Awesomeism CAVE (已結業)

餐廳門口有一間舖頭，覺得幾特別，細看之下先知道原來係Awesomeism品牌，各款聯乘產品，而CAVE就係旗下嘅餐廳，CAVE代表洞穴， 古時人類居住地方就係洞穴，意思係從此處誕生所有可能性，真係非常有概念。👀〈醬燒低溫慢煮八爪魚拼珍寶虎蝦〉🐙🦐醬燒嘅八爪魚真係好惹味，係偏向日式燒汁嘅味道，同薯蓉配搭得宜，雖然只得一隻虎蝦，但係都幾大隻，啖啖肉。〈冬蔭公奶油鳳尾蝦意大利粉〉🌶️🦐🍝呢款意粉夠晒濃味，係偏辣少少嘅冬陰功味道，但係又唔會辣到會係咁飲嘢，而係留喺口腔入邊嘅香辣味，估唔到嘅係蝦嘅份量超多，隻隻都爽口彈牙，推介！〈花生醬鹹蛋黄單骨雞翼〉🥜🍳🍖平時鹹蛋黃雞翼就見得多，加埋花生醬嘅口味都係第一次試，味道鹹鹹甜甜都幾特別，唔會比其中一邊搶晒味，未試過嘅要試吓啦！〈開心果曲奇奶昔〉🥑🍪🍼〈香蕉朱古力奶昔〉🍌🍫🍼兩杯奶昔都非常足料，前者曲奇味較重，後者香蕉同朱古力配搭味道非常夾。奶昔甜度較高，唔係嗜甜嘅朋友可能就要嗌少甜喇。