人和月雞煲火鍋店 (已結業)

天氣又突然間開始轉冷，就知係時候要打邊爐，今次黎左呢間朋友介紹嘅人和月雞煲火鍋，果然冇介紹錯，雖然價錢唔算平，但材料質素的確唔錯我地就揀左個$298套餐就已經包左以下所有野。首先就係打邊爐之前嘅呢個卜卜蜆鍋，大大粒嘅蜆肉鮮甜肥美，而且更加重要嘅係每粒蜆都洗得好乾淨，一粒沙都食唔到。之後嘅火鍋湯底我地簡左鴛鴦鍋，分別係沙嗲湯底同南瓜素翅湯底。落完湯底店員就會送上牛肉拼盤，分別有特選牛下肩、特級牛胸爽、牛板腱、金錢𦟌同埋高級雪花肥牛，而除左特選牛下肩之外，其餘嘅都可以免費再加，成個牛肉併盤都高質，牛肉味濃郁，之後都encore 左幾次。滑類都好高質，蝦滑同墨魚滑都勁彈牙，質素算係我食過任食火鍋之中最高質嘅。其他配料質素都好高飲品款式都相當多，但我就特別推介呢度嘅菊花露，微微嘅甜度可以中和返沙嗲嘅濃味。甜品方面係採用自助形式嘅，有芋圓小丸子同豆腐花等，可以根據個人喜好去選擇。