XDH的个人专页

最近聽朋友講旺角有間食羊嘅邊爐超好味，所以我當然捉咗佢帶我去試吓。餐廳裝修帶舊風格，用上圓枱摺凳等傢俱，加上牆身的裝飾同吊燈，彷彿就像回到八十年代。除咗有一般嘅火鍋食品，另外仲有串燒提供都幾全面，叫咗燒生蠔、蒜香扇貝、羊肉串、羊小排、燒龍蝦等等。燒羊肉串好食又大粒，而且價錢又唔貴，好食過深圳嗰啲，水果蜜桃茶味道清甜之餘又有果肉食到。餐廳主打羊肉火鍋，所以少少哋叫咗兩款羊食吓，兩款都各有特色而且肉味濃郁，其中一款口感仲非常爽脆。火鍋食材仲有啲係出面其他地方好少食到嘅，例如有雨衣鮮竹笙、馬鮫魚蛋、爆汁咸蛋魚丸、水蓮菜等等，不過我就最鍾意食佢個鴛鴦蝦滑墨魚滑，超級正勁足料。呢間火鍋店真係超級出色一定會推介俾朋友。…查看更多

雪糕品牌 DIGREEN 一直都未試過，今日同朋友等位食飯，係等食期間就買嚟試下，除咗有雪糕仲有雞蛋仔同飲品，雪糕方面有啲都幾創新，例如金箔雪糕、魚子醬雪糕等等。鍾意試新嘢嘅我就叫咗杯 🔥Tabasco 雪糕🔥 食落辣得過癮，火辣辣嘅 Tabasco 汁配上滑口嘅牛乳雪糕，簡直冰火交融，鍾意食辣嘅朋友千祈唔好錯過。另外叫咗個鹹蛋黃雞蛋仔，雞蛋仔夠酥脆又香濃，而且每粒蛋球都有鹹蛋黃非常足料，配埋杯出面比較少見到嘅葡式波波奶綠慢慢享受。…查看更多

最近食丼飯食上癮，今次嚟咗座落於旺角花園街嘅丼燃食堂，丼飯款式非常有創意，而且仲可以有得自己 DIY。激突三文魚丼食材主要圍繞住三文魚，有三文魚、三文魚腩、三文籽、甜蝦同帶子，厚切三文魚油脂香氣十足超級正，三文魚控有口福。乜蟹都有丼食材亦相當豐富有蟹棒、蟹肉、蟹膏、蟹鉗、蟹籽、蟹蓋，賣相非常吸晴，蟹肉味道鮮甜。另外叫咗焦糖三文魚卷，三文魚鋪上焦糖同三文魚籽，味道層次豐富，而且上枱時仲有火焰表演，睇得又食得。…查看更多

放假無野做一個人去咗東薈城行街，之後順路食吓東涌諾富特酒店嘅自助晚餐。餐廳係正酒店大堂好容易搵到，而且東薈城有條電梯可以直達酒店，所以非常方便。海鮮方面有蟹腳、青口、蝦、蜆、翡翠螺、龍蝦等等，而且仲有蒸生蠔，生蠔肉厚多汁好味 。而熟食區都以海鮮為主，有豉椒蟶子、老干媽小龍蝦、蒸魚、酸菜魚等等。食到咁上下仲有重頭戲，就係現場切原條黃鰭吞拿魚，切完之後仲有得食非常唔錯 😋 吞拿魚色澤紅潤，味道幾鮮甜。食到尾聲出去甜品區食埋 Häagen-Dazs 雪糕，埋單果時職員仲介紹嚟梗 10 月至 11 月嘅滋味秋宴主題同特色美食，星期六、日同公眾假期仲有大閘蟹、花膠同即劏吞拿魚食到。…查看更多

渡邊屋之前係九龍城都有食過，估唔到依家尖沙咀都開咗分店，喺香港屹立不倒之餘仲可以開分店，相信一定有過人之處。今日 Lunch 就揾同事一齊嚟食晏，午餐餐牌提供丼飯套餐及壽司盛盒套餐，另外仲有限定新鮮食材。原條池魚薄切 🐟 池魚肉質紅潤有光澤，另外附上柚子汁作調味，入口更鮮更甜。火灸壽司盛合套餐 🍣 每件壽司經過火灸後香氣撲鼻，食材新鮮入口質感細膩，另外套餐仲會跟餐前小食、沙律同蕎麥麵，所以都飽肚。最後仲有日式甜點做甜品。…查看更多

前幾日係棉登徑剪完頭髮，順便同朋友喺附近食晚飯，大家都想食串燒，所以揀咗呢間比較有日本 Feel 嘅樂酒場居酒屋。未到晚飯時間所以都唔洗等位，我哋揀咗坐榻榻米，叫咗兩款盛盒加其他小食。芝士玉子燒 ($98) : 時間掌握得啱啱好，入口口感嫩滑，蛋味香濃。吉列童星蝦 ($68) : 非常有創意嘅菜式，估唔到味道都幾夾。雞串燒盛盒 ($168) : 雞腎、雞皮、雞翼、雞肉、雞軟骨棒，燒嘅時候係食材灑上幼鹽，保留食物嘅原汁原味之餘口感非常香脆。串燒套餐 ($188) : 套餐食物大致上同雞盛盒差唔多，某幾款雞串燒變左明太子翠玉瓜同豚肉卷。國產和牛他他 TACO ($78) : 非常有驚喜，紫菜非常香脆，新鮮和牛肉質軟嫩，牛味濃郁，而且價錢唔貴值得一試。三文魚籽海膽 ($238) : 魚籽同海膽堆滿整碗，味道甘甜，滿足感十足。…查看更多

最近同中學同學敘舊，揀咗喺元朗芝加哥食串燒，貪佢附近有得泊車之餘又唔會話用餐限時幾多分鐘，可以慢慢傾偈慢慢食。未到晚飯時間餐廳唔太多人，可以揀坐室內或者室外，呢間串燒之前係大埔食過一次，呢間元朗分店就第一次食，同對上一次比餐牌多咗勁多種類嘅串燒，有啲款式出面都未見過，例如燒乳豬、巨型羊髀、燒龜苓膏、雞皮墨魚滑等等。見到有蕃茄啤酒咁得意，所以就叫咗杯試吓，入口有蕃茄味之餘，無蕃茄嗰種比較漿口嘅感覺，反而幾清涼透心。叫咗好多新款食物試吓，燒乳豬串燒得幾香口，入口油香滿溢。黑松露蝦多士油炸技術一流，多士炸得酥脆唔油膩。炸雞皮大塊又香口，好似食梗薯片咁。最有驚喜係雞皮墨魚滑同雞皮蝦滑，呢兩款必叫超好食，脆卜卜嘅雞皮包住勁爽口彈牙嘅蝦滑同墨魚滑，而且蝦滑仲可以配埋雞蛋食用口感一流。另外叫咗蔥燒半殼扇貝、雞泡魚干、魷魚串、茄子燒同牛油帆立貝等等都好好味，四個人食到飽飲埋野，埋單都係人均 $500 蚊。…查看更多

今日同兄弟打邊爐，帶咗佢嚟呢度滾滾下，因為呢度個冬瑤卜卜蜆湯底同食物質素都超正，所以想帶佢嚟試下。蜆肉肥美大隻，冬瓜又夠入味，味道清甜帶微辣，超鍾意呢個湯底。刺身拼盤足足有十款咁多非常有誠意，每款刺身都好鮮甜而且冇腥味。每次嚟食都必定會加錢嘅一次性海鮮船依舊咁出色，每位只需加 $50 蚊就可以食到鮑魚、蜆、蝦、帶子、生蠔、龍躉、蟶子同珊瑚蚌，性價比超高。牛肉質素幾精神，可以無限添加嘅食品亦好多、墨魚滑蝦滑必叫。大部份食物都透過 QR code 落單，少部份就放咗出外面，而且仲有膠蓋冚住相當衛生。…查看更多

餐廳裝修主打懷舊，營造出西日居酒屋感覺，叫咗招牌鍋二人餐，喺呢度食飯侍應會全程幫你煮埋，專心坐低食就得。套餐包咗兩款牛肉、小食兩款、關東煮同黑松露燉飯，另外加錢叫咗兩杯特飲同甜品。小食揀咗玉子燒同可樂波，玉子燒面鋪滿蟹籽同沙律醬味道超級正 😋 和牛可樂波炸得幾香口，不過黑松露味再突出啲就更正。澳洲和牛同牛頸脊味道都唔錯，配埋蛋汁食口感更佳，食完牛就食蔬菜，最後將剩返嘅壽喜燒汁加埋黑松露整成燉飯，燉飯味道甜甜地。自己揀咗開心果奶蓋烏龍茶，味道幾得意，茶味中帶點芝士味同開心果粒咬感。最後同朋友 Share 呢個帶有少許酒精嘅 Tiramisu雪糕杯，自己幾鍾意呢度嘅甜品，因為餐廳耐唔耐就會轉款，而且份量都好大杯。…查看更多

最近媽咪生日知佢鍾意食鐵板燒，所以就帶咗佢嚟呢間鐵板燒店慶祝。餐廳位於利東街附近，去之前順便可以喺利東街影吓靚相。餐廳裝修間隔唔錯，每個廚師都有獨立嘅鐵板爐位，想安靜啲用餐亦有四人枱提供。揀咗秋田二人前套餐每位 $888，套餐食材勁多海鮮菜式 😍 啱晒我呢啲海鮮控，開始煮之前廚師會向顧客展示今晚嘅食材。頭盤係沙律同魚籽鵝肝蒸蛋，蒸蛋鋪滿勁多魚籽非常鮮味。龍蝦同鮑魚都係活生生處理好，口感超正肉質嫩滑，兩款菜式嘅醬汁都好好味，尤其係龍蝦肉就用返龍蝦頭嘅蝦膏整成，而且仲有火焰表演環節。之後就係時令海鮮同鵝肝多士，元貝非常大粒，煎至呈金黃色，入口外脆內嫩，而鵝肝亦非常厚身，入口豐腴肥美。食完海鮮之後就到和牛系列，和牛粒同和牛卷肉質柔嫩，油香滿溢，而且仲有幾款調味料可自由配搭。炒飯雖然食材簡單，但炒得幾香口，龍蝦清湯用上頭先嘅龍蝦頭熬成湯，味道清甜之餘一解油解膩。最後食埋味道濃郁嘅抹茶雪糕同紅豆餡豆沙餅，非常飽肚又滿足。…查看更多

前幾日係西環附近做嘢，有啲累就係附近揾嘢食，揾咗間 Cafe 放鬆一下。餐廳以木傢俱為主配合柔和嘅燈光，打造出悠閒寫意嘅用餐氛圍。食物選擇幾多元化，而且仲有素食提供。美國肉眼扒配烤時蔬及壓薯，肉眼扒份量十足，入口軟嫩多汁肉味濃，而旁邊伴碟嘅時蔬亦非常出色，壓薯經過烤焗後香味十足入口軟熟，時蔬亦非常新鮮爽口。必食推介呢款楓糖碧根脆脆😍 多士熱辣辣口感軟熟鬆化，配上楓糖醬同雪糕，好味程度爆燈超級正。飲品叫咗 Chocolate Rumic 特飲，口感絲滑綿綿，味道濃郁嘅朱古力再加入少許酒，味道甜而不膩。…查看更多

想食西餐唔想去咁遠，所以同女友嚟咗呢度撐枱腳，餐牌同以往冇乜大分別，不過當晚冇海膽多士食就有啲可惜。🦪 時令生蠔 ($338) : 生蠔非常新鮮口感柔滑，味道鮮甜之餘略帶微微嘅海水咸香。🦀 蟹餅配檸檬忌廉汁 ($168) : 自家製蟹餅有勁多蟹肉，口感鬆脆，味道鮮甜，而且配上魚籽同金箔，值得一試嘅菜式。🌻 焦糖法式燉鵝肝 ($208) : 非常精美嘅擺盤，用麵包花瓣沾上香甜濃郁嘅焦糖鵝肝醬，入口 Creamy 鍾意食鵝肝嘅人必食。🍝 蒜片辣椒蟹肉扁意粉 ($258) : 蒜香味同辣味拿捏得剛剛好，非常惹味嘅意粉。🐖 西班牙黑毛豬鞍配焦糖蘋果 ($338) : 第一次叫呢道菜，估唔到黑毛豬鞍可以咁好食 🤤 肉質非常嫩滑，入口肉汁飽滿帶有堅果香味。…查看更多

自己同女友一向都好鍾意食Omakase，最近就試咗呢間位於佐敦寧波街嘅隱世 Omakase。餐廳雖然面積唔大，但係都設有吧枱同卡位，餐牌提供 $588-$1888 套餐，最後揀咗入門廚師發板套餐，套餐有五道菜，有沙律、兩款海鮮、一款肉類、炒飯及甜品。沙律係煙三文魚伴沙律菜，煙三文魚夠肥美，配搭酸酸甜甜嘅蔬果同黑醋，非常提神醒胃。海鮮每人有二款，我哋就揀咗帶子、元貝、鮑魚同東升斑 Share 食。自己超鍾意呢個元貝，肥大肉厚之餘牛油醬汁味道濃郁惹味，最後連啲汁都飲埋 🤭 鮑魚同東升斑入口亦非常軟嫩。黑豚扒入口即化油香滿溢 🤤 食過返唔到轉頭。澳洲牛柳粒揀咗五成熟，肉汁飽滿肉味濃郁，而且可以配搭碟上多種配菜一齊食。非常足料嘅海鮮炒飯。呢個白鱔係另外單點，鱔肉好肥美，就咁食鮮味十足，想滋味啲可以點上旁邊嘅海鹽泡泡或者調味料食。最後食埋清爽嘅柚子雪糕，呢餐 Omakase 超滿足。…查看更多

放假同女朋友喺旺角行街，行到差唔多晚飯時間佢見到呢間餐廳裏面勁多人，所以心郁郁想試下，加上又係日本嘢啱晒佢口味。餐牌提供八款丼飯及多款小食，而且丼飯仲可以玩 DIY，價錢亦非常親民，最後我哋叫咗兩款丼飯同一款小食。焦糖三文魚卷 ($68) : 起初以為係普通卷物，點知儀式感十足，卷物上枱後店員會為卷物點火，三文魚卷瞬間被火焰包圍，視覺效果一流，而且差唔多燒足成分鐘，打卡同影相絕對冇問題，焦糖溶化後又甜又脆，三文魚油香滿溢夠肥美，必點菜式之一。虎士山丼 ($148) : 材料有三文魚蓉、拖羅蓉、帶子、蟹肉、三文魚籽同黑松露，全部都係我鐘意食嘅野 😍 見到實物後流晒口水，以上食材堆成小山丘成碗都係餸 🤤 每啖飯都鮮味十足，口感層次豐富。激突三文魚丼 ($148) : 正常刺身丼飯，賣相正常冇乜驚喜位，不過刺身非常新鮮。…查看更多

早幾日去食大閘蟹放題，朋友提議食九龍城滔滔，佢之前食過話味道唔差，揀咗 88 分鐘大閘蟹套餐。因為上蟹先開始計時，所以我地就先叫小食同飲品，不過小食同飲品味道普普通通冇咩驚喜。食完小食就開始食大閘蟹，大閘蟹有鹽焗、麻辣、玫瑰露花雕三款味道提供，雖然每隻大閘蟹都有膏，不過幾款味道都無太大分別。因為得 88 分鐘食蟹真係時間有限，所以最後都只係食咗九隻，完全唔夠喉，連額外收費埋單差唔多要每位 $600 個人覺得唔太抵食。…查看更多