意粉屋 (已結業)

約咗男朋友去旺角gh睇戲, 睇戲前先去搵食......經過意粉屋, 見到AIG信用咭做緊優惠, 套餐低至55折, 好似好抵咁, 唔理咁多, 入去先算。入座後便忙於睇餐牌, 見到"美味西西里套餐"好似唔錯, 原价$350, AIG咭優惠$208, 咁就點咗呢個餐啦。 套餐叫咗: 俄羅倫斯帶子鮮蕃茄湯伴蒜茸多士、芝士焗卡邦拿意大利粉、意式什錦炒飯、2杯餐飲。 先講個湯...真係好好味, 好濃同好香蕃茄味, 唔會稀淋淋, 伴埋個熱辣辣又香蒜茸味既蒜茸多士, 一個字~正~。跟住個飯同意粉一齊嚟, 個飯得好少, 而且味道一般, 沒有驚喜, 至於個焗意粉, 一上枱已經聞到好香芝士味, 食入口簡直好味到不得了, D芝士焗得啱啱好, 濃濃既芝士沾滿咗每一條意粉, 真係好正, 搞到我要同男朋友爭食, 不過由於個意粉太多芝士, 所以食完好之後"漏", 最後餐荼要咗杯凍檸茶消吓滯。埋單加埋一都係228.80。呢餐真係十分豐富, 而且食得好滿足......喺AIG信用咭做完優惠之前, 一定要嚟食多次。