皇若葉的个人专页

搵食貼士: 質素嘅保證。唔想諗，又想有好嘢食，一定係呢一間。生日同老友出嚟食好嘢，呢到嘅下午茶必定榜上有名。scone同玫瑰果醬唔使再特別提，水準不變，連揀食嘅我，都食晒兩個scone, 玫瑰果醬唔使講，梗清晒佢啦！三層架之外，加上雞肉酥餅，份量雖小，但係恰到好處，由scone 過渡到鹹點。鹹點，我最喜歡食牛肉三文治，牛肉好鬆軟，唔乾;其次係煙三文魚三文治，三文魚唔質量良好，肉質爽口。甜點全部都好食，今次好多果味嘅甜點，唔太膩。…查看更多

搵食貼士:預早訂枱，計劃人生。枱唔易訂。滿足視覺與味角嘅下午茶。鹹甜點都好食，而且蝴蝶主題，好優雅，好lady. 我地兩個女仔去食三層架，加埋朱古力盤景，真係食到捧住個肚，最後要行商場消滯。一定要加錢飲朱古力，因為真係好rich. 朱古力有可可米，朱古力雪糕同埋cream。我無落太多cream，但係就用晒可可米同朱古力雪糕。本身朱古力就好濃味，再加上朱古力雪糕同埋朱古力可可米，係三重享受。朱古力控一定要試。…查看更多

搵食貼士:餐廳坐位不多，建議先訂枱。如果大班人聚會，一定要訂。港島人在尖咀出沒，當然要去韓國街朝聖。講得朝聖當然唔係食啲平常嘅韓國菜啦，於是我地去咗Oppa。為咗令朝聖之旅萬無一失，我地係前幾日就訂枱。我地雖然遲咗到，但係佢地照安排枱俾我地，全無黑面。我地當晚叫咗芝士骨，同埋蟹膏手卷。蟹膏手卷先上。飯餸比例好好，蟹膏嘅味無俾配料蓋過，整個卷包得好實，我啲筷子功咁一般都唔會夾散。芝士骨，上到枱先用火槍燒溶啲芝士，再每條骨用芝士包住，真係極邪至惡。骨嘅味道微辣，解去芝士嘅油膩感，肉質嫩滑，唔乾。特別提一句，送酒一流。當晚我地叫咗布冧酒，果味濃，易入口，酒精度略高，但係女仔都啱飲。鋪內仲有唔少韓國酒，真露，米酒，果酒唔同種類，總有一種啱你。…查看更多

午間搵食貼士：三五知己食個飯無問題，如果人多同埋趕時間就要三思，因為無得訂枱呀!同事話有新舖，一定要試啦，仲要係台灣嘢，唔食點得呀，解「鄉愁」呀！所以一行三人決定試吓。可能係late lunch 入座唔使等，安排好座位後就點餐。餐廳用自助點餐嘅方法，自己掃QR Code.點餐流程暢順，只係10幾分鐘新上菜，非常有效率。上菜就有啲搞笑啦，唔知係咪侍應係新手呢，我地三個人，一個點半筋半肉粗麵，一個點牛肉幼麵，一個點撈麵。當第一碗麵上枱時，望到有筋有肉，但幼麵，自然問一問啦，佢話係牛肉麵;第二碗有筋有肉，但粗麵上枱嘅時候，我忍唔住問個同事，明唔明半筋半肉同普通牛肉麵分別係邊，大家都諗唔明，明明只係麵底唔同，但我俾多咗幾蚊其實個麵係幾好食，軟硬適中，牛筋好軟，但不失咬口，啲牛肉亦都唔太粗身，軟硬適中，最重要係飲咗少少湯，唔太鹹，亦唔太重味精。食物質素唔錯。套餐附送三款前菜同一杯餐飲，水準不俗。總括嚟講，呢個價錢，呢個水準，係值得推薦嘅。…查看更多

搵食貼士：週末下午茶時段無咁多人排隊。今日一個人食個late lunch。諗咗好耐食乜好，諗起呢間BANCHAN AND COOK成日都好多人排隊，見末下午茶時段，碰碰運氣，好彩又俾我碰到，等咗5分鐘就順利入坐。叫咗伯爵茶咖啡，再加個牛肉蛋包飯。先講蛋包飯，叫得蛋包飯，最初都以為係奄列咁嘅，點知只係飯上放一片好厚嘅蛋，望到嘅時候，我呆咗，咁「包」呢個字代表緊乜，我唔太明，我諗我要重新認識呢個字的含義。唔包都算啦，老實，蛋同飯都係唔錯嘅，但係我肉就出事。啲牛肉又粗又韌，如果你聯想唔到個質感，你可以諗諗任飲任飲打邊爐嗰啲肥牛嘅質素。飲品嘅質素係唔錯嘅，茶同咖嘅味道平均，飲到茶味。最後講服務，佢由下單到取食物都係自助，係呢個時勢，連餐具都係自助攞，真心驚，依家唔少自助餐都轉成放題，為免大家自己攞食物或餐具而出事，佢呢間就一於少理，照係自己攞水，餐具，紙巾，附近亦無職員監察，我試完都心驚驚。…查看更多

外賣貼士: 週末下午，人流不多等10分鐘就有。週末早午餐有拆扣，抵食!今日輕遠足過後，唔想返屋企煮，又想輕食，見門外有早午餐供應，外賣仲要有拆，啱晒，結果我點咗個白松露菠菜pizza,連埋嘢飲，70幾蚊埋單。服務:從在門外八卦開始，侍應姐姐好好心機解答問題，全無黑口黑面。落咗單本來諗住轉頭攞，點知侍應姐姐問我會唔會入去等，更係入啦，又攰，又熱，又餓，有位坐即時話好呀!食物準備好，侍應姐姐又問要唔要外賣餐具，真係好好，夠環保!食物: 不過不失，個Pizza口味較淡，但有跟埋辣椒子做調味，上面的菜係新鮮嘅，美中不足係個批底唔夠脆，但係我要講明，由餐廳返家，大約二十分鐘，會唔會因為咁影響口感我唔知，但整體嚟講個pizza口感係鬆軟嘅，邊邊有啲脆。…查看更多

午間搵食貼士：近大時大節一定要訂枱今日同事話慶祝暹完假，話要食餐好嘅，但又唔想咁滯，所以諗到食蟹。我地叫咗蟹肉火鍋餐，必定要2人起的。前菜係蟹肉海膽湯同燒蟹腳，個湯雖然細杯，但有好大嚿海膽，隻蟹腳一啲都唔細，係有2隻筷子粗的，所以好多肉，仲有火候剛好，唔會乾到食唔到。到個火鍋，先食蟹同菜，職員特別提一個鍋煮菜，一個鍋煮蟹，因為最後用煮蟹的鍋煮蟹粥。個火鍋係自己煮的，但最員會細心留意，幫手加水，唔使提佢地。蟹肉每人3至4件，加上一大盤菜，份量十足。最後職員用蟹蓋煮蟹粥，仲會問粥想要稀定稠，好細心呀！個粥係神緒所在，食咗就大滿足啦！最後仲有雪糕，咖啡雪糕中有咖啡啫喱粒，真係非筆墨所能形容。…查看更多

搵食貼士：枱一定要訂今日係法定姐妹淘日，要搵個有格調，食物又有水準，有酒飲，又要方便散水的地方，於是嚟咗美食集中地，大坑。先講服務，真係非常好，侍應細心推介，我地問咗幾次菜式有關的問題，佢地都樂於回答，無黑面。加單時想搵嘢送酒，仲推介我地飲啤酒配炸雞好過炸魚，照跟啦，真係無介紹錯。兩個人叫咗一個龍蝦沙律，一個蟹肉意大利雲吞，一個炸雞，兩杯啤酒。個龍蝦沙律好新鮮，龍蝦彈牙，而且龍蝦份量好足。成個配搭好清新，而且份量剛好，兩個女孩子食咗仲有位食主菜，唔係食前菜食飽咗。個意大利雲吞，皮薄餡靚，用上菠菜皮，成個配搭唔會好滯，一碗5隻，份量剛好。炸雞，炸的剛好，肉鮮嫩多汁，唔太油膩。環境方面略為嘈吵，可能因為當日入座率有9成所致。另外，啤酒款唔太多，呢兩個點係美中不足之處。…查看更多

搵食貼士:一定要訂位，仲要留意佢有同個別搵食平台做優惠，分鐘鐘做緊75節添!同事話中西日式都食到悶悶地，難得俾我地搵到間充滿異國風情的餐廳，仲要搵到個勁抵的優惠，於是搵食兵團一行三人即日訂位。12點仲可以訂到1230的位置，真係無得頂。如果即慶飯局，又有一定人數，可以考慮。先講環境，可能都係特別小小的菜式，所以客人唔多。除咗我地仲有2枱客人，所以我地同其他客人有一定距離，呢點真係唔錯。因為有時講吓八卦嘢都唔使咁尷尬。氣氛同佈置都一流，好靜，而且佈好有中東風情。跟住係服務，雖然我地用訂位平台訂訂位，又係食set lunch (set lunch都有折），但係都好好服務，上菜速度快，而且樂於回答問題，真係好好。跟住講食物，我地三個人叫咗三個餐，有串燒羊肉，串燒雞肉同乳酪雞肉。我只食咗串燒羊，雖然燒得好深色，但真係唔係燒焦咗!唔使驚串燒每份兩條，大約一隻筷子咁長。再跟一碟沙律拼鷹咀豆泥拼比得包及falafel。單尾有甜品同mint tea 或中東式咖啡。由頭盤到甜品都好有質素，沙律新鮮，炸fafel唔油膩。甜品唔太甜，而且好脆。我選咗mint tea 好香唔係茶包茶，同事的咖啡香之餘仲勁提神。總括嚟講係十分好的用餐體驗，但係佢一定要你入會，如果你係好講私隱，唔想俾資料人，就要諗過啦。…查看更多

搵食貼士: 一定要訂枱!，因為都幾多人食!同肉食朋友一齊，一定要多肉食，於是大家選擇食雞煲。朋友話呢間雞煲唔辣不特只仲要啖啖肉。咁神，梗係要試。上到去，坐的地方比想象中舒服，不過同其他火窩店差唔多，唔提供茶水，一係飲氣水，一係飲特飲。我地叫咗個細嘅芝士雞煲。一上枱，真心驚喜，啲芝士多到呢。身為芝士控嘅我，即時心心眼，朋友話我定咗格望住個煲。啲雞係用雞脾，唔係其他雞煲咁成隻雞放入去。啖啖肉，又滑。唔使食到雞肋雞肋咁款。我地食嗰煲咗之後再加咗4款食物，蜂巢豆腐同鮮炸嚮鈴係必食之選。最好嘅係加湯嘅時候，可以加芝士湯而唔係普通雞湯或滾水。咁就真係芝士味由頭帶到尾，唔會食到尾乜味都食唔到。埋單每人唔使二百蚊，仲要飽到上心口，抵到呢。。。呢間雞煲/火窩店，一定會再去。…查看更多

搵食貼士:1200去到，仲有位，但係1245左右已有8成滿，如果係大伙兒食飯，記得訂位!慶祝放完一個月假復工，同事建議食呢間。本來諗住係豪食之選，點知價錢親民，服務又好，真係無得輸。我最初諗，食呢間無500蚊唔使埋單，點知入到去望吓個餐牌，原來價錢由親民價到豪食價都有。今次我選擇咗親民之選的2號餐，有蟹肉釜飯嗰個。茶碗蒸: 蛋好滑，亦好鮮甜! 免治蟹棒:啖啖肉，但係一食就知真材實料，唔係一口粉或成口魚肉嗰啲，份量唔細，有一隻手掌咁上下大。蟹肉釜飯:蟹肉多到呢！份量亦不少，足有兩碗，對女士而言，或許大碗咗啲，但係因為太好味，我堅。持。食。晒! 因為啲飯索晒蟹肉的味道，所以好鮮甜。甜品:雪糕。特選咗咖啡味。啲雪糕好滑，咖啡味剛好，食完好醒神侍應服務周到，而且好細心。一定會再嚟!…查看更多

搵食貼士: 1230前都好多位揀，1300有8成滿。部門即慶午宴或三五知己即慶飯局，想有個grand grand 地，又靜靜地的地方，就可以考慮呢到。見係新餐廳，又係酒吧格局，本來唔抱大希望。點知入到去地方出奇地整潔，又無煙味，坐位舒適，如果你好懷念怡東雙城吧，呢到可以係一個好選擇。食物水準中上,叫咗個Set Lunch,係腸仔薯蓉。以為都係hea嘢，點知。。。腸仔皮又薄又脆，仲要啲肉唔係梅嘅，正! 到個薯蓉，以為係開粉即成嘅方式，點知，係真。薯。蓉。有薯仔味，又creamy. 正到呢！個餐飲，我叫咗檸檬茶，啲檸檬好新鮮，唔係又乾又苦嗰啲，茶底正常嘅。未食完已經忍唔住whatsapp俾同事，話佢地知搵到好嘢!美中不足嘅係前菜個湯，係西蘭花忌廉湯，有啲稀，但係諗吓，十隻手指有長短，再望吓個價錢，都係唔好太要求高啦！最後仲要讚吓侍應，招呼好好，唔係十問九唔應嗰啲!…查看更多

搵食貼士:星期六晚都唔太多人，仲有室外位置，唔錯。不過都係訂店好啲。兩個牛魔王加手工啤控，叫咗全牛宴。挽手腩，黃喉，牛心，牛腩，滑尾龍。。。仲細心到話埋俾你知要煮幾耐正牛肉無論係唔係signature 都好新鮮，好嫩。仲有牛肉餃，有辣有唔辣，任君選擇。餃都做得好好，有個小插曲，餃皮唔知點解融咗，同侍應講，佢地即刻換。手工啤更加唔使講，同麥子合作，係質素的保證，美中不足嘅係無咗啤酒拼盤，唔可以一次過試晒咁多款。雖然唔係放題/或自助餐式火鍋，但係物有所值，超級推薦，亦會再去。…查看更多

搵食貼士:星期日中午，唔使訂枱，但係記得帶夠錢或者帶支票，再唔係就要用支*寶俾錢。剛過去的星期日，係同學仔聚舊的日子，大家諗吓好似無一齊食過泰國嘢，不如就搵泰國嘢食。於是訂咗呢間。我地叫咗:1。生蝦:唔錯，有乾冰一齊上，夠凍。蝦的質地好爽，好新鮮。2。冬陰功: 個人覺得一般，個辣比較死，無乜層次，但係只係個人喜好，唔係個廚的問題。用料足而且質量好。3。火焰雞:其實係燒雞，但係上枱時即時點火，所以大家一齊舉機影相，呢個係味覺同視覺享受，一定要叫。4。蝦餅: 炸得好好，口感唔太肥膩，而且好有蝦味。5。青咖哩:唔錯呀！香料同咖哩的味道好平均，唔係好似其他地方咁只係一碗綠色的水。6。柚子沙律: 好醒胃，柚子都唔苦其實服務員態度好好的，我地成班人坐咗幾個鐘都無點面，只係去到最後付款方法唔太方便。…查看更多

午間搵食貼士:唔使訂位，但係預留足夠時間進食，因為好難搵到侍應。老闆放假，終於可以行遠啲食晏，見到新餐廳，咪試吓囉！點知。。。入座唔使等，但係入座後乜都要等。座低後侍應，完全無招呼，叫人落單，舉到手都攰，都無人理我地叫咗一個海鮮天使麵，同海鮮焗飯，老實海鮮係算新鮮，但係其他嘢都唔太突出。最搞笑係連水都唔俾一杯，但又唔俾飲品餐牌我地，我地問佢有冇餐飲，佢話無，又唔俾水，又唔俾餐牌，結果嗰餐我地乾哽! Dry 到一個點，未出門口已經諗去邊買嘢飲。叫埋單時，又係舉到手都攰都無理我地，仲要係幾個侍應圍埋係咁傾偈。最後終於有人發現我地，唉！食完餐飯啲嘢食乜嘢味，我唔太記得，我只係知隻手攰到七彩，因為舉手舉咗好耐。總括嚟講，唔太推薦。…查看更多