一君士多 (已結業)

平時經過已經好想試吓，但都幾多人，驚排隊，所以無去到，今次就試下佢嘅車仔麵先。我叫咗個廣島蠔湯泡飯，朋友叫咗個霸王麵，一人一杯嘢飲，再加個一君炸蛋同磨菇芝士雞翼。上枱了，首先係我杯熱利賓納，好似唔係好覺平時啲餐廳有熱利賓納，呢杯就甜度適中，朋友嘅黑牛好懷舊，味道都ok, 佢表示好懷念細個嘅時候，有得飲就開心哂。一君炸蛋，其實係鵪鶉蛋嚟嘅，都幾特別喎，一口一啖，又重蛋味，好食。磨菇芝士雞翼，真係估佢唔到，一咬入去，啲芝士漏哂岀嚟😂😻正！輪到我個泡飯，又係癲倒咗我嘅認知，本身以為會係中式湯底咁，點知佢係忌廉湯底，食落好creamy 有少少漏，係我鍾意喔口味，啲蠔大大隻，勁新鮮，食落又夠滑又軟又唔會有渣，大推！😊 朋友個霸王麵有鮑魚、廣島蠔丶花膠丶花菇。我試咗幾啖，湯底濃郁，似係煲咗好耐，成個湯都好甜，好重骨膠原。連埋啲料都好入味，好食！