紅茶館 (已結業)

朝早沿著廟街行，覺得條街好似未瞓醒咁，份外冷清。一路行過咗榕樹頭轉入鴉打街，本來想揾碗粥食，偶然發現呢間蚊型酒店原來係有餐廳，仲有$22一個自助早餐，咁抵？係唔係呀！一於試吓。餐廳響一樓，雖然地方好細，擺埋D檯出lift口都唔夠十張，不過好企理又乾淨，入到去得連埋我都係得四個客，一對相信係自遊行嘅年青男女，另一個有鄉音嘅中年女人，個個響度靜靜地咁食，反而最嘈係個D侍應阿姐，掛著傾偈。食物方面就千祈唔好有期望，有雜菜湯、白粥、紹菜、腸仔、茄汁豆、蝴蝶粉、麵包、自製窩夫、雞蛋，飲品有橙汁、鐵觀音、紅茶及咖啡；啱啱好超過一打。全部都OK架，最低限度唔會難食，最鍾意自製窩夫，有得玩又有得食，仲有花生醬、朱古力同糖槳任落。咖啡係用自助咖啡機，味道幾好可惜唔夠熱連D糖都唔溶。埋單真係$22，飲杯咖啡都要喇！仲可以靜靜地好悠閒咁hea吓，確係賞心樂事，食物仲好健康，一滴油都無，有興趣不妨一試。