TamcmanGugu的个人专页

平時好少行呢到，有一次經過見到呢間餐廳未食過，今次就試下外賣自取，叫左一個番茄牛肉麵，去到餐廳攞外賣既時候，店面好多空位，外賣就咁擺哂係收銀個到冇人理，阿姐都唔會行出黎，我都心知不妙。返到去打開個外賣，麵餅又硬又乾，浸左係個湯到好耐先淋返，個湯偏油，有1/4個番茄，3小粒牛肉，配菜份量多，但唔飽肚。我係食牛肉麵唔係食配菜，咁既質素同份量，加埋外賣盒既錢，一共$60，非常嬲，完全唔知食左d咩，中環大把選擇，唔會再幫襯呢間。…查看更多

係門口攞飛，見到入面有幾張吉枱，侍應都冇安排入座，後來要入去問佢就即刻入得。入到去明明係新開張，但係環境有d污糟，可能因為實在唔夠人做，d客走左都冇人執枱，得一個廚房阿姐得閒先出黎抹枱。之後用手機落單叫左2個餐，足足等左45分鐘先黎第一個餐，然後用10分鐘食完，繼續等下一個餐，前前後後淨係等，都用左1個鐘。食物味道都ok，可惜份量太少，性價比低。難為左個侍應，成間餐廳樓面得佢一個，個個都等餐等勁耐，佢都只能愛莫能助。…查看更多

之前經過見到有位阿叔派傳單宣傳，先知呢個舖位轉左手，見新開張就試下。厚切牛舌飯$68，包餐湯。一打開個蓋就好香燒牛舌既味，牛舌仲好諗，好好食，不過菜就少左d，蘑菇湯都好好飲，飲到一粒粒打碎左既蘑菇，攞到返office 都仲好熱。店入面職員都好有禮貌，有位阿叔會親自攞外賣出黎俾我。有趣既係，外賣袋係寫「阿元來了」😂唔知佢地有咩關係…查看更多

menu 上面寫$148，6折完好似好抵，錯！因為個侍應每問你一樣野，都係要加錢！我落左個餐：「唔該一個beef burger。」個女人就會問：「飲咩湯呀？今日係蘑菇湯同番茄湯。」我答：「蘑菇湯。」☝🏻呢到已經要+$30之後個女人會再問：「飲品要咩？我地有xxxxx，最多人叫cappuccino bla bla bla」我話：「諗諗先。」到我差唔多食完，個女人又黎問我：「你飲品未落喎，要唔要依家落埋？」我已經覺得奇怪，好彩我唔想飲，我話唔洗。☝🏻如果你答左佢，再+$30全程個女人問得好自然，由頭到尾都冇講要加錢，最後埋單同冇6折差唔多，因為仲要按原價加一😊😊😊 我個日坐近門口位，出面d車經過嘈到不得了，D野又唔好食，個beef burger得個鹹字，食麥記仲好啦。做生意唔老實，環境差，食物難食，blacklist。…查看更多

睇到好多人推薦呢間cafe，可以打卡，原來真係只係for 打卡，星期六12:00黎到已經有人龍，好多人都book左位，但係我地冇book，好彩都有位，不過係bar 枱，望住街景都幾舒服。之後侍應攞menu黎，好快咁解釋左一次俾我地聽個set 係點叫，簡好左就要自己出去點餐，又要再排隊，排左5-8分鐘，之後等左5-10分鐘左右就上菜，完全冇服務都要加一。食物方面，擺盤幾靚，但又唔係特別到要特登黎打卡，但係食物真係迷你size，3品料理$88，呢個4品料理$108，再加一，仲有最低消費每人$100，後來我地加杯茶，少到一啖飲完，跟餐飲品半價$14，埋單$200幾蚊完全食唔飽，又唔係特別好食，仲要限時1.5鐘，呢間野試一次就算。…查看更多

平日lunch 過黎食，唔使排隊，服務態度一般，餐牌都冇，直接用手機落單，好在唔使加一。今次叫左味千沾麵 $65，等左5-10分鐘就有，其實賣相就一般般，但係真係唔好食，拉麵好淋冇彈性，個湯好稀，完全唔掛麵，叉燒比較瘦，個碗蔥其實唔係好夾😂整體來講，除非冇選擇/好趕時間，否則唔會再食味千。…查看更多

聽講呢間哈豆都幾出名，係觀塘既工廠大廈都有兩間分店，今日終於慕名而來，location 方面，本身都驚遠，但原來地鐵站行過黎只係5-10分鐘，仲要出lift一開門左手邊就係😂完全唔使搵黎搵去，都幾方便。今日19:30 左右夜晚黎食唔算多人，唔使等位，入到黎隨便坐。坐底左之後，自己將想order既食物number填係落單紙到，可以寫埋飲品既甜度同埋凍熱，之後攞出去點餐區俾錢，服務態度幾好，有禮貌。不過佢地似係即叫即整，所以除左飲品係好快有之外，食物都等左10分鐘先到。食物方面，整體質素都唔錯。逢甲鹹酥雞肉燥飯 - 呢個飯幾驚喜😆食鹹酥雞最怕太鹹又熱氣，呢個完全唔會，又炸到岩岩好，軟硬適中，肉燥飯本身以為好似其他餐廳咁，得一堆係飯上面，點知呢個肉燥份量幾多，又係唔會太鹹，仲可以撈飯食，好好味😋豐盛台灣牛肉湯麵（牛肉、貢丸、花枝丸）- 呢個麵少少貴$72，但係又好足料，個湯係好香既牛肉味，仲有少少似藥膳湯，飲完唔會口渴，麵就正常普通既粗扁麵，牛肉竟然係用牛𦟌😳俾靚野唔怪得之要$72😂牛𦟌好好味，切得夠厚身，4舊牛𦟌入面得一小部分係筋，好易咬，另外三粒丸最特別係牛丸，好彈牙好juicy，咁既質素即刻覺得抵食👍🏻最後，仲叫左小食 清境和牛薯餅 - 和牛味比較淡，但反而有少少奶味，薯餅唔會炸得好熱氣。飲品方面都唔錯，叫左黑糖薑母茶同仙草豆漿，跟餐+$6就有，仲要大大杯，薑母茶真係有薑係底😂真材實料，仙草豆漿既仙草都好大塊，要自己整碎佢，豆漿幾好味。整體來講，呢間哈豆食物質素好，價錢親民，真心好過其他大集團台式餐廳，如果係附近返工，就真係可以成日黎幫襯，叫佢得兩個後生仔撐哂成個場，仲可以咁有禮貌，我下次都會再幫襯支持下😊…查看更多

星期六黎啟德行下，點知原來冇咩野食，就是但入黎itamomo，得2張飛10-15分鐘到有位，不過都要搭枱，但係成個體驗都麻麻地。d侍應好似好亂咁，落單既時候，樣樣都冇，又唔係個menu寫，結果又要重新諗過食咩，送菜又好快，不過有幾次送錯枱，之後又過嚟換menu，換完又話換錯左，成餐飯不停有侍應過黎都幾煩，枱又唔係大，仲要搭枱。食物方面都過得去，$5x左右，牛肉飯都幾多牛肉，仲有隻溫泉蛋，都幾好食，另外黑松露雞肉飯份量都多，不過食得多就膩，呢個價錢仲包飲品都ok。…查看更多

今次係book 左酒店，package包二人下午茶，滿心歡喜黎食，星期五冇咩人，坐得幾舒服，服務態度都唔錯，一開始朱古力火鍋、蝴蝶酥都ok。之後我叫左杯watermelon green tea，一飲冇味既？成杯係水+幾粒西瓜，我就費時煩冇要求換一杯。三層架既下午茶黎啦，食左頂層d scone 之後，諗住攞底層既三文治，點知中間個層板冧左，成個中間層食物跌哂落地，一開始仲以為係自己撞跌，但睇返相，原來係本身佢個板冇放好，係靠底層三文治夾定住，唔怪得啦，好過份，點會做野咁求奇。最後個侍應話佢地既下午茶定好左份量，所以冇多，不過補返兩個signature 既cake 俾我地，我地就ok 既，因為本身都唔好食，甜點太甜，就算後補既cake 都好甜，真係冇下次。…查看更多

第一次黎食，因為太肚餓，所以17:30 左右黎到，冇咩人唔使等位，員工態度一般般，做到基本服務。今次叫左個意粉同安格斯漢堡，大約$130一份，份量比出面既西式餐廳多，味道都唔錯，意粉唔會太鹹，burger 好好食，中間舊安格斯幾厚身又juicy，仲有磨菇好大舊好有口感，包皮係脆底，仲有薯條好多😂應該係我食過份量最多既一間，配酸瓜醬或者茄汁都好味。重點係，$38就有500ml既啤酒，非常抵。最後埋單$334，坐得舒服，幾chill，食物質素又好，下次再黎。…查看更多

之前星期六12:00 諗住黎食，已經要排長龍，放棄左，今日星期四12:15 黎到唔使排隊，即刻衝入去😂但係到12:20 出面已經排緊10個人，真係誇張。坐底左，自己填紙落車，基本上台面得筷子、匙羹、落單紙，冇水冇紙巾，不過問侍應佢會俾你，等左大約5-10分鐘就有野食啦。我今次叫左油麵，連滷水湯底幾好食，唔會太乾或太鹹，不過餸既份量偏少，豬耳都有4-5條，花枝丸佢剪開半粒俾俾，夾埋應該2粒，鴨血就明顯地薄，應該又係一舊切開幾片，但麵既份量就足。成個麵既精粹係個滷水湯底，成間店都係個隻味，又唔太鹹，埋單$46，又幾抵，份量再多少少就好，下次再幫襯。…查看更多

平日中午黎食上海姥姥，唔使排隊，一入到去就有熱茶，依家仲有lunch menu 套餐，$78-$88就有前菜、主菜、飲品，都幾抵食，但我食量細，所以都係單點一個四川擔擔麵 $55，仲可以走辣。等左10-15分鐘上菜，碗就好大，其實份量好少，得麵同d肉碎，好都唔係好食得飽，不過味道唔錯既，麵比較幼身，湯有非常香既花生味，唔會太鹹，如果有多兩條菜就好。如果個麵既份量咁少，下次應該叫套餐，會食得飽d。最後計埋加一，埋單$60.5。…查看更多

第一次黎食，店舖比較細，唔係好多位，但星期六黎都唔使排隊，入到去有熱茶飲，可惜依家夏天，竟然冇乜冷氣，仲要飲熱茶😂坐都有d熱。今日叫左一個特製沾麵$108，同一個低溫叉燒沾麵$118，等左差唔多15分鐘先有，肉同麵既份量好多，湯睇落去少，但夠送麵。其實兩款冇咩大分別，只係肉唔同，同埋多半隻蛋，味道唔錯既，拉麵同叉燒夠凍，沾落去熱湯到係好食，但係好多拉麵黏埋一齊，好難夾，湯冇咩特別，偏鹹，呢個價錢再加一都幾貴。整體來講，價錢偏貴，味道ok，但勝在份量足。…查看更多

久仰大名既棋哥燒鵝，今日星期六終於黎食，中午12:30 黎唔使排隊，不過有機會要搭台，環境上都好似普通茶餐廳咁，都ok乾淨，侍應態度比較散漫，但基本既責任都有做到。今次叫左個棋哥燒鵝飯，$62 包飲品，等左唔使5分鐘就已經上菜，賣相唔錯，如果多幾條菜就仲好，汁唔算多，但可以落單既時候叫多汁，飯都幾多，女仔未必食得哂，燒鵝非要香，皮脆肉嫩，燒鵝皮有種幾特別既烤味，好好食，鵝油肥膏都幾多，唔鍾意既可以自己咬走d膏。整體來講，性價比唔錯，份量足又好食，下次再幫襯。…查看更多

之前見到旺角個間排長龍，一直都未食過，今次就係OpenRice book左星期六夜晚黎食，黎到唔多人，大約7點開始多人要等位，坐底左就可以手機落單，水都係自己斟，但呢間野要加一，有d唔抵。食物方面就幾抵食，基本上冇一款意粉係過$100，於是叫左鮭魚忌廉意粉$78，三文魚有4-5片，份量都夠一個人，忌廉好濃好香，意粉比較幼身，另外叫左個照燒雞pizza $48，呢個係細size，大size 10吋 $88，細size 都幾細，只係切都3塊，不過照燒雞幾好食，好日式。整體來講，性價比高，就算唔散叫，2人套餐都只係$228，下次再幫襯。…查看更多