P for Pastry (已結業)

買兩件撻八八折！晚上見到呢度嘅撻好靚，加上店員宣傳兩件撻八八折，於是想買幾件嚟試吓。由於有選擇困難症，開心果嘅味道、伯爵茶嘅外貌，同埋想食水果嘅衝動，所以我買三件撻。到比完錢，朋友先發現，原來真係得兩件撻有八八折，第三件賣返原價，我買完之後有啲被欺瞞嘅感覺，早知淨係買兩件來攞咗個優惠就算啦。不過其實個撻食落都麻麻哋，唔會再有下次幫襯。香印提子撻$53- 起初就係比呢個香印提子嘅靚樣吸引到，提子皮有啲苦澀，相比起之前在日本當地食嘅香印提子當然係冇咁大粒同甜啦，不過呢個算係三個撻之中最好味。中間嘅忌廉打得輕盈，撻皮富有牛油香味，有一個弊病三個撻都有嘅，底層撻皮太厚太實，食落去好硬、影響到口感。開心果撻$53- 冇錯，開心果味好濃郁，鹹鹹地。但係口感冇香印提子嘅忌廉咁輕盈，有少少似食緊牛油嘅質地，好濟。伯爵蜜桃撻$48- 呢個同樣個質地都係太實，冇開心果咁濟，味道甜少少，伯爵茶味同蜜桃味兩樣都食得出。所以排名會喺香印提子同開心果之間。