唔可以叫呢個，佢猶豫左一陣，之後再去問人，最終俾我叫呢個買一送一優惠（其實我唔明點解要問，因為真係未夠6點）。咁個menu寫住個A La Brasa Sandwich 係$98，到埋單時竟然見到張單寫$168，咁當然問返點解個價錢同menu唔同，佢就答我地係side dish錢。嘩大佬，首先我地冇叫過side dish，再者個side dish只不過係一堆薯條，會唔會值70蚊呀？！喺香港食飯服務差食物難食嘅餐廳就遇得多，咁樣呃人錢嘅真係好耐未試過，大家入去時真係要三思。…查看更多

今次去中環試吓由摩洛哥開過嚟嘅Bacha Coffee☕️ 裝修光鮮得嚟又有啲摩洛哥風情🇲🇦叫takeaway coffee有勁多隻味道揀，咁我就嗌咗杯Tolteca Chocolate Coffee。咖啡味道偏淡，有少少朱古力味，不過唔知點解覺得有云尼拿味，味道一般😗店員建議飲一啖咖啡之後再加cream落去，我反而覺得個cream又香又滑，出色過杯咖啡。佢仲會送一枝咖啡糖，支咖啡糖浸落咖啡度慢慢溶，啲甜味會慢慢出嚟，都幾得意😎整體嚟講，個裝修優秀過杯咖啡好多，影幅相幫襯一次都好足夠😉另外入面有好多咖啡賣，不過價錢一啲都唔平，我自己就唔係好捨得買😜推介指數7/10…查看更多

天后清風街天橋開咗間好有氣氛嘅居酒屋，逢星期二仲有live band music聽，今次去咁啱係星期二，有得聽音樂，個主音唱功真係好得👍成間餐廳氣氛都好高漲，仲有食客唱埋一份，好high好正😆食物方面，當然有刺身同埋串燒啦，除此之外，頭盤叫咗個三文魚冰頭漬，之前未食過，酸甜爽口味道幾得意。白松露薯仔沙律好香松露味，配搭幾新鮮。海膽炒飯啲海膽份量好generous，海膽係最後先加落啲炒飯度，可以食到新鮮海膽嘅鮮味，超正😍仲有個燒鱔膽燒廣島蠔都好好食， 之後仲叫咗金菇牛油煮蜆，最後有朱古力蛋糕同芝士蛋糕做甜品，成餐飯好圓滿😊香港有live band 聽嘅餐廳真係越嚟越少，好似酒屋一杯喜咁有氣氛，裝修又有特色，真係好啱一班朋友吹水聚舊！老闆好熱情好客，第一次幫襯就已經同我傾咗好多個計、向我提及開呢間餐廳嘅理念係希望客人最緊要係食得開心，無論係幫襯一杯酒又或者食一碗拉麵，都可以享受餐廳營造出嚟嘅氣氛。我覺得喺香港咁難經營餐廳嘅環境之下，仍然去用心投身餐飲業，實在非常難得，值得多多支持！…查看更多

一起食堂 (軒尼詩道) (灣仔)灣仔軒尼詩道153號地舖喺灣仔軒尼詩道想搵餐飯食，見一起食堂門面幾光鮮，就入去試吓啦。我地一行二人叫咗花雕麻油雞湯麵同埋紅燒三寶牛肉麵，兩碗都有驚喜。首先個個花雕麻油雞係要自己淋酒落碗麵度，充滿儀式感。個紅燒三寶牛肉麵入面粒牛丸超有牛肉味，仲有個牛𦟌都好入味，唔錯唔錯👍🏼最後食左個黃金芋泥球，入面係會有流心奶黃，非常之特別，不過食嘅時候記住唔好燙到個嘴呀💋整體食物質素唔錯，環境企理，值得推介😃…查看更多

11月又係秋刀魚當做嘅季節🐟，今次食呢個廚師發辦有兩款都係用秋刀魚整嘅菜式，一款就係秋刀魚壽司，另外一款係將紫蘇葉夾埋落秋刀魚入面食，食到秋刀魚香味得嚟仲多咗層紫蘇葉味，感覺好清新。😋而我覺得今餐最驚喜嘅係白子，平時好少會叫呢樣嘢，而今次我食嘅白子佢話係高級白子，食落口好Creamy，好似忌廉咁樣嘅質感好滑好綿，師傅先將白子炭烤到熱咗先再放落一細啖飯上面，撈埋食令到白子少咗份肥膩嘅感覺，非常配合！仲要講嘅係香箱蟹🦀，即係雌性嘅松葉蟹，同大閘蟹一樣嘅松葉蟹蟹膏都係一粒粒嘅，蟹膏同蟹肉撈埋一齊食，好香好好食，上面佢仲要擺咗少少紫蘇花，令到個層次好豐富。其實佢每一款壽司都做得一絲不苟，無論係海膽，抑或係吞拿魚腩，又或者係平時唔係好貴嘅北寄貝，每一款食材都好新鮮好好味，絕對係我食過最好食嘅Omakase。師傅好friendly好好傾，每款壽司都同我講解得好仔細，好似上咗一堂Omakase Lecture咁，獲益良多。🙇‍♂️…查看更多

經過大圍入咗去呢間二兄車麵館，佢喺大圍火車站一直行去到油站嗰度，位置都算幾方便。今次同朋友去叫咗個咗個招牌大碗麵同埋籠仔荷葉蒸蝦球飯。招牌大碗麵有得揀湯底，我揀咗沙嗲湯底，個湯底好濃，入面啲餸有豬皮蘿蔔、紅腸、咖喱魚蛋、雞翼、雞翼尖，每樣餸個水準都唔差，個豬皮好入味，另外最好食嘅係雞翼尖，醃得好好食😋本身仲諗住專登叫個雞翼尖外賣，不過好可惜佢話雞翼尖淨係可以配車仔麵，冇得就咁嗌。另外嗌咗個籠仔飯，份量好足，一個人食嘅話超級飽。…查看更多

喺時代廣場附近見到呢一間漢堡包店咁就入去試吓啦。我嗌咗個和牛漢堡，要$119，佢嘅牛肉係幾好食嘅，不過我覺得佢個包太大個，肉嘅份量太細，唔感覺比較吝嗇。之後嗌咗個古代漢堡，個肉就唔係特別好食不過塊肉個size就大返啲，呢個叫左combo跟埋薯條，但係個薯條一啲都唔好食，我覺得麥當勞嘅薯條好食過佢:(另外我哋跟餐嗌咗杯嘢飲要$35一杯，係一杯黑加倫子土茶，但係其實呢我就覺得個味道非常普通，個價錢亦都幾貴，唔係咁值。我個人認為間餐廳食物質素唔高，價錢亦都唔平，唯一好處就係近時代廣場行完街好方便咁樣可以落嚟食個漢堡不過講真附近大把選擇，真係唔需要去食呢一間餐廳。…查看更多

之前睇YouTube見到啲人介紹呢一間茶餐廳，其實我搭電車成日都經過，不過有冇機會落車去食，今次就專登嚟食佢最出名嘅燒春雞。佢隻燒春雞堅係好好食，皮脆肉嫩，又唔會燒得好乾，隻雞好多肉汁好Juicy。最正係佢俾埋手套你，預咗你成隻雞用手撕開嚟食，個感覺好治癒。佢仲有華鹽同埋類似麥當勞嘅泰式辣醬俾你沾嚟食，不過我覺得唔使沾都已經好好食喇。隻雞個份量唔細，都係賣$86，真係超抵食！不過喺環境方面就真係扣晒分啦，入到去唔知係邊度傳來有一浸煙味，同埋個感覺都幾污糟，餐廳嘅夥計都比較粗魯，不過將貨就價啦，俾咗佢隻雞份上，呢個價錢都係值得嘅…查看更多

兩草之前喺大坑嘅時候成日去食架！而家佢搬咗嚟旺角咁耐第一次再食返，個肉餅飯依然都係咁好食，不過印象中好似加咗少少價🤑肉餅飯個肉餅好彈牙，另外個蛋煎得好脆，個豉油又好好味。另外，我哋仲叫咗豬腸粉、香煎豬扒飯同埋咖央西多士，其餘三樣嘢我就覺得一般啦，冇咁出色。不過咁耐冇食過可以食返係開心嘅😃環境方面，我覺都坐得幾迫，佢成間餐廳都係用摺檯，行出行入條走廊好窄。一路播住7、80年代嘅廣東歌，好有懷舊香港味道。整體嚟講，如果我再去旺角嘅話我都會再去食嘅，因為佢嘅價錢都算係幾抵👍🏼…查看更多

來大坑一定要試吓順興茶餐廳嘅滑蛋叉燒飯，我已經食過好多次，我相信佢係全香港最好食嘅我的叉燒飯😋特別係佢嘅豉油，零舍好食。環境方面，都係坐得迫夾夾咁樣㗎啦，食完都係要快快手走柯達叉燒飯要六十幾蚊，抵唔抵食就見仁見智啦。同埋我好鍾意飲佢嘅凍檸茶，我覺得佢嘅茶底係幾好飲嘅。不過我最唔鍾意呢間餐廳嘅係佢嘅服務態度，個老闆娘成日喺度呼呼喝喝咁樣講嘢，又大聲冇乜禮貌，如果唔係佢嘅滑蛋叉燒飯咁好食，我都唔想嚟受佢氣😤…查看更多

水門雞飯差唔多係我飯堂咁滯，因為佢喺銅鑼灣來講價錢算唔貴，同埋我覺得間餐廳好有泰國風情🇹🇭個雞飯就係好似我地平時喺泰國food court食嘅雞飯一樣，正常發揮，不過不失，唔係特別好食，但係放得入口有餘。當然價錢係唔可以同泰國比啦，泰國我諗50泰銖可以食到，呢度要$54港紙💰除咗雞飯之外，水門雞飯最吸引我嘅係佢嘅飲品，有我最鍾意嘅泰式奶茶同埋龍眼冰，佢調出嚟嘅味道都同泰國好相似。另外，間餐廳一路播住泰文歌，令我覺得自己身處泰國一樣，係加分嘅地方。…查看更多

返工有時都會想食好啲，通常就會揀呢間穴食lunch。喺新城市食飯，你都唔可以預佢平㗎啦，呢個lunch set都係一個新城市廣場嘅價位，我嗌咗個雜錦魚生飯，趁係日本未排放核污水之前食返餐魚生先。個魚生飯有八款唔同嘅刺身，包括有三文魚、章紅魚、赤身、劍魚、三文魚子、蟹子，仲有蝦，咁我覺得以$188嚟講，魚生都切得幾好幾大塊，算係有啲誠意。個套餐仲包括左沙律前菜、麵豉湯同埋一個厥餅，都係香港日式餐廳例牌野啦。坦白講，如果我放假，我諗我會食返啲性價比高啲，同埋有風味啲嘅小店餐廳囉😚…查看更多

Baka burger 絕對係我食過最抵食CP值最高嘅漢堡包店！佢嘅位置喺銅鑼灣街市附近，喺條巷仔度你未去過嘅話絕對唔會搵到嗰個位，就係呢個咁陰暗嘅行仔入面有一間超高質嘅漢堡包小店，佢嘅門面唔係好特別好吸引，但係佢嘅漢堡包真係冇得輸😍我唔係成日食漢堡包，唔識得點樣形容一個好食嘅漢堡包要即係點，但係講到signature笨蛋漢堡，無論佢嘅肉同埋佢個包配搭出嚟都係好好食。牛肉肉質好夠牛味，個sauce又調得非常出色，個包呢我覺得佢嘅牛油係適中，唔會太多唔會太少，感覺啱啱好，match出嚟係非常好食😋最緊要一樣嘢就係佢嘅價錢好抵食呀！70幾蚊已經可以食到一個漢堡包加埋薯條同埋可樂，佢嘅可樂仲要係樽裝汽水。我希望多啲人可以知道有呢間漢堡包店存在，因為我覺得佢哋真係好用心製作。…查看更多

之前睇網上某平台介紹過呢間天龍燒鵝講到佢好巴閉，所以今次我專登嚟灣仔試吓佢。我哋一行二人一個嗌咗燒鵝叉燒雙拼飯二另外一個就嗌咗油雞乳豬相平飯，即係總共試咗佢四款燒味。我覺得最普通嘅係個叉燒，因為佢俾咗啲好瘦嘅叉燒我，不過個叉燒都好好味嘅，只不過係啲肉唔夠肥食落去比較柴咗少少。而個燒鵝嗰塊皮真係非常之香佢驚我油味好突出好好食之後呢就到乳豬，估唔到我夜晚去食都仲有乳豬，因為好多燒味舖啲乳豬都好快就賣晒，之後講埋個油雞都好好食，雞肉好滑。😋今次天龍燒鵝冇令我失望，喺我呢個燒味怪魔舌頭之下都覺得好好食，下次一定會再幫襯。…查看更多

呢間扒房已經係第二次嚟㗎啦！上次嚟都係因為有匯豐restaurant dining week所以先至知道有呢間餐廳😋呢間餐廳個裝修好典雅，位置好闊落，喺香港好少有咁闊落嘅餐廳。講番啲食物，我哋嗌嘅係最平$438 promotion嘅套餐，有前菜，塊扒呢就係四安士嘅牛柳，仲有side dish可以揀菠菜芝士同埋薯蓉，我兩款都叫晒😀另外甜品方面，可以揀芝士蛋糕或者雪糕芭菲，我哋就揀咗芝士蛋糕。首先講個前菜我哋嗌咗一個carpaccios 同埋周打蟹湯，兩個都非常出色好好食。我仲想特別一提係佢嘅餐包，係熱辣辣好煙靭，個牛油亦都好香。之後到塊扒，我哋嗌嘅係medium，佢真係整得好香好好食，同埋佢隻碟係好熱嘅，我唔知佢係用咩嘢方法你去到處理呢一舊牛柳😅最後個甜品芝士蛋糕，非常好食，唔算好甜。另外佢喺個芝士蛋糕上面有一層好似乳酪咁嘅嘢，中和返蛋糕入面嘅甜味。順帶一提，佢嘅服務係好好👍🏼我兩次嚟所有員工都好好笑容，我覺得而家喺香港搵到啲服務咁好嘅餐廳真係越來越少，要好好珍惜。…查看更多