影片
更多
2011-10-21
309 浏览
好耐冇去萬豪食brunch，主要係好難book位，差不多要早兩、三星期前book位，對於我這些心血來潮嘅人來講，係一件難事。月頭得知老婆今日放假 (因為佢要輪班，唔一定放星期日)，就預早book位，同埋細佬和佢女友，一齊歎番個Sunday brunch。今日安排咗一張近窗嘅coffee table，風和日麗，有微微嘅陽光曬入來，坐在一張軟棉棉嘅sofa上，非常寫意。一坐低，服務員就為我哋倒香檳，依然係Moet & Chandon，雖然唔係貴酒，但亦係一支名牌兼大路嘅香檳，大方得體，味道清爽，唔太甜，有一陣幽香，見到好多氣泡徐徐地由杯底升上來，未飲先醉；服務員更為我哋加粒士多啤梨，令到香檳嘅香味更特出。除咗香檳外，紅白酒都係無限添飲，紅酒有南澳嘅Kirrhill “Lizards of Oz”，主要係Shiraz，及南非嘅Simonsig，主要係Cabernet Sauvignon；白酒亦都係呢兩個品牌，有南澳Kirrhill “Lizards of Oz”，主要係Chardonnay，及南非嘅Simonsig，主要係Sauvignon Blanc Semillon；可以話各適其適，但今
月頭得知老婆今日放假 (因為佢要輪班，唔一定放星期日)，就預早book位，同埋細佬和佢女友，一齊歎番個Sunday brunch。
今日安排咗一張近窗嘅coffee table，風和日麗，有微微嘅陽光曬入來，坐在一張軟棉棉嘅sofa上，非常寫意。
一坐低，服務員就為我哋倒香檳，依然係Moet & Chandon，雖然唔係貴酒，但亦係一支名牌兼大路嘅香檳，大方得體，味道清爽，唔太甜，有一陣幽香，見到好多氣泡徐徐地由杯底升上來，未飲先醉；服務員更為我哋加粒士多啤梨，令到香檳嘅香味更特出。
除咗香檳外，紅白酒都係無限添飲，紅酒有南澳嘅Kirrhill “Lizards of Oz”，主要係Shiraz，及南非嘅Simonsig，主要係Cabernet Sauvignon；白酒亦都係呢兩個品牌，有南澳Kirrhill “Lizards of Oz”，主要係Chardonnay，及南非嘅Simonsig，主要係Sauvignon Blanc Semillon；可以話各適其適，但今日我哋就只係試咗少量Simonsig紅酒，白酒則冇沾手；Simonsig嘅紅酒，顏色深潤，果香味重，單寧酸簿，且欠缺層次，普普通通。如果唔喜歡飲酒的話，果汁亦都係無限添飲，仲要係鮮榨，非常吸引，有西柚汁、橙汁、蕃石榴汁、奇異果汁、芒果汁及草莓汁；除咗草莓汁外，我哋都試齊，西柚汁和橙汁最正常，其餘嘅都覺得唔甜，但全部都好新鮮，亦品嚐到各種生果嘅果味，而芒果汁亦都係比較杰。
沙律吧，已經係buffet嘅基本要求，見萬豪嘅配搭都有頗多選擇，而且食材都頗新鮮，一貫水準；Smoked Salmon亦都有三款選擇，一種原味醃，一種香橙薑醃和另一種香茅醃。
芝士有三款，分別為Camembert, Blue Cheese及Smoked Chedder Cheese，可惜我哋一行四人都對芝士冇興趣，哈哈；反而，見隔離有兩個師傅，好忙碌地切緊ham，非常誘人，左邊嘅係12個月白豬，右邊嘅係36個月黑毛豬，兩者都係來自西班牙，一睇d油脂，已經心中有數，再聞一聞，唔怪得，一碟滿滿的，另一碟卻空空如也；我兩款都拿了些試試，白豬嘅味當然唔濃，偏淡，而且有d韌；至於黑毛豬，色澤深潤，香味濃郁，入口更有一陣油香，滑溜，再配上蜜瓜一起食，可以把ham嘅油膩感減低，但又不失佢嘅滑溜，再加上蜜瓜嘅甜味，與ham嘅鹹度配襯得恰到好處，食多兩件都唔覺油膩，好食。
食過ham之後，緊係要食魚子醬啦，依然有三款，分別係丹麥lumpfish黑魚子，西班牙同俄羅斯；其實任何魚嘅卵子都可以做魚子醬，但最貴、最高級嘅當然係產自俄羅斯或伊朗嘅鱘龍啦；萬豪依家提供嘅丹麥lumpfish黑魚子，只要幾十蚊一小樽，最貴嘅俄羅斯，至少都要三仟幾蚊一盒仔，價錢相差過百倍，至於西班牙，就係中價貨，咁大家識揀啦，哈哈。丹麥lumpfish黑魚子係最細粒，呈深黑色，色澤暗啞，味道帶鹹，但唔濃烈，咬感偏硬，冇彈性；西班牙嘅魚子醬比較大粒，與俄羅斯嘅size接近，但相比之下，都係細少少，顏色近乎黑色，但帶有光澤，味鹹，入口亦有粒粒嘅感覺，但唔鮮明；至於俄羅斯，size最大，色澤最閃亮，顏色並非全黑色，啡啡綠綠咁，味亦鹹，而且鹹味維持長久，入口粒粒鮮明，可以用舌頭逐粒擠破，脆卜卜，好爽。
刺身方面，選擇唔多，有三文魚、馬都貝、榮螺、鮑魚、腐皮壽司及芒果卷，除咗腐皮壽司及芒果卷外，每樣都試咗少少，四種食材都新鮮，鮑魚唔韌，好食；馬都貝爽口，鮮甜；至於三文魚與榮螺，ok啦。海鮮凍盤，有加菲蟹、加拿大蟹、雪場蟹腳、本地花蟹、波士頓龍蝦及翡翠螺，全部都新鮮，惟花蟹比較細隻及雪場蟹腳比較瘦削。
另一主角，當然係煎法國鵝肝，講真，食唔出係法國鵝肝，還是匈牙利鵝肝，但見兩旁都擺滿法國名牌Rougie嘅鵝肝醬同鴨肝醬，相信都係同一品牌呱，雖然每件嘅size唔大，但係食buffet，可以攞多幾件嘛，無所謂啦，而且細件d，師傅更易控制火喉，眼見師傅灑上鹽和黑椒，唔駛三分鐘，又煎好幾件，非常快手；攞咗兩塊，表面焦焦哋，絕對係外脆內軟，入口香郁，細滑，完全冇根，食材質素與師傅功架都有水準。
同一時間，我亦要咗一隻egg benedict，其實吸引我嘅並唔係隻半生熟嘅蛋同muffin，而係d新鮮生拆嘅蟹肉同龍蝦肉，非常吸引，淋上原味荷蘭汁 (仲有蕃茄味可以選擇)，再加些黑松露醬，更惹味，只可惜muffin上嘅牛油唔多，欠缺咗牛油嘅香味，但嗰荷蘭汁反而唔錯，微酸，混和蛋汁及黑松露醬，很調和，與蟹肉和龍蝦肉嘅鮮味相襯。
再下一城，就係risotto，我只係揀選咗d蟹肉同草菇，不過就指明要龍蝦湯底，因為龍蝦湯底比忌廉底香濃好多，而且食落冇咁膩，不過risotto比較硬身，唔夠腍糯，好似未熟透，而且漿度唔多夠，雖然蟹肉新鮮，龍蝦湯底夠味，但係嗰飯就差強人意，應該要改良一吓。
熱盤方面，當然有燒牛肉，仲有片皮鴨、幾款不同點心、日式焗扇貝、焗鱸魚、蟹粉扒豆苗、印度咖哩等等，只可惜肚皮空間有限，而且對於鵝肝、魚子醬念念不忘，反覆再食，所以都冇食過熱盤，哈哈。
甜品款式頗多，有幾款蛋糕、餅食、糖果、生果及雪糕；雪糕依然係Haagen Dazs，不過味道選擇唔多，連基本嘅雲呢拿都冇 (不過可能係因為我哋太遲才出去揀雪糕，哈哈)；生果則有菠蘿、西瓜、蜜瓜和木瓜。
最後，仲有杯咖啡，我要咗杯cuppacinno，而老婆則要café latte，一般機磨咖啡，冇什驚喜，但亦為我哋今日嘅Sunday brunch畫上完美嘅句號。
埋單每位$680，因為有Marriott Gold Card discount，每兩位拆實為$816 (因為我哋用咗兩張cards，分咗單，所以每兩位就可以免一位)，所以每人實際只需$408，非常抵。张贴
