今次揀左A餐經典雙重奏長腳蟹鮑魚海洋盛宴，呢個餐有77品菜色可以任食，晚市可以食2小時，其實中午同晚市款式都一樣但中午可以食3小時比較抵食啲🤔出面自助吧款式都唔少，有海鮮吧、熟食吧、前菜、湯類、甜品類，最特別係佢有酒水吧有數款自家調配飲品可以揀，仲有每日特製既雞尾酒可以任飲🍸另外上菜速度都好快，基本上落單幾分鐘已經送到亦冇漏單問題出現～
5
—————————————————————————————
♦️刺身類🍣：淨係刺身都有16款可以揀，有最基本既三文魚、北寄貝、油甘魚、劍魚腩、角螺、八爪魚等等～特別啲既有泰式生蝦、象拔蚌、帶子、松葉蟹同柚子醋花海蜇🪼味道正常都幾新鮮，我個人幾中意帶子同象拔蚌味道鮮甜，松葉蟹都好大隻幾多肉
♦️壽司、手卷類🍣：三文魚腩壽司幾肥美，池魚王壽司肉質入口即化，另外有白松露、黑松露作配搭幾特別~手卷方面個人推介海膽手卷，海膽份量幾多食落唔腥仲帶有鮮甜味，細細舊方便入口，已經叫左幾轉🙈
♦️串燒、燒物類🦪：串燒方面有牛舌、鹽燒雞翼、有機菠蘿、鹽燒雞軟骨等等，特別要提川燒蒜蓉焗生蠔非常惹味，生蠔size適中配埋蒜蓉辣椒口感過癮，生蠔唔腥值得一試🥰中意食既羊既可以試香草燒羊鞍，我個人幾中意食黃金焗扇貝同蒜蓉燒茄子🍆
♦️天婦羅、炸物類🍤：當然唔少得有虎蝦、南瓜、蕃薯同茄子天婦羅啦，特別仲有大大條帝皇蟹棒天婦羅😍炸物我個人特別推薦貓山王榴槤炸彈真係一試難忘，完全做到外脆內軟，外皮唔厚超軟糯，裡面榴槤餡做到流心狀態，口感香濃💖
♦️煮物類🍲：叫左皇牌杞子花雕醉鮑魚，鮑魚都幾大隻食落唔韌幾入味～另外仲叫左和風汁牛柳粒同御品鮑汁燴花膠，仲試埋鮑魚瑤柱海皇粥，食左咁多生冷野食番碗粥暖下胃都幾舒服，碗粥好足料有好多海鮮，有主角大大隻鮑魚、海蝦、蜆肉、蟹柳、瑤柱等等可以話係必試😋
♦️自助區：有大量海鮮冷盤蝦、青口、蜆等等，仲有麻辣小龍蝦🦞前菜方面唔少得有中華沙律、螺肉、墨魚仔、鳳爪等，魚皮辣得好過癮幾好味😌另外仲有葡撻、章魚小丸子、炸單骨雞翼滿足你多個願望～
♦️甜品區🍨🍦：可以任食Häagen-Dazs、Movenpick雪糕、自家製軟雪糕、雪米糍、多款韓式人氣雪條、豆腐花等～仲有好多款自家製慕絲、布甸、蛋糕🍰同泡芺
♦️飲品：呢度好特別設有酒水吧有數款特別調配飲品如莎莉譚寶、藍糖荔枝梳打、藍蝶花白桃梳打～最特別係每日限定一款雞尾酒可以任飲，呢樣其他放題餐廳係冇架😌另外仲有三大個雪櫃有多款汽水、茶類🍵、果汁🧃、啤酒🍺揀，仲有白酒🥂、清酒🍶可以任飲
🌟最後當然唔少得介紹榴槤啦～黎自馬來西亞D24榴槤件件都好大舊，果肉厚帶有超濃榴槤香味，食落口質地非常綿滑，榴槤控既你千祈唔好錯過啦😌呢度咁多野食真係食一次都唔夠，要黎多幾次先可以試晒所有野食🙈
評分🖍️(滿分為5個🌕)
抵食指數：🌕🌕🌕🌕🌕
服務質素：🌕🌕🌕🌕🌗
環境：🌕🌕🌕🌕🌗
味道：🌕🌕🌕🌕🌗
