Potluck Eatery

嚟緊(9/6)係Ian生日，我哋早兩日去呢間尖沙咀嘅Potluck Eatery應援吓。呢度餐廳6月有Ian應援活動，當中除咗有打卡點，包括卡通版嘅黑膠唱片，同埋好多應援物外，仲可以唱代幣抽Ian卡！真係影到唔捨得走😆！好啦，講返嘢食。本身呢度有set dinner，亦有單點。我哋每樣叫少少。Set dinner揀咗10安士炭燒安格斯肉眼($348)，價錢已經包咗蒜蓉包、餐湯同餐飲，幾抵食。肉眼嘅炭燒香十足，最重要嘅係medium rare嘅成熟度掌握得良好。另外我哋叫咗柚子蜜桃咖啡($48)，飲住呢杯甜甜地有幾好飲嘅咖啡，一邊聽住Ian/Mirror嘅歌，都係一種享受，仲未計杯咖啡好靚，有分層效果。我覺得今晚最好食嘅係香辣海鮮墨汁意粉($188)。第一佢嘅汁唔係太多，啲墨汁唔會周圍彈。第二係佢嘅意粉好夠味，唔需要太多嘅醬汁，呢個係相當值得稱讚。我哋仲叫咗個水牛城雞翼($69 /4隻)辣辣地幾開胃。記得要叫埋甜品。呢度嘅泡沫咖啡慕絲蛋糕(餐+$38)，真係一絕，三層唔同嘅口感同味道，由輕味道食到重味，一流。飲埋杯餐茶(可以揀Earl Grey)，再打卡，perfect ending。