鍋霸吃到飽台式養生火鍋 (莊士倫敦廣場)

台式火鍋雖然係香港已經成行成市，鍋霸已經屹立係香港咁多年，一定有佢的留客之處。其中一樣最吸引我就係午市4.5小時任飲任食套餐，假期最平的餐都唔使$200 ，而叫到第3級包埋西班牙伊利比亞黑毛豬都只係$228加一，另外只需加多$40就可以享受無限海鮮，唔怪之下午去食都差唔多爆晒咁濟。

2

湯底方面有二十款選擇，我最後選擇咗鴛鴦鍋，包括[藥膳桃膠雞涮涮鍋]同埋[濃香蕃茄牛肉涮涮鍋]。湯底一啲都唔馬虎，本身都好多料。[藥膳桃膠雞涮涮鍋]直頭一開始養生到可以直接飲，湯底有唔少桃膠同蟲草花，飲完暖胃得黎又健康。至於[濃香蕃茄牛肉涮涮鍋]就超多蕃茄，另外仲有好多牛腩，煮到入晒味。

講番第三級套餐，主打食品係西班牙伊利比亞黑毛豬，另外仲有Prime grade 牛肩胛肉。伊利比亞黑毛豬有驚喜，食落去唔似食緊豬肉，佢嘅美味程度令我覺得自己好似食緊優質嘅牛肉，仲帶有一絲油香，完全無豬騷味。至於Prime Grade牛肩胛肉肉質薄滑，有濃郁嘅牛肉香味，配上蕃茄或藥膳湯底，即使唔加任何調料都夠晒味。

之後就要介紹海鮮，無論蝦同蜆都新鮮，肉質彈牙，所以最後都叫左幾輪。手打配料都好有特色，尤其係手工丸同餃類。包括手工梅菜豬肉丸、手工黑松露墨魚丸等等。至於手工餃子方面，香菇雞軟骨餃同埋麻辣粟米豬肉餃都好特別。

飲品同甜品方面基本上都有，首推佢地自家出的冬瓜檸檬茶同埋烏梅山渣茶。而雪糕就有Movenpick揀，仲要有特別的椰子味，對於呢個價位嚟講，我覺得算超值了。