米走雞Deluxe (已搬遷) 新店位置

九龍有兩間咪走雞食打邊邊，但銅鑼灣開咗間新嘅咪走雞個名有deluxe架喎，原來下午時段多左lunch set，夜晚先做芝士雞煲，一向鍾意食西餐嘅我，一定要去試吓啦！入到黎餐廳最吸引我係牆上面嘅掛畫同播放柔和嘅音樂，感覺令人好舒服。午市套餐有幾款選擇，主菜我叫左個紐西蘭燒羊架配蒜香炒意粉，羊架叫咗七成熟，烤熟之後灑上麵包糠焗，可以好好鎖好肉汁保存肉味，最欣賞薯蓉是自家製，食到好多細薯粒，其他蔬菜配料都好新鮮，好正！仲有不得不提嘅係蒜香炒意粉，蒜片炒得好香，意粉軟硬適中。餐湯叫咗個蘑菇湯，一定要讚下個蘑菇湯好新鮮好好味，個餐包又可以做到外脆內軟。餐廳嘅服務員非常非常有禮貌，仲好樂意去介紹食物食材，甚至烹調方法，細心到不得之了！下次一定要再嚟！