Hank Kwong的个人专页

環境：週六下午，搵間cafe坐下休閒下，開心嘅。4點零鐘嚟到，人流比較少，都坐得舒服。音樂有啲啲大聲，戴住耳機無點聽嘢，都聽到舖頭嘅歌偏大聲。食物：Tea Set（New York Cheesecake、榛子朱古力鮮奶）價錢：$74 + $5（特別飲品）評價：⭕ 蛋糕其實都好難出事，擺盤都唔錯，重有啲檸檬清香，慢慢嘆幾啱。⁉️ 感覺上價位有啲高，如果坐得耐，休息傾偈會圍得返皮，多過靠食嘢。❌ 朱古力鮮奶有啲過甜，接近死甜，好似落咗好多糖咁，飲到個喉嚨有啲涸。但係整體上又好似有啲稀，唔夠濃郁，未太知係點解。✳ 有加一，有最低消費（一杯飲品 $47）。✳ 侍應有啲來無蹤，去無影嘅感覺。似乎有個比較貪玩，有個比較盡責，人手似乎有啲不足。…查看更多

環境：平日下晝3點嚟食個All Day Breakfast，當做 late lunch。比以前嘉咸街舖多咗好多位，再加埋係角位舖，有大玻璃，採取好足自然光，配落成間舖嘅裝修真係好陽光清新，空間感好大，坐得開心舒服。食物： 勁量早餐 Lumberjacks Breakfast價錢：$138評價：⭕ 夠勁量同多樣。多士、窩夫、蛋、腸仔、煙肉、煙三文魚、薯仔粒。揀佢都係因為乜都有，唔使諗唔使取捨。⭕ 夠香！成碟都有香草飄洒，薯仔粒、炒蛋都有香料，腸仔係香草腸。煙三文魚都造到成朵花咁，花冧有粒醃青豆勁夾。⭕ 有得揀先至係老闆，想健康啲可以唔要薯仔粒，揀薄片蜜瓜 或者 沙律。⭕ 微細位其實做得幾好。斟嘅係檸檬水，睇個樽唔只有檸檬重有一款香草。同埋佢個果醬以前食嗰陣聽過話係自製，應該一直都係。⁉️ 唔係特登寫食評，都唔發覺樣樣都係鹹，但係我本人比較重口味，所以覺得正嘅～ 加工肉類、煙三文魚固之然鹹，重要薯仔粒都重鹽重香粉⁉️ 塊薄多士係麥多士無去邊，但係本身唔鍾意麥包同有皮嘅我都鍾意。❌ 薯仔粒啲香料粉，有啲唔勻循❌ 慣咗最後食甜品，所以窩夫最後先食，開始軟身。但係都係好食嘅服務：收碟、斟水都勤快，待應都戴晒手套做嘢。但係斟水嗰陣，個樽底掂到食物，扣咗少少少少分，同埋係掂到我屋企人嗰份，唔係我，哈！❇ 嚟親都想食 All Day Breakfast，明明次次嚟親都會諗不如試下其他嘢，飯呀、意粉呀嗰啲，但係最後都會係食返ADB。…查看更多

環境：隱世葵廣食店！但係都唔算捐窿捐罅搵佢嚟食。三人行嚟呢度捉緊晚市堂食嘅尾巴～無後悔嘅！7點前入座，由自行入座食到排晒隊再食到無人排，飽足離開！食物：牛肉火鍋價錢：$240評價：⭕ 講二人份，如果兩個人嚟食，真係唔使再叫其他嘢，一定夠飽⭕ 足料，個窩底配料好足，各款蔬菜、菇菌、粉絲、年糕乜都有，一啲都唔hea⭕ 啲牛肉本身有醃過，本身已經好好好好食！⭕ 配埋個麵煙煙韌韌，好有咬口，正！❌ 太足料，第一次水滾咗其實要撈一撈，再等佢滾，如果唔係會唔熟食物：芝士鐵板炒年糕價錢：88評價：⭕ 年糕煙韌有咬口，正！⭕ 有拉芝，夠重味，正！⭕ 醬料配搭勁惹味，正！❌ 口味偏辣，難以持續食食物：拌飯（豬肉）價錢：72評價：⭕ 偏正常發揮⁉️ 本來以為支醬係辣醬所以無落，食落好淡口，以為好清淡。點知支醬先係味道來源！臨尾先試落，但係已經為時已晚，當上咗堂，以後識點食拌飯❌ 唔知係唔係漏單，過咗勁耐先到（非味道評價）飲品：可樂、桃味忌廉溝鮮奶❌ 偏貴，分別10蚊同12蚊✳ 有加一✳ 汽水以外嘅飲品，有唔同嘅水果口味飲料（茶、梳打），但係水果配搭無重覆，即係話只要講生果名就知你想飲咩可惜無叫到炸雞，見隔離枱食好似好正咁！之後返啅一定要試。…查看更多

環境：星期三下晝5點，諗住捉緊堂食6點前堂食嘅尾巴，食一個下午茶。入到去無乜人，清幽舒服。重要播住五月天，台灣感加強！食物：鹽酥雞扒滷肉飯，加配蜂蜜綠妍價錢：$42 + $8評價：⭕ 份量都幾足，但係同一時間有得落午餐餐牌，唔知份量會唔會大啲呢 （當然有貴啲）⭕ 雞扒讚，唔係即時食，都有脆脆外皮！唔算油膩。味粉都夠香又唔過份⁉️ 其實個滷肉似肉躁多啲，食落重有啲港式味，不過我幾buy嘅，有種回憶的味道，哈哈，唔會話好差❌ 個飯偏濕，會有重水一pat pat嘅狀況，口感略差❌ 滷肉唔夠喉，唔夠餸晒成個飯❇ 自助落單✳ 綠妍要咗七分甜，都重係偏甜…查看更多

環境：不錯，整潔寬敞。本身夜市呢棟嘢都比較冷清，而呢間好似坐落成晚得4枱，感覺就更加冷清。食物：韓式泡菜豬肉丼 + 玉子燒價錢：$67 + $15評價：⭕ 豬肉不錯，泡菜汁唔算太辣，都幾惹味，送飯不錯。❌ 泡菜頗失望，係泡菜醬加新鮮菜。我嘅概念係醃到腍癟癟勁酸勁辣，但係而家見到青綠色嘅爽口菜真係覺得怪怪。⭕ 粒大福有驚喜，流心。❌ 流完心剩返個本體咬落有啲膠，唔太好。⭕ 玉子燒正常發揮。❌ 有啲唔夠挺身，個芯有啲軟，唔實在，又唔係軟滑嗰種喎。而且感覺有啲老。…查看更多

環境：初次嚟到木馬工房，諗住有個地方可以食完嘢空曠啲做下嘢抖下。幾光猛舒服，下晝3點唔算多人。食物：日式鰻魚炒飯（連串燒、紙包飲品）價錢：是日精選 $48評價：⭕ 串燒好食，就咁已經聞到啲串燒粉味，流晒口水⭕ 雞肉同洋蔥三色椒呢個配搭幾好，洋蔥爽甜好難得❌ 串燒支簽手拎個位係凍嘅，呢下有啲吊詭⭕ 鰻魚炒飯好食，夠鰻魚汁，夠味⭕ 鰻魚粒都幾重手，啖啖都食得到鰻魚❌ 炒飯配三色豆係咩玩法？即時心傷。諗住照食算，但係真係唔得，用咗好多時間挑返出嚟❌ 少少，真係少少位見到白色飯粒，未夠勻，但係無礙整體經驗幾好，可以覆桌。…查看更多