Lai Sau Man的个人专页

難得兩公婆平日放假入西貢行下，點知天公不造美係咁落雨😔我地下晝入到去西貢，原本打算四處閒逛直到晚飯時間，但落雨濕濕兩條友行左一個鐘已經唔多想行(而且又凍🥶)老公提議搵間cafe坐下打發下時間，喺冇乜特別心水下見到呢間店有得飲野又有甜點食下，於是二話不說就入左去。兩個人嗌左個二人餐$100(兩個青森蘋果批+兩杯鮮奶宇治抹茶)鮮奶宇治抹茶一般，抹茶味唔太特出，有啲淡。不過好彩個蘋果批冇令我失望，漲卜卜、熱辣辣，個外皮好酥脆，絕對係新鮮出爐，我咬落啲吉士醬時差啲燙死🤣蘋果粒好清甜，超like!原來呢間店有其他分店，口痕嘅時候又可以去買下了🤗…查看更多

老媽子想食生煎包而佢又未食過堅信號，於是就帶佢黎試下。我地叫左：生煎包2隻、雞絲粉皮、上海粗炒、酸辣湯同凍熱豆漿各一。生煎包個底煎得夠脆，裏面湯汁好多，一咬即爆汁，請左我頭髮飲左啖湯😅在我黎講生煎包係好味嘅，但要求高嘅老媽子食完就話味道係OK，但食得出個包係包好左一段時間先攞去煎，我自己就食唔出😂(但我好明白而家真係好難有店可以做到即點即包即煎)身為配角嘅雞絲粉皮老媽子就盛讚粉皮唔會好厚夠爽口，不過麻醬就少左啲。上海粗炒都好食，麵條夠煙靭，唔算太油，可惜老媽子唔鍾意食回鍋肉粗炒，好想食回鍋肉😔最後個酸辣湯聞落去有陣輕微𤓓味😑雖然飲落去又冇咩問題。好在呢度嘅湯唔係好杰果隻，好怕飲到啲杰到爆嘅酸辣湯，如果味道可以再酸啲辣啲就好。…查看更多

又係無意中發現嘅一間店，老實講呢間店離我公司有啲遠，如果唔係同事食過話我知都應該唔會諗到要去呢間店🤣但我為咗佢個牛扒沙律，已經好幾次不惜“爬山”上去荷里活道，講真都咪話唔辛苦🥴呢間店嘅野食種類唔少，雖然每次都好想試新野，但每次都係忍唔住翻啅牛扒沙律🤭曾經嚐試過佢個燒烤醬手撕雞沙律，唔係唔好食，只係個燒烤醬有啲蓋過咗牛油果醬、番茄莎莎醬同其他配料嘅味道，所以我個人都係偏愛味道冇咁濃嘅牛扒。話就話係牛扒，但佢已經切到比較細塊，材料好豐富，將全部野撈埋一齊真係好好味😋😋😋佢仲有另外附白沙律醬，但唔落味道已經好OK！食哂成個飽到上心口，就算係男人食份量應該都夠。…查看更多

去到深水埗真係唔愁搵唔到平靚正好西食，老公又搵到間正野啦~呢間店有米線有飯食，老公就推介佢地嘅米線，餸同湯底都有幾種配搭，我同老公每人揀咗唔同嘅餸同湯底，咁就可以試下多啲唔同嘅口味啦！我揀嘅係秘製脆汁豬扒特濃雞湯米線，加10蚊有個油菜。雞湯好香好濃，新鮮滾熱辣，飲落去唔會覺得有味精，應該用雞淆咗好耐，好好飲，不過都唔敢飲太多畢竟雞湯脂肪都唔少🤣而個豬扒肉質好嫩，一啲都唔柴，配上脆蒜片同蜜糖真係一絕😋而老公嗰份係秘製醬脆手撕雞豆漿豚骨湯米線，加18蚊要咗個金絲蜜椒雞翼。比起雞湯我覺得豚骨湯就比較平凡啲，豆漿味唔算太突出。而手撕雞就似平時食開嘅雞絲粉皮，只係將粉皮換成藕片，食落好爽，兩樣餸我都愛😍最後不得不講下個金絲蜜椒雞翼同埋XO醬嘅佐料，個雞翼一樣有蜜糖，而且外皮好脆好香口，肉質又嫩，好鍾意！而個XO醬係用黎佐米線食，我覺得好食過我喺出面買嗰啲，味道唔會太辣，又有好多脆脆，好想問佢有冇得單買😂呢個套餐48蚊有前菜有野飲真心抵，而且食物質素相當唔錯，好想再飲佢嘅雞湯同食佢嘅雞翼，希望佢可以保持水準！…查看更多

幾年前同同事食過呢間手工burger，因為覺得以午餐黎講價錢小貴所以好耐冇再食。最近喺啲外賣app再次見到呢間店，因為個app有優惠價錢平啲，於是決定再次光顧。今次order咗經典芝士漢堡(中味車打芝士)套餐，個餐包咗個漢堡包、薯條/薯角/沙律(我揀咗沙律)，同埋一個飲品。漢堡包果然都係揀原始(牛肉漢堡)最好👍🏻塊漢堡真係好厚，連埋其他料有啲難一口咬哂😅不過厚歸厚，但肉質一啲都唔柴，而且肉汁豐富，包皮微脆，再加埋佢特製甜甜哋嘅洋蔥醬(應該係)加融化嘅芝士，食落去好開胃好滿足~今次有兩樣野後悔咗：1)個包叫咗少醬，好似連帶少咗芝士_(:3」∠)_ 2)小食叫咗沙律，因為比較普通，薯條或薯角應該會更好食(見到原來仲要有芝士嘅我揼心口喇😭)。下次食呢類快餐真係要本住肥死嘅決心，要食最好🤣佢另外仲有下午茶漢堡包餐比較平，雖然冇牛肉漢堡同小食，不過應該可一試。…查看更多

今晚約咗老媽子撐枱腳，佢指名要去淘大食豆漿大王。佢有分室內同室外座位，由於室內已爆滿而前面仲有幾枱等緊，見天氣涼涼地，我地就選擇坐室外。老媽子一坐低就點哂佢想食嘅野：招牌正宗上海粢飯、雪菜肉絲麵、煎釀豆腐、炸銀絲卷，另外加兩杯凍豆漿。粢飯：夠哂熱辣辣，有榨菜、肉鬆同油炸鬼，油炸鬼好脆，調味好夠，不過感覺比外面嘅粢飯細條，同老媽子一人一半唔係好夠喉😕佢menu上面話有得加錢加料，其實仲有冇位加架？雪菜肉絲麵：係我鍾意食嘅上海麵，雪菜非常多，肉絲都好多，不過好乾好柴😖煎釀豆腐：豆腐算有豆味，但呢度嘅肉似乎全部都有又乾又柴嘅毛病，我寧願佢淨係煎舊豆腐比我我覺得仲好食啲😓炸銀絲卷：呢條銀絲卷裏面真係一絲絲的，我諗出面大部分嘅銀絲卷都係搓個饅頭出黎比你算🤣又熱又脆，點煉奶真係好好味！😋兩杯豆漿就正常發揮。聽聞呢間店嘅新蒲崗店攞過米芝蓮，好奇兩間差別到底係邊？…查看更多

深水埗真係有好多野食，家人提議到呢間pizza店就餐，雖然前一個星期先食完另一間pizza黎(肥死😂)但家人食過呢間覺得唔錯，當然點都要食下。店面光猛寬敞，枱同枱之間有一定距離，坐得舒適。Pizza種類都幾多，基本9吋批，亦都可以加$40加大成12吋，不過我地諗住試多幾種口味所以冇加大，另外仲有厚薄餅皮可以自由配搭。最後我地叫咗比薩雙人餐($232包一款小食、兩款主菜同兩杯飲品)外加一個烤飯。西西里蕃茄雞中翼聞到覺得好酸，但食落去酸甜度剛好，幾香口幾開胃。紅酒松露牛肋烤飯全晚表現最差嘅食物，唔夠熱之餘亦都唔覺得有紅酒同松露味😕(係丁丁都冇)可以唔叫。四重乳酪(厚批)我最期待嘅畫面出現啦！ヾ(*ΦωΦ)ツ好香好濃嘅芝士味，完全熱辣辣！佢有佐蜂蜜，第一次見到呢種食法，淋上適量蜂蜜可以中和四重乳酪嘅重鹹味，又係另一種美味，我自己就鍾意原味多啲😁餅底唔算好厚，杏仁片好脆，一口氣食咗兩塊✌🏻和風海陸(薄批)唔知係咪啱啱我果塊冇放，我食唔到魷魚😖肉丸同柴魚片配和風醬都幾夾，同樣夠熱，餅皮夠脆。火烤夏威夷(薄批)($103)老媽子食完兩個批後依然意猶未盡，於是再另外嗌咗個pizza，不過呢個pizza比起前面兩個pizza就遜色咗，pizza上有BB菠蘿當然冇問題，但個醬就超~甜！食到打冷震🥴但我睇在佢熱辣辣嘅份上就同老公夾份解決埋最後一塊。如果唔加醬我覺得會更好。總結：Pizza表現比較出色，四重乳酪必定翻啅！烤飯只試過一款就咁判呢個系列死刑好似唔多公平，下次可試其他款睇下係咪真係唔得😂…查看更多

一家人去飲茶，老媽子原本想去深水埗某店食點心，細佬話如果去深水埗嗰間咁不如去西環呢間周記食，有老闆坐陣包保點心熱辣辣。老媽子聽完好有興趣，於是就決定去周記，雖然對我呢啲住喺大西北嘅人黎講，去西環真係好遠😅呢間店嘅格局比較似茶餐廳，某啲枱坐落去有少少迫，我地一家人分開左前後兩張枱坐，尚算OK。點心種類頗多，因為兩張枱點咗唔同嘅野食，所以只寫我果枱食果啲點心。XO醬炒腸粉XO醬味唔算太濃，我自己就鍾意食濃味啲。好多芹菜，因為我同我細佬唔食，我老公一人食哂食得好開心😂芝麻蝦多士呢個必食！厚厚嘅蝦膠唔在講，最重要係灑滿芝麻嘅外表真係好脆好脆好脆！趁熱食真係冇得彈，本來只打算食一件嘅我忍唔住食咗第二件，食完仲要意猶未盡🤤唔點佢附嘅沙律醬已經好夠味。周記蝦餃皮夠薄，不過就乾身咗啲，蝦都夠爽口，就係普通嘅蝦餃。懷舊糯米包喺出面嘅酒樓好少見到糯米包，老實講我冇印象有食過呢樣野，呢度嘅糯米食落去唔會乾爭爭，味道亦夠，我比佢pass。黑松露湯餃呢個算係中加西式fusion菜？黑松露味好濃，湯餃都幾大隻，裏面好多料，亦食得到仿翅，呢個都係我會翻點嘅點心。蜜汁叉燒包普通嘅叉燒包，食完唔會留低深刻印象🤣咖哩土魷每次去食點心我都會點咖哩土魷(如果有嘅話)，呢度都唔例外，不過呢度嘅咖哩土魷嘅汁真係好濃好杰，而且仲會辣，正，又係忍唔住一件接一件！懷舊千層糕鬆軟，唔算太甜，食到有鹹蛋黃味，唔錯，可以再翻啅。懷舊芝麻卷全枱人都好鍾意食嘅芝麻卷冰凍清甜，好味~另外仲有偷咗隔離枱一條芝士蝦長春卷黎食，已經涼左不過外皮依然好酥脆，裏面有好多芝士，如果熱食應該會拉絲更好味，大家一定要趁熱食！🥺最後老公仲叫咗枝咖啡，佢話偏甜。我本身唔太熱衷飲茶，但係呢間真係得，不枉我地山長水遠去到西環，可惜呢次因為怕膩冇叫到流心西多士，下次要試下！…查看更多

今晚老公帶我到荃昌中心呢間小店食晚餐，話說呢間店係之前黎呢邊食野時老公無意中見到，真係好隱閉，唔專登行入去條巷仔真係唔為意有呢間店。不過當時已食完晚餐，諗住之後試下，拖咗一段時間，今晚終於黎食喇！店面好細只有幾張枱，不過menu內容就好豐富，除左一啲比較特別嘅晚餐set外，另外仲有幾版飯/意粉比你選擇，特別晚餐set本身已包是日餐湯、飲品加甜品，而飯/意粉就可加$20升級做晚餐，同樣包哂以上嘅野。最後我地叫咗個墨西哥烤雞卷晚餐，另一個南瓜蓉海鮮意粉加錢升級做晚餐。由於餐湯淨返一碗所以佢另外比咗個沙律我地，個餐湯係南瓜湯，夠綿不過略嫌淡口咗啲，定係我食慣重口味呢個先叫正常南瓜味？😂個沙律就係普通沙律，有我愛嘅醋油就加分❤然後上咗個意粉，細細碟，有幾隻蝦同一隻帶子，蝦夠爽口，帶子煎得唔太老，鮮味夠，今次個南瓜蓉就有少少甜味，食起上黎我覺得好味過南瓜湯😊(可能係南瓜嘅問題)而盤邊嘅蒜蓉包夠脆但如果熱返啲會更好。而個墨西哥烤雞卷晚餐就好大盤，有沙律、薯條、芝麻醬蕃茄、炒滑蛋同烤雞卷。薯條夠熱夠脆，蕃茄好大個好鮮甜，配芝麻醬好味😋個滑蛋真係好滑，有蛋汁最正！👍🏻而個主菜雞卷相對下就失色左少少，雞肉比較少不過菜夠多，味道普通，但都OK嘅。最後上咗兩件小小嘅芝士蛋糕，對我而言芝士味爭啲，作為一餐嘅結尾，算啱啱合格嘅水平。見到其他枱order嘅甜品睇落吸引啲😝呢間小店可以再試，希望下次可以發現新大陸😁…查看更多

呢間係同事介紹我嘅，佢係咁話呢間好抵，問我有冇興趣試，我對素食唔抗拒，就即管試下。同事預先打電話講低要咩餸同幾點去拎，到拎時再比錢即可。佢地每日都會喺FB同IG PO 6至7款餸比你揀，我叫左個三餸飯，$33，兩餸飯就$30，呢個價錢仲要有碗例湯，喺中上環呢啲地方真係難能可貴🥺不過堂食就貴十零蚊左右，咁梗係買外賣啦。內容物有蕃茄炒蛋、薯仔炆冬菇、薑汁炒芥蘭加白飯(可以走飯)，同埋青紅蘿蔔粟米湯，餸同湯料比得好足，所有食物你係食得出係新鮮同無落味精，尤其係個湯，清甜到不得了唔好望個餐盒好似細細個，食完都好飽肚。總結呢餐啲食物非常對得起佢嘅價錢，即使唔係糧尾都絕對會再幫襯。…查看更多

今日晏晝黎開呢邊上堂，本來無諗過要食甜品，只係因為打開Openrice想搵下上堂地方附近有咩地方可以食個冇咁伏嘅晏🤣結果無意中見到呢間甜品店☺我本身唔係甜品控(而且仲要減緊肥&當晚要食燒肉😂😂😂)不過見到呢間咁多好評又好奇，於是決定放學去睇下。放5:15pm撞著呢間鋪嘅出爐時間，搵呢間店時我仲要盪失路迷左10至15分鐘😔去到見到外面個牌寫住籌已派完以為已經賣哂，儘管入去問下點知又有喎🤗4種味道(髒髒比利時朱古力麻糬、日本焙茶小倉紅豆麻糬、煉乳草莓麻糬、甘酒tiramisu麻糬)只有草莓麻糬賣哂，於是就要左個朱古力麻糬。泡芙酥脆得黎又有適量空氣感，朱古力cream口感綿密，味道濃而不膩又唔太甜，泡芙入面有麻糬真係好新奇，煙煙韌韌，最重要係食哂成個都唔"漏"😳very good!咁多好評唔係冇原因的。其實我好想試埋佢個tiramisu味，但礙於佢嘅泡芙只能放室溫2至3個鐘，我又唔係即刻返屋企只能作罷(雖則呢間店標榜少糖少油，但一下子一個人食太多都係會好肥😆)希望下次有機會黎開呢邊試下其他味，見佢FB專頁post嘅口味有啲都幾有興趣😇…查看更多