yanyanWcloris的个人专页

以前聽同事講呢一間嘅千層蛋糕係一流，有一次經過，忍唔住買咗個椰子千層蛋糕，超足料。今次決定堂食睇吓佢咩料，叫咗一個咖喱大蝦，牛肉飯，炒通菜同泰式鳳爪，仲叫咗杯椰汁冰，出乎意料之外嘅好食。牛肉飯啲牛肉唔會全熟，又唔會好韌，配上好香嘅薑黃飯，食完都唔會覺得好油。炒通菜正常發揮。咖喱大蝦燒肉味，又新鮮，咖喱入邊仲加咗啲洋蔥，食落唔會覺得淨係食啲汁，點埋個薄餅一流。泰式鳳爪雖然預咗佢辣，估唔到呢一間係勁重手，一路食一路話好辣，好過癮。椰汁冰入邊仲會有椰子肉，性價比勁高。最後仲打包咗一個芒果千層蛋糕走。值得讚賞係呢一間餐廳嘅員工好有禮貌，特別有一個戴眼鏡嘅女仔，同埋一個企reception嘅後生男仔，我估計係店長之類，佢又要做埋水班嘅工作，雖然我覺得自己好多要求，不過佢哋都盡量滿足。…查看更多

好耐之前禾輋嗰間仲好好食。最近喺新蒲崗附近返工，見到佢開咗分店，諗住買個外賣試吓。點知超難食，嗌個腩肉，全部都係肥肉咁滯。食到尾仲要見到有條膠帶，本身諗住拎落去同佢講，不過今時今日餐飲業，同舖頭反映，分分鐘俾人鬧返轉頭。所以都係呢度呻吓算。…查看更多

一向唔敢喺茶記鋸扒，次次嗌5成都比8 9成我🫠食咗幾次四寶，覺得質素唔差，個個咕嚕肉食極唔厭，見到個新鮮菠蘿都覺得滿足🤣今次比次機會佢，食塊西冷，依然係5成，點知估佢唔到喎，今次真係5成，入面仲係粉紅色，厚得嚟肉身都好嫩🥩本身見到佢個餐又包又蛋，我已經知自己一個人唔會食得晒，咁岩見到個大家姐🤣（我估，因為得佢係粉紅色衫，而且次次都見到佢）忍唔住問可唔可以咩都唔要，淨係要扒同薯條，大家姐都超好人，估我一個女仔食唔晒，都轉比我。點知塊牛扒真係厚到爆炸，我最後都係食唔晒。因為我食薯條一條要食沙律醬，但一般茶餐廳都唔願比沙律醬我，又話要加錢，但呢度都好捨得，大家姐仲話唔夠出聲🫶🏻香港好小高質茶記，四寶係一個幾好嘅選擇，雖然定價比普通茶記高，不過質素同價錢成正比，由早價已經係大大份，仲有招呼有服務👍🏻…查看更多

冰室小菜館一向出名大件夾抵食，因為買外賣唔知食咩，咁啱經過尖沙咀分店，諗住試吓，返到屋企先知原來加咗價。買咗6個餸，我極度懷疑尖沙咀分店嘅廚房佬係唔識煮。5:30打去落單，叫我四個字後落去拎，唔知係咪下午茶時間冇咩人叫廚房嘢，落到去個外賣已經出咗，所以返到上樓已經得返微暖。叫咗煎封䱽魚，四隻鮑魚仔，豉椒炒蜆，一隻乳鴿，椒鹽腰果鮮魷，白灼蝦。有食開嘅朋友仔，都應該知道白灼蝦出晒名抵食。我自己都食過其他幾間分店，全部都有質素，今次第一次食到差唔多全部都係霉嘅，半斤入邊得兩隻叫正常，不過冇辦法，買得外賣都唔會打返去同佢講。乳鴿，唔知點解可以黑到好似燶晒咁，好彩食落去叫正常，只係外觀唔好睇。豉椒炒蜆同埋椒鹽鮮魷真係難食中嘅難食，豉椒炒蜆落得太多水，個底都唔似係汁，淨係得啲油，啲肉同埋啲殼全部都分開，基本上我可以直接夾走晒啲殼，淨係喺個底度摷返啲肉出嚟，仲要靭到不得之了，更加唔好講個味道，都唔知食緊咩，我仲專登睇返張單自己係唔係叫豉椒。椒鹽鮮魷先犀利，個廚師竟然將啲腰果都沾粉，所以叫外賣上到樓就林晒，仲要食落去一啲都唔似椒鹽，基本上都唔知自己食緊咩。煎封䱽魚其實整得幾好食，不過最奇怪係豉油竟然唔可以另上，第一次聽，外賣要浸住豉油返屋企食。鮑魚仔就正正常常冇特別。整體嚟講，下次一定會揀返堂食，仲要唔食尖沙咀分店。…查看更多

等咗好耐嘅微辣大排檔終於開，得閒緊係要試下咩料啦。入到去見到啲裝飾幾好，好多白色衫嘅人仔扮大排檔，仲有米之蓮嘅大利來，緊係心諗唔錯啦。行到門口想攞飛，安心都做埋，都冇人問我幾位，有幾個員工望住我，我又望住佢，都唔行過嚟😂終於有人招呼我。問我食大排檔定車仔麵，問完個朋友，話想食大排檔，就入咗去。嘩，不得了，啲裝修都幾落重本，又麻雀枱，即刻想啤啤佢🤤睇完個餐牌，發現原來嗌完小菜，冇得食車仔麵，問完個員工先知原來分開，同朋友傾完覺得晏晝食得小，決定去食車仔麵，唯有下次先食大排檔☹️坐到出去，雖然好暗，啲歌又大聲又嘈，不過環境算唔錯，有啲逼都叫行到。掃完QR code見到啲餸名幾有趣諗住應該幾多啦，嗌咗個豬紅，墨魚汁腸，牛腩，試埋個微辣汁。上到嚟賣相ok。不過食落真係差得遠，豬紅食落有啲奇怪既味，同埋啲嘢食整體好咸😅杯咖啡甜到呀媽都唔認得，仲要聽到隔離枱個姐姐都係咁話好咸🫣感覺上唔覺得有網上講到咁吸引，可一不可再。不過有一個位好需要改善，因為我見唔到收銀位啦，咁咪舉手想員工幫下我，點知舉咗一陣都未有人理我，成班白色衫好似發緊夢緊，好奇怪，微辣係咪專登請啲後生仔😳食餐飯留意咗好耐 全部望落又MK又細個，都唔知自己做緊咩，一係就背住啲客係咁傾計。終於有人話我知收錢係喺個角落頭度，真係唔講都唔知😅埋單仲要收加一，除開人頭差唔多$90，真係嚇一跳，一個lunch食咁貴，食車仔麵大排檔，自助落單學人收加一，又冇服務冇態度。下次試小菜都要諗下先，呢啲質素唔改善真係冇機會回頭。…查看更多

聯和墟新開嘅冰室，見佢大大個招牌咁吸引，夜晚唔知食咩，諗住去試下佢啲小菜。入到去，裝修幾有feel，相信有花過心機，地方都算闊落，唔算好爆場揀咗卡位坐。叫左椒鹽鮮魷同西檸雞，味道真係唔錯，雖然唔算好大碟，不過上菜個下真係幾吸引。見到隔離枱個啲小菜同煲仔，已經諗緊下次想食啲咩。🤤美中不足既係啲員工服務態度真係唔得，大聲講大聲笑，著住裇衫個個姐姐對客10問9唔應，對住啲同事就大大聲鬧😂仲有個成身紋身既呀叔，粗口爛舌，做嘢求求其其，隻手又唔乾淨咁出餐，下次戴返隻手套會好啲囉。可能係茶餐廳啦，服務質素真係唔好期望太高，不過嘢食真係幾好，下次試下去食返個lunch先🤣上網見到原來好多分店，不過間間都參差，得閒都要出去周圍食下。…查看更多