newbi的个人专页

本身是素年粉絲多年，在港島未有分店前，經常去深水埗分店食，好欣賞佢哋可以將素食都做得咁有新意，又會用上本地菜等新鮮食材，令每樣菜式都健康有益，同會期待下次再去！除咗灣仔姊妹店wanaka，太古here亦係我哋經常幫襯嘅餐廳，食物一貫好味，仲不時轉餐牌，每次去都有唔同選擇，可以試到唔同嘅時令食材！今日侍應幫我落完單後，主動幫我睇吓有咩優惠，發現我有$50 coupon，幫我扣咗$50，超好人！食完飽飽嘅一餐，臨走先記得自己要食中藥，大膽問店員可唔可以買一杯熱水，佢哋笑笑口話唔使買，知我冇自備杯，就幫我攞咗佢哋隻靚靚紙杯斟一杯熱水俾我，仲細心地冇裝到全滿同俾埋杯蓋我（怕我倒瀉），出門口時仲俾多張紙巾，我包住隻杯隔熱，會不會太sweet呀！🥰…查看更多

幫襯咗呢間全記超過十年，每年嚟三四次，每次都不過不失，但求一家人開開心心食下海鮮就算。過去一年公私都忙，成年冇嚟西貢吃喝玩樂，今日日難得抽到時間嚟西貢，所以都嚟全記食下海鮮，點知今日一役，肯定以後都唔會再嚟！加咗價冇問題，侍應冷口冷面都係等閒事，但食物確實係差咗一截：椒鹽墨魚粉厚但冇味，一啲都唔脆、上湯龍蝦伊麵龍蝦頭頭尾尾大兜亂，帶肉的只有兩小件、椒鹽瀨尿蝦繼續不過不失、元貝冇鮮味只有爽，難得蒜蓉味都冇。今日最趕客係服務，跟餐有菜送，歷年落單侍應都會問要咩菜要點煮，今日侍應甲落單後，我哋發現未揀菜，於是請侍應乙過嚟問：「唔該想問跟餐嘅菜有咩揀？」「菜心通菜西蘭花白菜」「咁要白菜丫！」「要點煮？蒜蓉炒？」「好丫！」侍應乙走開唔夠三分鐘，上菜姐姐上碟灼生菜，我哋話啱啱叫咗碟蒜蓉炒白菜，佢叫咗侍應丙過嚟，侍應丙問都冇問，一句喝過嚟「跟餐係生菜！而家食定唔食！」屋企人同佢講以前有得揀菜，侍應乙都俾我哋揀同話蒜蓉炒，佢再喝多一句「而家你哋食定唔食！」侍應丁過嚟問咩事，我哋同佢講多次成件事，佢俾我哋再揀過同要咩菜，我哋話唔需要，灼生菜ok，之後侍應乙自己走過嚟話唔好意思，話可能自己誤會咗，我話你記得取消個白菜，佢話ok，但最後埋單當然都係冇取消，要收我哋$98炒白菜！平心而論，三百蚊一位食呢啲「海鮮」，附近其實有更多更好嘅選擇，十幾年都喺度食其實只係習慣，但今日侍應丙的一副嘴臉令我哋覺得自己太犯賤，仲差啲以為自己喺度乞梗食，成家都吞唔到呢啖氣，樣樣都冇心機食，一踏出門口已一齊講，「以後都唔要再嚟全記食！」…查看更多