angelee1989的個人專頁

住係坑口附近嘅都知坑口村出名餐廳多，放工同朋友去睇下有咩啱食，發覺新開咗幾間餐廳，朋友想食西餐所以我哋就揀咗環境開揚嘅"FIKA"🍽️意大利水牛芝士番茄沙律配青蘋果爆珠：柔軟嘅水牛芝士搭配新鮮蕃茄片，配上黑醋、橄欖油同羅勒醬汁，入口清爽非常開胃！原本見到青蘋果爆珠放喺沙律入面覺得有啲奇怪，意想唔到將青蘋果爆珠、水牛芝士同蕃茄夾埋一齊食竟然出奇地夾🥗惹味水牛城雞翼：雞翼炸至外脆內嫰，醬汁相比平時食開嘅辣度較低，食開微辣嘅朋友都接受到，酸酸辣辣非常惹味！FIKA自家製雙重煙腩卡邦尼意粉：店員推介嘅招牌卡邦尼意粉，肥而不膩嘅雙重煙腩分別係意大利豬腩同本地豬腩肉，口感各有不同但同樣甘香美味！廚師仲會係客人面前將芝士磨碎灑上意粉上面😍扁意粉彈牙有嚼勁！日本蛋蛋味香濃，蛋汁份量同溫度都控制得相當好，入口香滑而且忌廉味道濃郁❤️店員有禮貌，食物上枱時廚師仲會出嚟介紹食物，係一間非常用心嘅小店👍🏻…查看更多

餐廳位置有少少偏僻，如果唔係朋友帶路我可能都要搵一段時間，今日我哋主要係為咗佢嘅招牌牛角包而嚟😍龍蝦湯流心牛角包：牛角包嘅外層烤到好酥脆好有層次感，一切開香濃嘅龍蝦湯就會湧出嚟，入口有少少似飲緊酥皮湯但係外皮仲可以保持到酥脆，做得非常出色🦞香辣煙茄黑毛豬腩意粉 ：西班牙黑毛豬腩用上48小時真空慢煮，肉質嫩滑而且鬆化！軟硬適中嘅扁意粉配上酸辣煙茄醬汁同帕馬臣芝士，惹味開胃🐷白松露野菌流心蛋高纖穀物意大利飯：一上枱白松露牛油嘅香氣已經撲鼻而來🫶🏻肉桂蘋果流心牛角包：外皮同龍蝦湯牛角包一樣酥脆，入口有啲似食緊蘋果批，酸酸甜甜好好味 🥐真空慢煮法式芝士蛋糕：係我食過最重芝士味嘅芝士蛋糕😍芝士味濃郁之外蛋糕軟滑細緻仲好creamy！配上酸咪咪嘅自家製藍莓果醬，仲可以中和油膩感🧀雖然我哋係為咗牛角包而嚟，但係餐廳其他嘅食物質素都好高，我哋都對今餐非常滿意😋…查看更多

放工同家姐去咗維園附近，見到<味滿> 咁啱有齊我哋兩個都想食嘅嘢，望落座位都幾舒服所以我哋就入咗嚟！薑蔥豬雜撈麵：有豬膶、豬肚、粉腸、手打豬肉丸同鮮肉片，材料非常豐富而且新鮮，豬潤嫩滑唔韌又唔會太生， 生熟程度煮得剛剛好，時間掌握得非常好！配上爽彈粗麵非常滿足👍🏻有骨海南雞飯：海南雞皮爽肉嫩，有啲美中不足嘅係無雞油飯，不過粒粒分明嘅白飯亦都唔錯！跟飯送上嘅湯充滿濃郁蝦籽味🐔鮮蝦腸：腸粉皮滑捋捋，入面包住大大隻嘅蝦同埋韭黃，名副其實嘅皮薄餡靚🦐香脆炸雲吞：一碟有六隻，熱辣辣脆卜卜，每一啖都食得到新鮮蝦肉，配埋泰式甜辣醬非常惹味😋紅油三寶：有水餃、菜肉雲吞、腐皮卷，雖然叫紅油三寶但係辣度非常低，如果可以揀辣度就更加好😆蝦籽芥蘭：翠綠爽甜嘅芥蘭灑上大量鹹鮮蝦籽，令人再三回味😍薏米水：薏米除咗可以美白仲可以消腫，加埋薑一齊煲更加香濃而且暖胃🥰食物質素唔錯價錢又唔貴，得閒行開附近可以再嚟食😊…查看更多

同事同我一樣都好鍾意食辣，所以佢間唔時都會帶我去食辣嘢，今次佢帶我嚟佢屋企附近僅僅開咗幾個月嘅川菜館<麻辣香鍋>🌶️秘製拍青瓜：爽脆嘅青瓜配上酸辣嘅秘製醬汁，開胃又解辣🤤麻婆豆腐：因為我哋香鍋加咗薯粉所以就無叫白飯，唔配飯淨咁食都唔會太鹹，豆腐嘅嫩滑程度直頭入口即溶👍🏻霸王蝦球：呢個真係無得輸！蝦球嘅脆漿薄薄一層緊貼住大大隻嘅蝦肉，真正外脆內嫩而且彈牙，香辣惹味但係又唔會嗆喉！雖然皮膚敏感唔應該食咁多海鮮但係真係好食到會一隻接一隻，停唔到口❤️❤️❤️麻辣香鍋：我哋揀咗香辣小辣，配料加咗牛味濃郁嘅牛肉片、爽甜萵筍、爽脆蓮藕、豆香味濃嘅豆皮、鴨血同煙韌薯粉，每款份量都好多，味道夠香夠辣又唔食到好口渴🫶🏻食物質素唔錯而且價錢唔貴，相信我哋短期內會再嚟😆…查看更多

放工同同事去咗佢想試好耐，主打食魚嘅＜魚事者＞🐟炸魚狗腸：魚狗腸啖啖魚肉，和風紫菜味道似章魚小丸子嘅醬料，辣辣地好惹味😆咩都有啲小食拼盤：有炸燒賣、炸芫荽燒賣、雞軟骨、炸魚無薯條撈咗店家秘製嘅蒜辣粉非常香口，外型雖然同薯條一樣但食落比薯條更加好食仲唔會覺得油膩🍟Don't陰功魚麵2.0：餐廳打正旗號賣魚嘅食物，當然要試呢度嘅招牌爽滑彈牙魚麵！湯麵配料豐富，魚片、魚蛋、魚皮餃每樣都各有兩粒！對本身鍾意食辣嘅我哋覺得冬陰功惹味但係唔太辣，食開微辣嘅都可以嘗試🥣卡邦尼烤雞魚米粒粒：職員推介嘅Fishotto魚米粒粒，用爽彈魚肉變成外型好似飯粒嘅意大利飯，雞肉搭配濃郁嘅忌廉芝士醬汁非常香口，灑上脆脆煙肉粒口感更加豐富☺️洛神花山楂雪梨茶：大大杯，味道微酸最適合用嚟解膩🥤…查看更多

舊同事帶埋小朋友入嚟坑口探我，之前食過兩次Coffee Break覺得味道唔錯，所以帶佢哋嚟食午餐！黑松露薯條：薯條幼身炸得非常香脆，除咗灑上黑松露碎仲有松露調配嘅醬，小朋友嘅最愛🍟烤羅馬生菜配蜜餞巴馬火腿、溏心蛋、柏爾馬芝士碎、鯷魚醬加煙三文魚：全棵羅馬生菜整嘅進化版Caesar Salad，溏心蛋蛋香味濃，蜜餞巴馬火腿脆卜卜好似脆脆豬肉乾咁好得意😝煙三文魚淡淡煙燻香味唔會過鹹食得出三文魚嘅鮮味👍🏻酥炸雞球蕃茄意大利飯：雞球酥脆，意大利飯軟硬度適中唔會太硬亦都唔會太淋，番茄酸甜開胃適合小朋友食🍅牛油果墨西哥辣椒醬芝士安格斯牛肉漢堡配薯條：醬汁香辣惹味搭配上新鮮蕃茄同鹹香芝士，仲有份量十足而且肉汁豐富啖啖肉嘅安格斯牛肉堡，一人一半都已經非常滿足🍔繽紛樂朱古力：濃郁嘅朱古力味，入口香滑仲有整整一條嘅繽紛樂朱古力😆雜莓乳酪：雜莓同埋乳酪都係健康嘅食物，酸酸甜甜小朋友就最啱飲，小朋友話好yummy☺️…查看更多

朋友搵到間新開嘅壽喜燒店話好似唔錯，鍾意試新嘢嘅我當然即刻約埋佢一齊去食好西啦！餐廳位置都幾偏僻，如果唔係朋友識路我應該都搵唔到😂😂 我哋叫咗少少串燒🍢牛舌($52)：爽口惹味！珠蔥豚肉卷($42)：蔥香十足，中和咗豚肉嘅油膩感！素拼串($58)：秋葵、蓮藕、冬菇，清新爽脆！壽喜燒二人前($898)：呢度嘅壽喜燒最特別係店員會即場喺棉花糖機整棉花糖出嚟放喺鍋入面等融化之後放入餐廳自家調製壽喜燒醬汁就可以開始煮A5鹿兒島黑毛和牛，店員會細心詢問每片和牛想要嘅熟成度！和牛油脂豐富，沾上蛋味濃郁嘅日本蘭王雞蛋入口更加嫩滑juicy😍季節野菜盛盒除咗有蔬菜之外仲有鮮味蟹棒、滑捋捋豆腐、冬菇、竹輪卷同埋超索味油揚🥗最後食埋爽滑彈牙嘅真打稻庭烏冬❤️巨峰提子乳酸梳打、蜜桃乳酸梳打($48@)：酸酸甜甜，清爽冰涼🍇🍑…查看更多

諗唔到食乜好嘅時候放題永遠係最好嘅選擇😆今次朋友生日就揀咗喺朗豪坊附近，地鐵站出口行幾步路就到嘅大瀛喜同佢慶祝🎂 刺身：刺身種類有好多款，每樣都好新鮮！北海道帶子鮮甜厚肉、赤蝦大大隻爽口又彈牙🦐火灸壽司：醬燒蟹棒、鹽燒左口魚邊，壽司飯細細件食多幾件都唔怕😚天婦羅：虎蝦、皇帝蟹棒，由薄薄嘅脆漿緊緊包附住，熱辣辣非常香口☺️炸物：榴槤炸彈一咬開濃郁嘅榴槤味即刻散發出嚟，鍾意食榴槤嘅唔可以錯過！芝麻雞翼皮脆肉嫰，香口惹味！串燒：蒲燒鰻魚肉質肥美無腥味！燒物：蒜蓉醬烤扇貝入口蒜香味十足但又食得到扇貝嘅鮮味🤤黃金醬燒開邊蝦醬汁比例平均，唔會好似平時出面嘅放題咁醬多過蝦👍🏻西京味噌燒比目魚燒到剛剛好，魚油豐富，魚皮香脆肉質嫩滑😍一品料理：鮮魚濃湯浸菜苗清爽健康！殿堂宴客醉鮑魚淡淡酒香好滋味！吉品鮑汁扣花膠滿滿骨膠原！煮物：金湯酸菜魚第一次喺放題見到，湯底酸爽微辣魚肉嫩滑🐟食物上菜速度快而且無漏單值得一讚👍🏻…查看更多

約咗閨蜜食飯，餐廳揀咗由同事介紹嘅＜申、居酒屋＞，位置距離公司十幾分鐘路程，而家開始秋涼放工慢慢行過嚟都唔會太辛苦！大家都唔係好肚餓，所以我哋叫咗少少串燒同埋叫咗個飯share食☺️生燒鰻魚：同平時食開嘅蒲燒鰻魚唔同，生燒可以食得出鰻魚本身嘅味道！鰻魚厚肉彈牙無腥味，表皮仲燒到微微焦脆👍🏻牛舌：每次食串燒都必叫嘅牛舌，厚切牛舌燒到外脆內嫩而且牛味濃郁👅雞軟骨：燒得剛剛好，香脆惹味唔油膩！炸明太子雞翼：無骨雞翼內餡包住滿滿嘅明太子，入口鹹香惹味但略嫌炸得乾身咗少少🤔炸雞飯：南蠻雞食得多但係啲醬多到咁真係第一次見，起初擔心食落會膩，但係當我食咗第一啖就即刻知我嘅擔心係多餘，因為醬汁加咗洋蔥碎喺入面非常惹味又清新，我嘅喜愛度直頭係淨係啲醬我都可以食到成碗飯😍主角炸雞都非常有驚喜，皮脆肉嫩仲好juicy，而且份量都幾多❤️牛油番薯伴雪糕：香甜蕃薯仔配上微甘嘅抹茶雪糕，甜度較低感覺上罪惡感低啲😆食物整體價錢唔太貴而且坐位都幾舒服🤗…查看更多

放假約咗閨蜜去銅鑼灣行街，大家掛住行街連晏晝都無食😆閨蜜提議不如去牛大人打邊爐，我當然同意啦🤤4點幾我哋就上咗去Walk-in排隊，一夠5點鐘餐廳就即刻安排入座🫶🏻外面自取嘅配料同埋飲品選擇都非常多，喺社交平台讚好同埋Follow仲有黑糖珍珠鮮奶送，香甜黑糖配上奶味濃郁嘅鮮奶，珍珠如果可以煙韌少少會更加好☺️身為牛魔王嘅我哋決定食最高級嘅澳洲極上和牛套餐😎 套餐附送每人兩粒澳洲M9和牛牛丸，牛丸彈牙肉汁豐富而且牛味濃郁，係我食過最好食嘅牛丸😍澳洲M5和牛牛肩卷油花均勻油脂甘香，肉質軟嫰❤️安格斯牛小排同樣出色， 肉質滑嫩入口juicy！北海道十勝豚豬肉味濃郁，入口爽口唔油膩！台灣濃香蕃茄鍋，湯底酸甜滿滿濃郁番茄味，最後放入新竹米粉將精華吸收曬非常入味👍小食方面士林鹽酥雞、真豬小香腸、梅甘酥脆薯全部都熱辣辣而且有水準同喺外面散叫嘅味道一樣🤤食埋雪糕真係好滿足，飽到要捧住個肚走🤭…查看更多

幾個月前同事曾經即興約我過嚟ROJO食飯點知嚟到摸門釘，今日我哋做足準備打定電話Book位保證萬無一失😆同事話Tapas係西班牙好重要嘅飲食文化泛指佐酒嘅前菜小食，所以我哋都有叫😋Hokkaido Scallop Carpaccio ($98)：新鮮厚肉嘅北海道刺身帶子配上酸咪咪熱情果醬、柚子、青檸啫喱同埋三文魚籽，清爽又開胃😍Tortilla ($88)：西班牙薯仔軟臘肉腸蛋餅，鹹香軟臘肉腸同芝士、薯仔仲有洋蔥，入口層次分明，蛋味香濃！淋上沙律醬同埋蔥花味道更加豐富👍🏻Ink Seafood Paella ($228)：西班牙墨魚汁海鮮飯材料豐富，有青口、魷魚、蝦、蜆同豬腩肉，底部仲有少少飯焦非常香口🦐🐖Churros ($68)：新鮮熱辣香噴噴脆卜卜嘅西班牙肉桂油條，配埋朱古力醬同埋凍冰冰嘅雪糕仲有金寶脆脆，口感豐富非常好味🍦…查看更多

約埋同事去樂富探剛剛生咗BB無耐嘅舊同事，大家決定預早時間去附近買禮物同食午餐！同事想食酸菜魚，咁啱見到『十三少』有，所以我哋就決定喺度食午餐😋椒麻皮蛋：選用金黃色嘅糖心皮蛋，椒麻醬汁酸香微辣配上蒜頭同辣椒碎，惹味開胃🤤酸菜魚：上菜時店員介紹湯底用上魚骨每日新鮮熬煮非常鮮甜，建議食之前可以飲碗湯先👍🏻雪白魚片採用新鮮鱸魚起肉，分量都幾多而且每片都大大塊啖啖肉滑捋捋🐟酸菜口感爽脆，酸度同辣度溫和唔會嗆喉，將鮮酸香辣集於一身！味道非常適合送飯，雖然已經叫咗荷葉飯但係我哋都忍唔住叫咗碗白飯share❤️蒜香荷葉蟹飯：荷葉包住螃蟹同白飯，用蒸煮嘅方式烹調！蟹肉上放上餐廳自家調配嘅蒜油，荷葉嘅香氣同蟹汁滲透晒係白飯入面，吸滿蟹肉精華嘅蒜香荷葉蟹飯芳香撲鼻，入口甘香而且鮮甜😍…查看更多

喺失業率高企嘅情況下公司竟然仲有人工加，當然要食餐好嘅稿賞自己！嚟到同事介紹位於銅鑼灣嘅御鐵，加咗人工咁開心，我哋決定食最豪華嘅E餐❤️煙三文魚野菜沙律：煙三文魚帶有淡淡煙香，柚子醋搭配爽脆嫩綠嘅沙律菜，清爽又開胃🥗北海道鮮帶子配魚子醬：手打菠菜汁同意大利黃瓜墊底，鮮甜彈牙刺身級鮮帶子配上鹹香魚子醬，放上食用金箔矜貴又美味😋南非活鮑魚配海苔醬：鮑魚非常新鮮，喺鐵板上面嘅時候仲郁緊！而且大隻到成隻手板咁大😳鮑魚肉質柔軟，搭配海苔忌廉汁同食鮮味更濃👍🏻西澳龍蝦配海膽汁：成隻龍蝦起肉，肉質嫩滑鮮甜！龍蝦膏同海膽煮成嘅惹味醬汁香濃但又唔會搶過龍蝦本身嘅鮮味🦞香煎法國鴨肝：鴨肝外脆內綿密入口即溶，搭配日本青蘋果同黑醋中和油膩感😋熊本縣A5和王牛厚燒：厚燒和王牛油花均勻肉汁豐富，牛味濃郁甘香🐂伴碟嘅配菜香甜同樣美味👍🏻三文魚籽海膽炒飯：飯粒炒到粒粒分明，上層放上大量鮮甜度爆燈嘅三文魚籽同海膽😍甜品：有幾款味道可以揀，我揀咗紫薯雪糕😋值得一提嘅係店員上菜嘅時候會好細心咁講解每一碟嘅食物！食過唔少鐵板燒，無論食物質素同店員服務態度，以目前嚟講御鐵都係我心目中第一位，值得推薦朋友❤️❤️…查看更多

放工出銅鑼灣打算買好出名嘅麻糬波波，點知見到隔離舖位嘅餐廳人龍排到落樓梯底😳我哋抱住人多嘅地方肯定會有好嘢食嘅心態決定排隊😆人龍雖然好長但好彩排咗大概半個鐘就有位☺️炸魚片米粉($98)：粗米粉其實即係米線，除咗有5件炸魚仲有蕃茄、白菜仔同紫菜！魚湯底鮮甜無腥味，我哋連湯都飲清光😋叻沙($98)：湯底香辣惹味而且配料豐富，有蝦、魚蛋、魚片、豆卜同半隻烚蛋！咖椰爆漿($68)：幾乎每枱都有叫嘅甜品👀多士包住咖椰、牛油、花生醬、朱古力榛子醬同煉奶，最後灑上美祿粉！可惜甜度爆燈，食1件已經感覺有啲飽滯😆黑白($28)：仙草奶茶平時就飲得多，仙草豆漿真係第一次飲！豆香濃郁嘅豆漿加上滑捋捋嘅仙草感覺好清新 🥤美祿爆炸($58)：超濃郁嘅美祿味，面層仲有好多朱古力脆脆😍餐廳採用自助形式，食完嘢記得幫手將餐具碗筷放番去回收處😊…查看更多

喺ig見到朋友打卡，俾餐廳嘅環境吸引咗，即刻約喺附近開鋪嘅閨蜜放工過嚟食晚飯😍Be leaf小食拼盤($108)：水牛城雞翼外皮鬆脆雞肉嫩滑，成隻雞翼都沾滿酸辣惹味醬汁😍泰式魚餅散發淡淡檸檬葉香氣，沾少少甜酸醬實在泰美味😋洋蔥圈炸漿緊貼洋蔥，外脆內juicy👍🏻香煎焗波士頓龍蝦 龍蝦汁燴撒丁珍珠麵($138)：足足有半隻嘅波士頓龍蝦肉質彈牙，龍蝦汁鮮味濃又唔會過鹹！珍珠麵份量都幾多，雖然望落好似意大利飯但食落就係意大利麵嘅口感，都幾特別🦞香煎白鱈魚柳配自家製橄欖杏仁醬($248)：大大件白鱈魚扒煎得剛剛好，外皮煎到香脆，肉質鮮嫩完全冇魚骨！自家製橄欖杏仁醬味道唔太突出，反而伴碟嘅紫薯蓉非常香甜而且綿滑，伴住魚肉一齊食非常出色😍Papaya Mango Smoothie($52)： 木瓜味相對濃啲，入口淡淡芒果味，清清甜甜🥭Strawberry Avocado Smoothie ($52)：酸甜士多啤梨加上牛油果獨有嘅香氣令人一啖接一啖，將上層嘅cream溝埋一齊入口更加順滑🍓🥑呢度唔單止環境好靚好適合打卡，連食物質素都好好❤️…查看更多