影片
更多
2006-04-12
13 浏览
8-4-2006 1259「世途險惡，橫風橫雨」中的一年，有驚有險的第300個食評。終於一嘗心願起碼有一個食評完完全全係全家人一齊食的，冇計，父母十年如一日唔出城，就算出城的時間永遠夾唔到，死而無憾。某日行行下街收到大家姐電話話去新德里食咖喱，佢地終於較正時辰八字，我又唔使返去做廉價勞工，咁就一齊去，做左成卅年人，都好似係第1次同屋企係街外食印度餐。上到去後個門口有花圍住，唔知係唔係因為將會有聚會關係，裡面既環境好似係好左些少，我地就安排尾二的大檯上，七個人連飯叫11道菜式。就先上場就係例牌既papadum (豆粉薄脆)，一人一塊，伴著有少少辣既薄荷醬，一食落去已知係新鮮做，但係有部份幾鹹下。黎得食印度菜，緊會叫杯甜lassi (乳酪)，味道差唔多係原味，即係冇乜甜味咁解，個人來講甜些少會帶出乳酪的香味，正如我之前所講，這杯lassi比起在元朗蓬萊及錦田沙查遜色得多，當然我唔係叫你地突登入去試，叫佢整甜的為得囉。屋企人始終喜歡一黎就係食主菜，咁我只叫了一款小食，就係Vegetable Samsoa (素咖喱角)，這款Samsoa係每件計，一件為5蚊，亦係新鮮炸，新鮮食，皮稍為厚左的，都
「世途險惡，橫風橫雨」中的一年，有驚有險的第300個食評。終於一嘗心願起碼有一個食評完完全全係全家人一齊食的，冇計，父母十年如一日唔出城，就算出城的時間永遠夾唔到，死而無憾。
某日行行下街收到大家姐電話話去新德里食咖喱，佢地終於較正時辰八字，我又唔使返去做廉價勞工，咁就一齊去，做左成卅年人，都好似係第1次同屋企係街外食印度餐。上到去後個門口有花圍住，唔知係唔係因為將會有聚會關係，裡面既環境好似係好左些少，我地就安排尾二的大檯上，七個人連飯叫11道菜式。
就先上場就係例牌既papadum (豆粉薄脆)，一人一塊，伴著有少少辣既薄荷醬，一食落去已知係新鮮做，但係有部份幾鹹下。黎得食印度菜，緊會叫杯甜lassi (乳酪)，味道差唔多係原味，即係冇乜甜味咁解，個人來講甜些少會帶出乳酪的香味，正如我之前所講，這杯lassi比起在元朗蓬萊及錦田沙查遜色得多，當然我唔係叫你地突登入去試，叫佢整甜的為得囉。
屋企人始終喜歡一黎就係食主菜，咁我只叫了一款小食，就係Vegetable Samsoa (素咖喱角)，這款Samsoa係每件計，一件為5蚊，亦係新鮮炸，新鮮食，皮稍為厚左的，都可以接受，裡面係咖喱薯仔，點海鮮醬食簡直一流，是炸得及整得相當有水準，一定要叫。
等左一陣，主角終於來到，差唔多次次去食印度菜必叫的Mixed Grill (鐵板雜扒)，內裡包括Fish Tikka、Chicken Tikka及mutton roll (免治羊肉卷)，新鮮整始終差極有限，連雜菜我都唔放，魚、雞及羊都有應有的鮮味，尤其係雞做得相當好，好像我咁貪心，要試咁多款既，加多十幾蚊就俾到你，唔叫係唔係閣下的損失呢？
前後我地叫了三款nann，分別係cheese (芝士)、garlic (蒜蓉)及原味，原味當然係咁多款最平及最多份量，用黎點咖喱一流，cheese就只係好少好少味，差了些少，我反而幾欣賞蒜蓉味，一上到檯後已經聞聞陣陣香味，但食落就只係有少少，唔會令到閣下有口氣，不計新鮮度，這款的味道是做得最出色的。
這裡的咖喱大部份佢地所分既小辣及中辣，大辣只係5隻手指數到有剩，小及中辣各叫了少少，大辣都係留番下次繼續，唔辣亦都有叫，當中還喜出望外。第1款辣既係Mutton Massla，屬於中辣，唔計辣度，汁的味道同羊配合得相當好，羊還有少少鮮及羶味，不過我心目中的中辣還有少少距離，或者要就番香港人的口味吧；另一味上場係Chicken Madras (椰汁咖喱雞)，只不過係小辣，始終用番傳統方法去煮，絕不會俾到港式咖喱的味道，椰汁味還有少少，加上顏色鮮艷，送nann一流；有肉冇海鮮點得呢？在眾多海鮮，選了Prawn Massala，蝦既鮮味比起石崗亦係稍為遜色，但都已經不錯了，汁就算滲入了蝦，亦保留了應有的原味。
我地成家人都係飯筒，即係無飯不歡，我地就了三款飯，第1款係白飯，後兩款都係炒飯：Delhi Special Biryani (新特里特色炒飯) 及Pulao Rice (印度黃飯)，兩者都有落saffron (紅花粉) 炒，前者還有雞肉、青豆及蛋絲，炒得不算油膩兼乾濕度適合，又係一匙食完又一匙，這裡用的是長而硬身的印度米，口感更佳。
最後一款無辣菜式Stuffed Tomato (茄汁拌芝士釀炸蕃茄) 係由大家姐拍版(如圖所示)，係想象之中好味得多，酸得來非常開胃，水牛芝士(由食落的味道估計) 被釀入蕃茄後炸，睇落及食落都冇乜油，兼芝士及蕃茄都有自己既味道，如閣下叫咁多款辣既菜式，不妨叫下這款絕不起眼的菜式，包你一試難望。
大家傾計由股票，日常生活，到講到滔哥將會係九龍灣開分店。連飲品，埋單共435，唔駛加一，每人唔駛70蚊，相當抵食一餐，之後我地經後樓梯入番大堂兼shopping，過了一個愉快的午餐。
這裡的印度菜，我個人認為未算係好突出的及全港最好，但有樣野肯定的是樣樣食物都係新鮮整，及估計材料部份亦係新鮮，單以兩樣已經值回票價，即使辣度稍為不足，我覺得食印度菜除了食辣度外，最重要係食其香味，喜歡食好濃及辣的我，係時候重頭認識。
小第初次題升，將食物相片供上網(新特里特色炒飯及羊除外)，供大家瀏覽，網址如下：
http://hk.pg.photos.yahoo.com/ph/mrweimanforever/album?.dir=/864b
多謝各位。
題外廢話篇：
1. 這裡由於係3樓，而不少客人搭電梯，落既時候有時已經客滿，咁唯有行樓梯，這裡的樓梯有工程進行中，行既時候要小心，一落到去就係買小食的印度舖，再轉彎入就係去番重慶大廈大堂內兼C座電梯大堂，即係話閣下可以從彌敦道正門直行，會經過A、B、C座電梯大堂，再行便是出去後巷及C座後樓梯，然後行上去，都幾方便。
2. 環境點惡劣，仍然會堅持繼續寫落去，平有平食，貴有貴食，最緊要開心，還有不要俾世俗眼光所影響，原因係以廣大喜歡食野(包括各位心目中十世都唔會突登去的食店如在錦田或黃竹坑，除非住係附近) 的網民為依歸。睇番以前去過及寫過的食店，有的生意仍然十年如一日的好如蓮香樓，有的因各種因素結業如車品品，亦有的好似我咁轉移陣地向東發展如桃花園。
3. 有時睇到某的食友要捱更抵夜，除了要食番的好野補充體力，亦要有充足睡眠及休息，身體始終係最重要的，咖啡奶茶益力多紅牛只係好短暫，good luck!
张贴
