影片
更多
2008-05-07
128 浏览
激死人喇!正當我自以為終於試晒咁多款agnes b. DELICES既朱古力既時候,竟然發覺…咦?點解除左仲有焦糖牛奶朱古力係重覆之外,另一款香草牛奶朱古力(Luna-Ganache Dark Chocolate)都係重覆既?28粒20款,應該只有8粒重覆而唔係9粒架!於是我睇晒個list,發現醇朱古力醬黑朱古力並無出現!點解會咁呢?我唔明白!究竟係專登,因為呢個最特別,定係唔小心呢?不過都無法啦…或者有機會的話,下次自己買一粒呢款試一吧!就呢一次黎講,比起上一次,感覺無咁好食,唔知係因為朱古力等耐左,所以失色左少少,定係今次試既口味的而確且係無咁岩我既胃口呢?不過點都好,都記低我既感覺啦!焦糖牛奶朱古力(Camille-Caramel Milk Chocolate):呢款比較甜,但係焦糖味只有好少,牛奶又唔係重喎,所以只係得個甜味,都幾普通;香草牛奶朱古力(Valerie-Vanilla Milk Chocolate):我第二唔鍾意(最唔鍾意見下)呢款,不過佢有一個特別之處,係其他朱古力無既,就係個心既醬係白色(其餘都係黑色/深朱古力色),而且佢係咁多款中最甜既,可能係因為我本身唔鍾
就呢一次黎講,比起上一次,感覺無咁好食,唔知係因為朱古力等耐左,所以失色左少少,定係今次試既口味的而確且係無咁岩我既胃口呢?不過點都好,都記低我既感覺啦!
焦糖牛奶朱古力(Camille-Caramel Milk Chocolate)[b. yourself]:呢款比較甜,但係焦糖味只有好少,牛奶又唔係重喎,所以只係得個甜味,都幾普通;
香草牛奶朱古力(Valerie-Vanilla Milk Chocolate)[b. logo在圓圈中]:我第二唔鍾意(最唔鍾意見下)呢款,不過佢有一個特別之處,係其他朱古力無既,就係個心既醬係白色(其餘都係黑色/深朱古力色),而且佢係咁多款中最甜既,可能係因為我本身唔鍾意呍呢嗱味啦,我覺得呢個都幾唔好味;
檸檬薑黑朱古力(Amelie-Lemon and Ginger Dark Chocolate)[AGNES B.]:呢款比想像中好呀,本來怕薑味,唔係好敢入口,但係原來薑味比想像中輕,比起無檸檬味而只係薑汁果款,呢好好多,少左薑既辣,而且第一啖已經感受到檸檬既味道,但係千期咪誤會係平日食檸檬糖果隻酸味之類,佢唔係咁樣,反而係有少少苦苦地,但係食到係檸檬,亦有檸檬香,原來檸檬同薑係配合到既,我真係第一次發現;
榛子黑朱古力(Agneau-Hazelnut Dark Chocolate)[b. logo]:以為會食到一粒粒榛子,原來唔係,只有榛子味,個醬都算濃味,好似分開左兩層咁,下層淨色一點,我估應該只有一層混左榛子,味道無飲榛子味咖啡果d咁強;
香片綠茶黑朱古力(Ariane-Jasmine Green Tea Dark Chocolate)[b. PERFECT]:失望呀以為點都食到少少綠茶味,點知無既,我好鬼喜歡綠味味道嘛,可能係因為又有香片味卦,搞到呢款朱古力味道好怪,唔話我知既話,我未必食到茶既味道,香片加綠茶,變成既無香片味又無綠茶味,只係好怪(正面d講,都可以話係特別卦);
伯爵茶黑朱古力(Aurore-Earl Grey Tea Dark Chocolate)[兩個感歎號]:呢款比上一款重一點茶味,但係都係淡淡地咁,係好似甜甜地既淡茶咁,OK啦;
咖啡黑朱古力(Lea-Coffee Dark Chocolate)[love]:真係幾咖啡架,對我呢d唔太好咖啡既人黎講,呢款比濃縮咖啡黑朱古力好好多,無咁刺喉同苦嘛,食呢款俾到我少爫飲咖啡既感覺,都唔錯;
奇士酒黑朱古力(Agathe-Kirsch Dark Chocolate)[向上箭咀]:我又係分唔到唔同酒既味道,但係呢款係有少少果味,唔算好甜,都幾好味;
薄荷黑朱古力(Laure-Mint Dark Chocolate)[agnes b.]:有期望架呢款,不過有少少失望…我食開既薄荷朱古力,通常食完之後個口好清新,覺得好「薄荷」,但佢俾唔到我呢種感覺,只係個杰杰既醬加左少少薄荷味,所以都比其餘朱古力個心既醬拡色少少,我覺得麻麻地,嘥晒薄荷朱古力呢個名;
杏仁脆片黑朱古力(Iris-Almond Crunch Dark Chocolate)[綠色b.滿佈]:我以為會食到脆脆,但係竟然無…不過,真係有杏仁味,以佢好多款都係味淡黎講,呢款食到呢個程度既杏仁味,算係唔錯,而且味道都幾好,唔會太甜,不過真係無脆片喎;
玉桂黑朱古力(Paris-Cinnamon Dark Chocolate)[巴黎鐵塔]:好驚,好怪,估唔到個味道咁奇怪,完全唔配,係咪我唔太食得玉桂味呢?但係平日食玉桂酥我都OK個喎,但係只有呢一款,係唯一一款令我有唔想再試既感覺,視為20款中我最不喜愛的款式;
姜都亞黑朱古力(Fleur-Gianduja and Ganache Dark Chocolate)[花朵]:睇個名完全唔明,食落幾好,都算係我最喜愛口味之一,比較重黑朱古力味,岩我胃口,個醬都幾黑架,而且頗滑,同埋圖案既花令我覺得好靚,好優雅。
總括黎講, agnes b. DELICES既圖案朱古力真係好味,而黑朱古力系列又比牛奶朱古力美味,佢所出品既味道亦都好特別,所以絕對值得一試,不過價錢確係貴,如果唔係有人送而係要自己買,我未必捨得,或者會買一兩粒試下囉!
講多句,我曾經去過呢間店幾次,員工服務態度好好,真係一流,抵讚!
张贴
