一個無癮的星期六, 下午「開工」前拉了朋友到高街搵 lunch 食. 俾對面間港式壽司店「三文魚壽司 $10 兩件喎」的「熱情」招徠嚇親, 呢度門口則似樣好多, 加上 lunch 價相宜, 0拿0拿聲入0黎「避一避」. 一人揀了一份 lunch, 再散叫兩客 (一客兩串0個 d) 燒物 share 食試試.
「前菜」係南瓜(茸)湯, 夠晒「茸」又帶點渣, 味道十足糖水鋪賣的「南瓜露」, 幾香南瓜味又幾甜0下, 雖然無乜問題, 但感覺好似食完糖水先食正餐咁, 飲唔慣.
混了紅蘿蔔粒的薯仔沙律情況亦差不多, 係甜版薯茸的味道, 甜得唔太慣.
先0黎的朋友的 set lunch 咖喱吉列豬扒湯烏冬 (點解會0係爐端燒餐廳食吉列的...?
)... 食了一塊賣相不錯的豬扒, 但原來係得個樣的, 雖然炸得脆口熱辣, 但肉好乾好0鞋又帶雪味, 要蘸 d 酸甜又帶點杰身的醋汁先食得入口; 再食了一條烏冬, 腍腍的,「成口粉」的口感, 差勁; 咖喱就係咖喱磚的味道, 不值一提. 不過一定要提, 朋友一見到碟豬扒即刻搶了我部相機影佢相, 因為有條頭髮0係面!
我揀了串燒 set lunch, 跟白飯一碗及 4 串 (溫溫吞吞的) 0野:
- 大蔥雞肉: 雞肉0鞋身, 幾乾, 又無喱味道; 大蔥算幾香口, 勉強及格.
- 雞骨腸: 第一次食, 原來係用條腸包住一條雞骨... 甜腸味道十足台灣腸, 幾肥又好甜, 可幸夠晒脆皮, 味道可以.
- 燒冬菇: 菇香一般, 乾乾的, 唔鍾意.
- 醬油燒豆腐: 「皮」部分香口脆身, 但「肉」就水汪汪, 而且醬油太重手了, 好鹹.
- 仲有碗白飯, 夠煙韌, 但無米香, 可惜.
而散叫的兩串0野, 就出色好多:
- 鹽燒牛舌: 香噴噴好吸引! 牛舌幾厚身, 油份十足, 味道鹹香, 豐潤又彈牙, 加埋少少胡椒香, 勁正, 值得試試!
- 燒大蔥豬頸肉: 又係熱辣辣, 大蔥燒得好香口, 豬頸肉係卷埋咁燒, 燒完後 d 肥油留晒0係入面, 味道係幾甘香, 但實在勁油, 配白飯較好.
小店環境骨緻, 可惜凳仔好矮, 坐0係 bar 檯都睇唔到師傅整0野食; 招呼就因為 interaction 實在太少, 唔講咁多.
埋單每人約 $120, 西營盤0黎講唔平, 但爐端燒從來都唔平0架啦, $120 都合理的. 雖然呢日經歷一般, 但 a la carte 0個兩串0野實在好食, 相信要搵日夜晚0黎試真 d 先得了.
