小麻吉滷肉飯 (已結業)

放工後同朋友行旺角，順便去食埋飯，因為剛過血色二月，所以大家都唔想食太貴，所以帶左朋友行去女人街食台灣野。小麻吉都算幾多人，但排一陣就有位。晚市套餐牌都好抵食夾大件，一個主食加兩個小食，同時仲有野飲都是人均$70左右。我同朋友都叫左滷肉飯，白飯上淋上簡單的滷肉汁，好難唔好食，不過我就希望可以再熱少少，但朋友話溫度剛剛好，一上枱唔使攤凍就食得。個餐有個紫菜貢丸湯，我最鐘意紫菜湯，入口的紫菜冇沙好乾淨。仲有大大粒貢丸。每一個餐都有兩個小食，但其實分量都唔細，食台灣野當然要食紅燒肉，牛筋腩炆得夠淋又入味，牛筋份量算多，紅蘿蔔都入晒味。忍唔住又叫滷水豬耳加豬腸，豬耳爽脆，豬腸淋夠乾淨，帶少少肥膏。朋友叫的是滷水雞翼，有三隻，幾有住家的感覺。下次想叫台灣腸同雞排！可能隔離飯香，好似好吸引的。個套餐最抵係隨餐是有飲品。