井之翹的个人专页

有事突然要去個business trip, 懶醒早左三個鐘入機場預左有排先塞到入去、殊不知一路順風順水，check晒in過埋關，都仲有兩個鐘頭先有得上機...（閘口號碼都未有🤣）咁多時間剩、實行去祭下個五臟胕先。上到food court，年多前見過既餐廳已經洗晒牌。眼見間間都未食過、就純憑嗅覺行事，聞下邊間食得過🤤未上電梯、就開始聞到啲拉麵味、即時成個胃扯一扯，此刻腦內只有麵。但當我正想排隊時、眼見場內空位所剩無幾、自己又拉住個hand carrry、如果仲要拎住大大碗熱湯麵咁去搵位就真係太狼狽。退以求其次、見到旁邊韓菜啲配菜都幾正咁、炒粉絲又無湯、岩晒我一個人買完野仲要搵位既人士。經過一番挑選、揀左個「韓式炒粉絲」($82) 。另俾左$15 變左做套餐，套餐會有跟小配菜、幾粒韓式炸雞及一碗疑似海帶湯既例湯。以我活左咁多年、成過不同的韓餐日餐的配菜來作準則、呢個配菜的味道算是合格以上了。除了泡菜味道略嫌過辣之外、麻油波菜的調味及牛蒡條的甜味都足以令我有衝動系食主菜之前就清晒個配菜佢。😋相反呢個疑似海帶湯的例湯就令我覺得誠意略微不足😕飲落極似海南雞飯個例湯、沒令我解渴之餘、仲令我想飲多啖氣水...有食過正宗韓國炒粉絲的朋友都應該知道，所炒的粉絲其實係由薯粉造的。味道方面呢碗炒粉絲算合格皊、油都落得唔多、調味算恰到好處。只係牛肉的少量（得兩片）及整體份量都超乎我預期的多。跟餐的韓式炸雞呢碟炸雞絕對成功演繹了咩叫「妹仔大過主人婆」😆咕嚕肉醬汁的味道的炸雞，用黎送飯就岩晒。此刻食住個無乜肉既炒粉絲、再配上炸雞、可謂完美補位。我就無咩可挑剔了。是次午餐 （一人前）韓式牛肉炒粉絲 - $82轉套餐 - $15可樂 - $10總結：系機場既禁區內能夠食到一個味道唔錯而份量又好足既韓餐、可謂令我好安心下次再出trip都有個可以番食一下既餐廳。 下次再有機會一頂要試下啲拉麵😋…查看更多

今晚收工特別肚餓。夜晚十點、都唔知邊度仲有飯食。最近的天氣又涼了很多、令我好想食得飽之餘仲有淡湯飲下。年前記得同朋友黎過呢間漁吉、佢地夜收工的印象令我好深刻（笑）。所以今晚我第一時間就諗起呢間，衝入去開飯。也許最近社會的氣氛頗為動盪，或時間上真係太夜的關係，這夜店內只有三台客人（包括我在內）其中一台係兩個侍應姐姐開緊飯，店內只剩番一名男侍應、但我揮手揮左三分鐘都無乜大理... 夜深真的大家都累了。落單時、肚都打晒鼓，我諗都唔諗就嗌左個份量頗豐富的「漁吉特選丼」（$198）、實行有殺錯無放過，今晚我乜魚都食。另外因個人情意結、嗌左個「日式炸豆腐」（$48）食左一半的「漁吉特選丼」太餓了、食左一半先記得未影相🤦🏻‍♂️魚生飯其實都無咩好講的、籠統啲只可以用「新鮮」同「唔係好新鮮」黎評價。但呢度個漁生飯、我頗喜歡個壽司飯底、對我黎講、個飯底先係主角、魚生反而係飯既調味。我建議大家食魚生飯時、不仿落少啲鼓油及芥辣，輕輕系成碗飯上面淋一個圈就夠了。享受一下果種微腥的鮮味，即使魚生的料並非是高級貨、都會食得出三文魚的油脂味、鰻魚的甜味、及每粒魚籽咬破後的魚油味等...一邊食個飯一邊飲佢個無限任飲麵鼓湯實在是一大享受（但小心飲到飽）記得我呢世人第一次食日式炸豆腐，並非系香港和日本、而係系加拿大的all you can eat日本餐。薄薄的炸粉包住細細啖一口豆腐、若非有湯汁浸住、我仲以為係普寧豆腐但兩者的味道都令我愛上這味菜、所以在我肌寒交逼之際系menu 見到呢味菜、即使明知食完個飯會好飽都忍唔住要叫一客。（漁吉版的）日式炸豆腐可能為左要襯番個價、每粒豆腐都好大磚...而面頭被炸得金黃鬆脆的係櫻花蝦，剩食櫻花蝦係無味的、而且同其他店的炸豆腐唔一樣，並無湯汁浸住、取而代之有一碟類似天婦羅汁咁既調味汁。個人偏好並不喜歡呢個style既日式炸豆腐。但如果識玩現場調味的話，落啲七味粉可能會唔錯的，但我無試。總結：專精食魚生飯，漁吉係一間相當唔錯的魚生飯店。但小食配菜等、就要多啲冒險精神和包容了。永遠都欣賞呢間夜收（收23:00）魚生飯店。雖然店員的態度近年有啲茶餐廳化、但未之於好影响食客心情。最後提一提大家、佢地公司規矩係過左$300先有得碌visa、其他電子結帳系統都無。所以好似我咁只食到二百幾既朋友記得袋定現金🙃…查看更多

今日情人節、特登放半晝同老婆出去撐枱腳同行下街街。雖則已經接近老夫老妻既地步、啲大時大節整色整水既野依然少不得。情趣丫嘛...同老婆大人食飯、我一向都係俾佢揸fit，佢想食乜就偏向佢口味，我相信有好多男人都係咁。唔係話男人無主見、係好多男人都好憎左諗右諗又度呢樣又度果樣。係男人既就決定左今日食中餐就中餐、西餐就西餐，咪同我扭扭捏捏！係咪好大男人？所以咪留俾女人揀囉、咪話我地唔民主題外話都係唔講咁多。今日系Mikiki行街時老婆大人話想食西餐，又唔想再行咁遠行出街慢慢搵、就去搵商場水牌search一search。見到樓上2樓有間未試過既新餐廳、去門口𥄫下個lunch menu有啲岩key、間新店睇落又幾闊落就入去試試。一入門口有兩個靚靚大卡位、可惜有人坐緊、無機會享用。餐廳裡面環境幾靚、裝潢同設計好明顯落足本錢。個人頗欣賞佢既窗簾既運用，間單既橫紋半透式拉簾，採光足夠之餘又唔會燦眼。一條條既光線斜斜咁射入黎影相仲幾靚添。全場唯一大缺點就係個大電視。其實呢度又唔係酒樓，又唔係Conference Room，整咁大個電視系度其實真係好格格不入。但既然餐聽個名寫到名係”Resturant & BAR” 就當你夜晚要變身做間Bar俾人飲酒睇波... 但日頭仲係Resturant時可唔可以熄左個電視等個場靜番啲？又或者播啲管弦樂搞下氣氛都好過開個新聞台勁loop新聞同財經，咁入到黎都好難放鬆同專心食飯傾計。Lunch Set Menu 簡潔明瞭，老婆想鋸扒所以二話不說揀左個「燒穀飼牛西冷紅酒汁」，而我就揀左我至愛既意大利飯「蕃茄忌廉汁海絴意大利飯」。由於我地都對個沙律無乜興趣，又想飲啲熱野䁔下胃，所以一律揀左餐湯。是日餐湯是日餐湯係綠豆蓉忌廉湯，個湯既味道其實都唔差的，金寶湯質素但尚算足料。唯獨湯面果一大Pat忌廉好搞笑，差不多有半球雪糕系面。好奇下試過啲忌廉仲係堅涷既，同啲湯攪勻後啲湯就有啲唔夠熱，但總括黎講尚算OK的。隨餐附送的法式小餐包有牛油同黑醋任均選擇，個人好Like黑醋所似餐前開胃菜我係食得幾開心的。食完個包兩個餐幾乎同時送到。唔駛搞到同枱得一個人有野食呢方面我覺得做得唔錯的我覺得上菜既時間控制呢樣係西餐廳應該要為顧客考量既基本問題黎。一班人系茶餐廳食碟頭飯就無乜所謂，但西餐廳系呢方面都算係對顧客既一種尊重黎。蕃茄忌廉汁海絴意大利飯呢個始終係自己個飯黎，感受較深就講左先，蕃茄、忌廉汁同芝士既配搭算係烚到好處，酸酸甜甜的蕃茄汁和芝士的香濃在洋蒽同少量的蒜交織着相當美味的樂譜，帶咬勁既珍珠米令人食起上黎相當醒胃。清左腸既蝦同雜菌都相當新鮮。但奇妙地呢個意大利飯居然仲埋藏左碎鱈魚柳條系裡面，某一兩舊食落有陣好強烈既冷藏味。明明餐牌上都無寫有魚，加多左落去如果好味既話都可以話當大贈送。但呢舊有強烈雪味既鱈魚完全係出黎搞破壞，明乎其實既「多舊魚」。燒穀飼牛西冷紅酒汁老婆鐘意食七成熟既牛扒，對於五成都嫌太熟既我黎講其實唔應該去評論塊扒軟唔軟熟。但被餵食過幾片（借啲兒放閃？）驚覺七成熟都算軟熟。雖然唔算非常有牛味，但尚算夠Juicy，唔多筋。紅酒汁調較得幾好味，但唔算好深刻，所以唔講咁多了。是日甜品（一粒橙肉＋幾粒柚肉＋碎蒟蒻）因為唔知叫咩名，唯有咁拆散黎叫住先。賣相麻麻，尤其是上枱時見到滴到四圍都係。睇落似楊枝甘露既䄂珍版，但食落幾清新，水果既酸同蒟蒻既甜幾夾，食完感覺好似食左飯後果咁，但又一啲都無裹腹感，係一個唔錯既結尾。餐飲 - 熱奶茶唔錯的普通熱奶茶，完。是次午餐 （二人前）Set Lunch 蕃茄忌廉汁海絴意大利飯 $80Set Lunch 燒穀飼牛西冷紅酒汁 $138總結不過不失的一間西餐廳，如果唔係坐近電視既話都算係傾計既好地方。食品其實味道可達到中上的，但雪味鱈魚真係令我扣唔少分，祈望下次有機會再幫襯既話會令我感到再滿足一啲。這家餐廳的待應其實給我印象幾深刻的，因為個個都初四咁既面口，呢個現像令我地猜度班待應係咪今年未收開工利士等八掛云云。但經理的招待是相當之欣勤的，如此強烈對比令我地深信該經理應該就是老闆...（誤）…查看更多

今晚忙過龍，餓到個肚打曬鼓先知道原來已經9:30，就立刻收捨去搵野食。最近天氣都好涷，餓起上黎個人都特別攰、個腦只係不停諗住要食啲熱辣辣既野，但具體食乜就真係摸不著頭腦。系條街行黎行去、雖然見到好多粥粉麵飯泰式韓式越式餐館仲開住，但都係無法打動我今晚既芳心。直至我見到有一塊非常燦眼既招牌強行映入我瞳孔 - 「浜滝」...嗯、此刻我完全無去諗到呢個名係同海產有意思。只知道係日式餐館就衝左入去，個腦只諗住「日式豬扒丼」10:00pm 入到去，拉開趟門就有位樣似16-7歲既靚仔哥哥招呼左我埋枱，臨收工前仲有單拖客黎到都仲咁態度親切，抵讚。咁夜黎到仍然見到有兩枱人食緊飯、即係個爐仲未收，好彩。餐廳環境有啲仿照日式小酒館既設計，但所有既枱都係西式酒吧既高腳枱櫈，好fusion。牆上仲有部大電視、播住日左新聞台。我唔知有幾多人識聽日文或睇得明、但令場內添上左薄薄一層日本氣氛。總好過播啲咩英超西甲、嘈到暈，至憎。Menu上既菜式唔多，計埋飲品都係得十頁左右。搵黎搵去都搵唔到豬扒丼、初時有啲失望、但見到拉麵果頁幾正、岩晒我依家有餓又涷既狀態。個「制霸拉麵」睇落好似幾正、想挑戰下點制霸法但可惜話無曬。最後就決定揀左個「濃厚醬油拉麵」+「大阪燒餅」一個人食既份量好似係大左啲、但無諗到最後我一個人都係食得曬。濃厚醬油拉麵：深鍻色既湯底味到好濃！不愧為濃厚醬油，但對我來講有點兒過咸、沾麵食係好味、但要飲就太膩了。白雪雪的叉燒薄薄兩大片，味道唔錯、貪心啲希望佢再多少少肥肉，但摸摸自己肚腩啲肥肉後係瘦肉多啲好啲。溫泉蛋一大隻。食過好多日式拉麵都係俾半隻，有全隻食算係對得住呢個價了。食落非常流心，但濃醬油有點蓋過蛋的味道，算是一點美中不足。大阪燒餅：我只能致以最單純概直接的評價給這一道菜 - 好味。曾食過好多不同餐館的大板燒既我只能說這裡的大阪燒的材料配搭最夾、粉漿濃稠適中、配料足夠、醬油不會過多變成食醬，酸甜度令人很開胃。是我絕對會翻啅既美食之一。（謎之聲：全套菜單的小食我定了！....）是次晚餐濃厚醬油拉麵 $83大板燒餅 $78總括來講，這次算是我的開心大發現。在餓到盡頭的關頭對味道的感覺可能過度寬容，但該大阪燒我真心真意覺得好味。店裡牆上仲寫左好多推介菜式，日後必定會回去再試一試、尤其是制霸拉麵、究竟有幾制霸......…查看更多