餐牌好似一本雜誌咁，今期係10月份，以Halloween做主題。餐牌有招牌蛋包飯，韓式輕食，韓式年糕及意粉，牛角包窩夫，休閑小食，甜品，炸雞，同各式飲品。今日第一次黎，叫左一個蛋包飯，一份肉，一個小食，一份甜品同兩杯飲品分享。
先黎一客免費小食，係青瓜漬，白蘿蔔漬，同紫梛菜漬，爽脆甜酸，好開胃。
芝士炸雞半份 $138 另加一
韓式餐廳當然有炸雞食，有幾款唔同口味，又可以揀全份或半份，有骨或者無骨。我哋揀左半份無骨芝士炸雞試吓先。半份炸雞都成座山咁，有十舊左右，雖然唔係熱到辣口咁上枱，但係都炸得皮脆肉嫩，全部都係雞髀肉，仲有肉汁。上面有幾條煙韌年糕，下面墊左好多炸薯條，全部面頭都滿佈芝士份，夠哂味。另配一小兜千島醬同煉奶，點埋黎食更加甜。
燒醬油黑毛豬白切肉配大醬生菜 $182 另加一
燒醬油黑毛豬白切肉一客八件，肥瘦相間，塊皮同脂肪超有彈性，質感超好，好邪惡，而味道腌得唔錯，燒醬油少少甜甜哋咁。伴碟有生菜同薄荷葉各4塊，俾你包住白切肉，連同伴碟嘅泡菜，青辣椒粒，同好辣嘅蒜片，再配埋灑上白芝麻粒嘅豆板醬包住一齊食。食落完全唔覺膩。
黑色海鮮蛋包飯 $145 另加一
黑色海鮮蛋包飯擺盤有心思。主角黑色奄列我真係第一次食，切開雖然冇蛋漿流出黎，不過蛋係算嫩滑嘅，而且味道帶微微鹹墨汁味，唔錯。奄列上面加左酸酸甜甜番茄蓉，同奄列味道好夾。下面嘅飯唔係普通白飯，係炒飯黎架，仲加左紅蘿蔔粒，翠玉瓜粒，牛肉粒，椰菜，粟米等等唔同配料加添味道同咬口，個人幾欣賞。海鮮有連頭虎蝦一大隻同兩隻連殼青口，質素正常。伴有沙律菜同車厘茄，加左適量沙律醬。可惜所有野食上得好快，我哋等到凍左先食，如果唔係應該會更好食。
1
韓式雜莓牛角包窩夫 $92 另加一
韓式雜莓牛角包窩夫一客兩件，未食先聞到窩夫同蜜糖香。窩夫係暖架，真係似牛角包嘅酥皮質地，少少外脆內軟，上面淋左蜜糖，再灑上糖霜，不過絕對冇過甜。另伴一大pat香滑輕忌廉，新鮮藍莓，紅桑子同士多啤梨。呢個價錢有呢個質素，唔貴喎。
科學怪人之夜(竹炭抹茶) $48 另加一 （左）
科學怪人之夜明顯見到三層，由底至上有抹茶同竹炭，最上面灑上南瓜子同松子。味道方面其實好淡，帶好淡嘅抹茶味，半杯都係碎冰，好健康。
士多啤梨紅桑子梳打 $42 另加一 （右）
士多啤梨紅桑子梳打顏色好靚，下底係紅色嘅士多啤梨，上面就係好浪漫嘅紫色，有青檸一件，仲有一粒新鮮紅桑子喺上面。味道方面帶非常淡嘅莓味，主要係梳打水味，絕對唔驚過甜。
總括而言，今餐食物唔錯，好有特色！餐廳裝修幾靚，座位舒適，服務員態度友善，今餐嘅用餐體驗幾好。
