陸羽茶室

营业中

休息中

好多人話，去陸羽既人都會有自己既感情史，我都唔例外。o係我未搵到第一份全職工作既時候，老豆第一次帶我去呢度飲茶，當時既白牡丹，記憶中仲係好滑，而且個鴿鬆酥仲令我好有印象；第二次，一家大細同親戚圍威喂，你飲你既龍井，我飲我既鐵觀音，難得既三寶燒賣，豬膶同鵪鶉蛋，完全唔理膽固醇；到左第三次，大家都各有各忙，老豆亦已經走左，一壺茶，唯有自斟自飲。白牡丹皇新茶剛剛上市，個人覺得唔算好滑，但都幾香同有餘韻；第一次用荷葉飯黎做早餐，蝦好彈牙好鮮連埋肉粒好足料，炒飯都好乾身，做左一個突破既序幕；之後睇左星期美點，冇鴿鬆酥，有D可惜，不過有雀肉燒多士，其實佢同炸麵包差唔多，只不過用鴿鬆+薯茸既Fusion；蛋煎蟹肉角其實熱D效果仲好，蟹肉就唔覺啦，有D似普通燒賣餡就真既；最後一個雞球大包，咪以為真係好大，其實都可以輕鬆幹掉，飽面唔厚，饀多結實，有豬肉仲有1/4隻蛋.....好多人都話，陸羽既服務麻麻地，但係，佢地（PS,係連埋點心阿姐)係會記得你叫左咩，仲會主動撩你傾下計，+一都係抵既。