博多拉麵別天神 (已結業)

第二次光顧別天神拉麵🍜，因為佢有久違日本嘅味道。今次帶埋朋友一齊食，每人點左一個餐，我要原味拉麵加餃子，朋友要蝦味噌拉麵加龍蝦沙律。我哋用完點餐機order後就坐低等店員準備。呢度有自助免費冰茶冰水，最特別嘅係有調味料及配料俾客人mix and match. 首先小食先上，龍蝦沙律用紫菜包住食好食，味道唔會太鹹。而餃子🥟外皮脆卜卜，沾上醬油食非常惹味，我試咗配上紅薑食都好好食。然後主菜上桌！朋友嘅蝦味噌有櫻花蝦，而每碗麵都有紫菜、木耳、滷水流心蛋、蔥粒及兩大塊焰燒豚肉，朋友更加有粟米！湯底清甜，蝦味噌口味亦唔過濃，因為佢哋標榜冇味精及用上純水。麵煮得啱啱好，麫條較幼，湯汁都被麵鎖住。無加配料食，熱辣辣軟滑口感非常突出。但係都冇忘記要加胡椒粉同埋辣粉，令麵更添風味。將麵配上木耳一齊食，口感豐富。滷水流心蛋十分出色，蛋白軟滑，蛋黃流心，外層帶有微甜鹹香滷水味。值得一提嘅係分量十足，響lkf 玩樂前，可以嚟呢度食個拉麵打底，冬天更加應該要嚟👍🏻