泰妹餐廳 (The Wave) (已結業)

今日放假黎到觀塘食午餐，位於The Wave 的泰妹係一間新開的泰國菜餐廳。門口呈開放式，好易搵，電梯一上黎就係。泰式雙拼飯，海南雞拼豬脾，$60/套餐，雞油飯色澤呈淺黃色，食落味道好濃郁，有好香的雞油味，飯粒軟熟煙韌。海南雞嫩滑鮮甜，有少少香茅等香料味，豬脾煮得軟稔入味，肥瘦適中，醬汁惹味香甜。蛋花咖哩軟殼蟹飯，$68/套餐，顏色好靚，好似蛋黃色，加入蛋花令咖哩汁更滑溜，醬汁香濃美味，軟殼蟹咬落香脆，同咖哩味道好夾。小食，炸蝦餅，即炸熱辣辣，卜卜脆，外皮的粉好薄，蝦肉厚身，彈牙爽口。