alexayip3的个人专页

喺香港地食情人節套餐，好多時都會中伏。2025年又再次唔信邪，去咗西營盤高街去試吓新嘅餐廳。呢間Off Town Kitchen係一間標榜法國農村菜嘅餐廳。去到呢間餐廳，驚訝地發現地方非常淺窄，枱同枱之間嘅空間好少。但係佢哋嘅服務都非常貼心，整咗一個位置俾客人放隨身物品。呢個我覺得值得稱讚嘅。情人節餐當然就比較貴，今日個Menu價值$888，兩個人食差唔多$2000。所以對佢期望都會比較高雖然餐廳環境有啲淺窄，裝修亦都麻麻地。環境好似坊間嘅清水樓，連牆紙都未有嗰種。望一望佢個餐牌，唔係好覺係法國農村菜。反而好似一般嘅西餐。不過希望都係好食嘅。餐廳第一個上咗兩塊好細好細嘅麵包，冇錯，只有兩塊。size就好似一個成年人手掌嘅¼。黎左都唔係好覺 😥我哋試咗兩個唔同嘅頭盤，第一個係鵝肝。鵝肝煎得香濃香脆，內裏保持鬆軟。味道香濃。呢個做得唔錯。另一個頭盤係蝦，唔覺佢有咩特別。蝦肉比較結實，但係唔覺係一啲新鮮嘅海蝦。似係冰鮮蝦。羅勒葉蕃茄汁有少少辣，味道都尚算唔錯。但係以咁貴嘅價錢期望可能有少少落差。接住落嚟就係個美式華都夫沙律，味道可以。但係呢個沙律喺屋企都做到。性價比唔高。呢個自家製闊條麵味道算唔錯，但係本身以為會比較煙靭，點知可能煮得有啲過時，軟腍腍。冇咗意大利麵應有嘅咬口。神奇嘅係個意大利麵一啖係熱，下一啖只係常溫。唔多似係新鮮煮出嚟。有點失望。終於到咗主角，呢個Wellington混合咗鵝潤腸，個味道未必個個人都接受到。但係我自己覺得唔錯。酥皮係脆，用美國安格斯牛柳都可以話係唔錯。牛扒質地鬆軟，有濃烈嘅肉香。唔會煎過龍。情人節嘅甜品當然一定要有雪糕。拿破崙tiramisu蛋糕都算係一個比較破格嘅甜品。但係本身拿破崙蛋糕嘅脆皮應該係鬆脆，但係呢一個就變咗硬脆。味道雖然唔錯，但係口感差少少。其實總體嚟講食物嘅質素唔算太好，$888一位呢個價錢我個期望就會高啲。如果呢個套餐係價值$488，都算抵食。情人節嘅餐廳其實好講氣氛，以為法國菜嘅氣氛會比較好。點知後面有一台會高談闊論同大講粗口嘅中年女人同男人。🤦🏻‍♂️真係破壞晒氣氛。佢哋嘈到我哋坐對面想講嘢都講唔到。呢台嘅客人質素簡直非常差。嘈到我只想快啲食完快啲走。其實高街好多間唔同嘅餐廳，競爭都好大。下次再去試吓其他餐廳啦。…查看更多

💌情人節當然要搵一間比較浪漫嘅西餐。喺OpenRice見到呢間Green Orange，評分都好高。咁就嚟試吓啦。滿心歡喜嚟到，發覺呢間餐廳真係好迫。枱同枱之間嘅距離非常之細。本身侍應安排咗我哋坐喺呢一個位置。我見到都有少少驚訝。因為呢間餐廳價錢唔平，平均過$1000一個人。 呢個位係會個頭頂住個吧枱。😓要坐啲咁嘅位成個用餐體驗自然唔會好得去邊。之後，侍應都安排咗我哋係卡位，但係枱同枱之間都仲係非常之擠迫，差唔多同隔離檯痴住咁滯 🥲講埋野食。情人節特別餐單價錢都算偏貴。但係情人節要加價都理解既。講真，啲食物其實幾吸引🤩。加埋個價錢同埋評語，我地都幾有期望。首先，上左法國生蠔🦪。第一隻生蠔其實味道最濃，但係其他個啲味道好淡，味道唔同到我懷疑係兩批唔同既貨。不過起碼唔會有腥味。不過質素真係比較普通 😕下一個係shrimp Sambuca and tomato bruschetta. 個麵包🥖部份真係好硬。調味ok，但係蝦個汁真係唔得，完全蓋住蝦個鮮味。蝦似係急凍蝦。完全係一個係屋企都可以做得更好食既菜色 🤦🏻‍♂️沙律都係普普通通，醬汁係意大利醋，講真就真係冇乜特別。分分鐘喺屋企做都係差唔多嘅水準。洋蔥濃湯，呢個同我期望上係有少少出入。因為我以為係法式洋蔥湯。但係點知係嚟咗一個忌廉湯嘅款式。又係冇乜驚喜，唔算太過出色。呢個牛扒絕對係今餐嘅”驚喜”。先講咗配菜，除咗個薯仔有少少”暖意”之外，啲配菜全部都係凍冰冰，好似啱啱喺雪櫃攞出嚟咁。我食咗個蘿蔔，我都冇再食過。我以為西冷牛扒應該唔會差得去邊。點知佢喺上邊加咗一個好濃嘅蒜蓉牛油，完全蓋過晒啲肉味。而且令到滿口油。牛扒偏韌。最重點就係切到一半嘅時候，佢竟然係凍冰冰，真係用手都可以感覺到佢嘅”寒意”🥶。所以係完全失望。呢個朱古力mousse可以話係全餐最好食嘅。紅色嘅唔好以為係脆餅，只係蛋糕碎如果係加脆餅，可能個味道同口感會更加好。總括嚟講，呢一餐係充滿着尷尬”體溫”同埋”寒意”嘅一餐。完全估唔到收過千蚊一位嘅情人節套餐竟然會係咁嘅水準。侍應嘅服務態度其實唔錯，只係個氣氛唔似一間西餐廳或者Bistro，似係茶餐廳。😢應該都冇下次㗎啦，不過都希望餐廳可以改進。…查看更多

要喺香港搵一間🇪🇸西班牙餐廳唔難，但係要搵一間好食嘅就真係比較困難啲。呢間Casamigos真係算做得唔錯，環境同食物都一流。因為聖誕節嘅關係，有最低消費$1200 。雖然貴就貴咗啲，但係就俾機會我哋食咗好多唔同嘅嘢。籌款喺北海道帶子ceviche。裏面係帶子，配合三文魚子同埋飛魚子。淡淡的柚子胡椒汁，加埋新鮮嘅帶子，絕對值得一試。呢個係聖誕特別有嘅牛骨髓配法式田螺。牛骨水本身係冇咩味道，但係加埋濃烈嘅牛油味同埋法式田螺，都可以算係聖誕節裏邊比較有派頭嘅一個菜式。呢個薯仔粉真係有驚喜。佢唔係嗰種煙靭嘅薯仔粉，反而吸晒所有汁同埋香腸嘅味道。雖然香腸嘅味道比較偏鹹，但係個粉本身真係冇得頂值得推介。36個月parma ham，齋食冇乜特別。可以唔使叫。呢個八爪魚腳汁比較濃，但係八爪魚冇煮得咁硬。配合埋啲汁就啱啱好。不過如果可以的話，八爪魚可以煮得入味啲就最好。最後呢個”鬼佬油炸鬼” 🇪🇸 其實係叫churros! 非常香口。上面鋪滿糖，加埋啲士多啤梨朱古力醬，真係好好食。如果改白朱古力醬，可能畫面上會再好啲。雖然呢間餐廳大時大節嘅時候需要比Minimum charge，但係總括黎講呢間餐廳值得再去！記得大時大節老婆仔女生日情人節要book定位啦…查看更多

平時見到呢啲又食環境，又食質素嘅鐵板燒，就知佢呢個價錢唔會平得去邊。但係難得呢間鐵板燒做緊感謝祭，就梗係去試吓。呢間鐵板燒喺銅鑼灣信和廣場，全層都係餐廳範圍。分開咗壽司同埋鐵板燒嘅area。裝修同埋環境都好好。有啲位置仲對住海景添! 所以如果同情人或者慶祝生日，記得要book間海景房 🌅咁當然，除咗食環境之外，食物嘅質素都好重要。雖然感謝祭，但係食物嘅質素都唔馬虎。首先，嚟咗個刺身拼盤，有赤身，馬刀背同埋池魚。質素都唔錯，絕對係新鮮。鐵板燒我哋點咗兩個餐，分別係澳洲和牛薄燒同埋美國牛肉厚燒。個餐其實仲有得揀埋鮑魚，同埋蝦。仲有可以任選兩款時令海鮮，蠔或者鵝肝。師傅先燒咗四款蔬菜俾我哋，啲菜都鮮甜同埋新鮮。再來就係鮑魚。師傅燒到剛剛好，口感唔太un。有一種淡淡的海水味道。非常香口。蠔就好似有啲失手，煎燶咗嗰邊。但係牛油味好重，反而搶走蠔嘅鮮味。反而啲煙肉幾好食，煎脆左係唔錯👍🏻。鵝肝非常之好食，夠濃味，油分好足。表面香脆，入口融化。個包其實可以唔使，我鍾意食到鵝肝嘅原味。之後就到蝦，質素都唔錯，冇煎到過熟。上面係自家製嘅蝦膏汁。澳洲和牛薄燒，肉味濃厚，入口即溶。配埋啲蒜片同埋蔥，感覺少咗油膩感。嗰種肉味持久唔散。和牛我覺得適合薄燒多啲，咁就唔會令到自己太滯美國牛肉就肉味濃啲，但係唔會太un。真係燒得剛剛好👌🏻炒飯就普通啲，都係純粹填飽你個吐。但係加埋櫻花蝦嘅香味，同埋佢哋自製嘅蝦汁，比起出面其他炒飯有特色好多。呢個係classic既鐵板燒甜品。如果熱辣辣咁食其實係唔錯嘅。可惜佢已經放咗一段時間，雖然仲係非常脆口，但係凍左啲，失色咗少少。甜品🍮，牛奶香味唔錯👍🏻，紅豆🫘甜。總括嚟講呢個感謝祭係非常之抵食，質素非常之好。唔怪得知佢星期一到全院爆滿。值得推介！…查看更多

係IG見到呢間大欖串燒賣廣告，上網見到環境都唔錯，就同朋友去試下。星期六晚去到，有好多卡位，感覺舒服有空間。唔似出面啲放題地方坐得逼一逼有唔同餐可以揀，有牛🐮有豬🐷，我地當然係揀左燒牛啦外面有凍櫃，可以攞一啲丸，菜等等一定要試下啲土匪雞翼，不過就要燒耐啲。麻辣雞翼就麻麻地，可以專注其他雞翼上面 🤤牛🐮既質素都唔錯，切到好薄，容易燒，油香好夠，肉味濃郁，特別係牛舌，真係可以不停encore要讚下啲秋葵，幾新鮮爽口。其實間餐廳都算做得唔錯不過啲抽風就麻麻哋，食咗一陣發覺自己比油煙包圍着。成間餐廳都煙霧離漫 😅其實雖然我地選擇左放題，但係其實肉嘅選擇唔係好多。比起出邊嘅放題餐廳，肉嘅選擇真係可以得嗰幾樣。食食吓，發覺原來我哋最想食嘅牛舌竟然賣晒。(但係牛舌係其中一個主要牛既選擇）所以只好食其他既 😅 但係就令人失望個爐嘅面積就真係比較細，想一次過燒都有啲難度。特別係雞翼呢啲咁難燒得熟嘅食物，真係分分鐘要等好耐先食到。所以呢間餐廳嘅食物質素真係唔錯，但係其他嘅配套就可以再改善啲 👍🏻…查看更多

除夕夜，本身自己book既餐廳俾人cancel左，突然間就要搵一間新既餐廳。上OpenRice望一望竟然有間環境唔錯既西餐仲有位，即刻就book左先。入到去其實環境好好，有個bar枱，對住條新既跨灣大橋。望入去廚房就見到一個架，上面放滿左dry age beef，咁當然就要試下咁靚嘅牛肉!個晚就試左幾樣菜先叫左兩個starters，一個Hamachi，一個grilled octopus tentacles. Hamchi 好新鮮，配合三文魚子 同埋酸酸地既柚子汁，好開胃。不過就食落有啲根。呢個Grilled Octopus就非常香口，滿滿既炭燒味。食落唔會太韌，保持一定口感。但係可能條尾嗰個位燒得有啲太燶，所以有啲苦味。輪到主菜呢個係mediterranean beef stew，啲牛肉煮得好好，唔會好韌。蘿蔔煮得好入味，如果配飯真係可以食幾碗。唯一嘅敗筆就係汁太少，個麵包得物無所用。嚟到呢一間，一定要試吓佢21 days dry aged beef。試咗佢呢個300 gram既striploin。肉味好豐富，入口有淡淡的炭燒味同埋果香。絕對適合一班對肉味有追求嘅人士。不過啊可能天氣太凍，同埋佢個碟唔熱，所以上枱好快就凍晒，變左有啲韌。如果兩個黎食就叫一份就好，留肚食其他菜。其實menu仲有其他pasta同埋主菜都可以試下，希望下次嚟嘅時候個牛扒可以熱啲，相信就會好好食😋服務一流，環境都好好。下次嚟就要試埋其他主菜…查看更多

雖然大部份既大阪燒店都係比較貴，但係呢間都真係真係偏貴。💸💸黎到呢間餐廳，第一件事就係俾佢嘅環境所吸引。好有日本🇯🇵既居酒屋feel。店鋪裏面就比較大煙，抽風上可能要改善下。講返嘢食先，價錢都真係比較貴。所以同我嘅期望都有啲落差。質素就真係冇得頂，但係份量就真係偏小。同埋星期五公眾假期lunch time黎到好多餐牌上嘅嘢食都冇或者賣晒，搞到有少少掃興。呢個白玉背好好食，炒得好香。但係唔會乾身唔會un。質素唔錯。嚟到大阪燒嘅舖頭點可以唔試吓佢嘅牛肉大阪燒。質素都算ok，唔係好覺好重嘅牛肉味，但係起碼笑得香同埋乾身。最後嚟到全場最貴既A5和牛炒飯。真係可以抄到粒粒分明， A5和牛嘅質素冇得頂。可以嘅話真係食唔停口。但係份量真係太細，同個朋友食兩啖就冇晒。有啲失望🙍‍♂️總括來講，呢間都算係值得嘗試嘅一間餐廳。有氣氛，食物質素都唔錯。如果可以改善下通風，同埋整大啲食物嘅份量嘅話，應該會係一間好好嘅餐廳!…查看更多

In a beautiful sunny day, what’s better than enjoying some local American food? 😋🇺🇸This small little restaurant reminds me of a traditional local food stand or bar food in Los Angeles. The menu consist of burgers, chicken wings, chicken tenders and a bunch of sides. I was hungry, so I chose three things from the menu: 1. Traditional double double cheese burger with tater tots and beans2. Lemon pepper chicken tender3. Chicken waffles Burger was juicy, and definitely well cooked. The buns could be toasted a bit more so that it won’t get soft too quickly after absorbing the meat juice! But in general it’s great!The waffles are quite awesome as well! Freshly made waffles and deep fried chicken tenders reminds me of iHOP! Definitely worth the try, especially in a small little town in Mui Wo with such great food!…查看更多

生日當然唔可以刻薄自己，特別係已經好耐無返 “鄉下”，緊係要用食去彌補下啦，所以今日就揀左位於灣仔君悅酒店既日本餐黎慶祝下🎉!一打開餐牌，果然係五星級酒店既價錢，不過話到明係慶祝所以唔好理價錢，最緊要好食同食得開心🥳。餐牌上面有好多種唔同嘅set，然後客人就可以搭配佢想要嘅前菜。第一份嚟嘅就係呢款南瓜，好香，係一款唔錯幾開胃菜。黎到主餐，我哋就叫咗一個雜錦壽司🍣+腐皮烏冬。有五款壽司➕卷物。不過卷物嚟到嘅時候，紫菜已經淋晒，如果唔係見到壽司師傅喺面前整，會以為佢擺咗好耐。😅雜錦壽司就有蝦，深海池魚等等。其實以為呢個價錢會有拖羅，但係點知都係無。不過唔緊要，起碼魚生係新鮮。其他配菜就唔錯，水準之上。我哋仲叫咗另一份A3和牛厚切配白飯。好可惜，和牛嚟到嘅時候已經唔熱，雖然油分好夠，入口即融，但係少咗嗰種啱啱燒起上嚟嘅香味。甜品就有雪糕，應該係普通嘅Haagan Daaz。不過佢哋就好貼心，生日就送咗一個細既生日蛋糕!!總括嚟講，呢個價錢其實食物既水準可以再高啲。服務好好👍🏻，所有人都好親切。裝修都好靚，好有一間豪華懷石料理既裝潢。我會覺得環境比食物更好! 如果大家想去一間豪華嘅日本料理，呢個絕對係一個好選擇。但係如果想食比較高檔嘅食物質素，用呢個價錢其實可以試吓其他Omakase!…查看更多

一年做野咁辛苦，緊係要獎勵自己。今次就黎左一個新既Omakase試下。Omakase係一個講求師傅同食物既料理。食材既新鮮同埋師傅既手藝，態度都好重要！今次呢間就真係值得推薦! 呢三個前菜都非常好食，特別係個三文魚子配茄子。新鮮又開胃!魚肝打成醬，唔會好腥，係鮮甜既感覺。唔使加豉油wasaibi都已經好好味😋生蠔夠鮮甜, 絕對想叫多一個!!蝦上檯既時候都仲郁，非常新鮮! (不過師傅解釋其實已經死咗，只係神經仲反射緊)。蝦肉加上柚子香味，好好食！蝦頭🦐會幫你炸脆埋添!八爪魚分開兩個部份，身體同吸管分開食。身體唔會有根，吸管爽脆。兩個不同既口感!生A4和牛肉sashimi，淡淡既肉味，不過就略嫌太凍，好似肉味雪糕你個嘴裏面溶化。呢個餐有3個highlightToro無筋，係melt in your mouth。好重油香，顏色好靚！呢份咁靚嘅toro已經值回票價。不過仲有!!香箱蟹🦀️，係日本一個名產。蟹肉，蟹膏已經幫你拆好，每一啖都係蟹既味道。最好就好就係將三樣嘢都一次過放入口，係最高既享受😎。最後一個係toro + 魚油 + 既一份手卷!! 一定係全場既highlight (我一口氣食左兩個). 就算幾飽都要食!!價錢都係同出面omakase差唔多，但係食物材料，加埋一個手藝，知識豐富，又識介紹菜色同埋最好既食法既師傅，最重要係會識同客人傾計，好幽默，絕對值得去試下!…查看更多

一路都好想試吓香港唔同嘅印度菜，今次就嚟到天后，試吓一間比較正宗嘅印度菜。一入到黎餐廳就已經感受到好濃烈嘅印度風味，裝修好有特色。Lunch set有素食，雞🐔，羊等等選擇，咁今次我就揀咗牛油雞+ Naan bread。頭盤先上咗一個湯，呢個湯味道有少少奇怪，有啲帶酸，亦唔算係番茄🍅湯，所以飲咗一兩啖我都冇飲。反而我想將重點放喺嚟緊嘅牛油雞同Naan Bread呢個牛油雞椰汁味好香，有好濃烈嘅香料味道。個汁好香，下面有個小蠟燭熱住啲雞，冬天食都唔會凍哂。Naan bread好柔軟，吊住係個架上面，點汁食非常好味😋。個牛油雞食落有種甜味，同時有少少辣，好惹味！如果唔係普通Naan bread而係蒜蓉Naan bread既話就更加好跟住嚟咗個咖喱薯仔➕青豆。呢個咖喱薯仔好香，煮得好入味。對比起牛油雞，個味道冇咁濃，反而有浸淡淡的香草味。都可以點Naan bread食😋總括嚟講都算係一間唔錯嘅印度菜餐廳，裝修同味道都好正宗。希望下次多啲人嚟試就可以揀多啲唔同種類嘅咖喱!! …查看更多

呢間炮台山少店門口唔係好明顯，啲窗好暗。一開始以為冇開門。但係喺出邊見到個lunch menu好似唔錯，就膽粗粗推門入去試吓。見出面凍冰冰，所以一入到去侍應就好快比一杯熱茶。非常之貼心。我今次就叫咗一個天婦羅配熱烏冬。天婦羅略嫌太油，但係就熱辣辣，冇油味。佢哋有炸蝦，炸南瓜，炸青豆。最特別係有一個炸蕃茄。薄薄既脆漿加埋酸甜既番茄🍅，係一個唔錯嘅配搭。至於烏冬就冇乜特別。$72一個lunch set就唔算太貴，值得推介! …查看更多

自己行行吓街，發現到呢間同路人餐廳。第一次嚟，侍應態度非常之好。坐低先介紹一次如何選擇魚生飯。然後就自己決定自己嘅配料。今次我就叫咗碎蔥吞拿魚，馬刀貝，油甘魚，三文魚子，同埋火炙左口魚裙邊。五款魚生加埋都係$78! (火炙左口魚裙邊 +$8)。每款魚生都非常之新鮮。仲可以食到馬刀貝嘅鮮甜，油甘魚嘅油香。如果唔係火炙藍旗吞拿魚賣曬，我都會加埋落去，等啲飯都可以吸收魚生既油香。價錢都唔錯，咁嘅價錢可以食到咁靚質素嘅魚生都算係物超所值! 下次一定會再嚟!…查看更多

行行吓嚟到尖沙咀，見到一間小店。餐牌寫住印度黃薑咖喱飯，隔離個牌寫住意大利pizza + pasta。咁特別嘅combination梗係要入去試吓。叫咗一個黃薑牛肉飯，夏威夷pizza同埋beef bolognese。黃薑牛肉飯冇咩特別，咖喱味都好香。唔係好食到黃薑味，但係牛肉好入味! 夏威夷pizza應該係即整，芝士可以拉出嚟! 餅底唔會特別厚，材料新鮮! 絕對係一個用心整出嚟嘅pizza! Beef bolognese分量十足，肉碎醬好多，味道適中! 侍應亦都非常之好服務，非常熱情。同每一個食客都好好傾! 絕對係一間良心小店!…查看更多