陸陸雞煲火鍋 (已結業)

33不盡，66無窮，陸陸雞煲有意思，吃得好意頭，希望幸運會降臨！牆上的雞仔畫得好可愛，請留意眼睛的表情。入得黎，唔需要唸，雞煲例牌加兩杯特飲係必定動作，唯一要講的就係唔要辣，近排太熱怕受不了；而66啲特飲冰，真材實料，飲得過，芒果味最吸引。雞煲例牌已經夠4個人，因為仲要食其他配料，即使唔辣，都好夠香，醬油調得好，入味有肉地，肚子餓，即點即有得食真好。員工好快手，見我哋食完雞，配料馬上全部上齊。牛肉快熟，先食，牛三拼中，美國肥牛脂肪最多，外表見三層肉，口感最肥美；手切肥牛雪花較平均，咬口多啲；金錢𦟌無咪肥膏，最好咬口；中間多送幾粒和牛肉，最美味。黑豚肉腩片相當肥美，見得到的五層肉，片片薄切，方便灼熟，口感鬆軟。刻意點咗巨型北海道帆立貝及珍寶帶子作比拼，前者拳頭咁大，啖啖厚肉，感覺好豪，食得特別開心，心理上似香甜啲，其實用相同鍋底灼熟，分別唔大。仲食咗甜味的日式玉子燒，好煙靱啲金錢肚及香脆啲釀油條，最後是大量新鮮蔬菜。食咁多肉，3個人分，每人$300有找，好公道。