花花世界.玫瑰咖啡室位於朗晴坊，就喺朗豪坊隔離，好易搵～
部𨋢一開門，見到門口，已經覺得好靚～
入面就更加靚，好多好多好多花，未坐低已經想影相！
店員帶咗我哋坐呢個位，好似坐喺鳥籠入面咁
叫完嘢食就出咗去影相喇！
1
呢個千秋岩晒打卡！而且餐廳仲提供咗好多道具比客人影相！
另外店員都會好樂意幫你影相，仲會影到滿意為止添！
影完之後都差唔多食得嘢喇～
我哋呢晚都唔係好肚餓，所以只係叫咗一個小食、一個主菜同一個甜品，加三杯嘢飲～
廚師精選餐湯（羅宋湯）
首先上嘅係呢個羅宋湯。
每個主菜都配一個湯嘅，但店員見到我哋有三個人都比咗三碗我哋
入面嘅料好多，不過個味就有啲太辣
水牛城雞翼（$68）
小食我哋嗌咗buffalo wings~
個汁都幾好味，而且雞翼好入味。煮得啱啱好，好好咬。
香煎比目魚配玫瑰香檳汁（$188）
呢個魚好好味！如果有得食多啲就好喇
魚煎得啱啱好，魚皮脆脆地，啲肉又淋又入味！
個汁都好好味！入面仲有啲洋蔥碎～ 雖然食唔出咩玫瑰味，但係好襯同啲魚一齊食～
另外伴碟仲有啲薯角，都整得好好味～
Rose cake with ice cream （$88）
我哋想呢晚叫嘅嘢都關玫瑰事，所以就揀咗呢個rose cake
裝飾好靚～ 用果醬畫左朵玫瑰花喺個plate度～
個蛋糕可以揀白朱古力／士多啤梨味，我哋就揀咗白朱古力～
本身個蛋糕個形已經好靚，係玫瑰形嚟嘅～
蛋糕嘅上層係白朱古力味嘅奶凍咁嘅嘢，下面就有一層蛋糕，幾特別同埋好味！
另外仲配咗曲奇味嘅雪糕添！
至於飲品，我哋都叫咗有玫瑰味嘅嘢飲
玫瑰朱古力
呢杯玫瑰朱古力既朱古力味好濃，但係又唔會蓋咗玫瑰嘅香味。
每一啖都係先飲到朱古力味，落到喉嚨就taste到玫瑰味，好正
玫瑰鐵觀音青烏龍茶
本身已經好鍾意飲茶，佢咁靚嘅茶具就更加令人既飲欲大增～
除咗有茶香之外，都有好香嘅玫瑰味～
玫瑰鮮奶伯爵茶
呢個就係我最想推薦嘅玫瑰鮮奶伯爵茶喇！
本身order嘅時候以為係熱嘅，掂到隻杯先知道原來係凍嘅。
冇乜抱特別嘅期望去飲，但一試就令我喜出望外～
本身好鍾意伯爵茶嘅香味，但呢個唔止有伯爵茶味，仲有玫瑰嘅香味，另外仲有甜甜嘅奶泡！
忍唔住飲得好快，但又怕好快會飲曬，要慢慢咁飲！
總括嚟講，我真係好鍾意呢間餐廳！
環境超級靚不特止，食物同飲品都冇令我失望！
除此之外，亦都見到餐廳擺咗好多心機去佈置成間嘢同購買餐具！
女仔嚟到一定會好開心，但我見有啲男仔嚟到都好興奮，哈哈
不過可以改進嘅地方可能係侍應嘅人數。我哋果晚去嘅時候得一個侍應，但間餐廳都幾大同幾多客人，所以未必好快咁應到客人，如果可以多啲員工就好喇～
不過我見呢間餐廳係新開，可能未必咁快請到咁多人，做到咁已經好好！
一定會再嚟過！
下面擺返menu：
