逸之燒 (已結業)

Blue Monday 收工，好想好好食一餐，又唔想去人多擠逼嘅地方。上網睇到呢間日本小店好有日本風，野食又多元化，一於食番餐以解無得去旅行之愁。介紹下比較深刻嘅幾款菜式。食日本野唔少得嘅一定係壽司，我地都點咗好幾款。其中最正嘅係海膽壽司，係加拿大海膽，好甘甜，creamy 嘅口感令人好滿足另外，火炙三文魚都係我每次食壽司必點，因為經火炙後半生熟嘅三文魚油脂香溢，又保留少少剌身口感。逸之燒，無理由唔試下呢度嘅燒物。汁燒黑椒安格斯牛肉串，醬汁好惹味，牛肉香嫩juicy。鹽燒豚肉芝士年糕串有少少驚喜，豚肉燒得香口乾身，裡面卷住煙軔嘅芝士年糕，正！松葉蟹粥好好味，一個字形容：甜。大大一鍋，份量比想像中多。𥚃面有菜，甘筍絲，冬菇絲，當然唔少得松葉蟹肉，令每一口粥充滿鮮甜。