為食鬼ssss的个人专页

喺Openrice見到哩間有得一人一煲關東煮咁得意嘅餐廳，隔涉啲都要嚟試吓～一番轉折行錯路後終於嚟到餐廳，不過一入到嚟都仲有啲壞消息，就係哩個酒場未有酒牌，啲酒有得睇冇得飲；另外就係今日未有鍋物提供。不過一場嚟到就繼續食吓關東煮同串燒啦～一坐底當然要諗吓個關東煮要揀咩餸啦~ 🥛等緊嘅時候比咗一人一杯雞湯我地，好香濃，不過都真係比較油～🍢大家都揀好晒個關東煮，重點講吓幾樣食材先~- 大根：關東煮內嘅大根又淋又入味，當然冇得輸啦- 玉子：以為係玉子燒咁，點知入口實到成粒魚蛋咁- 福袋：即係有年糕喺入面嗰種，入口煙煙韌韌好好食- 玉子福袋：之前睇介紹諗住係流心蛋，不過實情係包住咗嘅烚蛋，可以唔試🍡串燒方面我地試咗幾款燒蔬菜同雞肉串，我地重點講吓啲雞肉串($15@)~- (左一二) 山葵雞肉串：山葵冇咩味 - (左三四) 明太子雞肉串：明太子味不過不失- (右二三) 胡椒柚子雞肉串：胡椒味超重，唔太食到柚子香- (右一) 梅子紫蘇雞肉串：微酸咁幾好食除咗以上嘅嘢我地仲叫咗以下小食:- 🐙芥末章魚($28): 冇咩wasabi味，得個咸字- 👄墨魚咀($28): 正正常常都算爽口🍹飲品方面好彩冇酒飲都仲有幾多選擇，相中分別係信州蘋果梳打、靜岡綠茶可樂、完熟桃子梳打同信州白提子梳打($28@)。幾款果味梳打以蘋果梳打果汁成份最高(50%)，其他兩款其實都係果汁10%未滿，不過都幾香果味同唔會太甜。而綠茶可樂就.....可樂咁囉冇咩綠茶味，可以留番個quota飲其他嘢～總括而言，食物算係一般，不過始終係香港少見嘅類型，等似吓佢準備好晒所有食物飲品，應該會更好~…查看更多

喺灣仔番咗好幾年工，一直以為想飲茶冇咩選擇，點知仔細再搵搵先發現哩間老字號嘅存在，一食發覺咁出色，當然要寫番篇食評推介吓啲心水點心小食啦 (特別係發覺眾多食評大部份都係介紹緊佢嘅晚市食物)~首先係佢嘅🥨蛋散蜜芽糖夠重手唔怕一邊有糖一邊冇，仲配上香香嘅黑白芝麻🥰再嚟就係🦑酥炸魷魚鬚佢嘅炸皮夠晒薄，有別於平時喺其他茶樓食到嘅炸皮，哩度嘅比較鬆化，唔係好實一大片咁，更唔會覺得成口粉咁～然後就係佢嘅🍯蜜糖黑椒雞中翼唔好睇佢係普通炸雞翼咁簡單，隻隻夠多肉漲卜卜不突止，仲要炸完都非常juicy，加上調味甜得嚟幾惹味，係估唔到傳統茶樓會出現嘅出色食品。估佢唔到嘅仲有哩個🥘咖哩牛筋腩煎米粉米粉煎好切成好幾份好方便分食，再配上微辣嘅咖哩牛筋腩，脆脆地咁十分滋味除咗上述嘅介紹，仲有🦐蝦餃燒賣等必食點心都做得好好~件件都king size再加埋大大隻蝦仁，十分足料！總括而言，食物味道好，坐位唔會太迫，上菜又快，下次lunch hour想飲菜要再嚟先得！…查看更多

食過哩間餐廳一次之後，對於佢嘅食物念念不忘🤤 今日加班加到咁攰，當然要食啲好嘢慰勞吓自己~🦞芝士龍蝦忌廉飯 $168必點嘅係哩個risotto🧡 首先映入眼簾嘅係件龍蝦，上面鋪滿焗溶咗嘅芝士，入口好好味！加上哩度好貼心，提供晒架生比你拆肉，包保唔會浪費隻龍蝦仔嘅任何一部分~再嚟係個飯，好creamy，仲帶有濃郁嘅海鮮鮮味，令人一啖接一啖咁不停食~🍹仲夏水果茶 $42食住個咁heavy嘅飯，當然要飲番啲refreshing嘅飲品~ 上枱見到顏色好靚，未飲已令人好開胃👍🏽 加上茶壺下面有小蠟燭，可以暖住哩壺水果茶，唔怕放到不冷不熱咁~ 飲落果香都幾出，所以都不難想像到最後倒啲生果出嚟食，會發覺佢地完全冇味😂 因為所有水果嘅精華都去晒杯茶度了~🍵抹茶麻糬窩夫(FULL) $108去到最後當然唔少得叫番個甜品啦~ 我地叫咗哩度其中一款幾出名嘅甜品，就係麻糬窩夫了~ 喺眾多口味入面，我地揀咗抹茶味~ 當個窩夫出現時，見到嘅係佢既似花又似心心嘅外表，隨窩夫附上多種配料，包括有紅豆茸、抹茶mousse、吉士同埋蜂蜜，仲有雪糕同抹茶brownie粒粒。試過唔同配搭，其中覺得唯一係同蜂蜜冇咁搭，唔係因為個蜂蜜唔好味，而係佢個味太出，會蓋過主角嘅抹茶味。🍮Cream brûlée 當以為咁就完嘅時候，店員遞上一部機，邀請我地做份問卷，做完會送番個迷你Cream brûlée比我地。唔好諗住係免費送嘅甜品就唔會有水準，睇相都見到上面層焦糖做得非常靚，敲開成為一片片時仲可以每啖都食到甜脆嘅焦糖同軟滑嘅布丁，加上布丁蛋味濃郁，亦食到來自雲尼拿籽嘅香味，一流！總括而言，哩間餐廳嘅回頭度好高，不過佢嘅價錢算中上，建議可以約多幾個三五知已試多幾樣食物兼減輕胃部同荷包嘅負擔~…查看更多

工作忙咗成日一時之間唔知食啲咩好，去到上環亂逛之下嚟到哩間餐廳～🦀蟹肉焗釀蟹蓋配輕量田園沙律 $39見到咁平就有焗釀蟹蓋食，所以叫咗個嚟試下 😛蟹蓋好迷你好可愛同menu上圖片size一樣 (誤) 咬落食我出有少少蟹肉同蝦膠，唔算太彈牙，但係幾好味的，就性價比嚟講其實都OK~ 加上有個🥗輕量田園沙律，配上沙律醬食落幾refreshing~🍄黑椒蘑菇漢堡意粉 $56一上枱就聞到黑椒香味撲鼻，未入口已好醒神！仔細研究個醬汁幾足料，有黑椒、蘑菇、三色椒、粟米同煙肉碎，入口幾豐富~ 另外漢堡扒幾厚身，而且幾彈牙，算幾驚喜~ 不過個意粉就較淋，茶記質素咁上下咁。🥬三色素菜腐皮卷配自家手打菠菜麵(鮮茄雜菜湯底) $62個手打菠菜麵顏色青綠，加埋個蕃茄雜菜湯底，望落已令人好開胃👍🏽 本身睇落個鮮茄雜菜湯底好似羅宋湯咁，但飲落冇酸辣味，反而有微甜嘅蕃茄味，加上有好多好多煮到淋晒嘅雜菜，令人忍唔住飲多幾啖湯 🤤 腐皮卷大約手指咁上下粗，一份5條好似有隻手爬緊出嚟咁😂 餡料食到除咗有大路啲嘅紅蘿蔔同冬菇絲外，仲食得出有爽脆嘅沙葛，食落更有口感~🍋自家制低糖青檸鴛鴦薏米水麵餐會送一杯自家制低糖青檸鴛鴦薏米水，薏米好足，加上青檸微酸，為哩頓健康多茶晚餐完美作結。總括而言，哩間餐廳嘅食身未必係好完美，但味道都算中上，如果想食啲住家風味又健康嘅食物，不妨嚟試吓~…查看更多

好耐之前食第一次已經覺得好好味~ 今次見到用eatigo app有半價，馬上再book枱食多次~🌧是日天氣寒冷加上微雨，當然要比自己食暖番個人，加上見有半價，我地毫不客氣咁叫咗一人一客釜飯，再加咗個小食~ 每客釜飯都會跟一份前菜，而且前菜仲由以前嘅三味變成六味！其中最推介嘅就係佢地嘅茶碗蒸！不但高湯夠香，蛋夠滑，入面仲好足料，加埋啲菇菌香味，一流呀！食完前菜冇耐，釜飯就陸續登場了！每個釜飯set仲會跟一個麵豉湯添～🦀蟹釜飯 $198打開見到滿滿拆好嘅蟹肉加上一大堆三文魚子喺中間就已覺得佢好食~ 果然一入口，啲飯已索晒啲高湯同海鮮嘅香味，加上啖啖蟹肉，令人忍唔住將所有飯餸連同每一絲嘅蟹肉都食得一乾二淨！🐟西京銀雪釜飯 $188銀雪魚雖然仲有少量骨，但啲魚肉夠軟滑，完全唔腥令唔係太好魚嘅我都一口接一口咁食～🐮月見和牛釜飯 $198一開蓋牛肉又係勁多勁滿！牛肉夠軟嫩，牛味亦充足，加上高湯飯嘅加持更加提鮮！每個飯食到底都會有少少飯焦，令成個飯更有層次同口感～小食方面我地叫咗$158嘅🧡雲丹天婦羅，即係有紫菜包住嘅海膽天婦羅~薄薄嘅炸衣同紫菜包住入口即溶嘅海膽，作為海膽迷真係覺得不得了！總括而言，哩度嘅釜飯十分高質，加埋優惠，當然要一嚟再嚟，不過下次都係唔好一人一客飯，因為佢份量真係幾足，我地最後要打包咗合共半個至大半個飯先離開哈哈…查看更多

難得舊同事番嚟搵我地食lunch，當然要搵番間靜靜地嘅西餐廳食餐好嘅😆 (加上見到有entertainment嘅買一送一優惠，更加要食佢啦😋)落完order之後，首先會送上一人一份餐包🍞~哩份多士仲會配上一碟黑醋橄欖油同生蒜，見到哩個配搭就連平時唔太好生蒜嘅我都忍唔住試一試，暖笠笠嘅多士加上黑醋同生蒜真係好正呢！🧀紅酒燴牛肉芝士夾餅 $88比較少見啲嘅一款主食，芝士味唔算好重(對唔太好芝士嘅我嚟講好好哈哈)，肉味就好出，哩種咁濃味嘅肉岩唔岩食就見仁見智了~🦀蟹肉意大利飯 $884個主食之中我地最鍾意嘅就係哩個！哩個risotto夠晒creamy，更重要係佢有濃郁嘅蟹味，食落令人非常滿足 💛🍝德國腸茄醬意粉 $88哩個意粉賣相唔錯，有唔少三色椒，不過整體就比較失色，因為幾款唔同嘅德國腸切咗做細細件，入口好似食緊啲普通腸仔咁。🐮澳洲草飼肉眼扒 $1285成熟口嘅肉眼扒煎得岩岩好，配上帶有薯仔粒嘅薯蓉同大啡菇~ 小小美中不足係塊扒比較薄身~🍰Tiramisu另外食完正餐除咗飲埋餐茶，當然唔少得要食甜品啦🤤，於是我地加咗份Tiramisu嚟分享~ 哩度嘅Tiramisu幾大份吓，而且又夠晒滑，加上咖啡味同酒味都好香濃，十分讚！總括而言，除咗lunch time播嘅歌比較唔岩feel(誤)之外，食物都還可以~ 睇埋眾多其他Openrice食評，下次要dinner time再嚟過先得~…查看更多

今次嚟到哩間好有格調嘅餐廳，點咗一系列健康素食~🥗FAMA Daily Bowl $118+18哩個自選沙律擺盤好靚，加上顏色鮮豔又食材新鮮，非常好食！我地揀咗店員推介嘅Greek yogurt sauce，估唔到佢幫手蓋過咗啲Kale嘅苦味🥬，令個沙律入口更清新~ 其中有道配料Beetroot Hummus(紅菜頭鷹咀豆泥)算係最濃味嘅配料，配上清淡嘅沙律就又幾恰到好處。另一個配料Baked organic tofu cake口感好特別，與其話佢係豆腐，我會覺得佢咬落比較實，有啲似壓實咗嘅海綿蛋糕，為沙律帶嚟多一份飽足感。仲有夠熟嘅牛油果同夠淋嘅Baby carrot🥕，又唔會有草青味，十分討好~ 牛油果🥑夠熟，一咬即溶非常好~🥒Portobello Raw Zucchini Noodles w/ Basil Cashew Pesto $88Zucchini Noodles聽就聽得多，食就真係第一次~ 本身以為生嘅瓜扮麵應該唔會太令人入到戲，但估唔到個瓜夠爽脆，加上少少胡椒/鹽作調味同埋個青醬，令清淡嘅意大利青瓜幾有意粉感覺。配料方面大啡菇🍄好好味，同埋繼續有滿滿熟透嘅牛油果🥑，而且雖然同沙律一樣有車厘茄🍅，而且哩啲茄睇落好乾身，點知一咬就爆汁，好驚喜！總括而言，哩度間食物食香味俱全，真係要嚟多幾次mix多幾個salad …查看更多

成日聽到身邊嘅人推介世界の山ちゃん嘅雞翼，加上見佢嘅食物都幾平吓，終於決定要食番次啦~🐔夢幻雞翼(5隻*2) $48*2首先當然要叫番份招牌嘅夢幻雞翼啦~ 我地一行4人決定直接一口氣叫兩份5隻😎 雞翼上枱時熱辣辣，加上外皮炸到脆卜卜，入口感覺唔錯~ 不過如果可以更juicy就好了~🥘名古屋咖哩烏冬鍋 $78同樣係上枱時熱辣辣，直頭見到啲咖哩仲bulubulu咁滾緊~ 再撈埋隻半生熟蛋落個咖哩湯底，用啲蛋汁包住啲烏冬嚟食，YUM😋🍝名古屋鐵板炒麵 $68哩個炒麵鋪滿木魚碎，賣相吸引~ 加上炒麵嘅醬汁帶微酸，幾醒胃~🍳豬扒蛋飯 $98無論係賣相定味道都比較一般，而且定價竟然係三款主食中最高，令人有點失望。哩度嘅食物份量唔算好大，我地一行4個女生食完上面嘅食物都係忍唔住追加咗兩個小食~🥚香煎鰻魚雞蛋卷 $78哩個都好一般，玉子唔係太滑，蛋味亦唔夠重，加上個鰻魚又同個玉子唔太夾，可以唔叫。🍞炸年糕 $48雖然係炸物，但因為上枱時係有啲醬油浸住的，所以完全唔熱氣。當我地以為佢又炸又浸好似怪怪地時，入口嘅煙韌同醬油嘅微咸又出奇地幾夾，為上面幾個麻麻地嘅食品挽回少少分數。總括而言，食物平得嚟份量偏細，計番性價比其實都唔算太高，好再menu入面都幾多嘢揀，可以唔夠叫到夠都唔會太肉赤。如果想一晚食到多啲唔同嘅菜式都可以嚟食吓~…查看更多

今日同一班同事去咗食哩間唔算太貴嘅西餐廳~一人叫完一個餐之後，首先出現嘅係跟餐嘅湯同包🥯~ 湯嘅味道一般，但啲麵包就好出色，加上帶檸檬香嘅牛油，又香又軟~ 其實除咗相中嘅麵包，佢地仲有另一款蒜蓉包，可惜我地太餓一嚟就食晒，唔記得咗影😂食完starter冇耐，主食就陸續上枱了~🦀日本小帶子、野菌及菠菜意大利飯 伴 日本松葉蟹鉗(3隻) $98個意大利飯好香；松葉蟹鉗雖然細細隻，但已剝好殼，食得好方便~🐷西班牙Duroc無骨黑毛豬扒 配 野菌西梅燒汁、薯蓉及時菜 $138點餐時見到豬扒都有得揀幾成熟我地都嚇咗一跳，因為一直認為豬肉係要全熟先食得~ 不過見佢建議7-8成熟，咁我地就叫個8成熟試試~ 果然入口幾軟滑，加上個酸酸地嘅燒汁，好好味呢！哩度叫lunch set可以加錢叫埋甜品，我地當然唔會放過啦！🍎法式金寶蘋果盅 +$20蘋果+玉桂本身就冇得輸，再加埋個sour cream，正呀！🍦心太軟 伴 冰凍雲尼拿芭菲(法式手打雪糕) +$35睇相都感受到個心太軟有幾流！而且佢個朱古力味好濃！配埋個手打雪糕，一冷一熱衝擊你嘅味蕾！總括而言，哩度嘅食物性價比好高，不過當日食嘅時候見到佢話1月尾要搬去西營盤，想食佢就變得無咁方便了~…查看更多

對芋圓零抗拒嘅我地最近又發現咗間新嘅台灣嘢，仲見到佢個menu入面嘅食物熟悉得嚟又加咗啲新意，當然要快快試吓佢啦~🌸明太子櫻花蝦蛋餅 $68櫻花蝦蛋餅有好多好多櫻花蝦，所以可以想像到個蛋餅非常香🍄紫菜椒鹽杏鮑菇脆脆 $62鹽酥杏鮑菇切到好似薯條咁，酥脆外皮包住多汁嘅菇，加埋啲紫菜碎好似shake shake薯條咁好味~🐮主廚四寶牛肉麵 $98牛肉麵好足料，有牛展、牛筋、金錢肚同埋牛腩。牛筋好淋好入味而且充滿膠質；牛腩都好入味，鬆軟到阿婆都食到，仲有個湯底夠晒香，上品也。🐔手繪雙色鹽酥雞 $85有清新嘅柚子醬同香濃嘅黑松露醬可以點，一次過滿足你兩個願望。鹽酥雞大大件、啖啖肉夠晒juicy，配上唔同嘅醬帶嚟不同好滋味～🔮伯爵茶凍QQ芋圓 $58伯爵茶底加埋伯爵茶凍，茶味清香。芋圓同地瓜圓大大粒又QQ的不會太淋。珍珠、蜜綠豆同埋愛玉份量夠多，夾埋真係又滑又好味 💜總括而言，雖然對比其他台灣嘢嚟講有少少貴，但勝在食物夠驚喜，鍾意食台灣嘢嘅人記得嚟食吓。補充一點就係哩到嘅侍應非常細心，會主動留意到你杯水飲得7788，又或者係你食完牛肉麵成個碗仔都係湯會自動自覺換個新碗仔比你食鹽酥雞，讚！…查看更多

平時去莆田食晚飯覺得佢定價都有啲小貴，不過佢一出啲一人餐時真係非常抵食！佢嘅午市一人前莆田頭等餐只要$68就又有湯、又有3個前菜，仲有一個主食，最正係佢仲免收茶芥加一，既豐富多選擇性價比又高🤩🍵首先有每天指定款式嘅莆田地道湯品，星期四嘅款係大白菜燉軟豆腐湯~ 湯入面又有蝦肉又有大白菜，而且又夠清同埋新鮮熱辣，味道唔錯~🍢每人可以喺6款小菜入面揀3款，我地除咗冰浸涼瓜之外，都有叫到~滷水嫩豆腐：豆腐夠入味蝦苗拌頭水紫菜：酸酸地幾開胃~ 喺幾款張菜入面小編最鍾意食呢款鹽焗豬肝：豬肝唔算好入味，同埋偏硬身，所以覺得一般家常燜荀乾：味道一般水晶豬蹄凍：好似啫喱咁，幾彈牙🍲主食方面共有7款，我地一共試咗4款~興化炒米粉：米粉好幼細，十分足料有蝦肉、蜆肉等，配埋莆田嘅秘製辣醬10分夾又夠晒惹味包菜飯：係一個有啲肥豬肉有啲菜嘅醬油飯，都好食嘅不過唔係會令人好回味嗰種漁民紫菜燜飯：似係用珍珠米，但又唔會煮到太淋，仲做到粒粒分明媽祖麵線：唔知係咪製作程序有啲咩特別，等到食晒所有嘢先嚟🙄 作為湯麵佢索咗湯得嚟又唔會太淋，味道口感都唔錯~🌻套餐仲包埋菊花茶，唔好諗住佢只係好似普通茶樓是但開壺茶比你，哩度嘅菊花茶好好飲，帶有陣陣清香嘅茶味，令唔多鍾意飲嘢嘅小編都隊咗唔少杯～總括而言，夾啱時間真係要去莆田食吓佢哩啲咁抵嘅一人餐，除咗午市有set，下午茶set都又有小食又有甜品，成個餐都好完滿，真係要去食吓~…查看更多

有見逢依家定咗星期一係🌪風雲日，沾麵買一碗的話，第二碗會半價，咁抵食當然要衝去食番兩碗❤️豚骨魚介味玉沾麵 $93咖喱魚介沾麵 $93🦈先講湯底，入口魚介味濃，有種木魚碎嘅香味，濃度適中，加上用石碗上，夠晒滾唔怕入口不冷不熱，更可以保持到個熱度耐一點～ 咖哩豚骨底嘅咖哩都好香濃，仲有陣黑椒味，食落更惹味，濃得嚟又唔係令人好口乾嗰隻～另外每份沾麵仲附上咗一細舊檸檬🍋，食到有啲膩時加幾滴檸檬汁，解膩得嚟更別有一番風味！食晒啲麵後可以加啲清湯再試真個湯底，可惜個清湯唔係好熱，撈勻湯底後入口一般，冇咩驚喜～麵嘅份量好flexible，唔使加錢嘅情況下已經有200g(並盛)/300g(大盛)/400g(特盛)可以揀，唔夠仲可以加$45要夠🗻800g(富士山盛)~ 另外麵仲有冷麵同溫麵可以選擇，冷麵聲稱會較彈牙有咬口，而溫麵聲稱會食到麥香，我地兩種麵都有叫，不過就真係唔太食得出分別😂 反正兩者都彈牙，麵條粗幼適中，足夠掛到湯汁入口~而且配料方面都同樣咁flexible，蔥量可以揀少蔥或走蔥，而荀就可以直接揀要定唔要~配麵嘅肉係🔥火炙燒肉，肥瘦分明，即使係瘦嘅部分，都唔會話鞋口或者痴牙。上枱時凍凍地，再沾番落個熱湯度，就啱啱好~ 🥚而味玉就不負所望，流心效果十足，加上已有適度調味，就咁食已經好香，當然沾湯後配上濃郁魚介味都好配合~燒汁羽根餃子 $38🥟另外我地仲叫咗份餃子~ 餃子與餃子之間有層薄薄嘅脆皮連接住，配上燒汁都不至於會整到塊脆皮淋晒，不過有啲啲偏濃，如果輕手少少又或者比客人自己後加/點，可能會更好~ 餃子咬開仲有少少肉汁，配上燒汁都幾夾~總括而言，如果鍾意食湯夠熱嘅沾麵，用石鍋上湯嘅風雲丸絕對係好選擇。加上人流已唔係誇張地多，早少少食飯已可0等候即入座。…查看更多

講起雞蛋仔，🤰🏻媽咪雞蛋仔一向都喺我嘅雞蛋仔排行榜嘅首選，佢嘅雞蛋仔熱辣辣出爐，夠晒外脆內軟，加上蛋漿充足，咬開唔會食風咁，哩啲先叫係雞蛋仔㗎嘛！🍠紫薯蕃薯雞蛋仔 $30 （冬季限定）落足料嘅有雙色番薯雞蛋仔，食落夠晒番薯味~而且可以放心，食完都唔會令你覺得飽飽濟濟咁~🌰有機栗子雞蛋仔 $30拎上手諗住咬開會同頭先嘅蕃薯雞蛋仔差不多，有啲栗子碎又有啲蛋漿咁，點知今次有驚喜，偶爾會食到原粒栗子喺粒雞蛋仔入面！而且入口又唔會太甜，味道恰到好處~總括而言，就咁睇$30食底雞蛋仔好似好貴咁，但睇到佢由蛋漿到配料都咗足，性價比嚟講其實接受到～另，佢啲咸味雞蛋仔都好香好好食，快啲去試埋佢啦！…查看更多

對於喜愛芋圓嘅我地，見到西環有新開嘅甜品鋪有個好足料嘅芋圓，當然要嚟食吓啦~🍡黑糖芋圓仙草 $38哩個芋圓數埋數埋總其有十種材料，包括：芋圓、地瓜圓、紫薯圓、小丸子、珍珠、水晶珠、西米、黑糖條、仙草同埋台灣黑糖。另外仲可以揀配德國忌廉或者港式花奶嚟食，我地就揀咗花奶～事不宜遲，係時候淋落去啦～撈勻碗芋圓後，我地就馬上試吓入口到底邊樣配料最搶眼～第一樣感受到嘅當然係黑糖底，配埋花奶提味，入口特別香滑。之後當然唔少得最大件又有口感嘅仙草啦。但下一樣估唔到嘅係黑糖條比各式圓類搶眼，好似啫喱咁match番個黑糖底。終於食到三款圓啦，可惜係啲圓煙軔得嚟唔得彈牙，喺彈牙方面小丸子反而更出色。就成碗芋圓嚟講，佢唔會過甜，配合得都算恰到，係唔錯嘅～🌋華田熔岩心太軟配乳酪雪糕 $52個華田心太軟拎出嚟時都未上枱就已經聞到非常香濃嘅阿華田味！伴隨住哩份咁吸引嘅香味，我地係時候剷開個心太軟啦！一剷開，朱古力醬就有如哩個心太軟之名咁，好似熔岩咁湧出嚟，賣相給力！但可惜朱古力好快蓋過咗華田味，大概因為佢地大家都有可可成份，融合得太好了吧～不過配埋旁邊嘅乳酪雪糕，馬上為濃濃嘅朱古力味帶番啲清新感覺，唔怕越食越膩～不過唔知係咪一甜一酸比較太大，食完心太軟之後就會覺得個乳酪雪糕有啲過酸。整體嚟講，如果好似我地咁為咗芋圓去食，可能會有啲失望，唔至於會好驚喜～…查看更多

好耐冇食過阿元來了，見佢出咗幾樣新嘢，係時候再去食吓～🍳爆蛋雞肉飯 $39次次都食魯肉飯，今次試咄吓哩個新嘅爆蛋雞肉飯～🍄香菇肉羹米粉 $45另外亦搵咗哩個香菇肉羹米粉取代平時成日食嘅麵線。🌿高麗菜捲 $39為咗要有啲菜落肚，我地叫咗哩個高麗菜捲。爽脆嘅高麗菜包住啲肉，又幾好味。🔥炸甜不辣拼盤 $30每次食甜不辣都會諗一輪咩係甜不辣。其實甜不辣係取自Tempura嘅諧音，不過係指關西嘅Tempura，即係炸魚漿製品，而唔係大家較常食到嘅炸蝦炸南瓜嗰啲Tempura。我地嘗試研究哩個甜不辣到底拼咗啲咩，不過除咗煙煙軔軔嘅好滋味，其實我地都唔係好分到，大概係本身哩啲炸魚漿有唔同形狀同size，所以炸完後口感每件有少少唔同咁吧～配埋啲胡椒粉，送飯一流～🐽肉鬆蛋餅 $25哩度嘅蛋餅從來唔會令你失望，薄薄嘅皮配埋香口嘅肉鬆，再點少少辣醬，配合得非常好！係今晚點咁嘅咁多樣食物中嘅highlight！🍡九份芋圓(溫) $30作為芋圓愛好者當然要以哩個甜品為我地嘅晚餐劃上一個靚句號。芋圓夠晒Ｑ彈，豆又夠多，加上糖水底又唔會過甜～特別嘅係佢加咗椰果，為哩碗芋圓加多咗一重酸酸甜甜嘅味道，食落又幾夾～整體嚟講，蛋餅係必食之選，鍾意食芋圓嘅朋友都可以試吓哩個有椰果嘅版本。同埋嚟緊阿元要搬去堅尼地城，怕冇咁就腳就快啲去食多次先啦～…查看更多