老鍋台式火鍋 (京都廣場) (已結業)

啱啱去完台灣返香港，最念念不忘嘅，一定係台灣火鍋！正當我心思思想食嘅時候，友人突然約我去銅鑼灣打個「台灣HOT POT」！而我當然秒速答應啦！今次去嘅係「老鍋-台式火鍋」，位於京都廣場2樓（銅鑼灣地鐵站C出口），非常就腳方便。餐廳門口有一個天燈牆，打咭一流！絕對呃到like!夜晚9點幾，店內人頭湧湧，坐無虛席，氣氛不錯！坐低第一件事，當然係揀湯底先！我地揀咗個「酸菜白肉鍋」，配料方面，就揀左「水蓮」、「皇室魚肚」、「手切牛肩肉」、「鵝肝墨魚丸」、「黑松露蝦丸」、「咸蛋炸魚皮」同「寬粉條」！飲品方面，就叫咗「杭菊露」！等左一陣，「酸菜白肉鍋」就到！鍋內配料相當豐富，除咗有酸菜白肉之外，仲有好多蕃茄同埋寬粉條係入邊。湯底嘅味道酸酸甜甜非常開胃！再等多一陣間配料都陸續送上！總括嚟講，呢間火鍋店嘅嘢都幾新鮮！特別係牛肩肉同蝦丸味道非常出色！前者牛味濃郁，肉質鬆化；後者口感彈牙，蝦感強烈！店家好細心提供小用具畀客人煮「寛粉條」，非常方便呢！非常滿足嘅一個火鍋晚上，有機會一定要再嚟呀！