JLaw3601的个人专页

今次去咗深水埗食上海菜，地方都唔細，出菜好快，叫甜品記得叫佢後上。佢嘅晚市套餐好抵食，小菜選擇奇多，重點係份量超級大！我哋叫咗西蘭花炒蝦仁，隻隻蝦仁都好大隻，彈牙、有肉地，西蘭花用蒜蓉炒過，香到食唔停。佢個晚市套餐仲可以+15蚊轉酸辣湯或者擔擔麵，酸辣湯以酸味為主，內有小蝦仁，係有驚喜。另外散叫咗小籠包，大大個，皮薄餡靚，湯汁勁多，一咬就食到豬肉嘅香，手藝的確唔錯，不得不提，佢5粒小籠包都只係50蚊，簡直係最抵食嘅小籠包。至於上海粗炒，抵讚嘅係佢唔會菜多個肉、或者菜多過麵，係三者嘅良好平衡、麵底都唔會話煮得太爛、彈牙有咬勁。紅油抄手，內餡有豬肉味，上面嘅辣油唔係普通辣椒油，係自家用辣椒製，十分有心思，50幾蚊就有8粒，超抵。我哋仲叫咗高力豆沙，係童年嘅味道，紅豆餡甜甜地咁好好味，如果熱食應該會更好味。四喜烤麩，調味平衡，唔會過咸，一粒粒烤麩完全吸收咗醬汁嘅香味。最有人情味嘅位係佢送兩杯豆漿比我哋，好感恩。…查看更多

位於高街嘅一間隱世cafe，見佢餐牌飲品種類多，行過唔係食飯都可以入去飲下嘢🤩！老細仲要有自己出書，文青氣氛加到滿瀉！不過見google同openrice都話佢收1900，但其實星期六日係做到2200！講返餐晚餐，必須要話……估唔到一間cafe嘅餐點可以大份到食唔哂🤣🤣我哋叫咗慢煮雞胸蕎麥沙律，超中份，雞胸有4件，肉質結實，上面有少少調味料吊味；勁多蕎麥，蔬菜材料新鮮，用埋柚子醋夠哂清新！兩個意粉都唔算好貴：冬陰功帆立貝海鮮意粉，用嘅係扁意粉，掛汁，豐富用料有帆立貝、八爪魚仔、魷魚、蝦肉同蜆仔。整體冬陰功味濃郁，微辣但唔嗆口，個醬唔會太稀，加上有甜味平衡，幾特別。魷魚彈牙，唔難咬，帆立貝裙邊微焦脆口，肉質新鮮，八爪魚仔唔韌都好好食。第二個意粉係香煎牛腱板扒蒜香炒意粉，不得不說蒜香勁濃，牛人扒嘅牛油香不俗，肉質都幾冧，不過呢個部位有少少筋就無可避免，但牛味比得上出面食嘅牛排，十分出色。另外叫咗兩杯香蕉牛油果奶昔，奶昔本身好稠身、乳酪味唔重，但牛油果味濃、香蕉味出眾，非常之refreshing。…查看更多

我哋叫咗兩個至尊雙層芝牛堡，兩塊勁厚嘅漢堡扒，真係可以去到肉餅嘅厚度，配合埋自家製嘅漢堡醬唔會太乾，調味唔會太重手或者太咸，但就十分入味，簡直係大滿足；本身想轉竹灰包，但唔記得咗……不過原裝嘅漢堡包有少量牛油、輕輕烘過令到包面幾脆 。我額外加咗燶邊蛋，脆口得嚟又唔會太焦黑，蛋黃唔會太乾，好好食；另外加咗菠蘿，酸酸甜甜咁、好開胃，亦都令個包多咗層次。套餐有跟份量十足嘅薯條，本身佢哋薯條會加辣粉，有懷舊嘅味道同埋十足嘅誠意，辛辣味香，仲中有淡淡嘅牛油香。另外加配咗黑松露醬，黑松露味濃，微酸唔膩；蜜糖芥末醬，唔會太辣，甜甜地幾特別。套餐兩杯飲品：菊花蜜有清涼下火嘅感覺，綠茶味都飲得出，算得上幾出色；蜂蜜蘋果茶有粒粒果肉，整身就清清地、微酸，頗為解渴。另外叫咗小食：魷魚鬚香口酥脆，外脆內軟，有鮮味，稱得上酒樓級數，加埋千島醬就有層次，條條都大大條咁，好有份量、一份都食飽人，必須話冇諗過喺小店會試到呢個質素。另外仲有煙三文魚雜菜沙律，材料新鮮，煙三文魚算得上極多，柚子醋加埋都好refreshing。值得一叫！…查看更多

一間油麻地嘅樓上cafe，環境細細，燈光氛圍特別，稱得上係家庭風cafe。我同朋友叫咗個2人餐，上枱嘅有美式炸蟹餅，呢個蟹柳餅一口一個，食落方便，店家炸得佢外皮香脆，內層鬆軟，有少少彈牙唔乾口，點埋佢個泰式甜辣醬，味道嘅層次又再提升一級。另外有個10吋至尊辣肉腸pizza，個餅底唔會太厚亦唔會太乾，算得上比較鬆軟，可能同佢用嘅意大利麵粉有關；加上芝士味濃，蕃茄醬新鮮，辣肉腸份量足，絕對食得過。另外今日叫咗兩杯飲料來試試，分別是朱古力沙漠和綠茶紅豆。朱古力沙漠的朱古力味非常濃郁，而且還加了朱古力碎，視覺效果和口感都超特別的！綠茶紅豆的綠茶味不會太苦，甜度出眾，非常適合喜歡喝甜飲的朋友。最後個意大利飯粒粒分明，松露味唔會太濃，適合清淡口味嘅朋友。…查看更多

佢嘅招牌推廣係花膠雞鍋，估唔到佢會直接半隻雞咁上，加埋花膠十分震撼，雞件嫩身滑口唔韌，大大舊啖啖肉，湯底清甜可口，上面層雞油係精華所在，重口味嘅朋友可以落返餐廳提供嘅雞汁。打邊爐點少得牛肉，佢就跟個牛盛盤，肥牛牛味重，大大片唔難咬，肉質都唔鬆散，不過再多幾片就好；和牛粒乳香味濃，想食多幾粒，淥耐咗都唔會咬唔開。難得係個海鮮盤：卜卜蜆大大隻有咬口；鮑魚唔細隻，份量都多，唔會太韌兼爽口；雖則我唔食淥蠔，但見到佢大大隻咁、好有肉地，都令人食指大動。配料方面：腐皮結，豆味濃。餃子雖然皮厚但餡料充、調味唔錯。枝竹大大塊咁，都爽口唔錯。油麥菜新鮮，用雞湯嚟淥又係上咗一個層次嘅風味。另外佢有個刺身拼盤，帶子清甜，有兩隻甜蝦，而三文魚就正正常常，都唔錯。仲送咗兩爐粒荔枝蝦球比我哋，咬落去彈牙，加埋千島醬就唔膩，好少打邊爐會食到。不過非常可惜係今晚冇雪糕食，對於我咁鍾意食雪糕嘅人嚟講簡直係災難，不過佢都有啲白桃仙草、雪耳糖水、巨峰提子啫喱頂一頂…查看更多

喺尖沙咀角落嘅泰式菜，位置唔算多，佈置有特色，整體環境ok，不過啲凳比較高，坐耐咗可能會有少少攰。我哋食咗泰式原條燒魷魚桶，燒得夠香，食落爽脆唔韌，配上酸甜泰式汁，又別有一番風味。另外仲有個泰式冬陰功湯，冬陰功湯都尚算足料，有鮮蝦 , 我平時唔算太食得辣，覺得個冬陰功湯可以再辣啲，但係其實已經望到落咗好多辣椒咁，而我朋友有啲怕辣，但係都仲食到，係開頭層辣油有啲嗆喉，不過個冬陰功酸酸辣辣、用嚟做開胃菜簡直一流。蟹肉蛋餅包得好滿，蟹肉味道濃郁、配上香脆嘅外皮食落去、口感好豐富；個蛋有香味，而且煮得比較乾身，啱哂唔食生雞蛋嘅朋友仔。黃咖喱軟殼蟹配法包，黃咖喱相對冇咁辣，但仍然香濃惹味，啱哂唔食得辣嘅朋友；軟殼蟹炸得相當香脆，有軟殼蟹自帶嘅腥味，鍾情呢種味嘅朋友應該會滿足，另外呢個咖喱汁配上法包亦都非常適合。飲品方面叫咗大大個嘅椰青沙冰，解渴有椰子味，飲一啖透心涼。加上有焦糖燒菠蘿做甜品，大大舊又多汁，焦糖面夠哂脆，有酸味同甜味互相平衡，十分開胃。…查看更多

位於山林道嘅一間靚西餐，座位唔多，但佈置精緻，不得不讚由餐廳望返出去嘅黃昏天色，十分有氛圍感！叫咗3樣嘢食，有松露炸薯條，啲薯條好精神🤣，極香口，熱辣辣，有種酥脆嘅感覺，食到尾都仲挺身，份量亦都十足，點埋微酸嘅松露醬，十分解膩。第二樣嘢食係蒜蓉青醬雞肉意粉，青醬refreshing，但又唔會有草青味，入面應該有有橄欖油、羅勒香，creamy得嚟又食得出磨碎嘅香料口感；意粉有咬口有質感，唔會好似茶記意粉咁；雞肉結實、咬落去係入味嘅，洋蔥清甜淋身，總體不俗。最後係三成熟美國牛小排，肉質鬆軟彈牙唔會太實正，一切落去肉汁就爆開，證明三成熟剛好，表面有微焦香，加埋醬汁酸咸酸咸咁十分獨特。估佢唔到嘅係個蒜片整得好好食🤣連埋肉食又係另一番滋味。…查看更多

十下火鍋，淨係個名都有香港特色 --- 「烚下下」，裝修都係滿滿嘅香港情懷，舊式嘅櫃同枱、霓虹燈，鏡子，聽住有年代感嘅廣東歌打邊爐，更加係一流。全場位置不多，員工服務態度認真、熱情、主動，仲會幫我哋影相留念🤣。講返主題：湯底叫咗養生豆乳白鍋，十分清甜，雖然話豆乳味比較寡淡，但藥材味出眾，飲湯都飲到紅棗當歸嘅香味。湯底本身會有蜂巢豆腐和鴨血，蜂巢豆腐完美吸收湯汁，一口一粒，十分不錯；鴨血大大塊唔會輕易煲到散哂。我哋仲叫咗蟹肉餃，職員教落湯過面、烚3分鐘就ok，滿滿嘅蟹肉，十分足料，精華一咬就爆哂出嚟，皮薄蟹肉足，值得一試。另外有豆卜魚腐，一碟六粒，魚肉彈牙，有啖啖魚肉，外面一層豆卜包住，令成粒好似豆腐咁、有特色。佢嘅大刀手切本地牛頸脊好大碟、牛味濃，肉質好，唔韌，有陣陣乳香同甜味，食嗰時加上沙茶醬夠哂地道。估佢唔到係有椰子水可揀，仲要係成jar咁上，份量夠兩個人每人飲3杯，配火鍋清甜解渴，仲可以順便降火！…查看更多

一間高質米線，地址方便，喺灣仔/銅鑼灣都好易去到，餐點有雲南特色，可以食到出面冇嘅菜色。要提一提佢嘅招牌氣鍋雞: 用特製汽鍋，通過蒸汽將雞肉蒸熟，保留到雞肉嘅原汁原味，又有清澈嘅湯汁，營養豐富。一人份雞味濃，有油香但唔會話飲到一口油，有菇菌味；可能因為用蒸氣煮，所以雞件唔柴離骨，又入味，肉質唔錯，藥材香亦都滲哂入去。叫咗碗酸辣米線，酸味為主，唔會死辣，叫埋小辣食得舒服，米線份量十足。特別試咗佢嘅油雞樅菌，香口脆卜卜，油香十足，同埋平時好少會見到米線有得叫，加埋米線食就咸淡得宜！另外嘅特色嘢係豆花撈米線，出面又係好少見。豆花香滑清新，夏天食落去涼涼地好舒服，適合淡口味之人，撈落米線係十分之夾，因為兩樣都好滑口；肉碎微辣有特色，蕃茄帶來清澈嘅感覺，令個米線唔會太油膩又多一份自然嘅清甜。配菜係豬排，有越南香茅嘅味道，估唔到食雲南米線都食到越南嘢嘅風味。另外叫咗涼拌金耳，十分獨特，清新口感爽，有食刺身嘅感覺，點埋豉油同wasabi又有另一種風味！想試下全新嘅米線風味就要嚟呢間小瑪哥到試下啦！…查看更多

喺元朗嘅一間西餐廳，成個環境都十分闊落、舒適，仲要不限用餐時間、十分適合兩個人慢慢食、慢慢傾計。坐低一陣就上咗餐包，佢係比一種酸酸地嘅他他醬配餅乾同餐包食，個餐包似薄餅皮般軟腍唔膩，餅乾條脆脆地，加埋個他他醬好易入口，好開胃。之後上咗杯Cocktail（美女與野獸），有花瓣做點綴，如果鍾意玫瑰露酒同花香嘅朋友應該會幾鍾意。要讚下個酥皮龍蝦湯：龍蝦味濃，鮮甜唔苦口，重點係唔會好稀，十分濃郁仲要有幾粒真龍蝦肉；酥皮唔膩而酥脆，加埋個湯都十分好飲。接住係個布袋芝士巴馬火腿沙拉，先講我最愛嘅布袋芝士：乳香一咬就散發出嚟，濃郁香氣充滿口腔，用火腿包起來食，咸味更添層次；另外佢有用蕃茄醬作酸味嘅點綴，令到成個沙律唔會太膩，又有層次。另外仲有嗰芝士烤南瓜沙律，芝士咸淡適中，為個沙律增色不少；南瓜軟身清甜、表面微焦，食落去好舒服；蕃茄新鮮而唔草青，加上橄欖油潤滑同意大利黑醋調味令個沙律好有高級感。主菜有豬鞍配龍蝦尾：龍蝦尾鮮甜彈牙，有海水香，佢應該有輕輕烤焗過，加埋香草味帶出唔同層次，實在令人驚豔！至於豬鞍份量十足、唔韌唔乾 入口即融，油脂均衡，唔會太油膩。配菜為薯蓉蔬菜餅，加上芝士味道濃郁，而西蘭花口感有變化，令人食極唔厭、連黃椒片都十分甜，平時唔食黃椒嘅人都會鍾意。另外有個蕃茄煙肉意粉，蕃茄醬唔會太酸，意粉係窄身扁意粉，有特色，唔會太膩。最後上咗個甜品tiramisu，唔會太甜，cream嘅份量適中，唔會食到成口cream，咖啡味都唔會搶咗朱古力嘅風頭。…查看更多

成日都見到朋友試，今日終於都到自己食啦，喺TOP嘅一間高質西餐，氣氛環境都非常唔錯。我哋試咗白酒煮藍青口，羅勒的清香與蒜頭的馥郁交織在一起，為這道熱頭盤帶來豐富的層次感。每一口藍青口都保持著肉質的鮮嫩，完美地保留了海鮮本身的鮮甜。而用法包巧妙地吸收了忌廉汁，使得整道菜的鹹香味更為突出，同時洋蔥的香氣濃烈而持久。這道菜不僅味道出色，而且烹飪技巧精湛，絕對值得一試。主菜有西班牙羊架，從薯角每一啖都保持著鬆軟，絲毫不乾涸。羊架搭配清新的香草醬令整道菜清新怡人。燒汁中隱藏著陣陣紅酒的香氣，為羊架增添了一層豐富嘅風味。羊羶嘅味道恰到好處，既濃郁又不過於厚重，烹調得恰到好處，尤其對於喜歡羊肉的人來說，這道菜絕對會讓他們愛不釋手。另一個主菜係北海道帶子扁意粉，帶子經過精準煎烤，外皮焦香脆，內裡卻保持著鮮嫩多汁，完美地保留了海鮮的原汁原味，帶來刺身般的享受，散發出迷人的海洋風味。除了精湛的帶子烹調，意粉本身都係亮點：意粉的口感恰到好處，保持著恰到好處的彈性。而炸蒜片和生蒜粒的加入更為整道菜帶來意想不到的風味驚喜，使得每一口意粉都充滿著濃厚的蒜香，為整道菜增添了層次感和豐富度。…查看更多

第一次嚟尖沙咀The one嘅呢間餐廳，試試佢嘅春日會席🤩🤩前菜：醃製螺肉鮮甜清新，十分彈牙，好適合剛剛坐低就品嚐；魚子果凍同樣清甜醒胃，酸酸甜甜。刺身都好有水準：初鰹柑橘味重、加上洋蔥汁令成件事更有層次，櫻鯛薄切極之新鮮、淡淡嘅粉紅色十分吸引。煮春野菜海鮮腐皮：魚肉結實爽口，魚味濃，配搭有趣，腐皮豆味十足、嫩口，有飲豆乳嘅感覺，兩者搭配令口感層次極為豐富。鐵板燒蟶子配文也汁，彈牙嘅蟶子唔需要用濃烈嘅調味就好好食，食得出食材嘅新鮮，加上脆口露荀令襯搭唔單調。鐵板燒比目魚配蕃茄醬：番茄醬入邊有紫蘇同生蒜，層次分明；魚肉本身表面焦脆，內裡鬆軟滑身，入口就能感受到食材的新鮮和高品質，烹飪技巧也相當出色，感受到廚師花喺呢道菜嘅心思。鐵板燒美國肉眼薄燒：五成熟的牛肉包裹蔥蒜，口感極佳，蔥香清新，巧妙平衡了濃郁的牛油香氣，避免咗油膩感。…查看更多

平時出街食得多、但係有無時間煮，點先可以食得健康啲？就係去私房菜啦！偉師傅私房菜位於灣仔，位置唔算難搵，都值得大家去試下。坐低無耐就上咗兩盅雞腳蟲草花瘦肉湯，湯色清澈，香氣撲鼻。雞腳慢煮釋放膠質，蟲草花增添獨特風味，令湯水十分清甜。瘦肉鮮嫩，與雞腳口感相得益彰，唔會太油膩，應該冇落味精令食材的自然鮮甜更為突出。作為年輕人食得中菜就當然有椒鹽鮮魷啦，魷魚新鮮彈牙但唔會韌、炸蒜的香氣濃厚，散發出濃烈的蒜香，帶有微焦嘅香氣，每一啖加埋炸蒜嘅焦香，特別欣賞鮮魷唔會炸得太老、炸漿亦都唔厚。不得不推介佢嘅經典牛氣沖天配wasabi汁，牛肉十分鮮嫩，香味濃油香重，脆口而且唔會韌，一定要講佢份量十足，兩個人都未必食得哂，wasabi汁勁香，又唔會太搶喉，反而解到膩。最後要介紹埋佢嘅金瓜蒸黑豚肉，本來係午市一人餐，跟飯同湯，午市價88蚊，包你食得飽，肉餅十分足料又軟腍，容易入口又唔粉；南瓜清甜，剛剛好可以中和豬肉味，加上無味精令成餐飯都好健康。…查看更多

喺廣東道嘅一間日式餐廳，座位都幾闊落、坐得幾舒服，見佢有其他間房、私隱度好，可以同朋友好好傾計聚舊。食物方面都唔錯：最令人驚豔嘅就係佢嘅壽司拼盤，overall嚟講都係新鮮、高級嘅，每件壽司大小都剛剛好可以一口食到，欣賞佢似日本本地師傅一早就包咗Wasabi 喺壽司入面。要提一提佢嘅拖羅，加咗檸汁，借由檸香解一解佢肥美嘅魚油香。估唔到有埋海膽壽司，有海水香；左口魚壽司上面仲有灸燒左口魚邊，好有心思；另外仲有北寄貝、池魚、帶子、鯛魚，無論係常見定罕見嘅壽司都有出現。另外，我哋試咗燒白鱔串，燒白鱔串份量慷慨，每件都相當厚實，燒烤的炭火香氣撲鼻，加上鹹甜適中的醬汁，特別有日本風味。 不過，魚肉比較多幼骨，食用時要小心。建議不擅長處理魚刺嘅朋友多加留意。好欣賞佢最後嘅魚湯，好暖胃，魚味重又唔會腥，入口鮮甜實在，完全熬出材料嘅鮮味，加埋入面嘅蜆肉同海帶，的確係幾適合做成餐飯嘅結尾。…查看更多

今日去元朗食港式火鍋，雖然有雞煲可以揀，不過都係揀返普通火鍋湯底試一試佢，今次就叫咗個沙嗲鍋，花生味濃，唔似其他店嘅湯底得隻色咁，微辣、。話說佢個餐桌嘅設計都唔錯，個煲位陷落去，唔使吊高隻手就夾到嘢食，係一個暖心位。安格斯牛頸脊牛味十足，一咬落去濃濃嘅牛奶香，絕對可以歸功於分佈均勻嘅牛脂。牛舌十分爽口，大大塊，淥完都唔會話縮哂水咁，肉味都十分足夠。其他嘅食材選擇亦都唔少，一份菜都好足料，包仔豆腐同蜂巢豆腐吸引哂沙嗲湯嘅精華。值得一提嘅係一入座就上咗每人一塊嘅吉列蠔、一塊炸蝦餅、一隻炸蝦。吉列蠔新鮮多汁，濃濃嘅海水香喺咬落去嘅瞬間爆發開嚟，非常之唔錯；蝦餅就夠哂彈牙、大蝦就炸得夠脆，連殼都可以食埋。…查看更多