山崎~~的个人专页

於剛剛過去的星期一打電話去此餐廳訂位，有個男士聽電話，我話book1月某晚晚上兩位，咁ok左冇問題，仲話有來電顯示知道我個電話號碼，咁會留位俾我地。於今日星期三，有個朋友話想一齊食，咁我再次打電話去此餐廳諗住加多一位，同樣有位男士聽電話（但此男士把聲比較年長），我話我之前打過電話黎book位。。。。都未講完句說話，個男士就不停講冇book位架，冇book位架，之後cut左我線。我以為我打錯電話，於是再上網睇返個電話號碼，我明明冇錯吖，咁再打多次去，又係年長男士聽電話，佢一聽到我把聲，又好似錄音機咁，又不停loop冇book位架，冇book位架，於是我冇等佢講完時，就問佢我星期一打電話黎留位，依家話冇得book位，咁如果我唔知道冇得book，我又以為自己book左，咁黎到冇位，咁咪浪費時間囉，個男士仲好似鬼上身咁，仲係咁講冇book位架，冇book位架。。。終於等到佢有句新對白喇，係呀，我地冇book位架，之後又cut左我線。呢間野咁嘅服務態度，啲野點好點抵食都唔會黎食呀！…查看更多

早於OPENRICE BOOK左位無需等位, 環境舒適, 但安排坐於一班大癲大肺的客人隔鄰, 影響了氣氛坐低後便先點了一個海鮮生蠔拼盤及一個PIZZA, 過了15分鐘左右, 職員先送上海鮮生蠔拼盤, 全部海鮮都好鮮味, 沒有海水的死咸味職員很細心, 待我們將海鮮生蠔拼盤清晒後, 才送上PIZZA, 而PIZZA沒有特別, 不過不失其後我們再ORDER左一個卡邦尼意粉及3隻$10澳洲生蠔, 意粉味道濃郁, 值得一試, 而$10澳洲生蠔雖然沒有海鮮生蠔拼盤上的生蠔 (分別是美國陳加拿大)肥美, 但都新鮮又抵食最後, 點了一個心太軟甜品, 於OPENRICE訂位時, 已寫明於甜品上寫明要寫字, 職員亦沒有話可以寫字, 到最後都沒有, 算是一個遺憾總括是說, 食物一流, 環境舒適 (如沒有大聲呼叫的客人), 值得再試!…查看更多

同朋友以前一直都食開澳門有名的魚翅店舖, 見果間舖頭多人, 就去左人生第一次去既"譚家魚翅"到食魚翅下午十二點左右去到, 有個職員同我地講: 「冇位呀, 係門口等啦!!」, 咁我地就係門口等啦, 咁見有兩個坐近門口既客埋單出黎, 咁即係門口有兩個空位啦, 我地問佢可唔可以坐呢到, 點知D職員十問九唔應, 唔知係咪要等到吉時先可以講野....問左幾次之後, 就話: 「上樓上啦」一上到我地兩個就坐左一張大圓檯, 張檯已經有兩對係到食緊, 我真係唔明, 點解明明下面有張二人檯唔俾我地坐, 係要人地上二樓, 個二樓仲要有陣怪味...好唔舒服, 好想走, 但朋友話一場黎到就試下啦咁話晒都係第一次黎, 咁緊係要睇下有咩野食啦.....睇唔夠30秒, 就有個職員話: 「諗到食咩未? 未既話我地要食飯喇, 廿分鍾之後先幫你地落單啦」, 乜咁樣做生意都有架? 食飯真係大晒架啵....心諗要等廿分鐘, 唔好玩啦, 我地仲要去下一個景點架, 咁就好快手咁叫左兩碗翅....一碗菜膽雞炖翅, 一碗黃燜大排翅等左唔洗5分鐘就到喇, 呢樣真係要讚下...真係好快手但碗野到左之後, 都冇人拎筷子同匙羹俾我地, 由於D職員話要食飯, 當然樓上都唔會有職員出現啦...咁唯有行落下一層問佢地拎筷子同匙羹啦, 佢地都有即時拎俾我, 但都要再講多一次: 「我地食緊飯呀」.....再一次睇得出食飯真係好緊要終於都有得食喇....一食~~~~真係普通過普通, 碗菜膽雞炖翅D雞肉好鞋, 條菜梅既....OK我明, 碗野既精華係D翅到, 但D翅一餅野....完全冇咬口....而另一碗黃燜大排翅都尚算可以, 撈飯黎食應該真係唔錯總括黎講, 應該持主唔休做心態, 所以態度極差 (真係要用個差字黎形容), 野食非常普通食飯對佢地黎講咁緊要既話, 不如關門, 唔好做生意, 貼張紙係門口到話俾人聽, 『我地食緊飯, 唔好入黎阻住!!』咁啦~~仲以為因為要食飯, 所以會唔收錢添 (哈哈.....)真係唔洗錢都唔會再黎食呀!!…查看更多