翡翠拉麵小籠包 (已結業)

之前都有黎過翡翠拉麵小籠包，但都有成年冇黎，今日突然想食銀絲卷，所以黎左。餐牌同以前唔同，而加仲有好多顏色同味道既小籠包，但價錢不菲，所以我地都係叫返普通既小籠包。我見有口水雞拉麵，之前唔見，就叫左。朋友點左上海炒年糕，菜餃拉麵，同宮保雞丁。上菜速度好快！我通常叫左菜之後都沒什麼耐性，急不及待。短短5分鐘已經差唔多成檯菜都黎齊。我既口水雞拉麵係冷麵。我覺得口水雞好入味，但分量很少，而且冷麵汁太少，麵沒味道，很失望！菜餃拉麵既湯雖然很清，但卻好舒服，好好味。拉麵做得很好。蛋味重，有彈性，又夠粗。小籠包好好食。入面既湯太正喇！皮又夠薄。果然係拉麵小籠包專門店。拉麵同小籠包都一流。我覺得宮保雞丁幾好味，但唔係川菜個種味，偏甜唔辣。腰果好脆，同雞丁一齊吃絕配，我地成盤清曬。上海年糕既醬料做得幾好，年糕都算彈牙入味，但我已經太飽，唔想食咁多，反而蒸銀絲捲就做得一如既往咁軟，一條條絲食好過癮。整體黎講都幾滿意！係有D後悔叫左口水雞拉麵啫。會再黎既！