Codychan1215的个人专页

一早就訂咗枱兩位，去到被安排坐一個近廁所嘅兩人枱，本身感覺都唔太舒服，而且靠牆果一邊嗰個位設計只係得半張凳嘅Size ，連箍臣都放唔到。同職員講回覆係"張枱係咁 我哋冇其他枱啦"搞到食餐飯都唔舒服。不過10幾分鐘之後好似有其他客人no show，所以就可以調去其他枱。食物方面刺身來講唔算10分新鮮，佢有好多芫荽嘅新產品，可能係食住最近芫荽嘅熱潮，但都表現唔太出眾。酒品來講佢冇咗之前加錢清酒任飲嘅優惠，咁相對有冇咁抵因為佢單價嗰啲唔算係啲咩名釀。整體黎講食物質素可以但相對於價錢荃灣會有更好嘅選擇。…查看更多

本身就唔係因為某個食評話佢係全香港最正宗所以先入去試嘅，但係因為APM入邊啲餐廳都食到悶悶地，所以就就不如入去試吓睇吓有幾利害啦咁咁。其實都好多人食，所以被安排坐喺近門口嘅地方，咁食個快嘅晚餐咁都冇咩所謂啦。Menu入邊選擇唔算太多，越南野都係湯河類啦，炸嘅雞翼呀，咁目標係想試嘅所以每類都叫咗少少嘅。講個湯河先啦咁，其實d 湯第一啖飲落去真係覺得話OK喎，個味道好濃厚，好刺激食慾，加上香料，芽菜，辣椒，配起上來真係幾好食，但係繼續食落去呢就發覺，"咦佢係咪好似加咗味精呀？"因為越食越口渴咁樣，我本身冇嗌飲品，所以忍唔住啦要去拎幾杯水返嚟，係真係會渴。咁碗粉入邊有牛丸啦生熟牛肉啦咁，牛丸係好食嘅，但係個牛腩就好鞋好韌，好誇張好難咬同吞，另外生牛肉都熟晒咁滯個雞翼炸唔錯嘅加埋牛油真係好香，個價錢唔平但係如果你係一人一兩隻其實我覺得都OK既小食來講。咁另外嗰個卷呢佢係正常發揮既，食落去都好清新嘅，加埋個source 其實就食落好舒服，要講只能講入邊嘅蝦其實浸冰水浸浸到冇晒味，而且唔夠爽。咁以快既晚餐來講，其實整體都OK嘅，價錢唔算太平，如果有朋友提出想去食嘅話我都會再去食既…查看更多

呢間餐廳賣點嘅係舊式台灣學校既感覺，第一下入去：哇返校wo..🙈成個裝修都係"好懷舊", 用上學校嘅木枱木凳，用漫畫架去做間牆，有少少展物可以觀賞同售賣，其實感覺都幾新鮮，不過可能間鋪嘅舊物太多啦，同埋用上啲舊木枱木凳，所以發現其實好多書蚤出現，而且樓底唔算高，其實有少少壓迫咁喺度嘅。但係我哋去嗰日就唔係太多人，同其他顧客都有一定嘅距離，所以整體感覺都OK嘅。食物方面主要都係一啲台式嘅食品咁，大約種類都係嗰啲，鹽酥雞呀滷肉飯啊豬肚等臟類嗰啲，咁我哋就冇嗌內臟啦，叫咗個醉雞同埋三杯雞試下。醉雞來講唔似係一般上海鋪食嗰啲好濃烈嘅酒味，雞嘅話肉質滑度都唔足夠，佢係類似雞髀蒸熟左先再浸酒，所以就唔係好入味啦，變咗肉還肉，酒還酒味咁。另外三杯雞都唔算係好正宗嘅做法，而且熱度唔夠，所以以主打台灣食物來講嘅話佢只係去到啱啱合格嘅質素。飲品方面都冇咩特別話好出眾。另外本身想試吓佢甜品，可惜佢當日就全部都秀售罄，咁就冇辦法啦。如果以一間叫做享受食物嘅餐廳來講呢，咁就非常之一般嘅，但如果以一間係朋友聚腳聊天，或者自己休息放空，小工作睇書過幾個鐘嘅地方呢，都不失為一個選擇嘅。…查看更多

銅鑼灣有好多食粉面既鋪頭，無他既，都係因為快，食個速食lunch 唔洗等位。而呢間三才，一間位於坐街食粉面既鋪頭，係狹窄既行人路，竟然有一行人等緊入去。基於諗唔到食咩 同 人等我又等既心態，就決定一齊等試試佢。就算我係得一位，都等咗四五個字，心諗有無咁好食🤔🤔可能想客人流轉快D，未入坐排緊隊已經落緊單，一入去坐低就有得食。都好既，唔洗等完又等。一坐低無耐碗粉就上，食粉面第一件事當然要試下個湯濕下個口先。味精感唔算強，無果種味精"拿"喉嚨既感覺。魚蛋同魚片都真係有魚味，有鮮味而加工魚蛋係唔會有。但個西洋菜餃就比想像中有少少跌watts ，西洋菜本身個味道應該好強好香，但隻餃出唔到隻菜味，飲啖水清一清都唔太覺有增強，希望下一次食會改進。…查看更多

一條舊屋村入面，一定會有一間陪伴住屋村成長既舊冰室。喺華富邨，有間屹立左幾十年嘅冰室，佢唔係賣緊頂級既美食，亦都唔係賣緊好華麗嘅餐廳環境，依然都坐滿食客，其實大家就係食緊一份感情，一份懷舊。食物賣相普普通通，但卻令人有一種回到中學時代既感覺，椒鹽豬扒咬落去甘香，配上一杯濃厚嘅奶茶，看一下牆上華富村富有藝術感嘅舊照片，加上一份街坊街里既人情味，難怪一直滿座。要喺咁多大型連鎖餐廳包圍之中做得住，可能其實就係咁簡單。…查看更多

一大班人要喺旺角食飯，仲要有要求嘅，其實真係好難揀餐廳。最尾決定咗喺創興上面一間叫德家嘅燒肉火鍋放題。上到去好多人等緊位，佢火鍋同燒肉係二揀一嘅咁我哋揀咗燒肉。可能因為間鋪頭唔足夠大枱，所以其實我哋都等左超過一個鐘頭嘅時間先安排到入坐。佢有安排部份小凳比人等位坐，但其實好多人都有企喺度等，所以有種好逼逼夾夾嘅感覺，不過創興間間餐廳都係咁嘅狀況所以都冇咩好投訴。終於入到去，佢係有得揀唔同嘅餐，最平嗰種就係燒肉，加少少錢會有多盤刺身。咁我哋係一心食燒肉所以就揀咗燒肉平就OK啦。室內燒肉店最大問題係個環境嘅抽風，最怕食到成身燒肉味。但係佢既抽風真係唔錯，起碼無身處於油煙下嘅感覺。肉類既質素以任食來講，係水平之上。當中牛舌同羊架我仲有re order，鍾意食肉嘅人會覺得好滿足。唯一要講嘅可能係蔬菜量選擇唔夠，因為食太多肉多嘅話都會覺得油膩，想食啲蔬菜，呢方面就略嫌有不足。不過講到最吸引我哋一大班人食飯，當然係任飲嘅啤酒啦。佢有提供hoegaarden嘅生啤。講真，真係飲多幾杯都回本，所以真係相當之抵食。以旺角區可以一大班人食嘅燒肉放題，呢間真係冇咩好挑剔。…查看更多

未夠七點就去咗拎位，好彩係第一台walk-in 客好快就安排到入坐。鋪頭唔算大，無進食時間限制，所以如果要等位就有少少難搞，因為門外就正正係馬路。食日本野，第一當然係叫個沙律開下胃先，順便試下面頭既刺身新鮮程度。沙律正常發揮，唔會太酸，份量都算足夠，刺身又無霉，算幾抵食。好快就嚟埋燒雞泡魚乾同厚燒牛舌，雞泡魚乾唔係食開乾爭爭果種，相比之下佢係軟身d ，咀嚼出個甘香出黎。但佢既份量真係好少，一個人送酒食都唔夠。而厚燒牛舌真係燒得好好，香得來又好爽口，個滿足感好大，定價我覺得偏高，但都仲值得一試。既然試過刺身嘅質素okay ，咁當然就可以開始叫壽司啦。整體都好新鮮，壽司飯唔會覺得酸又唔散。香蔥吞拿魚軍艦好好食，但相對之下三文魚腩壽司就略嫌失色。佢冇一般食三文魚腩嗰種肥美同埋強烈嘅魚油香味，但都仲係可以。清酒煮蜆同炸蝦天婦羅都係正常水準。前者有好香嘅酒味，後者食落都冇好似一般冇心機嘅小店咁食得出油益味。呢一間餐廳整體體驗唔錯，以同區小店來講，算係有心機既鋪頭。鋪頭入面有吧台，見到廚師會同客人有個互動，傾下食材，介紹一下。不過我今次係坐卡位嘅咁就冇得傾啦。良心同崇優，呢間小店都達標，值得下次再試。…查看更多

冬天梗係想食啲熱辣辣得嘅嘢，行過新都城唔知有啲咩好食，見到有間食火鍋嘅，岩晒！走入去試試先。星期日都唔使點樣排隊，好快就安排坐。佢有唔同牛肉嘅品質，唔同價錢，全部都係任食再加自助吧嘅形式提供蔬菜菇類丸類。我哋揀咗中等嘅價錢，我同行揀咗泡菜湯，而我就揀咗壽喜燒。坐低冇幾耐啲牛肉就送到上枱，牛肉嘅色澤同埋質素以任食火鍋來講都算可以。個泡菜湯味道好濃，但如果會加埋泡菜喺入面就會更加好。自助吧嘅菜類選擇唔算多，以"食肉獸"伴住食牛肉來講都尚算足夠。丸類來講有隻三文魚丸幾特別，辣辣地。烏冬呢啲必備嘅當然有提供，但佢係散開用夾夾，我自己就唔係太喜歡呢個方式，直接一包或者剪半，出來既觀感會好一點。而飲品係自己去自助吧撳嘅汽水可樂檸檬茶，冇咩特別，唯一要講嘅係飲品膠杯有少少污跡，呢度要扣少少分。成個用餐時間大約90分鐘，用餐時間好足夠。整體體驗都可以嘅，但係如果食具衛生情況再改善會更好。今次掛住食嘢傾計唔記得影相，不過下次都應該會再幫襯，下次再補相啦🙏…查看更多

水門呢排咁紅，梗係要去幫襯下啦！水門開喺深水埗西九龍中心嘅food court 。咁開得喺food Court ，環境就一定唔會特別好㗎啦，不過勝在多座位，都唔使點樣等位。水門鋪頭細細，但係真係好多人幫襯。我大約兩三點去幫襯，order完個海南雞飯都要等十張票左右。見到水門做好多外賣嘅生意，個個都係兩三盒兩三盒咁order 。佢地出餐都算快，但品質又唔會因此下降。D 雞好滑，但又唔會好油膩，食唔到雪味。個辣醬係合理辣度，酸酸地，應該唔係食開辣既人都會接受到。唯一要講，係飯真係少d ，以午餐黎講份量有少少唔夠。佢跟餐仲有一個例湯，開頭仲以為會好似一般茶記咁既味精水，飲落出奇清，唔會太減，用來清一清口腔既辣醬味一流。以四十蚊都唔洗既價錢，都真係超水準抵食。最緊要 仲見到老細添🤤🤤🤤…查看更多

我喺附近返工，但又唔想食啲連鎖快餐店，行過見到呢間鋪嘅門面都幾特別，係一個類似自動售賣機咁嘅樣，就諗住入去試吓。入到去你間鋪其實唔算大，座位唔多，大約可能招待到10個客人左右。同埋佢嘅座位係以Bar 枱嘅形式，一大班人去傾計食野就可能麻煩少少。我見同時間幫襯嗰啲客人都係飲緊咖啡，但係因為我好肚餓，所以就直接睇下午餐嘅Menu，想食All Day Breakfast但係下晝原來無，其他多數都係意粉，咁就揀咗嗰卡邦尼意粉試試佢。佢嘅意粉比較硬身，味道都唔錯都尚算creamy 。份量唔算多，但卡邦尼本身都飽肚，所以都okay 。可能礙於間鋪嘅面積唔大，佢哋鋪頭要求客人食完幫手拎返隻碟去counter，咁其實我覺得都可以接受嘅，咁因為擰轉面就喺counter，咁嘅要求都OK，好過個Staff喺客人背後行嚟行去。咖啡今次就冇試過，但係如果下次諗揀啱時段，唔多人嘅話，我都會再一次幫襯去試一試佢哋嘅咖啡。…查看更多