Set lunch menu ($888)
先食沙律，之後大廚開心姐就喺我哋面前即煮茶碗蒸，外面食嘅茶碗蒸都係預先整好，睇住蛋汁由生變熟，再加上高湯及滑子菇，好好味呀！
伊勢海老
鹹蛋黃炒蟹嘅方法煮龍蝦，肉質新鮮彈牙，開心姐仲提醒我要食埋龍蝦頭嘅肉，嗰條係最滑溜㗎
和牛厚燒
今日係近江牛肉，原來佢哋定期都會用唔同縣嘅和牛，基本上每次嚟都可以試到不同嘅和牛。煮得幾熟？一齊交俾開心姐決定啦！有3種食法，分別係加wasabi，食落唔會好膩；可以加炸蒜片；又可以點自家製醬汁，呢隻醬汁酸酸鹹鹹，正正就係好多年前三越百貨公司樓下嘅美多詩日本餐廳，佢哋嘅招牌菜鐵板燒牛肉嗰隻醬汁，好懷念呀！
炒野菜
椰菜好爽脆，再加啲頭先嗰隻自家製醬汁一齊食係完美的！
海膽炒飯
先喺我哋面前煎兩隻蛋，再加上白飯及海膽，炒炒炒得好乾身，粒粒分明軟糯
飲完麵豉湯，食埋香之物，就要食開心果雪糕及飲埋杯凍檸茶，完美嘅lunch
呢度服務好好，不斷為我哋添茶，同開心姐傾偈亦都令成餐飯好愉快。而且由食物嘅選料及賣相都睇得出佢哋嘅日本籍總廚對食物嘅堅持
